来源：新华社
发布时间：2025-10-29
Aen Hoih Daengxcungq Baez Daiheiq Cunghyangh Veijyenzvei Gaiq Ngeihcib Cunghgoz Gungcanjdangj haeujlaeg faensik gij hingzseiq ndaw guek rog guek, couh ceiqdingh aen gveihva “Cibhaj Haj” gozminz ginghci caeuq sevei fazcanj daezok gij genyi lajneix.
It、Mboengq “Cibhaj Haj” Dwg Mboengq Ceiq Youqgaenj Daihdaej Guhbaenz Sevei Cujyi Yendaiva
(1) Mboengq “Cibseiq Haj” guek raeuz fazcanj aeundaej cingzcik hungloet. Mboengq “Cibseiq Haj” guek raeuz fazcanj ginglig gig mbouj bingzciengz、gig mbouj yungzheih. Najdoiq gij hingzseiq rog guek fukcab doxgeuj caeuq gij yinvu ndaw guek gaijgwz fazcanj onjdingh gannanz naekcaem, aen Dangjcunghyangh aeu Siz Ginbingz dungzci guh goek doxgiet dazyinx daengx Dangj daengx guek gak cuz yinzminz, nyig nanz bae guh、haenqheiq baenaj, dingj gvaq gij binghraq baenz sigij noix raen haenx yiemzhaenq cungdongj, mizyauq wngqdoiq baenzroix fungyiemj deuqnyex hungnaek, doinyoengx saehnieb Dangj caeuq guekgya aeundaej cingzcik hungnaek moq. Ginghci yinhhengz youq ndaw onjdingh miz baenaj, yiengh hwngfat coh ceiq ndei maenhsaed doihaeuj; gohgi cauhmoq cingzgoj lairaeuh, yiengh swnghcanjliz rengzmoq onjbouh fatmaj; cienzmienh gyalaeg gaijgwz caiq ndaej doihaeuj, gij doiq rog hailangh suijbingz sang haenx mboujduenh gyadaih; yiengh yinzminz minzcuj ronz goek daengz byai fazcanj haeujlaeg, cienzmienh ciuqfap guenj guek mizyauq saedhengz; vwnzva saehnieb caeuq vwnzva canjnieb hwngfat hoenghhwd, cingsaenz vwnzva canjbinj lai saek lai yiengh; baujcang beksingq gwndaenj netsaed onjmaenh, gij cingzgoj haenqrengz duetgungz gyamaenh gyalai; yamqdin cienj haeuj loegsaek danqnoix gyavaiq, gij caetliengh swnghdai vanzging laebdaeb gaijndei; gij bonjsaeh bauj guekgya ancienz caiq lai gyaak, gaiq hong ceihleix ndawbiengz ndaej engq mizrengz, aen daihbuenz ndawbiengz baujciz onjdingh; gozfangz caeuq bingdoih guh ndei baenaj lailai; hengzguh “aen guekgya ndeu song cungj cidu” ndaej doi haeuj laeg bae; yiengh vaigyauh guekhung miz gij daegsaek Cungguek cienzmienh haigvangq; cienzmienh yiemzhaenq guenj Dangj cingzyauq yienhda, fanj nduknaeuh doucwngh doi haeuj ndaw laeg, gij rengzcauhguh、rengzgietcomz、rengzdwkhoenx aen Dangj daezsang yienhda. Gij saedlig ginghci、saedlig gohgi、gueklig gyoebhab guek raeuz yat hwnj mbaek moq, gij yendaiva yiengh Cungguek byaij ok yamqdin maenhsaed moq, diuz roen moq buekguh gij moegbiu aen bak bi daihngeih guhbaenz haibuenz ndei. Aeundaej doengh gij cingzcik hungloet neix, goekgaen dwg aenvih miz aen Dangjcunghyangh aeu Siz Ginbingz dungzci guh goek haenx gaemdox dazroen, dwg aenvih miz Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz gohyoz dazyinx.
(2) Mboengq “Cibhaj Haj” youq ndaw roenloh daihdaej guhbaenz sevei cujyi yendaiva miz aen diegvih youqgaenj ciep gonq hai laeng. Guhbaenz sevei cujyi yendaiva dwg duenh roen raez baez mbaek hwnjsang、mboujduenh hwngfat doxbae ndeu, aeu lienzdaemh roengzrengz、doxciep buekguh. Mboengq “Cibhaj Haj” dwg mboengq ceiq youqgaenj daihdaej guhbaenz sevei cujyi yendaiva cuknet giekdaej、cienzmienh fatrengz haenx, aeu gyamaenh haigvangq gijndei、cawz bae gijgaz、bouj giz dinj giz nyieg, youq ndaw gozci beijak haenqrem hingz ndaej canloz cujdung, doidoengh gij canloz yinvu nangq daengz daengx aen yendaiva yiengh Cungguek ndaej daih cungbyoengq, vih daihdaej guhbaenz sevei cujyi yendaiva dwk roengz aen giekdaej engqgya maenhsaed.
(3) Mboengq “Cibhaj Haj” gij hwngfat guek raeuz bungzdaengz bienqvaq fukcab dangqmaz. Gij gvanhaeh guek hung yiendoengh gozci hingzseiq, gij hingzseiq gozci bienqvaq doiq ndaw guek hwngfat gauxnyaux youqgaenj, guek raeuz hwngfat cawqyouq mboengq canloz seizgei caeuq fungyiemj deuqnyex caez miz、gaiq nanz liuh hoj dingh de gyalai. Daj gozci daeuj yawj, seiqgyaiq bak bi boekbienq gyavaiq yienjbienq, gij ligliengh gozci doxbeij gaenq bienq lairaeuh, lwnz gohgi gwzming caeuq canjnieb bengwz moq gyavaiq cungbyoengq, guek raeuz bwhmiz haujlai diuzgienh ndei ndaej youq gozci gag caeuzveh baijbouh aen gyanghoeng canloz、dajcauh vanzging baihrog. Doengzseiz, seiqgyaiq bienqluenh doxgeuj、fubfab gyahaenq, deihyienz doxdawz heih fat lai fat; yiengh mbiengj dog gag goq、yiengh cuk ciengz gag humx ndiengq hwnj, yiengh baengh ak guhvuengz haephangz swng hwnj, gij bouhloh guhfap gaicawx gwnz seiqgyaiq bungzdaengz deuqnyex yiemzhaenq, gij rengz nyoengx hawj seiqgyaiq ginghci demmaj mbouj gaeuq; guek hung doxdax engqgya fukcab haenqrem. Daj ndaw guek daeuj yawj, gij ginghci guek raeuz giekdaej onj、gijndei lai、rengzniu ak、rengzndumj hung, gij diuzgienh dingjcengj caeuq gaenbonj byaijyiengq ciengzgeiz coh ndei mbouj bienq, gij ndei aen cidu sevei cujyi miz gij daegsaek Cungguek、gij ndei hawciengz gveihmoz hungloet、gij ndei aen canjnieb dijhi caezcingj、gij ndei vunzcaiz laidaih engqgya yienh okdaeuj. Doengzseiz, aen vwndiz hwngfat mbouj bingzyaenx mbouj cukgaeuq vanzlij doedok; gij caencingq aeuyungh mbouj gaeuq, yiengh daih baenqloek ndaw guek lij miz giz gaz giz saek; rengznyoengx gaeuq moq cienjvuenh yinvu gannanz hungloet; yiengh yendaiva nungzyez lajmbanj miz di nguhlaeng; couhnieb caeuq gihminz souhaeuj demmaj atlig haemq hung, baujcang beksingq gwndaenj miz giz dinj giz nyieg; gapgyaq vunzgyaeuj bienqvaq hawj ginghci hwngfat、ndawbiengz ceihleix daengj daezok goqdaez moq; aen lingjyiz cungdenj vanzlij miz fungyiemj huxndumj.
Boekbienq hamz miz seizgei, deuqnyex gik ok ceiqheiq. Daengx Dangj aeu laegdaeuq rox daengz “song aen doekdingh” ndaej gietdingh guh baenz hongsaeh, gyaak “seiq aen roxyiuj”、dawzdingh “seiq aen gagsaenq”、guh daengz “song aen henhoh ”, baujciz rengzdingh canloz, gyaak gij saenqsim itdingh ndaej hingz, lailai rox bienq wngq bienq gouz bienq, gamj doucwngh、rox doucwngh, mbeilaux najdoiq doengh yiengh gaujniemh hungnaek rumz hung fwn naemq engqlij raemx git langh haenq, baengh gagrox doinyoengx lizsij bae gung nanzgvan、dingj fungyiemj、coux deuqnyex, comz rengz banh ndei gij saeh swhgeij, ciep sij bien sawfaenz moq ginghci hwngfat riengjvaiq caeuq ndawbiengz ciengzgeiz onjdingh song yiengh mbouj bingzciengz neix, haenqrengz haicauh aen buenzmienh moq hwnqguh gij yendaiva yiengh Cungguek.
Ngeih、Mboengq “Cibhaj Haj” Gij Fuengcim Cijdauj Caeuq Gij Cujyau Moegbiu Ginghci Sevei Fazcanj
(4) Mboengq “Cibhaj Haj” gij swhsiengj cijdauj ginghci sevei fazcanj. Dawzmaenh Majgwzswh Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cungyau Swhsiengj、Gohyoz Fazcanjgvanh, cienzmienh gvancez Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, haeujlaeg gvancez gij cingsaenz Ngeihcib Daih caeuq gaiq ngeihcib gak baez cienzhoih aen Dangj, hopheux cienzmienh hwnqbaenz aen guekak sevei cujyi yendaiva、guhbaenz gij moegbiu buekguh aen bak bi daihngeih, aeu gij yendaiva yiengh Cungguek bae cienzmienh doicaenh Cunghvaz Minzcuz fukhwng hungmbwk, doengbuenz maeuzveh doicaenh aen cungjdaej baijbouh “haj yiengh gap baenz aen”, dox boiqhab doicaenh aen canloz baijbouh “seiq aen cienzmienh ”, maeuzveh ndei ndaw guek rog guek song aen daihbuenz, caezcingj cinjdeng cienzmienh gvancez gij leixniemh hwngfat moq, gyavaiq laebhwnj aen gvaenghgaq hwngfat moq, dawzmaenh aen goekdiuh guhhong youq ndaw onjdingh gouz baenaj, dawzmaenh aeu ginghci gensez guh cungsim, aeu doidoengh yiengh hwngfat coh ceiq ndei guh cawjdaez, aeu gaijgwz cauhmoq guh gaenbonj doenghlig, aeu muenxcuk yinzminz gij aeuyungh gvaq saedceij gyaeundei ngoenz beij ngoenz demmaj haenx guh gaenbonj muzdiz, aeu cienzmienh yiemzhaenq guenj Dangj guh gaenbonj baujcang, doidoengh ginghci guh daengz caetliengh caencingq daezswng caeuq soqliengh hableix demmaj, doinyoengx bouxvunz cienzmienh fazcanj、daengxcungq yinzminz doengzcaez fouqmiz byaij ok yamqdin maenhsaed, saedbauj daihdaej guhbaenz sevei cujyi yendaiva aeundaej gij cincanj miz gietdingh cozyung.
(5) Mboengq “Cibhaj Haj” gij yenzcwz ginghci sevei fazcanj bietdingh aeu ciuqei haenx.
——Dawzmaenh yienghyiengh aeu Dangj lingjdauj. Laemxsim henhoh gij gienzvi caeuq gyonjcomz lingjdauj Dangjcunghyangh, gyaak gij bonjsaeh aen Dangj dawz fuengyiengq、maeuz daihbuenz、dingh cwngcwz、coi gaijgwz, dawz aen Dangj lingjdauj ronz gvaq ginghci sevei fazcanj gak fuengmienh goekbyai bae, vih guek raeuz hwnqguh sevei cujyi yendaiva daezhawj gaenbonj baujcwng.
——Dawzmaenh aeu yinzminz cuengq youq vih daih’it. Gingqcungh aen diegvih aeu yinzminz guhdaeuz, baengh maenh yinzminz, henhoh gij leih’ik gaenbonj yinzminz, coinyoengx ndawbiengz goengbingz cingqngeih, yawjnaek youq mwh hwngfat bae baujcang caeuq gaijndei gwndaenj beksingq, youq mwh muenxcuk gij aeuyungh beksingq bae haigvangq aen diendeih hwngfat, doinyoengx ginghci caeuq sevei doxdaengh hwngfat、vuzciz vwnzmingz caeuq cingsaenz vwnzmingz doxik doxbouj, hawj gij cingzgoj hwnqguh yendaiva aeundaej de engq lai engq goengbingz dwk ik doh daengxcungq yinzminz.
——Dawzmaenh yiengh hwngfat coh ceiq ndei. Aeu yiengh leixniemh hwngfat moq dazyinx hwngfat, yawj dieg dingh geiq bae hwngfat yiengh swnghcanjliz rengzmoq, guh ak ndaw guek daih baenqloek, hawj ndaw guek rog guek baenqloek doengrat bae, doengbuenz maeuzveh gyadaih ndaw guek aeuyungh caeuq haeujlaeg gaijgwz gij gapgyaq mbiengj gunghawj, gyavaiq gungganq yiengh rengznyoengx moq, coinyoengx gapgyaq ginghci gaijndei hwnj mbaek, guh ndei gij demlai、buenzhoengh gij gaenq miz, doinyoengx ginghci lienzdaemh cangqheiq hwngfat caeuq ndawbiengz yienghyiengh guh ndei baenaj.
