AEN GANGJMINGZ GVENDAENGZ《GIJ GENYI GVENDAENGZ CEIQDINGH AEN GVEIHVA HAJ BI DAIH CIBHAJ GOZMINZ GINGHCI CAEUQ SEVEI FAZCANJ CUNGHGUNG CUNGHYANGH》

来源：新华社

发布时间：2025-10-29

Siz Ginbingz

Gak boux dungzci:

Cunghyangh Cwngcigiz dak gou, yiengq cienzhoih gangjmingz gij cingzgvang mizgven dajgauj《Gij Genyi Gvendaengz Ceiqdingh Aen Gveihva Haj Bi Daih Cibhaj Gozminz Ginghci Caeuq Sevei Fazcanj Cunghgung Cunghyangh》 (lajneix heuhguh《Genyi》).

It、Faenh Gauj《Genyi》Neix Baenzlawz Raiz Baenz

Ceiqdingh aen gveihva cungciengzgeiz daeuj dazyinx ginghci sevei fazcanj, dwg yiengh fuengsik youqgaenj guenj guek ceih biengz Dangj raeuz. Aen gveihva “Cibseiq Haj” yaek youq bineix guhsat lo, aeu yenzgiu ceiqdingh aen gveihva “Cibhaj Haj”. Yenzgiu ceiqdingh ndei aen gveihva “Cibhaj Haj”, doiq doinyoengx ginghci sevei guek raeuz lienzdaemh cangqheiq hwngfat, vih ciuqgeiz daihdaej guhbaenz sevei cujyi yendaiva dwk roengz aen giekdaej engqgya maenhsaed, miz eiqngeih hungloet.

Bineix 1 nyied, Cunghyangh Cwngcigiz gietdingh, Baez Seiq Cungh Cienzhoih Gaiq Ngeihcib Dangj raeuz saemjlwnh faenh gezyi aen gveihva “Cibhaj Haj”, laebbaenz aen cuj dajgauj vwnzgen, hawj gou dang cujcangj, Lij Gyangz、Vangz Huningz、Cai Giz、Dingh Sezsiengz dungzci dang fucujcangj, boux fucwz dungzci mizgven bouhmonz caeuq deihfueng caeuqfaenh, youz Cunghyangh Cwngcigiz Cangzveijvei lingjdauj, rapdawz gaiq hong dajgauj faenh gauj《Genyi》neix. 2 nyied 11 hauh, aen cuj dajgauj vwnzgen ciuhai aen hoih daengxcungq baez daih’it, cingqsik hainduj dajgauj faenh gauj《Genyi》neix.

