Swcigih Dangj Cwng Ginh Lingjdauj Caeuq Soujfuj Gak Gyaiq Daibyauj Caez Ndaem Faex

来源：广西民族报网

发布时间：2026-07-08

3 nyied 26 hauh, Swcigih Dangjveij suhgi、Swcigih Yinzda Cangzveijvei cujyin Cinz Gangh, Swcigih cujsiz Veiz Dauh daengj swcigih dangj cwng ginh lingjdauj, daeuj daengz Nanzningz Cizvuzyenz（Byacinghsiusanh） suen faex- funghlingz vaaeuj, caeuq soujfuj gak gyaiq daibyauj doxcaez camgya yivu ndaem faex.

Cinz Gangh、Veiz Dauh daengj sien dingqaeu hong linzyez daengx gih daengj mizgven cingzgvang gaisau, riengzlaeng dawz fagso, byaij daengz dieg ndaem faex, caeuq ganbu cizgungh、bouxgagnyienh、sausenh- duiyenz doxcaez nyaengq hwnjdaeuj. Canj namh vat gumz、lumx namh、riuj raemx rwed raemx……Cinz Gangh doq guh hong, doq cam gyoengq lwgnyez hagsib caeuq lienhndang ndaej baenzlawz yiengh, gienqmienx gyoengq lwgnyez daj iq gyaez guh hong、gyaez daswyenz, lai camgya ndaem faex cauh ndoeng doengh gij yienghsaeh neix, youq ndaw guh hong lienh aenndang、cangqmaengh majhung, guh daengz dwz ci dij meij lauz yienghyiengh ndei liux. Cinz Gangh naeuz, vunzciuhgeq ndaem faex, vunzciuhlaeng aeu raemh. Ndaem faex cauh ndoeng goeng youq daihneix、leih daengz cien bi, raeuz aeu geiqmaenh gij vahdaengq Siz Ginbingz cungjsuhgi “Gvangjsih swnghdai gim mbouj vuenh”, daih dam daih cienz roengzbae, dawzmaenh gya heu hwng heu hoh heu “sam heu” caemh yungh, doinyoengx ndoengfaex sijhoq、cangcienz、canghaeux、cangdanq “seiq cang” doxlienz, caezcaemh hwnqguh ndei suenranz gyaeundei, gyavaiq hwnqguh aen gih ak linzyez daihneix.

Swcigih Dangjveij、Yinzda Cangzveijvei、Cwngfuj、Cwnghez lingjdauj banhswj cwngzyenz, Swcigih Genjcazyen genjcazcangj, youq Nanzningz capyouq Gvangjsih budui cujyau fucwz dungzci caeuq guen bing daibyauj, mbangj boux Daengx Guek Yinzda daibyauj youq Gvangjsih、veijyenz Daengx Guek Cwnghez youq Gvangjsih, Swcigih Luzva Veijyenzvei cwngzyenz danhvei fucwz dungzci, gihciz、cunghciz capyouq Gvangjsih danhvei daibyauj, Nanzningz Si seiq aen banhswj cwngzyenz daengj camgya ndaem faex.

Ciuq cam rox, ngoenzhaenx gungh ndaem roengz faexfunghlingz vaaeuj 1600 lai go, baez ndaem faex neix youq suen faexfunghlingz vaaeuj ndaem faexfunghlingz vaaeuj, baengh dieg bya caeuq lueg deih, dah raemx doxyungz, haenqrengz cauhlaeb mbaw veh swnghdai “song bya doxhumx、luegva ok yiengh”. “Cibseiq Haj” geizgan, Gvangjsih dawzmaenh gya heu、hwng heu、hoh heu caemh yungh, haenqrengz cuknet gij giek swnghdai, hwngfat guhhung linzyez canjyez, gyoebsuenq ndaem faex cauh ndoeng ca mbouj lai 2000 fanh moux, ndoeng vunz cauh caeuq ndoeng cwkrom guekgya najdieg cungj youq daengx guek daih’it. Bi 2025 daengx gih ndoengfaex diegnywj canjyez cungjcanjciz daengz 1.16 fanh ik maenz, ciemq daengx guek cungjsoq 1/10, lienzdaemh seiq bi youq daengx guek baihnaj.

（daj 《Gvangjsih Yizbau》 aeu daeuj hoiz Cinz Yizcwz Loz Canghlieng）

编辑：实习生韦婷萱复审：黄慧华终审：蒙树起