——Dawzmaenh cienzmienh gyalaeg gaijgwz. Cimdoiq gij dijci gihci gazgit hanhhaed yiengh hwngfat coh ceiq ndei, doicaenh guh gij gaijgwz caengzlaeg, gyadaih yiengh hailangh suijbingz sang, doinyoengx swnghcanj gvanhhi caeuq swnghcanjliz、sangcwngz gencuz caeuq ginghci giekdaej、guekgya ceihleix caeuq ndawbiengz hwngfat engq doxngamj, lienzdaemh demlai gij rengz coi hwngfat caeuq gij rengzhoengh ndawbiengz.
——Dawzmaenh aen hawciengz mizyauq caeuq aen cwngfuj ak guhsaeh dox giethab. Lailai hawj hawciengz bae gietdingh boiqceiq swhyenz, engq ndei langh rengz cwngfuj okdaeuj, cauhlaeb aen dijhi hawciengz doengzcaemh、hailangh、beijak、miz bouhloh, laebguh yiengh ginghci fapceih、yiengh ginghci saenqyungh, dajcauh aen vanzging guh gaicawx maenhndei hab hawciengz、hab fapceih、hab gozci, guh baenz yiengh guenj ginghci gawq “cuengq ndaej hoengh” youh “guenj ndaej maenh”.
——Dawzmaenh doengbuenz maeuzveh hwngfat caeuq ancienz. Youq ndaw hwngfat gyamaenh ancienz, youq ndaw ancienz maeuzaeu hwngfat, lailai ngeixnaemj daejsienq, ndeindei fuengzre vaqgej gak yiengh fungyiemj, gyarengz hawj ginghci caeuq sevei engq naihniu, aeu yiengh ancienz moq baujcang yiengh hwngfat moq.
(6) Mboengq “Cibhaj Haj” gij cujyau moegbiu ginghci sevei fazcanj.
——Yiengh hwngfat coh ceiq ndei aeundaej cingzyauq yienhda. Ginghci demmaj dingx youq ndaw duenh hableix, daengx gaiq yausu swnghcanj yauqlwd cungj onjbouh daezswng, aen soq gihminz siufeiq mingzyienj raen lai, geu rengzdaeuz gij aeuyungh ndaw guek rag hwnj ginghci demmaj laebdaeb gyaak, gij rengzndumj ginghci demmaj ndaej lailai langh okdaeuj, dajcauh aen hawciengz hung daengx guek caezcaemh ndaej guh haeuj laeg, gijndei aen hawciengz gveihmoz hungloet lienzdaemh yienh’ok, gij gunghyezva、sinsizva、cwngzcinva、nungzyez yendaiva yienghmoq byaij ok yamq laux, hwngfat yiengh swnghcanjliz rengzmoq、laebhwnj aen gvaenghgaq hwngfat moq、dajcauh aen dijhi ginghci yendaiva ndaej miz cungbyoengq hungnaek.
——Gohgi gag guh gag ak bonghyat hwnj sang. Aen dijhi cauhmoq guekgya cingjdaej raenhamq yienhda, yiengh gapgyaq gyauyuz gohgi vunzcaiz doengzcaemh hwngfat daihdaej cauxbaenz, gij bonjsaeh guh gihcuj yenzgiu caeuq baeznduj cauhmoq dem’ak yienhda, gij gisuz ceiq youqgaenj aen lingjyiz cungdenj gung roengz vaiqvwt, aen lingjyiz caez buet lingx buet demgya raen lai, gohgi cauhmoq caeuq canjnieb cauhmoq yungzhab haeuj laeg, baengh cauhmoq gaexnyoengx gohgi fazcanj yied daeuj yied raen ak.
——Caiq cienzmienh gyalaeg gaijgwz ndaej miz cungbyoengq moq. Aen dijhi ceihleix caeuq gij bonjsaeh ceihleix guekgya baenz yendaiva doinyoengx haeuj laeg, aen dijci yiengh hawciengz ginghci sevei cujyi engqgya caezcienz, gij dijci gihci doiq rog hailangh suijbingz sang de engqgya caezcienz, yiengh yinzminz minzcuj ronz goek daengz byai baenz cidu、hab gveihfan、ciuq bouhloh haenx suijbingz caiq hwnj sang, hwnqguh aen guekgya fapceih sevei cujyi hwnj mbaek engq sang.
——Sevei vwnzmingz mingzyienj daezswng. Gagsaenq vwnzva bonjfaenh engqgya dawzdingh, gij baklinx swhsiengj gaemgoek yied daeuj yied ndaej gyamaenh bienq hung, aen hwzsinh gyacizgvanh sevei cujyi gvangqlangh hengzguh, daengx aen minzcuz ak cauhmoq ak cauhguh vwnzva ngoenz hoengh gvaq ngoenz, gij saedceij vwnzva cingsaenz yinzminz engqgya lai yiengh, gij sim gij rengz Cunghvaz Minzcuz engqgya gietcomz、gij vwnzva Cunghvaz yingjyangj seiqgyaiq engq hung, gij saedlig’unq guekgya lienzdaemh daezsang.
——Saedceij yinzminz yied gvaq yied ndei. Yiengh cukgaeuq youh onjmaenh dwk couhnieb caiq raen lai ndei, gihminz souhaeuj demmaj caeuq ginghci demmaj doengzbouh、cienzhong daezsang caeuq lauzdung swnghcanjliz daezsang doengzbouh, aen gapgyaq faenboiq ndaej gaijndei, gyoengqvunz souhaeuj cungdaengj lienzdaemh gyalai, aen cidu sevei baujcang engqgya bienq ndei youh ndaej lienzdaemh, yiengh fugsaeh vunzlai caezcaemh ceiq noix bouxboux doxdoengz daezsang yienhda.
——Hwnqguh aen Cungguek gyaeundei byaij ok yamq hung. Loegsaek swnghcanj loegsaek swnghhoz daihdaej cauxbaenz, aen moegbiu danqdaemxdingj ciuqgeiz guhbaenz, aen dijhi nwngzyenz yienghmoq cinghseuq danqnoix ancienz yauqlwd sang haenx cobouh laebbaenz, gij cungjsoq baizcuengq gaiq huq uqlah youqgaenj laebdaeb gemjnoix, swnghdai hidungj yied daeuj yied lai yiengh、onjdingh、lienzdaemh.
——Gaiqdangj hawj guekgya ancienz engqgya maenhdwt. Aen dijhi caeuq gij bonjsaeh hawj guekgya ancienz youh caiq gyaak, gij fungyiemj aen lingjyiz youqgaenj ndaej daengz mizyauq fuengzre vaqgej, guenj biengz caeuq guenj gij ancienz vunzlai caezcaemh guh ndaej engq ndei, aen moegbiu buekguh laebbaenz bingdoih it bak bi ciuqseiz guhbaenz, hwnqguh aen Cungguek bingzan rem’ak ndaej onjmaenh doi baenaj.
Youq gwnz giekdaej neix caiq haenqrengz buekguh haj bi, daengz 2035 nienz guh daengz gij saedlig ginghci、saedlig gohgi、saedlig gozfangz、gueklig gyoebhab caeuq gij rengzlig yingjyangj gozci guek raeuz bonghyat hwnj sang, swnghcanj cungjciz ndaw guek dan bingz daengz gak boux dabdaengz gij suijbingz aen guekgya fatdad cungdaengj, ndwenngoenz yinzminz engqgya vuenyungz gyaeundei, daihdaej guhbaenz sevei cujyi yendaiva.
Sam、Hwnqguh Aen Dijhi Canjnieb Yendaiva, Guhmaenh Guhhung Aen Goekgaen Yiengh Ginghci Saeddaej
Aen dijhi canjnieb yendaiva dwg aen giek vuzciz gisuz dwkdaej guh gij yendaiva yiengh Cungguek. Dawzmaenh guh ginghci aeu coq rengz guh yiengh ginghci saeddaej, dawzmaenh aen fuengyiengq baenz cinwngz、baenz loegsaek、dox yungzhab, gyavaiq hwnqguh aen guekak dajcauh、aen guekak caetliengh、aen guekak hangzdenh、aen guekak gyaudoeng、aen guekak vangjloz, bauj hawj hangz cauhguh beijfaenh hableix, cauhlaeb aen dijhi canjnieb yendaiva aeu hangz cauhguh maenhndei guhdaeuz haenx.
(7) Gaijndei swngsang doengh aen canjnieb conzdungj. Doinyoengx gij canjnieb youqgaenj gaijndei swnggaep, gyamaenh gyaak doengh gij canjnieb gvangyez、yejginh、vagungh、ginghgungh、daemjrok、gihgai、aenruz、dajhwnq haenx, hawj de youq ndaw canjnieb faengoeng daengx seiqgyaiq engq ak bae ceng hingz. Engq ak gag dawz gag gaem diuzlienh canjnieb, gyaak caiq cauh yiengh giekdaej canjnieb caeuq gung roengz gij gisuz canghbei hungnaek, lienzdaemh hengzguh gaiq hong hawj diuzlienh canjnieb youqgaenj hangz cauhguh ciuq yiengh ndei ak bae guh, lai hawj hangz cauhguh maenhndei comzgyoengq. Doinyoengx gisuz gaijcauh swnggaep, coihaeuj hangz cauhguh cienj baenz yiengh soqcih yiengh cinwngz, hwngfat cinwngz cauhguh、loegsaek cauhguh、yiengh fugsaeh cauhguh, gyavaiq gaijbienq canjnieb vunqsik caeuq giyez cujciz hingzdai. Gyaak gij naengzlig yiengh gisuz giekdaej caetliengh, gyarengz aeu biucinj yinxlingx、engq habngamj gozci, gyarengz dajcauh binjbaiz. Gaijndei canjyez baijbouh, coihawj gij canjnieb youqgaenj youq ndaw guek miz bouhloh senjdieg.
(8) Ganq ok guh hung gij canjnieb ngamq hwng caeuq yiengh canjnieb daengzcog. Roengzrengz dajcauh aen canjnieb donghsaeu ngamq hwng. Hengzguh aen gunghcwngz canjnieb cauhmoq, doxcaez doihaeuj gaiq hong hwnqguh sezsih cauhmoq、yenzgiu haifat gisuz、vuenh daih swnggaep canjbinj, gyavaiq nwngzyenz moq、caizliuh moq、hangzgungh hangzdenh、yiengh ginghci mbwn daemq daengj gij canjnieb ngamq hwng nangq daengxbuenz de comzgyoengq hwngfat. Caezcienz gij swnghdai canjnieb, saedhengz gaiq hong guhyiengh daihbuek bae yungh gisuz moq canjbinj moq ciengzgingj moq, gyavaiq baenz gveihmoz hwngfat gij canjnieb ngamq hwng.
Yawj gyae bae baijbouh aen canjnieb daengzcog, damqra gij gisuz lohsienq lai yiengh、giz ciengzgingj wngqyungh denjhingz、gij vunqsik sanghyez guh ndaej、gij gveihcwz gamguenj hawciengz, doinyoengx liengswj gohgi、swnghvuz ceiqcauh、ginghnwngz caeuq nwngzyenz hwzciben、gaiq ciep uk、gaiq raeh lumj vunz、yizdung dunghsin daih daihroek daengj bienqbaenz giz ginghci demmaj moq. Cauhmoq gij fuengsik gamguenj, hwngfat yiengh douzswh cauhnieb, laebhwnj aen gihci hawj gij canjnieb daengzcog douzhaeuj demlai caeuq faenrap fungyiemj. Coihaeuj giyez rauh iq coh cien cing daeg moq bae hwngfat, gungganq gij giyez “nyaengaeudog”.
(9) Coicaenh hangz fugsaeh ndei youh vaiq bae hwngfat. Hengzguh yienghsaeh coi hangz fugsaeh hwngvuengh bienq ndei, gyadaih hangz fugsaeh hailangh, gyalaeg gamguenj gaijgwz, laebndei cwngcwz dijhi bae haeujcoengh, rex hung gya lai gij cawjdaej ginghyingz maenhndei, faen lingjyiz doihaeuj hangz fugsaeh swnghcanj bienq ciennieb caeuq iet haeuj giz gyaciz sang bae, coicaenh hangz fugsaeh gwndaenj binjcaet sang、baenz lai yiengh、bienq bienhleih bae hwngfat. Hawj hangz fugsaeh ciuhneix caeuq hangz cauhguh maenhndei、nungzyez ciuhneix yungzhab hwngfat engq ndei bae, doinyoengx hangz fugsaeh bienq soqcih bienq cinwngz. Gyarengz laebndei gij biucinj fugsaeh caeuq dajcauh gij binjbaiz caetliengh ndei. Laebcaez aen dijhi gyoebsuenq gamcaek hangz fugsaeh.
(10) Laebhwnj gij dijhi sezsih giekdaej hab ciuhneix. Lai yunghrengz naemj daengxbuenz bae gveihva yiengh sezsih giekdaej, gaijndei gapgyaq baijbouh, coicaenh gyoebcomz yungzhab, hawj de engq ancienz naihniu caeuq engq lienzdaemh ndaej yungh. Habdangq mauhgonq bae hwnqguh gij sezsih giekdaej yienghmoq, doihaeuj hwnqguh caeuq gyonjconz engq ndei leihyungh saenqsik doengsaenq vangjloz、aen vangj suenqlig daengx guek doxcaemh、gij sezsih giekdaej gohgi hungnaek daengj, doihaeuj gij sezsih giekdaej mwhgonq vuenhmoq caeuq gaij baenz soqcih cinwngz. Laebndei aen cunghab gyaudoeng daehyinh dijhi hab ciuhneix, lai guh hamj ranghdieg doengzcaemh baijbouh、lai fuengsik baenz aen cingjdaej dox hamzciep, roengzrengz hawj dieg buegnyieg doeng roenci liux caiq bauj de doengrat. Laebcaez aen dijhi roenloh daehyinh gozci lai yiengh、naihniu haenx. Hawj gij roenloh goetganq daehyinh nwngzyenz baijbouh engq ndei, gyarengz hwnqguh gij sezsih giekdaej nwngzyenz yienghmoq. Gyavaiq hwnqguh aen muengxraemx habngamj ciuhneix, gyaak gij bonjsaeh fuengzre dingjdangj raemxrongz raemxdumh、itcaez diuzboiq swhyenz raemx、bauj hawj singz mbanj miz raemx yungh. Doihaeuj hwnqguh gij sezsih giekdaej caezcaemh hawsingz seiz gaenj seiz soeng caez yungh de.