Dangjcunghyangh youq mwh dajgauj vwnzgen, daj goek daengz byai cungj fazyangz minzcuj、gyonjcomz yigen genyi vunzlai, haeujlaeg bae diucaz yenzgiu, cam’aeu yigen gak fueng. 1 nyied 22 hauh, Dangjcunghyangh fatok《Aen Dunghcih Gvendaengz Doiq Baez Seiq Cungh Cienzhoih Gaiq Ngeihcib Dangj Raeuz Yenzgiu Gij Genyi Aen Gveihva “Cibhaj Haj” Cam’aeu Yigen》, doiq gij vunz daegdingh ndaw Dangj rog Dangj cam’aeu yigen. 2 nyied ndawnyieb, Dangjcunghyangh cujciz 6 aen diuyenzcuj, bae 12 aen sengj gih si guh ciendaez diuyenz. Doengzseiz, Dangjcunghyangh baijbouh bouhfaenh cunghyangh caeuq guekgya gihgvanh yenzgiu le 35 hangh goqdaez cungdenj. 4 nyied 30 hauh, gou youq Sanghaij cujciz ciuhai codanzvei yaenglwnh mbangj aen sengj gih si youq mboengq “Cibhaj Haj” ginghci sevei baenzlawz hwngfat. Gvaqlaeng, dak Lij Gyangz dungzci gonqlaeng ciuhai ginghci gyaiq、gohgi gyaiq、gihcwngz daibyauj 3 aen codanzvei. Dou lij youq gwnz vangj cam’aeu yigen, sou ndaej 300 lai fanh diuz yigen genyi, mizgven fuengmienh daj ndawde leh ok 1500 lai diuz genyi. Gak fuengmienh cungj nyinhnaeuz, Baez Seiq Cungh Cienzhoih Gaiq Ngeihcib Dangj raeuz haeujnaek yenzgiu aen vwndiz gvendaengz gij genyi aen gveihva “Cibhaj Haj”, doiq hawj gij fazcanj gveihva guekgya engq ndei langh’ok yiengh yunghcawq dazyinx daengxbuenz, youh caiq gietcomz gij rengz hung rengz hoengh daengx Dangj daengx guek gak cuz yinzminz bae doxgiet haenqguh, aeu gij yendaiva yiengh Cungguek bae cienzmienh doicaenh aen saehnieb hungmbwk hwnqguh guekak、minzcuz fukhwng, miz eiqngeih youqgaenj. Gyoebhab buenqduenh, youq mboengq “Cibhaj Haj”, guek raeuz hwngfat gawq bungzdaengz canloz seizgei youh miz fungyiemj deuqnyex, gij yinhsu mbouj doekdingh nanz liuh daengz de demlai, hoeng gij diuzgienh dingjcengj ginghci sevei guek raeuz naihnanz hwngfat coh ndei caeuq gij daihdaej seiqdaeuz de cix mbouj miz gaijbienq. Gak fuengmienh cungj maqmuengh, mingzbeg doekdingh gij cungjdaej lohnaemj、yenzcwz youqgaenj、cujyau moegbiu、canloz yinvu caeuq gij banhfap hungnaek ginghci sevei fazcanj mboengq “Cibhaj Haj”, doinyoengx mboengq “Cibhaj Haj” hwngfat coh ceiq ndei bae, vih daihdaej guhbaenz sevei cujyi yendaiva dwk roengz aen giekdaej engqgya maenhsaed.

8 nyied 4 hauh, faenh gauj 《Genyi》 neix fat hawj gij vunz daegdingh ndaw Dangj rog Dangj cam’aeu yigen, baudaengz cam’aeu gij yigen mbangj boux dungzci laux ndaw Dangj, lij cienmonz dingqaeu le gij yigen gak minzcuj dangjbai cunghyangh、bouxdaeuz Daengx Guek Gunghsanghlenz caeuq doengh boux daibyauj mizmingz mbouj haeuj dangjbai de. Daj gij yigen cam ndaej de daeuj yawj, gak dieg gak bouhmonz cungfaen haengjdingh faenh gauj《Genyi》neix. Daihgya cungj nyinhnaeuz, faenh gauj《Genyi》neix dawzcinj mboengq “Cibhaj Haj” gij saehnieb Dangj caeuq guekgya hwngfat daengz yiengh lizsij fuengvih lawz, haeujlaeg cekgej yiengh hwngfat guek raeuz baihnaj bungzdaengz bienqvaq fukcab laegdaeuq, doiq coglaeng 5 bi hwngfat guh caengzdingj sezgi caeuq canloz anbaiz, cijdauj fuengcim gohyoz cingcinj, cujyau moegbiu cingcuj mingzbeg, yinvu guhfap gouz caen guh saed, youh dwg baez cungj dungyenz、cungj baijbouh swnhriengz seiqdaeuz、laebdaeb doinyoengx hwnqguh gij yendaiva yiengh Cungguek ndeu, yienh’ok gagrox ciep raiz bienq moq ginghci hwngfat riengjvaiq caeuq ndawbiengz ciengzgeiz onjdingh song yiengh mbouj bingzciengz neix、haenqrengz cauxok buenzmienh moq hwnqguh gij yendaiva yiengh Cungguek, dingh yaek doiq gij saehnieb Dangj caeuq guekgya hwngfat miz ok yingjyangj hungnaek youh gyaeraez. Doengzseiz, gak fuengmienh daezok le haujlai yigen caeuq genyi ndei. Aen cuj dajgauj vwnzgen cug diuz bae naemj, guh daengz hab sou couh caenhliengh supsou, doiq faenh gauj《Genyi》neix gya raiz、gaij raiz、gemj cih gungh 218 giz, baudaengz gak fuengmienh yigen caeuq genyi 452 diuz.

