Cenzcouh Yen “Feihyiz+Seuqcingh” Ndei Fanh Ranz

来源：广西民族报网

发布时间：2026-07-08

Geij ngoenz gonq, feihyiz minzsuz “dwk sixhuj” cienzswnj ndaej caet bak lai bi haenx youq Cenzcouh Yen Vwnzgyauz Cin Gyanghdouz Cunh hainduj yienj. Gyoengq nyezrauh ndang daenj buhvaq yienjheiq cang baenz boux vunz cungngeih ligdaih, youq ndaw yaem’wenq goksad baenqcienq noddoengh, aeu gij conzdungj ndei cingliemz goengcingq fwngzseuq、gyaez guek cungcig akmaenh cienz roengzbae. Hangh feihyiz daibyaujsing hanghmoeg neix daj Sungcauz hainduj, seizneix gaenq baenz gaiq sienlix vwnzva seuqcingh dangdieg, hawj faenzmeg ranzmbanj caeuq rumz seuq heiq cingq youq ndawbiengz doxyungz caemhyouq.

Cenzcouh dieg youq rangh dieg gapgyaiq Cunghyenz vwnzva caeuq Lingjnanz Bwzyez vwnzva, ndaej bingz “aen yienh cien bi vwnzva yizcanj deihmingz Gvangjsih”, feihyiz swhyenz lai, caemhcaiq miz gij yinhswj seuqcingh lai. Gijveij genhveij aen yienh neix yungh ndei gaiq namhbiz bonjdieg neix, cauhmoq dajcauh “feihyiz+seuqcingh” vunqsik, hawj feihyiz gaeuqgeq bienqbaenz aen dangzgoq cienzboq vwnzva seuqcingh, doinyoengx rumz seuq heiq cingq cimqnyinh cien ranz fanh hoh.

Vih hawj vwnzva seuqcingh engq haeujgyawj vunzlai、haeujlaeg simvunz, gijveij genhveij aen yienh neix lienzhab mizgven bouhmonz banh gij langhbaij raed ceij、hag dinfwngz doengh gij yienghsaeh neix, cujciz bouxcienzswnj feihyiz byaij haeuj gihgvanh、hagdangz、lajmbanj guh senhgyangj caeuq yienj; doengzseiz, aeu gij yenzsu seuqcingh yungzhaeuj ngoenzciet bingzciengz、gingjgih cezmuz caeuq guh six lajmbanj bae, bangdoi vwnzva seuqcingh caeuq vwnzlij hwngfat、guhhoengh lajmbanj doxyungz laegdaeuq. Lumjbaenz, Dunghsanh Yauzcuz Yangh aeu gij leixniemh gaenx seuq siuq haeuj ndaw Siuqyauz bae, Ciuzgyangh Yauzcuz Yangh aeu gij vah bouxgeq son seuqcingh bien haeuj fwen Yauzcuz bae, youq ngoenzciet aeu fwen cienz seuqcingh、aeu siuq nyinh simvunz, hawj vwnzva seuqcingh yawj ndaej raen、lumh ndaej daengz、haeuj uk haeuj ngviz.

（Fu Cinghlungz Lij Yaujgunh）

编辑：实习生韦婷萱复审：黄慧华终审：蒙树起