Seiq、Gyavaiq Yiengh Gohgi Suijbingz Sang Haenx Gag Guh Gag Ak, Lingxdaeuz Hwngfat Yiengh Swnghcanjliz Rengzmoq
Gij yendaiva yiengh Cungguek aeu baengh gohgi yendaiva daeuj daemxcengj. Cadawz aen lizsij seizgei lwnz gohgi gwzming caeuq canjnieb bengwz moq, doengbuenz maeuzveh hwnqguh aen guekak gyauyuz、aen guekak gohgi、aen guekak vunzcaiz, daezswng gij cingjdaej yauqnaengz aen dijhi cauhmoq guekgya, cienzmienh gyaak gij bonjsaeh gag cauhmoq, ciemqhah giz diegsang gohgi hwngfat, mboujduenh coiok yiengh swnghcanjliz rengzmoq.
(11) Gyarengz guh codaeuz cauhmoq caeuq gung roengz gij gisuz ceiq youqgaenj. Laebndei gij yienghmoq daengx guek ok rengz, yungh gij guhfap mauhgvaq bingzciengz, daengx lienhdiuz doinyoengx gunggvan cizcwngz denlu、gunghyez mujgih、gauhdonh yizgi、gihcuj yonjgen、senhcin caizliuh、swnghvuz ceiqcauh daengj lingjyiz cungdenj gij gisuz ceiq youqgaenj aeundaej yiengh cungbyoengq gietdingh baenzsaeh haenx. Lai ngeix guekgya canloz aeuyungh, baijbouh saedhengz buek gohgi yinvu hungnaek guekgya ndeu. Gyarengz ciuq canloz bae、yawj gyae bae、baenz dijhi bae baijbouh giekdaej yenzgiu, gyalai faenh douzhaeuj guh giekdaej yenzgiu, caiq ciengzgeiz onjdingh bae haeujcoengh. Gyarem dazyinx gohyoz yenzgiu、gisuz haifat guh codaeuz cauhmoq, gaijndei gij vanzging ikleih guh cauhnduj、guh yiengh cauhmoq boekbuenz, cauh ok gij cwngzgoj cauhnduj ndaej guh maihauh de engq lai.
(12) Doinyoengx gohgi cauhmoq caeuq canjnieb cauhmoq yungzhab haeuj laeg. Doengbuenz maeuzveh dajcauh gij ligliengh gohgi coengh canloz guekgya, gyaak gij bonjsaeh guh baenzroix gunggvan. Gyarengz gag guhcawj bauj gij diuzgienh giekdaej gohgi, doengbuenz maeuzveh hwnqguh gij bingzdaiz gihdi gohgi cauhmoq. Laebndei aen dijhi cauhmoq gvaengxdieg, baijbouh hwnqguh aen cungsim gohgi cauhmoq ndaw gvaengxdieg caeuq aen dieg yinxlingx canjnieb gohgi cauhmoq, gyaak gij goengnaengz gizgoek aen cungsim gohgi cauhmoq gozci. Gyavaiq hawj gij gohgi cwngzgoj hungnaek engq vaiq dwk cienjvaq baenz yungh, baijbouh hwnqguh aen bingzdaiz niemhcingq gainen、niemhcingq duenhgyang sawqniemh, gyarengz hwnqguh caeuq cuengqhai giz wngqyungh, gyarengz baujhoh caeuq yinhyungh cihsiz canjgienz. Dajcauh yiengh swnghdai hailangh cauhmoq miz gij rengz ndaej caeuq seiqgyaiq beijak haenx. Haeujcoengh gyoengq gohgi vunzcaiz bouxcoz cauhmoq cauhnieb. Gyarengz bujgiz gohyoz gisuz, gungganq cauhmoq vwnzva, hwngcienz gij cingsaenz gohyozgyah. Gyarengz laebndei gohgi fapceih、lunzlij、saenqyungh、ancienz.
Gyarem gij diegvih giyez guh aen cawjdaej gohgi cauhmoq, doinyoengx gij swhyenz cauhmoq conz haeuj giyez, haeujcoengh giyez yiendaeuz cujlaeb aen lenzhozdij cauhmoq、engq lai raphwnj gij yinvu gunggvan gohgi guekgya, gikcoi giyez lai douzcienz guh giekdaej yenzgiu, coihawj diuzlienh cauhmoq diuzlienh canjnieb diuzlienh ngaenzcienz diuzlienh vunzcaiz ndaej yungzhab haeuj laeg. Gungganq guhhung gij giyez lingxdaeuz gohgi, haeujcoengh gij giyez gisuz moqak caeuq gij giyez rauh iq guh gohgi de hwngfat, gyalai aen beijlaeh gij ngaenzyungh giyez yenzgiu haifat ndaej gyasuenq caiq gaeucawz. Gyalai gij rengz cwngfuj cawx doengh gij canjbinj gag guhcawj cauhmoq.
(13) Baenz cingjdaej doinyoengx gyauyuz gohgi vunzcaiz fatmaj. Laebhwnj laebcaez gij gihci dox boiqhab baenz cingjdaej bae doihaeuj, gyarem gveihva hamzciep、cwngcwz boiqhab、swhyenz dungjcouz、bingzgyaq lienzdoengh, coihawj gohgi gag guhcawj cauhmoq caeuq vunzcaiz gag gungganq doxcoi doxhab, hwnqguh gij gyauyuz cungsim、gohyoz cungsim、vunzcaiz cungsim youq lajmbwn miz yingjyangj haenx. Hopheux gohgi cauhmoq、canjnieb hwngfat caeuq guekgya canloz aeuyungh doxgap ganq vunz, gaijndei gauhyau baijbouh、faenloih doihaeuj gaijgwz、doengbuenz ndalaeb yozgoh, haeujlaeg doihaeuj hwnqguh gij gauhyau “sueng itlouz ” caeuq gij cungsim yozgoh gyauca guekgya, lai hawj gohyenz gihgou、bingzdaiz cauhmoq、giyez、gohgi giva yienh’ok gij goengnaengz gyonjcomz gungganq vunzcaiz, gungganq gij vunzcaiz ak cauhmoq. Gyavaiq ganq ak gij ligliengh canloz vunzcaiz guekgya, ganq ok baenz gyoengq gohyozgyah roxyiuj daengxbuenz、vunzcaiz lingxdaeuz gohgi、gunghcwngzswh maenh’ak、lauxcangh guek hung、vunzcaiz dinfwngz soemraeh daengj doengh loih vunzcaiz neix. Lailai guh vunzcaiz doxgap boiqhab, gaijndei gij gapgyaq vunzcaiz, coihawj vunzcaiz youq gvaengxdieg doxdaengh fatmaj. Aeu gij naengzlig、caetliengh、saedyauq、gunghawj cauhmoq daeuj dazyinx bingzgyaq, gyalaeg gaijgwz gij hongsaeh bingzsaemj hanghmoeg、bingzguj gihgou、bingzgyaq vunzcaiz、faenboiq souhaeuj, deudoeng diuz roenloh gauhyau、gohyenz yensoj、giyez gyaulouz vunzcaiz, gikfat gij rengznyoengx rengzhoengh cauhmoq cauhguh. Hawj gozci gyaulouz doxgap haeuj laeg bae, laebhwnj aen cidu hawj gij vunzcaiz dinfwngz soemraeh roengzhoh, yinx ganq gij vunzcaiz maenhndei seiqgyaiq.
(14) Haeujlaeg doinyoengx hwnqguh soqcih Cungguek. Laebcaez gij cidu giekdaej coengh soqgawq yausu, laebhwnj aen hawciengz soqgawq daengx guek doengzcaemh hailangh caezyungh ancienz, gyalaeg haifat leihyungh soqgawq swhyenz. Coihawj saeddaej ginghci caeuq soqcih ginghci yungzhab haeuj laeg, hengzguh aen gunghcwngz cauhmoq hwngfat gunghyez hulenzvangj. Gyavaiq cauhmoq yinzgungh cinwngz daengj gij gisuz bienq soqcih bienq cinwngz neix, gung roengz lijlun giekdaej caeuq gisuz haedsim, gyarengz engq ndei dwk gunghawj suenqlig、suenqfap、soqgawq daengj. Cienzmienh saedhengz aen hengzdoengh “yinzgungh cinwngz +”, aeu yinzgungh cinwngz dazyinx gaijbienq gij yienghsik gohyoz yenzgiu, gyaak yinzgungh cinwngz caeuq canjnieb hwngfat、guhhoengh vwnzva、baujcang beksingq gwndaenj、ceihleix ndawbiengz dox giethab, ciemqhah giz diegsang wngqyungh yiengh canjnieb yinzgungh cinwngz, dohdaengz hawjrengz gak hangz gak nieb. Gyarengz ceihleix yinzgungh cinwngz, laebndei mizgven faplwd fapgvi、cwngcwz cidu、wngqyungh gveihfan、lunzlij cunjcwz. Guh ndei gamguenj, doinyoengx bingzdaiz ginghci cauhmoq caeuq cangqheiq hwngfat.
Haj、Hwnqguh Aen Hawciengz Ndaw Guek Hung’ak, Gyavaiq Cauhlaeb Aen Buenz Hwngfat Moq
Aen hawciengz ndaw guek hung’ak dwg gaiq canloz dakbaengh guh gij yendaiva yiengh Cungguek. Dingjmaenh gyadaih ndaw guek aeuyungh aen canloz dajdaeuz neix, dingjmaenh ndeileih beksingq gwndaenj caeuq coi siufeiq、douzcienz haeuj huq caeuq douzcienz haeuj vunz gaenjmaed giethab, aeu yiengh aeuyungh moq dazyinx yiengh gunghawj moq, aeu yiengh gunghawj moq daeuj cauh ok yiengh aeuyungh moq, coihawj siufeiq caeuq douzcienz、gunghawj caeuq aeuyungh doxcoi doxhab, hawj aen loek ndaw guek engq ak dwk gag fat rengz baenqcienj caeuq engqgya baengh ndaej.
(15) Roengzrengz guhhoengh siufeiq. Haeujlaeg saedhengz aen hengzdoengh cienmonz guhhoengh siufeiq. Doengbuenz maeuzveh coi couhnieb、dem souhaeuj、onj yawhgeiz, hableix hawj faenh ceiok guh fugsaeh caezcaemh haenx ndaej ciemq caizcwng ceiok lai di, hawj gihminz lai ak siufeiq. Gyalai gunghawj gij doxgaiq siuyungh caeuq gij fugsaeh ndei haenx. Aeu cuengqsoeng cinjhaeuj、yienghnieb yungzhab guh cungdenj gyahung fugsaeh siufeiq, gyaak binjbaiz dazyinx、biucinj swnggaep、yungh gisuz moq, doinyoengx sanghbinj siufeiq gyalai hwnj mbaek, cauxlaeb buek ciengzgingj moq siufeiq daiqdoengh lai yiengh、yienh cingx raixcaix ndeu. Gungganq aen hawsingz guh gozci siufeiq cungsim, haigvangq yiengh haeuj guek daeuj siufeiq. Gyarengz hengz gij cwngcwz cigsoh hawj ndei bouxsiufeiq, demlai gij cienzngaenz cwngfuj yungh youq baujcang gwndaenj beksingq. Laebndei gij cidu gihci coicaenh siufeiq, cingleix doengh gij guhfap mbouj hableix hanhhaed cawx giceh、cawx ranzyouq daengj, laebhwnj laebcaez gij banhfap guenjleix hab hangznieb moq vunqsik moq ciengzgingj moq siufeiq haenx, doeksaed daiq cienzhong doxca yietgyaj. Gyarem baujhoh gij gienzik bouxsiufeiq.
(16) Gyalai yiengh douzcienz raenhamq. Bauj hawj douzcienz hableix demlai, daezsang douzcienz raen ndei ndaej leih. Guh ndei aen gapgyaq cwngfuj douzcienz, demlai faenh cienz cwngfuj douz haeuj loih beksingq gwndaenj bae, engq ndei dwk doicaenh hengzguh aen canloz hungnaek guekgya caeuq hwnqguh gij hanghmoeg hawj lingjyiz cungdenj lai ancienz. Hab’wngq aen seiqdaeuz gapgyaq vunzgyaeuj bienqvaq caeuq riuzdoengh, guh ndei sezsih giekdaej baijbouh caeuq gij sezsih fugsaeh caezcaemh baijbouh, gyalai douzcienz haifat gij swhyenz vunzlig caeuq hawj bouxvunz cienzmienh fazcanj. Daengxbuenz maeuzveh yungh ndei gak loih cienzngaenz cwngfuj douzhaeuj haenx, youq doengh giz deihfueng giekdaej guhhong haemq ndei de damqra bienceiq aen giva sojmiz cwngfuj douzcienz. Gyarem daj goek daengz byai guenjleix cwngfuj douzcienz. Gyalaeg gaijgwz gij cidu saemjbae douzcienz, caiq lai mingzbeg doekdingh gij fuengyiengq caeuq cungdenj cunghyangh ndij deihfueng douzcienz. Gyarengz maeuzveh lwnhcingq, hengzguh buek gunghcwngz hanghmoeg miz biugeiq youqgaenj ndeu. Laebndei aen gihci naihnanz hawj minzyingz giyez caeuqfaenh hwnqguh hanghmoeg hungnaek, langh’ok gij rengz dazyinx daiqdoengh douzswh gihginh cwngfuj, gik ok gij rengzhoengh ndawbiengz douzcienz、demlai faenh cienz ndawbiengz douzhaeuj, gyaak gij rengzlig douzcienz demlai raenhamq youz hawciengz dazyinx haenx.