Youq mboengq dajgauj faenh gauj《Genyi》neix, Cunghyangh Cwngcigiz Cangzveijvei hai hoih 3 baez、Cunghyangh Cwngcigiz hai hoih 2 baez saemjlwnh、coihgaij, raiz baenz le faenh gauj《Genyi》neix gyau hawj baez cienzhoih neix saemjlwnh.

Ndaej baenzneix gangj, gij hong dajgauj vwnzgen baez neix, dwg baez guhfap moq raeuz fazyangz minzcuj ndaw Dangj caeuq yiengh yinzminz minzcuj ronz goek daengz byai ndeu.

Ngeih、Dajgauj Faenh Gauj《Genyi》Neix Cujyau Ngeixnaemj Gijmaz Caeuq Gij Daihdaej Neiyungz De

Dajgauj faenh gauj《Genyi》neix cujyau ngeixnaemj daengz, ciuq aen canloz anbaiz “song yamq byaij” cienzmienh hwnqbaenz aen guekak sevei cujyi yendaiva youz Ngeihcib Daih Dangj raeuz guh’ok haenx, dawzcinj mboengq “Cibhaj Haj” youq gwnz roen daihdaej guhbaenz sevei cujyi yendaiva miz maz diegvih youqgaenj, haeujlaeg cekgej le gij hingzseiq ndaw guek rog guek, doengbuenz bae maeuzveh caeuq daj canloz bae baijbouh gij ginghci sevei guek raeuz youq mboengq “Cibhaj Haj” baenzlawz hwngfat.

Youq mwh dajgauj faenh gauj《Genyi》neix, dou louzsim gaemdawz geij diemj lajneix. It dwg dawzdingh aeu moegbiu caeuq vwndiz guh dazyinx, ndwn youq aen gihbwnj dinghvih cuknet giekdaej、cienzmienh fatrengz, aeu vih daihdaej guhbaenz aen moegbiu sevei cujyi yendaiva dwk roengz gij giekdaej engqgya maenhsaed guh giz roengzfwngz bae doengbuenz maeuzveh, aeu miz rengz miz bouhloh miz yauqlwd bae wngqdoiq gij hingzseiq moq seiqgyaiq bak bi boekbienq caeuq gij vwndiz doedok mwh hwngfat miz de guh giz roengzrengz bouj giz dinj、ak hangh nyieg. Ngeih dwg dawzdingh daj daengxbuenz bae naemj, ciuq gij iugouz doengbuenz maeuzveh doicaenh aen cungjdaej baijbouh “haj yiengh gap baenz aen”, dox boiqhab doicaenh aen canloz baijbouh “seiq aen cienzmienh”、cienzmienh baijbouh gak hangh hongsaeh ginghci sevei fazcanj caeuq gensez Dangj raeuz. Sam dwg dawzdingh caiq cienzmienh gyalaeg gaijgwz, yawjnaek yungh gaijgwz banhfap buqgej hwngfat nanzdaez, vih hwngfat dem rengznyoengx、coi rengzhoengh. Seiq dwg dawzdingh gyadaih doiq rog hailangh, gawq aeu hwngfat cuengq youq giz goekrengz bonjfaenh, youh doengbuenz maeuzveh yungh ndei gij yausu daengx seiqgyaiq caeuq gij swhyenz hawciengz.