(17) Laemxsim cekcawz giz gaz giz saek ngaih daengz hwnqguh aen hawciengz hung daengx guek doengzcaemh haenx. Gyonj dingh gij cidu gveihcwz giekdaej hawciengz, laebndei doengh gij cidu baujhoh canjgienz、cinjhaeuj hawciengz、goengbouh saenqsik、ndawbiengz saenqyungh、doxgyoeb dauqlaeb、doiqok hawciengz haenx, siucawz doengh yiengh gazgit yausu aeundaej、swhciz nyinhdingh、ciubiu roengzbiu、cwngfuj dajcawx haenx, gveihfan gij guhfap deihfueng cwngfuj guhhoengh ginghci, cekcawz deihfueng baujhoh caeuq hawciengz faengat. Gyoebhab cingjceih yiengh beijak “begndaw”. Dungjyiz hawciengz gamguenj caepfap, gyaak gamguenj caetliengh, laebndei aen gihcunj cidu gij gienz hingzcwng buenqgiet cawqfad, gyarem gij caepfap dawzfap fanj lungjdon caeuq fanj mbouj cingqdangq beijak, cauxbaenz yiengh hawciengz cizsi huq ndei gyaq ngamj、huzndei beijak. Laebcaez gij gveihcwz caeuq biucinj riuzdoeng doxcaez hamzciep haenx, engq ndei dwk lienzdoeng gij sezsih hawciengz, gyangqdaemq gij goekcienz daengx biengz daehhuq. Laebndei gij cidu gyoebsuenq、caizsui、gaujhaed ikleih hwnqguh aen hawciengz hung daengx guek doengzcaemh haenx, hawj giyez cungjbu caeuq aen gihgou faennga、dieg swnghcanj caeuq dieg siufeiq engq ndei bae faenyiengj leih’ik.
Roek、Gyavaiq Cauhlaeb Aen Dijci Yiengh Hawciengz Ginghci Sevei Cujyi Suijbingz Sang, Dem’ak Gij Rengznyoengx Coi Hwngfat Guh Coh Ceiq Ndei
Aen dijci yiengh hawciengz ginghci sevei cujyi suijbingz sang dwg gij baujcang youqgaenj guh gij yendaiva yiengh Cungguek. Dawzmaenh caeuq laebndei gij gihbwnj ginghci cidu sevei cujyi, engq ndei langh’ok gij rengz bengrag ginghci dijci gaijgwz, laebndei aen dijhi ceihleix hungzgvanh ginghci, saedbauj hwngfat coh engq ndei dwk byaij onj bae gyae.
(18) Lailai gik ok gij rengzhoengh gak loih ginghyingz cawjdaej. Dawzmaenh caeuq doeksaed “song aen mbouj doenghngauz saekdi”, coicaenh gak cungj sojyoujci ginghci doxbouj gijak、itcaez hwngfat. Gyalaeg gaijgwz swhbwnj guekmiz giyez guekmiz, guh ak guh ndei guh hung giyez guekmiz caeuq swhbwnj guekmiz, doicaenh gaijndei gij baijbouh caeuq diuzcingj gij gapgyaq ginghci guekmiz, hawj giyez guekmiz demlai gij goengnaengz ceiq maenh、daezswng gij rengz beijak ceiq maenh. Doeksaed aen fap coicaenh minzyingz ginghci, daj faplwd caeuq cidu fuengmienh baujcang bingzdaengj bae yungh swnghcanj yausu、goengbingz caeuqfaenh hawciengz beijak、baujhoh ndei gienzik habfap, hwngfat guhhung minzyingz ginghci. Haeujcoengh giyez rauh iq caeuq cangh gagguh seng’eiq hwngfat, doidoengh giyez hung rauh iq guhdoih yungzdoeng hwngfat. Gyarem canjgienz caepfap dawzfap baujhoh, gyarem dawzfap gamduk cazfung、gaeuat、funggiet doengh gij guhfap gaemhanh neix. Laebndei aen cidu giyez ciuhneix miz gij daegsaek Cungguek, hwngcienz gij cingsaenz giyezgyah, gyavaiq dajcauh gij giyez lajmbwn itlouz engq lai.
(19) Gyavaiq laebndei gij dijci gihci youz hawciengz ndaboiq yausu. Coicaenh gak loih swhyenz yausu ndaboiq engq doxngamj, laebhwnj laebcaez gij hawciengz dieg dajhwnq singz mbanj doxdoeng caezcaemh、gij hawciengz swhbwnj goengnaengz caezcienz、gij hawciengz vunzhong haeujok doengrat、gij hawciengz gisuz cienjvaq vaiq ndei. Bienguh aen biuj dawzcaiq hungzgvanh swhcanj, dohcaez saej ok gij daejsoq swhyenz swhcanj gaenq miz, gaijndei aen gapgyaq swhcanj dawzcaiq. Laebndei gij cwngcwz gyoebcawx、buqcanj、lawhvuenh daengj, buenzhoengh yungh ndei gij dieg raenndei noix、gij ranz cuengqndwi、gij sezsih giekdaej gaenq miz. Laebndei gij faplwd fapgvi swnjgeiz sawjyungh diegyungh gunghyez sanghyez, ciuqfap onjdangq doicaenh gij hong swnjgeiz. Doicaenh daengx guek hingzcwng swyez danhvei buenzhoengh caez yungh gij swhcanj guekgya gaenq miz. Doinyoengx swhfaz buenqgiet caephengz caeuq buqcanj cidu ndeindei hamzciep, ciuqfap mizyauq buenzhoengh gij caizcanj deng cazfung funggiet.
(20) Daezswng gij yauqnaengz ceihleix hungzgvanh ginghci. Gyaak gij rengz guekgya fazcanj gveihva dazyinx daengxbuenz, gyarengz hawj gij cwngcwz caizcwng、hobi dox boiqhab, langh’ok gij rengz doengh hangh cwngcwz canjnieb、gyagwz、couhnieb、siufeiq、douzcienz、gaicawx、gvaengxdieg、vanzbauj、gamguenj daengj, coicaenh cauxbaenz yiengh ginghci hwngfat engq lai youz ndaw guek aeuyungh guhdaeuz、siufeiq ragdoengh、gag ndaej demlai haenx. Gyarem nyig hopgeiz caeuq hamj hopgeiz bae diuzcez, saedhengz gij hungzgvanh cwngcwz engqgya soeng haenx, laebdaeb onj demmaj、onj couhnieb、onj yawhgeiz. Dem’ak hungzgvanh cwngcwz yiengh aeuyiengq doxdoengz de, gyarem bingzgyaq cwngcwz saedhengz ndaej baenzlawz yiengh, laebcaez gij gihci guenjleix yawhgeiz, gaijndei gij gaujhaed gyoebhab cikyauq yiengh hwngfat coh ceiq ndei.
Langh’ok gij rengz caizcwng cwngcwz soeng haenx, gyaak caizcwng yiengh ndaej lienzdaemh de. Gyarem gohyoz guenjleix caizcwng, gyarem doengbuenz suenqveh gij swhyenz caeuq yawhsuenq caizcwng, gyarengz aeu caizlig bauj gij hongsaeh canloz hungnaek guekgya caeuq gwndaenj beksingq. Haeujlaeg gaijgwz gij yawhsuenq daj lingz guh giek, gyonjcomz gij gienz faenboiq yawhsuenq, gaijndei aen gapgyaq caizcwng ceiok, gyarengz guenj gij cikyauq yawhsuenq. Caezcienz aen dijhi gvaehdeihfueng、gvaehsohsou, laebcaez gij cwngcwz cienzgvaeh guhcanh aeundaej、swhbwnj aeundaej、caizcanj aeundaej, gveihfan gij cwngcwz sougvaeh youhvei, baujciz daengx aen dawzsuiq suijbingz hableix. Habdangq gyalai gij saehgienz cunghyangh、daezsang faenh caizcwng ceiok cunghyangh. Lai hawj deihfueng gag dawz cienz yungh cienz. Gyarem gamduk caizgvai. Gyavaiq cauhlaeb aen gihci ciengzgeiz mizyauq guenjleix ngaenzcaiq cwngfuj riengz yiengh hwngfat coh ceiq ndei dox habngamj haenx.
Gyavaiq hwnqguh aen guekak ginhyungz. Caezcienz aen cidu cunghyangh yinzhangz, cauhlaeb aen dijhi hobi cwngcwz gohyoz onjmaenh caeuq aen dijhi hungzgvanh coumaed guenjleix cienzbouh goq doh, hawj aen gihci cienzyinx hobi cwngcwz doengrat bae. Haenqrengz hwngfat yiengh ginhyungz gohgi、ginhyungz loegsaek、ginhyungz ik doh、ginhyungz ciengxlaux、ginhyungz soqcih. Lai hawj gij cidu hawciengz swhbwnj engq bauyungz、engq habyungh, laebcaez gij goengnaengz hawciengz swhbwnj hawj douzswh caeuq yungzswh doxha. Hwnjheiq hwngfat gujgenz、caigen daengj yiengh yungzswh cigsoh, onjbouh hwngfat geizhuq、huqdoksanj caeuq swhcanj cwnggenva. Gaijndei aen dijhi ginhyungz gihgou, doinyoengx gak loih ginhyungz gihgou ciensim cawjnieb、caezcienz ceihleix、baengh ndei guh ak. Hwnqguh gij giekdaej sezsih ginhyungz ancienz ndei yungh. Onjbouh hwngfat yiengh yinzminzbi soqcih. Gyavaiq hwnqguh Sanghaij Gozci Ginhyungz Cunghsinh. Cienzmienh gyarengz gamguenj ginhyungz, cunghyangh caeuq deihfueng gyaak doxgap gamguenj, gyalai swhyenz caeuq fuengfap cawqleix fungyiemj, cauhlaeb aen dijhi fuengzre vaqgej fungyiemj, baujcang ginhyungz byaij onj yamq maenh.
Caet、Gya’gvangq Yiengh Doiq Rog Hailangh Suijbingz Sang, Haicauh Aen Buenzmienh Moq Gapguh Caezhingz
Dawzmaenh hailangh doxgap、doxik caezhingz dwg gij yendaiva yiengh Cungguek itdingh aeu baenzneix guh. Onjbouh gyadaih hailangh hawj cidu doiqciep gozci, henhoh aen dijci lai mbiengj guh gaicawx, haigvangq aen baenqloek gozci, aeu hailangh coi gaijgwz coi hwngfat, caeuq seiqgyaiq gak guek caezyiengj seizgei、doengzcaez hwngfat.
(21) Lai gag bae gyadaih hailangh. Doiqciep gij ginghmou gveihcwz biucinj sang gwnz gozci, aeu hangz fugsaeh guhdaeuz gyalai cinjhaeuj hawciengz caeuq lingjyiz hailangh, gyalai aen lingjyiz caeuq gvaengxdieg mbiengj raeuz gag doiq rog hailangh. Gyavaiq yamqdin doihaeuj dinghlaeb gij douzswh hezding gvaengxdieg caeuq song mbiengj gaicawx, gyahung aen vangjloz swyouz mouyizgih biucinj sang. Gaijndei gij baijbouh gvaengxdieg hailangh, dajcauh giz diegsang hailangh lai cungj lai yiengh. Hengzguh aen canloz swnggaep giz diegsawq mienx gvaeh haeujok, engq ndei dwk hwnqguh Haijnanz Swyouz Mouyiz Gangj. Doengbuenz maeuzveh ndabaij hwnqguh aen bingzdaiz hungnaek hailangh gapguh gohgi cauhmoq、yiengh gaicawx fugsaeh、hwngfat canjnieb daengj. Doinyoengx yinzminzbi dwk haeuj gozci, swnggaep hailangh gij hanghmoeg swhbwnj, hwnqguh aen dijhi ndaej gag guhcawj gaemhanh yinzminzbi hamj gyaiq ceihawj. Doihaeuj gaijgwz ceihleix ginghci ginhyungz daengx seiqgyaiq, doinyoengx cauhlaeb caeuq henhoh gwnz seiqgyaiq yiengh ginghci cizsi goengbingz goengcingq、hailangh bauyungz、doxgap caezhingz haenx.
(22) Doinyoengx gaicawx cauhmoq hwngfat. Coihawj doiq rog gaicawx hwnj ndei raenhamq, gyavaiq hwnqguh aen guekak gaicawx. Doinyoengx hawciengz bienq lai cungj lai yiengh caeuq gij gaicawx ndaw rog caemhcaez hwngfat, gaijndei swnggaep huqyiengh gaicawx, gyalai guh huqgyang gaicawx、loegsaek gaicawx, doinyoengx cingouj cuzgouj doxdaengh hwngfat. Gyarengz hwngfat yiengh gaicawx fugsaeh, haeujcoengh yiengh gaicawx fugsaeh cuzgouj, laeb caezcienz aen cidu guenjleix gij mbawdan gimq guh yiengh gaicawx fugsaeh hamj gyaiq, hawj gij gaicawx fugsaeh engqgya hab biucinj. Cauhmoq hwngfat yiengh gaicawx soqcih, miz bouhloh bae gyahung hailangh aen lingjyiz soqcih. Daezswng gij rengz hawj bingzdaiz coinyoengx gaicawx, haeujcoengh hwngfat yiengh densangh hamj gyaiq daengj gij hangznieb moq vunqsik moq neix. Laebcaez gij gihci guenjceih cuzgouj caeuq saemjcaz ancienz.
(23) Haigvangq aen diendeih suengyiengq douzcienz gapguh. Caiq dajcauh gijndei daeuj supyinx vaiswh, guh daengz “cinj haeuj caemh cinj guh”, sukgemj mbawdan gimq vaiswh haeuj hawciengz, coihawj vaiswh youq ndaw guek caiq douzswh. Laebcienz aen dijhi baujcang fugsaeh vaisangh douzcienz, cienzmienh doeksaed yiengh dakdaih gozminz, coihawj soqgawq hamj guek baedauq youh vaiq youh bienh youh ancienz, dajcauh aen vanzging hawj cidu ronghcingx onjdingh ndaej liuh daengz. Mizyauq guenjleix doiq rog douzcienz, laebcaez aen dijhi youq rog guek guh lai yiengh fugsaeh, coihaeuj gaicawx douzcienz baenz aen cingjdaej ndeu, dazyinx diuzlienh canjnieb diuzlienh gunghawj hableix miz bouhloh hamj gyaiq baijbouh.
(24) Hwnj mbaek sang caez guh “it rangh it loh”. Gyarengz caeuq aen guekgya caez guh de doiqciep canloz, gyarem doengbuenz guenjleix gij gviveh gapguh. Gyalaeg hawj gij sezsih giekdaej “lienzdoeng geng”、gveihcwz biucinj “lienzdoeng unq”、caeuq gij yinzminz aen guekgya caez guh de “sim lienzdoeng”, nda ndei gij vangjloz seiqlengq doxlienz doxdoeng, caemhcaez doihaeuj gij gunghcwngz hungnaek baenz biugeiq caeuq gij hanghmoeg beksingq gwndaenj “iq youh ndei”. Daezswng gij suijbingz hwngfat Cungh Ouh (Ya) banhlez. Gyavaiq hwnqguh diuz roen moq baihsae doeng haij. Gyalaeg gaicawx、douzcienz、canjnieb、yinzvwnz fuengmienh saedcaih gapguh, haigvangq aen diendeih moq gapguh loegsaek hwngfat、yinzgungh cinwngz、ginghci soqcih、veiswngh gengangh、lijyouz、nungzyez daengj. Caezcienz aen dijhi douzcienz comzcienz lai yiengh、ndaej lienzdaemh、gaem ndaej fungyiemj. Gyarengz baujhoh gij leih’ik youq rog guek.
Bet、Gyavaiq Gij Yendaiva Nungzyez Lajmbanj, Netsaed Doicaenh Cienzmienh Guhhoengh Lajmbanj
Gij yendaiva nungzyez lajmbanj gvanhaeh daengz daengxbuenz caeuq cingzsoq gij yendaiva yiengh Cungguek. Dawzdingh aeu gaijgez ndei gij vwndiz “sam nungz” dangguh hongsaeh daengx Dangj gaiq ceiq youqgaenj de, coihaeuj singz mbanj yungzhab hwngfat, lienzdaemh gyamaenh gya’gvangq gij cwngzgoj haenqrengz duetgungz, doinyoengx lajmbanj daihdaej bwhmiz gij diuzgienh ndwenngoenz ciuhneix, gyavaiq hwnqguh aen guekak nungzyez.
(25) Gyaak gij rengz nungzyez gyoebhab swnghcanj caeuq hawj nungzyez lai ndei lai sou. Dingjmaenh caez ca canjliengh canjnwngz、swnghcanj swnghdai、demcanj demsou, doengbuenz maeuzveh hwngfat yiengh nungzyez gohgi、yiengh nungzyez loegsaek、yiengh nungzyez maenhndei、yiengh nungzyez binjbaiz, hawj nungzyez baenz aen canjnieb hung yendaiva bae. Gyarengz hengzguh yiengh saeh lwnz moq lai ok haeuxgwn cien ik gaen, gyaak bonjsaeh bauj gunghawj haeuxgwn doengh gij nungzcanjbinj youqgaenj neix. Soujmaenh diuz sienqhoengz reihnaz, dawz yiemz ciemq bouj doxdaengh, doengbuenz maeuzveh nda ndei dieg reihnaz. Caetliengh sang bae doihaeuj hwnqguh gij reihnaz biucinj sang, gyarengz baujhoh dieg namhndaem caeuq gyoebhab leihyungh diegndaengq, daezswng gij caetliengh reihnaz. Haeujlaeg saedhengz yiengh saeh guhhoengh hangzceh, doicaenh munaemj cauh ok gij nungzgih canghbei gvairaeh akmaenh、hab diegbo diegbya aeuyungh, coihawj reihnaz ndei cehfaen ndei nungzgih ndei fuengfap ndei ndaej comzbaenz lai raenhamq. Dawzmaenh nungzyez linzyez muzyez yizyez caez guh, hwngfat yiengh nungzyez yungh sezsih ciuhneix, cauhlaeb aen dijhi gunghawj gijgwn lai cungj lai yiengh. Hwng guh yiengh laj faex ndaem ciengx, guh’ak aen canjnieb ndoengfaex diegnywj. Onjdingh gij gvanhaeh bau diegdeih, yamqonj doihaeuj gij sawqdiemj baudieg lwnz ngeih daengz geiz le caiq gyaraez samcib bi. Lai guh gij ginghyingz nungzyez miz yiengh gveihmoz habdoh, engq ndei dwk gyalai gij cawjdaej ginghyingz nungzyez yienghmoq, laebndei aen dijhi ndawbiengz fugsaeh nungzyez fuengbienh ndeivaiq, coihawj gyoengq nungzhoh iq caeuq gij nungzyez ciuhneix hwngfat ndeindei hamzciep.
(26) Doihaeuj hwnqguh cungj lajmbanj hab youq hab hong youh gyaeundei. Bae hag bae yungh gij gingniemh “gunghcwngz cien fanh”, yawj dieg dingh ndei aen gihci hwnqguh lajmbanj, faen loih miz bouhloh、baenz benq guhhoengh lajmbanj, cugbouh hawj lajmbanj gij sezsih giekdaej engq caezcingj、yiengh fugsaeh vunzlai engq bienhleih、giz vunzyouq engq cwxcaih. Caemhcaez gaijndei aen baijbouh haw mbanj, doinyoengx doengbuenz gviveh hwnqguh guenjhoh gij sezsih giekdaej ndaw yienh. Doxgap caez guenj gyanghoeng diegguek ndaw yienh, yamqonj gyoebhab cingjceih diegdeih daengx yienh, lienzdaemh cingj ndei aen vanzging vunzyouq lajmbanj, aeu cungj cingsaenz dok ding daeuj gaijgez doengh gij vwndiz gaij hwnq diengzhaex lajmbanj、nyapnyaj humx mbanj, gyavaiq gaij giz yaez gvaq saedceij lajmbanj bienq ndei liux bae, dajcauh aen vanzging ndeiyouq lajmbanj. Hwngfat gij ginghci ndaw yienh gak miz daegsaek, haifat lai cungj lai yiengh nungzyez, doinyoengx lajmbanj it ngeih sam canjnieb yungzhab haeujlaeg, ganq hung doengh aen canjnieb miz gij daegsaek lajmbanj, laebndei gij gihci lienzhab nungzyez daiqdoengh nungzyez, coihawj nungzminz ndaej onjdingh demlai souhaeuj.
(27) Lai hawj gij cwngcwz guh’ak nungzyez、ndeileih lajmbanj、nungzminz ndaej fouq haenx engqgya raenhamq. Laeb caezcienz aen gvaenghgaq douzhaeuj lai yiengh miz caizcwng baujcang gonq、ginhyungz cungdenj nyengqcoh、ndawbiengz lailai caeuqfaenh haenx, saedbauj mboujduenh gyaak douzhaeuj guhhoengh lajmbanj. Baujhoh caeuq diuhhwnj nungzminz maij guh reihnaz dajndaem haeuxgwn, lai yungh gij cwngcwz gyagwz、boujdiep、baujyiemj daengj bae haeujcoengh caeuq boiqhab. Gyarengz boizbouj gij leih’ik dieg cujyau ok haeuxgwn, hawj dieg ok haeux caeuq dieg siu haeux hamj sengj doxbouj leih’ik. Gyarem guenjleix sougai caeuq bwhcwk haeuxgwn. Doicaenh cingouj lai cungj lai yiengh nungzcanjbinj, coicaenh mouyiz caeuq swnghcanj doxdaengh. Doinyoengx gij yausu singz mbanj doxdoeng, gikcoi gak loih vunzcaiz roengz mbanj guh fugsaeh caeuq cauhnieb guhhong. Mbaet yungh gyonj yungh gij dieg dajhwnq guh gaicawx cizdij lajmbanj, ciuqfap buenz ok yungh ndei gij dieg caeuq ranz cuengqhoengq, faenloih baujcang gij dieg lajmbanj hwngfat yungh haenx. Haeujcoengh hwngfat gij cizdij ginghci lajmbanj yienghmoq.
Doengbuenz maeuzveh laebhwnj gij gihci ciengzseiz fuengzre dauq gungz bienq gungz, dingjmaenh dawzcinj bangfuz, caezcienz yiengh baujcang baujdaej, lai baengh haifat bae bangfuz, lai hawj gyoengqde gag rox roengzrengz, faen caengz faen loih bangfuz giz dieg mbouj fatdad, laebcaez gij cwngcwz haeujcoengh doengh aen yienh youq mboengq guhhoengh lajmbanj aeu lai bae bangfuz haenx, saedbauj mbouj ok gij saeh baenz buek dauq gungz bienq gungz.
Gouj、Gaijndei Gij Baijbouh Ginghci Gvaengxdieg, Coicaenh Gvaengxdieg Doxdaengh Hwngfat
Gvaengxdieg doxdaengh hwngfat dwg gij yendaiva yiengh Cungguek bonjfaenh aeu baenzneix guh. Langh’ok gij yauqgoj baengh aen canloz gvaengxdieg doxdaengh hwngfat、aen canloz hungnaek gvaengxdieg、aen canloz cujdij gunghnwngzgih、aen canloz hawsingzvaq yienghmoq doxdaeb, gaijndei baijbouh gij swnghcanjliz hungnaek, langh’ok gij rengz gyaeujdemmaj gvaengxdieg youqgaenj, cauhlaeb aen baijbouh ginghci gvaengxdieg caeuq aen dijhi gyanghoeng diegguek gijak doxbouj、ndeivaiq hwngfat.
(28) Gyaak gvaengxdieg doxdaengh hwngfat. Maenhsaed doinyoengx Baihsae daih haifat cauxbaenz gvaenghgaq moq、Doengbaek cienzmienh saenqhwng aeundaej cungbyoengq moq、dieg Cungqgyang gyavaiq hwnghwnj、dieg Baihdoeng gyavaiq doihaeuj yendaiva, coicaenh Baihdoeng Cungqgyang Baihsae、Baihnamz Baihbaek doxdaengh hwngfat. Gyamaenh gyaak gij rengznyoengx oklaeng ranghdieg Gingh Cinh Gi、Cangzsanhgoz、Yez Gangj Au Davanhgih ndeivaiq hwngfat. Laebdaeb doicaenh fazcanj ranghdieg ginghci Dahcangzgyangh、baujhoh gij swnghdai ranghdieg Dahvangzhoz caeuq hawj de ndeivaiq hwngfat. Ciuq biucinj sang caetliengh sang bae hwnqguh aen hawsingz yendaiva Yungzanh Sinhgih, daezswng gij daengjgaep gvaengx ginghci dieg Cwngzduh Cungzging. Gikcoi gak dieg langh’ok gij ndei、gij ak bonjfaenh, haeujcoengh doengh aen sengj ginghci ak dawz rapnaek, youq gwnz roen doihaeuj gij yendaiva yiengh Cungguek guh yienghndei byaij youq baihnaj. Gyarengz yungh cwngcwz mbouj doengz bae haeujcoengh, hwngfat guhhoengh gizdieg doenghbaez guh gwzming、gizdieg minzcuz、gizdieg henzguek daengj.
(29) Coicaenh gvaengxdieg gapfwngz hwngfat. Doihaeuj hwnqguh diuz doengloh hung hamj gvaengxdieg hamj ranghdah, gyaak gij sezsih giekdaej gvaengxdieg doxlienz doxdoeng. Lai hawj baenz gyoengq hawsingz youqgaenj doxgap doxlienz hwngfat, coihaeuj diuzlienh cauhmoq diuzlienh canjnieb gvaengxdieg ndeivaiq gapguh. Doinyoengx gyoengq hawsingz duenhgyang Dahcangzgyangh daengj gyavaiq hwngfat, gungganq laebguh geij aen hawsingz guhdaeuz ndaw gvaengxdieg, engq ndei langh’ok gij rengz doengh dieg hamj gvaengxdieg lienzgiet haenx bae cengjdingj daiqdoengh. Gyalaeg hamj hingzcwnggih doxgap, laeb caezcienz gij gihci hamj gvaengxdieg doengbuenz maeuzveh、gapguh canjnieb、caemh ndaej ndeicawq daengj, lai damqra yiengh ginghci ranghdah daengj.