Faenh gauj《Genyi》neix miz 15 aen bouhfaenh, faenbaenz sam aen banjgvaij. Banjgvaij daih’it baudaengz daih’it、daihngeih 2 aen bouhfaenh, dwg gyoeblwnh, cujyau lwnhgangj gij neiyungz neix：Mboengq “Cibseiq Haj” guek raeuz fazcanj aeundaej cingzcik hungloet、mboengq “Cibhaj Haj” youq ndaw roenloh daihdaej guhbaenz sevei cujyi yendaiva miz aen diegvih youqgaenj ciep gonq hai laeng、mboengq “Cibhaj Haj” gij hwngfat guek raeuz bungzdaengz bienqvaq fukcab dangqmaz、gij cijdauj swhsiengj、ciuqsouj yenzcwz caeuq cujyau moegbiu ginghci sevei fazcanj mboengq “Cibhaj Haj”. Banjgvaij daihngeih baudaengz daihsam daengz daih cibseiq 12 aen bouhfaenh, dwg faenlwnh, cujyau liuqcinj doengh gij vwndiz youqgaenj nangqdaengz daengxbuenz caeuq gyaeraez haenx, faen lingjyiz baijbouh gij canloz yinvu caeuq gij cosih hungnaek mboengq “Cibhaj Haj”, mingzbeg doekdingh canjnieb hwngfat、gohgi cauhmoq、hawciengz ndaw guek、ginghci dijci、doiq rog hailangh、hwngfat lajmbanj、gvaengxdieg hwngfat, daengz guhhoengh vwnzva、baujcang gwndaenj beksingq、loegsaek hwngfat、ancienz hwngfat、hwnqguh gozfangz daengj lingjyiz cungdenj neix aeu baenzlawz bae guh caeuq guh yiengh hongsaeh cungdenj lawz. Banjgvaij daihsam baudaengz bouhfaenh daih cibhaj caeuq vahgietsat, cujyau baijbouh doengh gij yinvu baudaengz dawzmaenh caeuq gyaak Dangjcunghyangh gyonjcomz lingjdauj、doicaenh laebguh yiengh minzcuj fapceih sevei cujyi、gij hong Gangj Au Daiz、doinyoengx cauhlaeb aen minghyinh caezcaemh vunz lajmbwn、lailai hawj daengx biengz hwnjheiq guh、gagrox guh、cauhmoq guh.

Sam、Geij Aen Vwndiz Cungdenj Aeu Gangjmingz De

Faenh gauj《Genyi》daezok le mbangj di gvanhdenj youqgaenj caeuq cosih hungnaek. Gizneix, leh ndawde geij aen vwndiz cungdenj daeuj genjdanh gangjmingz.

Daih’it, gvendaengz gij diegvih youqgaenj mboengq “Cibhaj Haj”. Guhbaenz sevei cujyi yendaiva dwg duenh roen raez baez mbaek hwnjsang、mboujduenh hwngfat doxbae ndeu, aeu lienzdaemh roengzrengz、doxciep buekguh. Faenh gauj《Genyi》daezok, mboengq “Cibhaj Haj” youq gwnz roen daihdaej guhbaenz sevei cujyi yendaiva miz aen diegvih youqgaenj ciep gonq hai laeng, neix dwg ciuq gij lizsij yinvu mboengq “Cibhaj Haj” wnggai rapdawz haenx guh’ok aen duenqdingh baenzneix. Ngeihcib Daih Dangj raeuz doekdingh daengz 2035 nienz daihdaej guhbaenz sevei cujyi yendaiva. Mboengq “Cibseiq Haj” dwg aen haj bi daih’it, gaenq dwk roengz giekdaej maenhsaed, guh ndei haidaeuz. Mboengq “Cibhaj Haj” dwg mboengq ceiq youqgaenj cuknet giekdaej、cienzmienh fatrengz he, ceiqdingh caeuq saedhengz ndei aen gveihva “Cibhaj Haj”, couh ndaej vih 2035 nienz daihdaej guhbaenz sevei cujyi yendaiva dwk roengz gij giekdaej engqgya maenhsaed.