(30) Gaijndei aen gvaenghgaq gyanghoeng diegguek hwngfat. Gyarem hengzguh aen canloz cujdij gunghnwngzgih, baujciz aen gvaenghgaq dieg bienq hawsingz、dieg cujyau ok nungzcanjbinj、dieg cungdenj baujlouz swnghdai goengnaengz daengx aen onjdingh, guhsaeq doekdingh dieg goengnaengz daegbied, laebndei aen gihci haeujcoengh cwngcwz caeuq aen gihci gaujhaed bingzgyaq. Doinyoengx gaijndei aen baijbouh gij canjnieb hab canloz、gij dieggoek nwngzyenz swhyenz daengj. Laebndei aen dijhi gveihva gyanghoeng diegguek, doeksaed gaijndei diuz sienq gaemhanh reihnaz caeuq nazgoek ciengxlwenx、diuz sienqhoengz baujhoh swnghdai、diuz gyaiq hawsingz haifat daengj, faen dieg faen loih miz cabied、guh cingsaeq bae guenjceih yunghcawq. Hawj gaep cwngfuj aen sengj engq miz gienz gag guhcawj doengbuenz maeuzveh dieg dajhwnq, damqra cungj guhfap saedhengz gij cungjsoq yungh dieg dajhwnq ciuqcoengz mboengq gveihva bae guenjhaed, saedhengz gyonjhab gij dieg gaemmiz caeuq gij dieg demgya bae gyoebhab gunghawj diegdeih.
(31) Haeujlaeg doicaenh gij hawsingzvaq yienghmoq aeu vunz guh goek. Hableix miz bouhloh doicaenh gij vunzgyaeuj daj nungzyez senj ok bienqbaenz vunzgai, doihengz aen cidu youz gizdieg ciengz youq daenghgeiq hugouj daezhawj yiengh fugsaeh caezcaemh ceiq noix. Doicaenh gij hawsingz hungloet hungdaih de ceihleix hab ciuhneix, gyavaiq gyoengq hawsingz gyoebconz baenz caemh aen ndeu caeuq gvaengx hawsingz bienqbaenz aen singz doengzcaemh, gaijndei gij gveihmoz gapgyaq hawsingz, coicaenh singz hung rauh iq caeuq haw iq doxdaengh hwngfat、cingsaeq gyonjcomz baijbouh. Faenloih doicaenh hwnqguh yiengh hawsingz aeu yienhsingz guh gaiqdak youqgaenj, gyaak naengzlig cengjdingj canjnieb caeuq engq rox guh yiengh fugsaeh vunzlai caezcaemh. Dingjmaenh hawsingz baengh rengzndaw bae hwngfat, gyarengz hengzguh hawsingz vuenhmoq, hwnqguh aen hawsingz yinzminz hab yiengh yendaiva cauhmoq、ndeiyouq、gyaeundei、naihniu、vwnzmingz、maenhraeh. Ndeindei hwnqguh gij hawsingz henzguek.
(32) Gyarengz haifat leihyungh baujhoh dieghaij. Dingjmaenh doengbuenz maeuzveh dieghawq dieghaij, gyaak gij bonjsaeh maeuzveh guenjleix dieghaij, doinyoengx gij ginghci dieghaij ndeivaiq bae hwngfat, gyavaiq hwnqguh aen guekak dieghaij. Lai roengzrengz cauhmoq gij gohgi dieghaij, gyamaenh daezswng gijak hangz cauhguh canghbei dieghaij, guhhung gij canjnieb ngamq hwng dieghaij, hwngfat hangz fugsaeh gwnz haij daehyinh ciuhneix. Guh yiengh saeh diucaz caeuq cazyawj gamcaek dieghaij, doicaenh haifat leihyungh gij nwngzyenz swhyenz dieghaij caeuq aen dauj gwnz haij, gyarengz baujhoh coihfuk gij swnghdai vanzging dieghaij youqgaenj. Gyaak aen dijhi cengjdingj baujcang gaujcaz giz laeg dieghaij caeuq gyaeujdigiuz. Laemxsim henhoh gij gienzik caeuq ancienz dieghaij, gyaak gij bonjsaeh gwnz haij caepfap caeuq saeh gwnz haij dawzfap.
Cib、Gikfat Daengx Aen Minzcuz Ak Cauhmoq Ak Cauhguh Vwnzva, Guhhoengh Yiengh Vwnzva Sevei Cujyi
Vwnzva mwnhoengh hwngvuengh dwg yiengh geiqhauh youqgaenj gij yendaiva yiengh Cungguek. Dingjmaenh aen diegvih Majgwzswh Cujyi dazyinx yisiz hingzdai, ingbaengh gij vwnzmingz Cunghvaz gvangqlangh naekna, swnh’wngq aen cauzliuz saenqsik gisuz hwngfat, hwngfat yiengh vwnzva sevei cujyi miz gij daegsaek Cungguek seizdaih moq youh miz gij rengzak dazyinx swhsiengj、gij rengzak gietcomz cingsaenz、gij rengzak dazyinx gyaciz aeuyiengq、gij rengzak yingjyangj seiqgyaiq, maenhsaed doicaenh dajcauh aen guekak vwnzva.
(33) Hwngcienz caeuq hengzguh aen hwzsinh gyacizgvanh sevei cujyi. Engq rox yungh sim bae hag、bae cienzgangj son’gyauq gij lijlun cauhmoq Dangj raeuz, laebdaeb mbouj cuengqsoeng bae yungh Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj comz sim couq hoenz. Cauhmoq hengzguh hangh hong muhag caeuq laebndei gij lijlun Majgwzswh Cujyi, gyavaiq cauhlaeb aen dijhi miz gij cihsiz cezyoz sevei gohyoz Cungguek bonjfaenh. Aeu aen hwzsinh gyacizgvanh sevei cujyi dazyinx guhhoengh vwnzva, lai baengh vwnzva ciengx ceiqheiq、ganq cingzdiuh, rungxciengx gij cingsaenz simsingq daengx aen minzcuz caengqheiq fwdfwd bae buekguh haenx. Hwngcienz yiengh vwnzva lauxsaed souj saenqyungh、yiengh vwnzva seuqcengh. Gyarengz caeuq gaijndei gaiq hong swhsiengj cwngci, doicaenh hwnqguh yiengh vwnzva hagdangz, yungh ndei swhyenz saekhoengz, gyarengz son’gyauq hawj bouxcoz nyezrauh miz lijsiengj saenqniemh. Doengbuenz maeuzveh gaiq hong hwnqguh yiengh cingsaenz vwnzmingz hawsingz lajmbanj, hawj beksingq engq gangj vwnzmingz caeuq ndawbiengz engqgya vwnzmingz. Gyarengz guh ndei guenj ndei gij neiyungz gwnz vangj. Engq rox baengh saenqsikvaq ceihleix gij hongsaeh vwnzva.
(34) Roengzrengz guhhoengh gij saehnieb vwnzva. Cauh’ok vwnzva swnghdai ndei, daezswng gij naengzlig guh vwnzva cauhnduj, doinyoengx doengh aen lingjyiz baudaengz sinhvwnz okbanj、gvangjbo denyingj densi、vwnzyoz yisuz daengj dajcauh cozbinj maenhndei. Gungganq cauxbaenz aen doih vunzcaiz vwnzva maenhndei gveihmoz hungloet、gapgyaq hableix、laebsim cauhmoq. Gvangqlangh guh gij vwnzva hozdung ginzcung caeuqfaenh, ingbaengh hulenzvangj bae guhhoengh yiengh vwnzyi vunzcungq ngamq ok. Gyalaeg doengh aen meizdij gaemgoek de guh baenzroix bengwz, doicaenh sinhvwnz senhconz caeuq baklinx vangjloz doxcaez guenjleix, gyaak bonjsaeh dazyinx yiengh baklinx gaemgoek. Haeujlaeg bae guh gaiq hong cienzswnj hwngfat gij vwnzva conzdungj maenhndei Cunghvaz, doinyoengx baenz hidungj bae baujhoh caeuq gyoebgyonj gamguenj dukcaz vwnzva yizcanj, gyarengz mizyauq baujhoh caeuq doq yungh doq swnj doengh aen singz mizmingz、dieghaw、aen cin aen mbanj miz lizsij vwnzva haenx. Laeb ndei yungh ndei gij vwnzva gunghyenz guekgya. Cauhlaeb aen dijhi maigeiq gij vwnzmingz Cunghvaz. Dingjmaenh vwnzva ndeileih beksingq, engq ndei engq raenhamq guh yiengh fugsaeh vwnzva vunzlai caezcaemh. Doicaenh hwnqguh aen biengz hwng doegsaw. Maeuzveh lai guh yiengh dijyuz vunzlai lienhndang caeuq guh yiengh dijyuz doxdax, gyavaiq hwnqguh aen guekak dijyuz.
(35) Gyavaiq hwngfat yiengh canjnieb vwnzva. Laebndei aen dijci guenjleix vwnzva caeuq aen gihci swnghcanj ginghyingz vwnzva. Laebcaez aen dijhi yiengh canjnieb vwnzva caeuq aen dijhi hawciengz, ganq ok aen giyez vwnzva caeuq gij binjbaiz vwnzva maenhndei, saedhengz aen canloz aeu vwnzva canjnieb hanghmoeg hungnaek bae ragdoengh, saedhengz gij cwngcwz hawjrengz guh vwnzva ginghci. Doicaenh vwnzva caeuq gohgi yungzhab, doinyoengx vwnzva gensez bienq soqcih bienq cinwngz、cienjhingz baenz yiengh saenqsik, hwngfat gij vwnzva hangznieb najmoq. Dazyinx gveihfan vangjloz vwnzyoz、vangjloz youzhi、vangjloz yawjdingq daengj byaij ndei byaij cingq, gyarengz gwnzvangj baujhoh bouxcaengzhung. Doicaenh hwnqguh aen guekak lijyouz, lai ok yiengh lijyouz canjbinj gig ndei, engq ndei fugsaeh lijyouz. Hawj haeuj guek daeuj lijyouz engqgya fuengbienh engqgya riengz hwnj gozci. Doicaenh vwnzva caeuq lijyouz haeujlaeg yungzhab, roengz rengz hung guh vwnzva lijyouz, aeu vwnzva bae coengh ginghci sevei fazcanj.
(36) Lai hawj gij vwnzmingz Cunghvaz cienzboq bae gvangq yingjyangj bae gyae. Laebndei aen dijci gihci guh gozci cienzboq, lai yungh gaiqdak moq fuengsik moq cienzboq, roengzrengz hwnqguh dieggoek youqgaenj, gyaak gij naengzlig doengh aen meizdij gaemgoek youq gwnz seiqgyaiq cienzboq, hawj raeuz youq gwnz seiqgyaiq ndaej gangj lai gangj gok, gangj ndei gij gojgaeq Cungguek, mbebaij gij yienghsiengq ndeisaenq、dwggyaez、habgingq Cungguek. Gyarengz bae yenzgiu ranghdieg caeuq guekgya, hawj gij gozci cienzboq raeuz guh ndaej engq ndei. Lai guh vwnzmingz doxgyau doxhag, lailai caeuq guekrog doxbyaij doxgap, gikcoi gij giyez vwnzva caeuq gij vwnzva canjbinj maenhndei engq lai byaij coh seiqgyaiq.
Cib’it、Haenqrengz Baujcang Caeuq Gaijndei Gwndaenj Beksingq, Netsaed Doicaenh Daengxcungq Yinzminz Doengzcaez Fouqmiz
Guhbaenz gij siengjmuengh yinzminz gvaq saedceij gyaeundei dwg giz hwnjdin caeuq giz roengzdin guh gij yendaiva yiengh Cungguek. Seizseiz aeu caenh rengz bae guh、aenq rengz bae guh, gyarengz guh gij hongsaeh ndaej ik doh、ndaej dajdaej、ndaej baujdaej beksingq gwndaenj haenx, gaijgez ndei gij vwndiz yinzminz ginzcung gaenjgip hojnanz youheiq deqmuengh gaijgez de, dwkdoeng diuz miengloh ndawbiengz dox baedauq, hawj ndwenngoenz beksingq yied ngoenz yied ndei.
(37) Coicaenh cukgaeuq youh onjmaenh dwk couhnieb. Haeujlaeg saedhengz aen canloz couhnieb youq gonq, laebcaez aen gihci coicaenh couhnieb, cauhlaeb yiengh hwngfat ndeileih couhnieb. Lai guh canjnieb caeuq couhnieb doxgap, lailai gungganq yiengh hong moq gangjvei moq, haeujcoengh giyez onj gangjvei gya gangjvei. Laebndei aen gihci aeu vunz yungh vunz doxdaengh doxhab, laebcaez aen cidu baenzciuh ndaej sonhag dinfwngz guhhong, gyarengz dazyinx baenzlawz genj hangz caeuq yungh vunz, roengzrengz gaijgez yiengh doxdawz dinfwngz mbouj hab canjnieb aeuyungh. Laebndei aen dijhi haeujcoengh couhnieb caeuq fugsaeh vunzlai, onjdingh caeuq gyadaih gauhyau bizyezswngh、nungzminzgungh、bouxbing duiyiz daengj gyoengqvunz cungdenj neix couhnieb, doinyoengx yiengh gag nda hong、yiengh hong moq cangqheiq hwngfat. Gyarengz haeujcoengh cauhnieb, hawj cauhnieb engq ak daiqhwnj couhnieb. Laebndei aen dijhi lauzdung byauhcunj caeuq aen gihci doxyaeng hezdiuz gij gvanhaeh lauzdung, gyarengz baujcang gij gienzik bouxguhhong, dajcauh aen vanzging couhnieb goengbingz onjswnh. Laebndei gij yiengh bingzguj yingjyangj couhnieb caeuq gamcaek yawhgingj, gyoebhab wngqdoiq gij yienghsaeh vanzging baihrog bienqvaq caeuq gisuz moq yingjyangj couhnieb.
(38) Laebndei aen cidu faenboiq souhaeuj. Dawzmaenh ciuq hong faenboiq guh goek、lai yiengh faenboiq caezmiz, hawj gihminz souhaeuj youq ndaw gozminz souhaeuj faenboiq ciemq faenh engq lai, hawj cienzhong youq ndaw baeznduj faenboiq ciemq faenh engq lai. Laebcaez aen gihci baeznduj faenboiq gak loih yausu youz hawciengz bingzgyaq goenglauz、ciuq goenglauz gietdingh cienzhong, coicaenh boux guh lai ndaej lai、boux maenhraeh ndaej lai、boux cauhmoq ndaej lai. Laebndei aen gihci gietdingh、hableix gyalai、bauj ndaej ceihawj gij cienzhong bouxguhhong, doihengz aen cidu cizdij doxyaeng cienzhong, laebcaez hangh gihci diuzcingj aen biucinj cienzhong ceiq daemq, gyarengz hungzgvanh dazyinx giyez faenboiq cienzhong. Lai miengloh hawj gyoengq gihminz hawsingz lajmbanj gyalai gij souhaeuj oklaeng caizcanj. Gyarengz diuzcez gvaehsuiq、gij baujcang ndawbiengz、gij senjnod ceihawj daengj guh caiq faenboiq. Coicaenh caeuq gveihfan gij saehnieb goeng’ik swnzsienh hwngfat. Gveihfan aen bouhloh faenboiq souhaeuj caeuq aen gihci cwkrom cienzcaiz, haeujcoengh gaenxguh cauhmoq habfap baenzfouq, gikcoi boux fouq gonq daiq boux fouq laeng caezcaemh baenzfouq. Saedhengz aen giva hawj gihminz singz mbanj demsou, caen hawj gyoengqvunz souhaeuj noix de ndaej demgya souhaeuj, onjbouh gyalai gyoengqvunz souhaeuj cungdaengj, hableix diuzcez gij souhaeuj sang gvaqbouh, gimqhaed gij souhaeuj mbouj habfap, doinyoengx guhbaenz ciuq yiengh lwggyamj bae faenboiq.
(39) Banh ndei gij gyauyuz hawj yinzminz habhoz. Hengzguh aen gunghcwngz guh ndei son vunz seizdaih moq, coicaenh aen godangz swhsiengj cwngci caeuq aen godangz sevei ndeindei yungzhab, gyarengz son’gyauq dijyuz、meijyuz、lauzdung, laebndei aen dijhi bingzgyaq gyauyuz. Laebcaez aen gihci boiqceiq swhyenz gyauyuz caeuq vunzgyaeuj bienqvaq doxngamj, gyadaih gung gij swhyenz gyauyuz hawj gij lwghag cingh riuzhaeuj hawsingz de. Onjbouh gyadaih aen gvaengx doegsaw mbouj sou cienz, damqra gyaraez gij nienzhanh yivu gyauyuz. Doinyoengx gihcuj gyauyuz engq maenh engq ndei, doengbuenz maeuzveh youh ndei youh bingzyaenx banh yivu gyauyuz、youh ndei youh ik doh banh yiengh gyauyuz duenh caengz haeuj hag, gyalai gij swhyenz banh bujdungh gauhcungh, banh ndei yiengh gyauyuz daegbied、yiengh gyauyuz cienmonz. Doinyoengx gauhdwngj gyauyuz guh ndei guh lai, gyalai ciu gyoengq hagseng doeg gij bwnjgoh maenhndei. Gyaak gij naengzlig cizyez yozyau banhhag, hwnqguh gij gauhciz yenyau gag miz daegsaek de. Dazyinx gveihfan minzbanh gyauyuz hwngfat. Gyadaih doiq rog hailangh yiengh gyauyuz suijbingz sang. Hwngcienz gij cingsaenz gyauyuzgyah, ganq baenz aen doih lauxsae ak son rox gyauq, engq ndei baujcang gij dakdaih lauxsae. Laebcaez aen gihci hawj hagdangz gyadingz ndawbiengz dox boiqhab ganq lwghag. Haeujlaeg hengzguh aen canloz yungh soqcih gisuz son hag, gaijndei yiengh fugsaeh vunzlai caezcaemh coengh baenzciuh hagsib.
(40) Laebcaez aen dijhi ndawbiengz baujcang. Laebndei caemhcaiq doekguh aen cidu daengx guek doengbuenz maeuzveh yiengh baujyiemj ciengxlaux dakdaej, gyavaiq laebhwnj aen dijhi hawj yiengh baujyiemj ciengxlaux miz caengzmbaek lai、miz daemxcengj lai, laebcaez gihci bae doekdingh caeuq diuzcingj dakdaih, cugbouh daezsang gij cienzgoek ciengxlaux gyoengq gihminz singz mbanj. Laebcaez aen dijhi baujcang ywbingh lai mbaek, doicaenh sengjgaep doengbuenz maeuzveh yiengh baujyiemj ywbingh dakdaej, gaijndei gij cwngcwz comzcawx gijyw、yihbauj ceihawj caeuq yungh gij cienzngaenz gietlw. Gya’gvangq yiengh baujyiemj saetnieb、goengsieng, laebhwnj laebcaez aen cidu baujcang boux deng cizyez sienghaih. Laebndei gij cwngcwz senj sebauj ciep sebauj, hawj doengh boux gag nda hong、nungzminzgungh、doengh boux guh yiengh hong moq lai bae caeuqfaenh baujyiemj. Laebcaez aen cidu cingsuenq baujyiemj ndawbiengz, laebdaeb vehcienj swhbwnj guekmiz bae demgya sebauj gihginh, laebcaez aen gihci hawj sebauj gihginh ndaej ciengzgeiz couzcomz、gyonjconz ndayungh、bauj goek ok leih caeuq gamguenj ancienz. Lai hawj gak loih sanghyez baujyiemj okrengz boujcung gak cungj baujcang. Gaijndei aen sebauj gunghgung fuzvu bingzdaiz daengx guek caemhyungh caiqlij guhndei yiengh guenjleix caeuq fugsaeh gvaqfwngz banhleix. Laebcaez aen dijhi ndawbiengz gouqbang. Laebndei aen dijhi baujcang fugsaeh gyoengq bouxgeq gag youq、lwgnyez loemq hoj、bouxbueg daengj. Laebhwnj laebcaez aen cidu bang banh begsaeh. Dawzmaenh aen gihbwnj gozcwz sai mbwk bingzdaengj, baujcang gij gienzik habfap mehmbwk lwgnyez. Gyarengz fugsaeh baujcang bouxbing duiyiz.
(41) Doinyoengx fangzdicanj coh ndei hwngfat. Gyavaiq laebhwnj yiengh vunqsik moq hwngfat fangzdicanj, laebndei gij cidu giekdaej guh ranzgai haifat、yungzswh、siugai daengj. Gaijndei gaiq hong gunghawj gij ranz bauj miz youq, hawj gyoengqvunz lingx cienzhong hawsingz caeuq gak loih ranzhoj miz ranzyouq. Yawj singz ok geiq lai gunghawj gij ranz guh gaijndei haenx. Hwnq gij “ranz ndei” ancienz cwxcaih loegsaek gvairaeh, hengzguh aen gunghcwngz gaijndei ranzyouq caeuq yienghsaeh gaijndei gij fugsaeh vuzyez. Laebhwnj aen cidu ancienz guenjleix ranzyouq baenzciuh.
(42) Gyavaiq hwnqguh aen Cungguek bouxboux ndangcangq. Saedhengz aen canloz bouxvunz ndangcangq baiz youq baihgonq, laebcaez gij dijhi aeu cwngcwz cidu gikcoi ndangcangq, hawj yienghsaeh gyaezguek veiswngh lai ik ndangvunz, hawj vunzraeuz lai ndaej gyaeu youh ndangcangq. Gyaak bonjsaeh bae guh gunghgung veiswngh, gyarengz hwnqguh aen dijhi fuengzre binghvanh, fuengzhaed gij binghlah hungnaek. Laebcaez gij gihci doxgap hwngfat caeuq ceihleix yihliuz、yihbauj、yihyoz, coi baenz faengaep yawjbingh ywbingh. Aeu guhbaenz goeng’ik guh dazyinx doiq yihyen goenglaeb gyalaeg gaijgwz benhci、gyaqcienz fugsaeh、cidu cienzhong、gyoebhab gamguenj daengj, gyarengz baujcang gij yihliuz gihgou ndaw yienh、gihcwngz haidou ywbingh. Gaijndei yihliuz gihgou goengnaengz dinghvih caeuq baijbouh, hengzguh aen gunghcwngz gyamaenh giekdaej yihliuz veiswngh, lai guh yiengh bouxboux baengh cinwngz ganq ndang guenj ndang. Gyarengz gyoebhab fuengzre gaemhanh binghnyangq, lai guh yiengh fugsaeh fuengz yw ganq guenj binghnyangq daengx diuz lienh guhcaez. Daj gak fuengmienh gyaak gij bonjsaeh gaenj yw gouq gip、bauj miz lwed yungh caeuq wngqdoiq yienghsaeh fwtfat. Gyaak gij bonjsaeh caeuq ganq ndei gij cozfungh aen doih yihliuz veiswngh. Doihaeuj cunghyihyoz cienzciep cauhmoq, lai hawj cunghyih sihyih dox giethab. Haeujcoengh cauh yw moq caeuq guh gaiqdawz ywbingh moq. Gyarengz guh yiengh ywbingh hawj vunz sim soeng uk swnh.
(43) Coihawj vunzgyaeuj gig ndei bae fatmaj. Laebcaez aen dijhi fugsaeh vunzgyaeuj goq daengz bouxboux、guenj daengz baenzciuh. Dazyinx vunzlai haengjheiq baenzgya senglwg, gaijndei cwngcwz caeuq banhfap bae haeujcoengh aeulwg senglwg, fat ok gij rengz hangh cwngcwz boujdiep ciengxlwg caeuq dingjgaeu goyinz sojdwzsui, ndei hawj doengh ranz senglwg ciengxlwg sonlwg de caencingq gyangq roengz cingzbonj. Laebndei aen cidu senglwg baujyiemj, doeksaed aen cidu senglwg yietgyaj, hengzguh aen hengzdoengh gvansim boux ngamq mizndang、aen giva gyaak gij naengzlig raekciengx caeuq gij naengzlig fuengzre seng gij lwg maj mbouj caez. Haeujlaeg haiguh gij sawqdiemj boujdiep dakciengx, lai guh yiengh dakciengx ndeidoh caeuq yiengh dozwzsoj youwzyenz doxcaez fugsaeh, cugbouh caezcienz gij cidu doxgven de. Lai guh gij fugsaeh hawj mehmbwk caeuq lwgnyez ndangcangq. Lai rox wngqdoiq bouxgeq bienq lai, laebcaez gij gihci baengh cwngcwz hawj aen saehnieb caeuq canjnieb ciengxlaux guhdoih hwngfat. Engq ndei gunghawj yiengh fugsaeh ciengxlaux ceiq noix aeu bwhmiz de, caezcienz gij vangjloz fugsaeh ciengxlaux hawsingz lajmbanj, lai roengzrengz gaijcauh gij sezsih caezcaemh hab bouxgeq yungh caeuq mbouj miz gitgaz haenx. Lai guh yiengh fugsaeh baujgen ganqciengx、ywbingh ciengxlaux dox giethab. Doihengz yiengh baujyiemj ciengzgeiz hohleix, laebcaez aen dijhi ciuqgoq gij bouxlaux ndanggyad ukmwnh, gyalai gunghawj yiengh fugsaeh ganq boux dauqfuk cangqndei、ganq boux yaek gvaqseiq. Onjdangq saedhengz cugciemh doilaeng aen bi’ndwen duiyouh fapdingh, cuengqsoeng gij cwngcwz hanh nienzgeij couhnieb、hanh gyau sebauj daengj, lai yungh bouxgeq guhsaeh, hwngfat yiengh ginghci bouxgeq.
(44) Onjbouh doicaenh yiengh fugsaeh caezcaemh ceiq noix bouxboux doxdoengz. Laebhwnj gij biucinj bingzgyaq yiengh fugsaeh caezcaemh ceiq noix bouxboux doxdoengz, laebndei gij fanveiz caeuq neiyungz yiengh fugsaeh caezcaemh ceiq noix, ceiqdingh gij moegbiu、roenloh、banhfap guh baenz yiengh fugsaeh caezcaemh ceiq noix bouxboux doxdoengz, doinyoengx yiengh fugsaeh caezcaemh engq lai caem roengz gihcwngz、cw daengz lajmbanj、ngeng coh diegrungh diegbien caeuq gyoengqvunz ranzhoj, laebcaez gij gihci boiqceiq yiengh swhyenz caezcaemh caeuq gij vunzgyaeuj ciengzseiz capyouq doxngamj haenx. Gyarengz doengbuenz suenqveh gunghawj yiengh fugsaeh caezcaemh ceiq noix ndaw yienh, laebndei aen gihci ciengzgeiz mizyauq baujcang douzhaeuj. Cienzmienh gyalaeg gaijgwz swyez danhvei.
Cibngeih、Gyavaiq Ginghci Sevei Fazcanj Cienj Baenz Yiengh Loegsaek Liuxcaez, Cauhlaeb Aen Cungguek Gyaeundei
Loegsaek hwngfat dwg guh gij yendaiva yiengh Cungguek aen daejsaek ceiq singjda he. Laebmaenh caeuq hengzguh aen leixniemh raemx saw bya heu couh dwg bya gim bya ngaenz, aeu danqdaemxdingj danqcunghuz daeuj dazyinx, doengzseiz doihaeuj gyangq danq、gemj uq、dem loeg、demmaj, cukmaenh gaiqdangj hawj swnghdai ancienz, demrengz doinyoengx loegsaek hwngfat.