Faenh gauj《Genyi》daj aen gihbwnj dinghvih neix bae maeuzveh mboengq “Cibhaj Haj” baenzlawz hwngfat, gawq caeuq gij leixniemh nem lohnaemj aen gveihva “Cibseiq Haj” daezok haenx doxciep, youh liuh cinj coglaeng 5 bi guek raeuz yaek baenzlawz hwngfat, daezok gij cungjdaej lohnaemj、yenzcwz hungnaek、cujyau moegbiu、canloz yinvu hab saedsaeh、yawj ndaej gyae haenx. Aeu gaemdawz mboengq seizgan ndeileih raeuz neix, gyamaenh haigvangq gijndei、cawz bae gijgaz、bouj giz dinj giz nyieg, youq ndaw gozci beijak haenqrem hingz ndaej canloz cujdung, doidoengh gij canloz yinvu nangq daengz daengx aen yendaiva yiengh Cungguek ndaej daih cungbyoengq, saedbauj byaij ok yamq ndaej gietdingh daihdaej guhbaenz sevei cujyi yendaiva.

Daihngeih, gvendaengz gij moegbiu ginghci sevei fazcanj mboengq “Cibhaj Haj”. Hableix laebdingh gij moegbiu hwngfat, doiq ceiqdingh caeuq saedhengz ndei haj bi gveihva youqgaenj dangqmaz. Faenh gauj《Genyi》dawzndei gij gihbwnj dinghvih caeuq gij iugouz duenhmbaek mboengq “Cibhaj Haj”, mingzbeg doekdingh le gij cujyau moegbiu ginghci sevei fazcanj. 2035 nienz daihdaej guhbaenz sevei cujyi yendaiva, aen cijbyauh ndaej guh biugeiq youqgaenj ndeu couh dwg gij swnghcanj cungjciz ndaw guek dan bingz daengz gak boux haenx dabdaengz yiengh suijbingz aen guekgya cungdaengj fatdad, neix iugouz mboengq “Cibhaj Haj” ginghci sevei aeu baujciz vaiqmenh habdangq bae hwngfat. Faenh gauj《Genyi》ginggvaq haeujlaeg yenzgiu caeuq hableix lwnhcingq le, daezok doengh gij moegbiu youqgaenj baudaengz ginghci demmaj baujciz youq ndaw duenh hableix、daengx gaiq yausu swnghcanjliz onjbouh daezswng、gij rengzndumj ginghci demmaj ndaej cuengqlangh gaeuqdoh、gihminz souhaeuj demmaj caeuq ginghci demmaj doengzbouh、cienzhong bienq lai caeuq lauzdung swnghcanjliz bienq sang doengzbouh、gyoengq vunz souhaeuj cungdaengj lienzdaemh gyalai daengj. Doengzseiz, ngeix daengz mboengq neix gij vwndiz ginghci ndaw guek gyodroengz aplig gyalai、gij aeuyungh mizyauq mbouj gaeuq daengj, faenh gauj《Genyi》daezok aeu hawj gihminz siufeiq bienq lai mingzyienj、gij aeuyungh ndaw guek guh rengzgoek laebdaeb bienq ak bae ragdoengh ginghci demmaj daengj.

Ciuq gij guhfap doenghbaez, faenh gauj《Genyi》daezok gij moegbiu ginghci sevei fazcanj mboengq “Cibhaj Haj” cujyau dwg doekdingh iugouz, gidij itdingh aeu dabdaengz aen liengh lawz caeuq gidij guh lawz baijbouh hongsaeh couh louz daengz mwh ceiqdingh aen gveihva 《Ganghyau》caiq yenzgiu doekdingh, baenzneix cij ndaej yienh’ok caeuq langh’ok gij rengz《Genyi》guh hungzgvanh dazyinx de.

Daihsam, gvendaengz aeu doidoengh yiengh hwngfat coh ceiq ndei guh cawjdaez.《Genyi》caeuq aen gveihva “Cibseiq Haj” caemh meg doxciep, laebdaeb doekdingh doinyoengx yiengh hwngfat coh ceiq ndei guh gij cawjdaez ginghci sevei fazcanj mboengq “Cibhaj Haj”, iugouz dingjmaenh aeu guhhoengh ginghci guh goek, caezcingj dengcinj cienzmienh hengz ndei gij leixniemh hwngfat moq, guh daengz caetliengh caen hwnj mbaek moq caeuq soqliengh demmaj hableix, doinyoengx ginghci lienzdaemh cangqvuengh hwngfat caeuq ndawbiengz yienghyiengh ndei doxbae. Doinyoengx yiengh hwngfat coh ceiq ndei, ceiq youqgaenj dwg gyavaiq hawj gij gohgi suijbingz sang ndaej gag guh gag ak, gyarengz hwngfat yiengh swnghcanjliz rengzmoq, youq doinyoengx gohgi cauhmoq、gyavaiq gungganq yiengh rengznyoengx moq, coinyoengx gapgyaq ginghci gaijndei hwnj mbaek fuengmienh caen raenhamq、caen miz cungbyoengq.

Faenh gauj《Genyi》daegbied dawznaek aeu gohgi cauhmoq guh dazyinx, youq hwnqguh aen dijhi yiengh canjnieb hab ciuhneix、gyavaiq hawj gij gohgi suijbingz sang ndaej gag guh gag ak、gyavaiq ginghci sevei fazcanj cienj coh loegsaek liuxcaez daengj fuengmienh guh’ok baijbouh, daezok gaijndei daezswng gij canjnieb doenghbaez, ganqok guhhung gij canjnieb ngamq hwng caeuq gij canjnieb daengzcog, gyamaenh guhhung gij goekgaen yiengh ginghci saeddaej; daezok gyarengz guh yiengh cauhmoq baeznduj caeuq gungroengz gij gisuz ceiq youqgaenj, doinyoengx gohgi cauhmoq caeuq canjnieb cauhmoq yungzhab haeuj laeg bae, gyoebgyonj doicaenh gyauyuz gohgi vunzcaiz hwngfat, haeujlaeg doicaenh hwnqguh soqcih Cungguek; daezok gyavaiq hwnqguh aen dijhi nwngzyenz yienghmoq, gyavaiq cauxbaenz yiengh swnghcanj swnghhoz loegsaek. Gij aeu louzsim de dwg, fazcanj yiengh swnghcanjliz rengzmoq iugouz bonjfaenh miz diuzgienh miz gizak cij baenz, ndigah, aeu ngeix ndei dwg mbouj dwg caen miz diuzgienh guh, faenh gauj《Genyi》daegbied gangj daengz aeu ciuq cingzgvang bonjfaenh bae fazcanj yiengh swnghcanjliz rengzmoq, couh dwg aeu dazyinx daihgya gohyoz singjsag、ciuq saed ciuq caen bae guh hongsaeh, fuengzre baez gangj couh luenhrobrob bae guh.

Daihseiq, gvendaengz guh ak ndaw guek daih baenqloek、hawj ndaw guek rog guek baenqloek doengrat bae. Gij vanzging baihrog yied yiemzhaenq fukcab, yied aeu gyavaiq cauhlaeb aen gvaenghgaq hwngfat moq, gaemmaenh hwngfat youq ndaw fwngz raeuz. Seizneix caeuq gvaqlaeng mboengq ndeu, aeu dingjmaenh guh ak yiengh saeh ndaw guek baenqloek, gyavaiq guhbaenz aen dijhi ginghci baenqcienj ndaw guek maenh’ak, aeu ndaw guek baenqloek onjdingh bae dijsiu rog guek baenqloek yiengh nanzliuh de.

Faenh gauj《Genyi》daegbied dawznaek guh ak ndaw guek baenqloek, doiq hwnqguh aen hawciengz ndaw guek maenh’ak、gyavaiq cauhlaeb aen dijci yiengh hawciengz ginghci sevei cujyi suijbingz sang bae guh’ok baijbouh, daegbied gangj daengz dawzmaenh gyadaih gij aeuyungh ndaw guek aen giekdaej canloz neix, dawzmaenh ndeileih beksingq caeuq coihwng siufeiq、douzswh coq huq caeuq douzswh coq vunz gaenjmaed giethab, haenqrengz guhhoengh siufeiq, gyadaih gij douzswh raenhamq, laemxsim buqcawz giz laengz giz saek gazngaih hwnqguh aen hawciengz hungloet daengx guek caezcaemh, daegbied gangj daengz lailai gikfat gij rengzhoengh gak loih ginghyingz cawjdaej, gyavaiq laebndei aen dijci gihci youz hawciengz ndaboiq yausu, engq ndei ceihleix hungzgvanh ginghci. Doengzseiz, daezok haigvangq gij miengloh rog guek baenqloek, onjbouh gya’gvangq hailangh cidu doiqciep gozci, henhoh aen dijci lai mbiengj mouyiz, caetliengh sang bae caezlaeb “it rangh it loh”.

Daihhaj, gvendaengz daengxcungq yinzminz doengzcaez fouqmiz byaij ok yamqdin maenhsaed. Gij yendaiva yiengh Cungguek dwg gij yendaiva daengxcungq yinzminz doengzcaez fouqmiz. Cibbet Daih Dangj raeuz doxdaeuj, dou seizseiz cungj mbouj lumz simnduj, ndwn youq mbiengj yinzminz bae ngeix vwndiz, doinyoengx gvaengxdieg doxdaengh hwngfat, yungh banhfap ndaejrengz bae baujcang caeuq gaijndei gwndaenj beksingq, dwkhingz ciengz ciengq haenqrengz duetgungz, cienzmienh hwnqbaenz aen biengz siujgangh, cauh’ok le diuzgienh ndei bae coengh doengzcaez fouqmiz. Faenh gauj《Genyi》youq ndaw cijdauj swhsiengj daegbied gangj naeuz daengxcungq yinzminz doengzcaez fouqmiz yamq ok yamqdin maenhsaed, neix dwg aen iugouz daengxbuenz dazyinx ginghci sevei fazcanj mboengq “Cibhaj Haj” .

Faenh gauj《Genyi》gaenjndaet dawzndei gij moegbiu iugouz doengzcaez fouqmiz, hopheux baujcang caeuq gaijndei gwndaenj beksingq, youq coihawj couhnieb youh lai youh ndei、laebndei gij cidu faenboiq souhaeuj、banhndei yiengh gyauyuz yinzminz habhoz、laebcaez gij dijhi baujcang ndawbiengz、doinyoengx hangz fangzdicanj hwngfat coh ceiq ndei、gyavaiq hwnqguh ndangcangq Cungguek、coihawj vunzgyaeuj gig ndei bae fatmaj、onjbouh doihaeuj yiengh fugsaeh caezcaemh ceiq noix bouxboux doxdoengz daengj fuengmienh, baijbouh buek cwngcwz banhfap doxdaengh youh ngaih guh daengz ndeu. Daj sukiq gvaengxdieg cengca、singz mbanj cabied bae naemj, youq gyavaiq nungzyez nungzcunh yendaiva、maenhsaed coinyoengx cienzmienh hwngfat lajmbanj, gaijndei gij baijbouh ginghci gvaengxdieg、doinyoengx gvaengxdieg doxdaengh hwngfat daengj fuengmienh, baijbouh buek guhfap saedcaih ndeu. Daj coicaenh gij cingsaenz swnghhoz yinzminz doengzcaez fouqmiz bae naemj, daezok hwngcienz caeuq hengzguh aen hwzsinh gyacizgvanh sevei cujyi, haenqrengz gaujhoengh gij saehnieb vwnzva, gyavaiq fazcanj gij canjnieb vwnzva, hawj Cunghvaz vwnzmingz cienzboq engq gyae yingjyangj engq gvangq.

Daihroek, gvendaengz doengbuenz maeuzveh hwngfat caeuq ancienz. Youq onj le cijndaej maeuz hwngfat, hwngfat le cijndaej bauj youq onj. Coglaeng 5 bi, guek raeuz yaek miz gak cungj yinhsu fungyiemj mbouj doekdingh nanz liuh daengz haenx yied daeuj yied lai, gij yinvu doengbuenz maeuzveh hwngfat caeuq ancienz engqgya gannanz. Faenh gauj《Genyi》hopheux doicaenh aen dijhi caeuq gij bonjsaeh bauj hawj guekgya ancienz hab ciuhneix, daezok laebcaez aen dijhi bauj guekgya ancienz de, gyaak gij bonjsaeh youq doengh aen lingjyiz cungdenj bauj guekgya ancienz, daezsang gij suijbingz ceihleix hawj goenggungh ancienz, laebndei aen dijhi ceihleix ndawbiengz. Hopheux caetliengh sang bae doicaenh gozfangz caeuq bingdoih hab ciuhneix, daezok gyavaiq guh ak gij rengzhoenxciengq akmoq, doicaenh yiengh saeh ceihleix bingsaeh hab ciuhneix, gyamaenh gij dijhi caeuq gyaak gij bonjsaeh gyoebgyonj maeuzveh canloz guekgya.

Daihcaet, gvendaengz dingjmaenh yienghyiengh aeu Dangj lingjdauj. Gaemmaenh caeuq gyaak yienghyiengh cungj aeu Dangj lingjdauj dwg daj goekgaen bauj raeuz doihaeuj gij yendaiva yiengh Cungguek. Faenh gauj《Genyi》daj hawj Dangj engq ak engq rox lingjdauj ginghci sevei fazcanj bae naemj, giengzdiuh dawzmaenh caeuq gyaak Dangjcunghyangh gyonjcomz lingjdauj, laebndei aen gihci baijbouh doeksaed gij gezcwz hungnaek Dangjcunghyangh; laebdaeb yungh gij lijlun cauhmoq aen Dangj daeuj dungjyiz swhsiengj、dungjyiz ceiqheiq、dungjyiz hengzdoengh; gaemmaenh aen yinxyiengq cingqdeng yungh vunz, laebndei aen gihci gaujhaed bingzgyaq ganbu; doengbuenz maeuzveh youq gak aen lingjyiz doicaenh gihcwngz dangjcujciz gensez; laebdaeb mbouj cuengqsoeng doeksaed gij cingsaenz bet hangh gvidingh duh cunghyangh; laebndei aen dijhi gamduk duh Dangj caeuq guekgya; laemxsim dwkndei ciengz ciengq haenqrengz naihnanz daengxbuenz fanj nduknaeuh.

Gak boux dungzci, saemjlwnh doenggvaq aen gveihva《Genyi》“Cibhaj Haj”, dwg gij yinvu youqgaenj baez cienzhoih neix. Daihgya aeu nyinhcaen ngeixnaemj、yaenglwnh haeujlaeg bae, daezok gij yigen caeuq genyi baenzyungh, caemh hai ndei baez cienzhoih neix、gaij ndei faenh gauj《Genyi》neix.

编辑：韦亦玮复审：黄慧华终审：蒙树起