(45) Lienzdaemh haeujlaeg doihaeuj gaiq hong haenqrengz fuengzceih uqlah caeuq gaijndei swnghdai hidungj. Dawzdingh vanzging baujhoh vih beksingq, cienzmienh doeksaed cingcinj gohyoz ciuqfap ceih uq, engqgya yawjnaek ceihleix goekdaeuz, gyarengz gyonj guh gemj uq gyangq danq、gaemhanh lai cungj huquqlah、ceihleix gvaengxdieg, haeujlaeg hoenx ndei ciengz ciengq henhoh mbwn lamz、raemx saw、namh seuq. Gyavaiq doeksaed aen cidu gamguenj gij uqlah goekdaeuz doekdingh aeu aen cidu cinjhawj baizuq guh goek haenx. Saedhengz yienghsaeh gyoebhab ceihleix gij huqfeiq baenzndaek. Gyarengz fuengzre gaemhanh fungyiemj vanzging, haeujlaeg doihaeuj ceihleix huquqlah moq. Laebndei gij cidu dingh biucinj、gamcaek、bingzgyaq caeuq gaujhaed swnghdai vanzging.
Dingjmaenh doengbuenz baujhoh caeuq doxgyonj ceihleix bya raemx ndoeng naz huz nywj sa, caezcaemh doihaeuj gaiq hong hungnaek baujhoh caeuq coihdauq gij swnghdai hidungj youqgaenj. Soujmaenh diuz sienqhoengz baujhoh swnghdai, cienzmienh doihaeuj hwnqguh aen dijhi gizdieg baujhoh swyenz aeu guekgya gunghyenz guhdaeuz, miz gonq miz laeng bae hwnq guekgya gunghyenz moq. Gyarengz baujhoh doenghduz doenghgo lai cungj lai yiengh. Haiguh gaiq hong bingzguj swnghdai baujhoh coihfuk guh ndaej baenzlawz yiengh. Gohyoz mbeguh gaiq hong daih ndaem faex ndaem nywj, hoenx ndei ciengz ciengq haenqrengz gung roengz hangh gunghcwngz “sam baek”. Gyarengz hwnqguh gaiqdangj baujcang gij swnghdai benqdieg Cingh Cang Gauhyenz daengj. Laebndei aen gihci lai yiengh boizbouj swnghdai, yawj dieg dingh geiq lai miengloh hawj swnghdai canjbinj canhcienz. Caiq roengzrengz doxgyoeb ceihleix caeuq baujhoh gij swnghdai doengh aen dah huz suijgu youqgaenj. Saedhengz ndei Dahcangzgyangh cib bi mboujcinj dwkbya.
(46) Gyavaiq laebguh aen dijhi nwngzyenz yienghmoq. Laebdaeb gyalai cingzsoq bae gunghawj nwngzyenz moq, miz bouhloh ancienz youh onjdangq aeu nwngzyenz moq bae lawh vasiz nwngzyenz, roengzrengz cauhlaeb aen hidungj denliz yienghmoq, dajcauh aen guekak nwngzyenz. Aeu rumz ndit raemx hwz doengh gij nwngzyenz neix lai yiengh caez yungh, doengbuenz suenqveh dangdieg gag siu roxnaeuz soengq ok baihrog, coihawj nwngzyenz cinghseuq ndeivaiq bae hwngfat. Lai yunghrengz cinghseuq yauqlwd sang bae yungh vasiz nwngzyenz, doihaeuj gaiq hong gaijcauh swnggaep meizdienh caeuq lawhvuenh meizsanq. Cienzmienh daezswng gij suijbingz hawj denliz hidungj doxbouj doxbang caeuq ancienz naihnanz, gohyoz baijbouh cou raemx cwkrom nwngzyenz, haenqrengz bae guh gij cwkrom nwngzyenz yienghmoq, gyavaiq hwnqguh cinwngz denvangj caeuq denvangj iqsaeq. Hawj gaiq gyaeujyungh nwngzyenz engq rox yungh engq lai yungh dengi, doinyoengx nwngzyenz siufeiq bienq loegsaek bienq danqnoix. Gyavaiq laebcaez gij gihci hawciengz caeuq gyaqcienz riengz aen dijhi nwngzyenz yienghmoq doxhab doxngamj haenx.
(47) Hwnjheiq onjdangq doihaeuj caeuq guh daengz danqdaemxdingj. Saedhengz aen cidu hanh aen cungjsoq youh hanh yunghsoq danq baizcuengq. Haeujlaeg gaijcauh mbaet nwngz gyangq danq. Doinyoengx meizdan caeuq sizyouz siufeiq daemxdingj. Laebndei aen dijhi gyoebsuenq haedsuenq danq baizcuengq, onjdangq hengzguh gij cwngcwz cidu deihfueng gaujhaed danq、hangznieb gaemhanh danq、giyez guenjleix danq、hanghmoeg bingzgyaq danq、canjbinj caz riz danq daengj. Fazcanj yiengh nwngzyenz faennda, hwnqguh gij gunghcangj caeuq yenzgih lingz danq. Gyahung gyalai gij hawciengz gaicawx gienzbaizdanq daengx guek, gyavaiq hwnqguh aen hawciengz gagnyienh gaicawx gemjnoix baizcuengq heiq ranzraeuj. Laebhwnj laebcaez aen dijhi yiengh biucinj loegsaek danqnoix, doinyoengx dazyinx laebndei caeuq doxciep doxnyinh gij biucinj gozci gveihcwz. Laebndei aen gunghcoz dijhi riengz ndaej hwnj dienheiq bienqvaq, gyaak yiengh bonjsaeh wngqdoiq dienheiq bienqvaq daegbied dwg gij mbwnheiq gig rwix.
(48) Gyavaiq cauxbaenz yiengh swnghcanj swnghhoz loegsaek. Haeujlaeg doinyoengx faen gih guenjhaed swnghdai vanzging, lai caeuq gij gveihva gyanghoeng diegguek dox hamzciep, guhdoih gaijndei aen baijbouh canjnieb. Doinyoengx gunghyez、singz mbanj hwnqguh、gyaudoeng daehyinh、nwngzyenz daengj lingjyiz youqgaenj cienj baenz yiengh loegsaek danqnoix. Caezcienz aen cidu guenjleix cungjliengh caeuq cienzmienh mbaetyungh swhyenz, engq rox ciuq loih faen nyapnyaj caeuq bienqbaenz swhyenz bae yungh, coicaenh yiengh ginghci baenqcienj de hwngfat. Laebdaeb hwnqguh dieg sawqguh swnghdai vwnzmingz guekgya, hwnqguh aen gih doekgonq yiengh Cungguek gyaeundei, dajcauh aen diegsang loegsaek hwngfat. Doeksaed aeu gij cwngcwz caizsui、ginhyungz、douzswh、gyagwz、gohgi、vanzbauj bae coicaenh loegsaek danqnoix hwngfat. Laebcaez aen gihci gikcoi loegsaek siufeiq, doigvangq yiengh swnghhoz loegsaek danqnoix.
Cibsam、Doicaenh Aen Dijhi Caeuq Gij Naengzlig Guekgya Ancienz Habngamj Ciuhneix, Hwnqguh Aen Cungguek Bingzan Suijbingz Engq Sang
Hwnqguh aen Cungguek bingzan dwg gij neiyungz youqgaenj guh gij yendaiva yiengh Cungguek. Dawzdingh hengzguh aen swhsiengj guekgya daengxbuenz ancienz, byaij diuz roen ceihleix ndawbiengz yiengh sevei cujyi miz gij daegsaek Cungguek, saedbauj ndawbiengz hwnghoengh fwdfwd youh caezcingj mbouj luenh.
(49) Laebcaez aen dijhi guekgya ancienz. Gyamaenh aen dijci ndaej gyonjcomz、gienzvi yauqlwd sang bae lingjdauj guekgya ancienz haenx, gyavaiq cauhlaeb yiengh ancienz moq, engq gagrox daj canloz bae henhoh caeuq dajcauh guekgya ancienz. Dingjmaenh aeu canloz guh dazyinx、aeu cwngcwz guh giz roengzfwngz、aeu fapceih daeuj baujcang、aeu fuengzre gaemhanh fungyiemj guh giz roengzdin, laebndei aen dijhi fapceih、aen dijhi canloz、aen dijhi cwngcwz、aen dijhi fuengzre gaemhanh fungyiemj nangqdaengz guekgya ancienz. Gyaak aen gihci hezdiuz gij lingjyiz youqgaenj caeuq cienhangh youqgaenj nanangq guekgya ancienz haenx, hawj wngqgip wngqbienq engq ndei engq vaiq. Doeksaed aen cwzyinci guekgya ancienz, coicaenh sojmiz lienhdiuz sojmiz yausu doxgap doxlienz, cauxbaenz gij rengzgap oklaeng dijhi. Laebndei aen gihci guekgya ancienz nangqdaengz rog guek, laebhwnj aen dijhi baujcang youq rog guek ndaej ancienz, lai rox guh yiengh doucwngh fanj ceihcaiz、fanj capfwngz、fanj “iet gen daeuj guenj”, youq ancienz lingjyiz caeuq gozci gyalaeg doxgap caepfap, doinyoengx caezcienz ceihleix hawj daengx seiqgyaiq ancienz. Lai guh yiengh gyauyuz guekgya ancienz, cukmaenh faj ciengz yinzminz henhoh guekgya ancienz.
(50) Gyarengz guh’ak gij bonjsaeh hawj aen lingjyiz youqgaenj guekgya ancienz. Dajcauh gij bonjsaeh henhoh guekgya ancienz hab caen hoenx youh caen miz yungh, daegbied yawjnaek baujcang gij ancienz hungnaek nanangq guekgya ciengzgeiz onjdingh、ginghci ndei onj、yinzminz youq onj maij hong, aeu henhoh cwngci ancienz baij youq vih daih’it. Cuknet gij giekdaej baujcang guekgya ancienz, saedbauj haeuxgwn、nwngzyenz swhyenz、diuzlienh canjnieb diuzlienh gung’wngq youqgaenj、gij sezsih giekdaej hungnaek ancienz, gyarengz damqra haifat caeuq bwhcwk doengh cungj gvangcanj swhyenz hawjrengz daengxbuenz, lai rox gyonjcomz cingsaeq ancienz yungh raemx swhyenz, henhoh diuz doengloh yungh guh canloz de ancienz, doicaenh hwnqguh gij diegndaw hab guekgya canloz caeuq bwhfaenh gij canjnieb ceiq youqgaenj. Gyarengz youq vangjloz、soqgawq、yinzgungh cinwngz、swnghvuz、swnghdai、hwz、daigungh、gizlaeg dieghaij、gyaeujdigiuz、mbwndaemq daengj gij lingjyiz ngamq hwng neix gyaak naengzlig henhoh guekgya ancienz. Daezsang gij naengzlig fuengzre vaqgej gij fungyiemj ndaw lingjyiz youqgaenj, doengbuenz maeuzveh miz bouhloh vaqgej gij fungyiemj oklaeng fangzdicanj、ngaenzcaiq deihfueng cwngfuj、ginhyungz gihgou rauh iq daengj, yiemzfuengz ok gij fungyiemj baenzroix.
(51) Daezsang gij suijbingz ceihleix yiengh ancienz caezcaemh. Laebndei aen dijhi yiengh ancienz caezcaemh, doinyoengx aen vunqsik ceihleix gij ancienz caezcaemh cienjhingz baenz saeh gonq yawhfuengz. Gyarengz gamcaek yawhbauq yawhgingj gisieng、suijvwnz、diciz caihaih, gyaak bonjsaeh baujcang fuengz cai gemj cai gouq cai caeuq cawqceq gij saehgienh caezcaemh fwtfat hungnaek, gyarengz guh gij hong wngqgip cijveih、ancienz swnghcanj、gijgwn gijyw ancienz daengj. Daezswng naengzlig hawj gij sezsih giekdaej youqgaenj daengx aen ancienz, caencingq ndaej naenx roengz gij saehhux hungnaek、saehhux daegbied hungnaek. Gyalaeg laebguh aen dijhi caeuq ganq ak yiengh naengzlig doengbuenz fuengzhaed cianh ndawbiengz, doeksaed diuzrap henhoh ndawbiengz onjdingh, guhhung aen doih vunzlai caez fuengz caez ceih, laebcaez gij gihci baeznaengz baet yak cawz rwix, gyarengz yawhfuengz caeuq dwkceih densin vangjloz yaeuhlox、huqdoeg famhcoih daengj. Doicaenh hwnqguh aen cungsim gyoebhab ceihleix hab gveihfan. Gyalaeg gyoebhab ceihleix hawj vangjloz ancienz, gyarengz baujhoh saenqsik gagboux. Gyahaenq yawhfuengz caeuq ceihleix gij famhfap famhcoih bouxcaengzhung. Cienzmienh cinjdeng hengzguh gij cwngcwz hingzsaeh soeng yiemz doxbouj, ciuqfap fadceih yiengh saeh famhfap famhcoih, hawj hingzfad caephengz engq raenhamq.
(52) Laebndei aen dijhi ceihleix ndawbiengz. Dingjmaenh baenzroix ceihleix、ciuqfap ceihleix、gyoebhab ceihleix、daj goek ceihleix, laebndei gij cidu ceihleix ndawbiengz caez guh caez guenj caez yungh, doicaenh gaiq hong ceihleix ndawbiengz gaen hwnj seizdaih. Laebndei gij dijci gihci guh hongsaeh ndawbiengz, laebndei gij cwngcwz caeuq aen dijhi faplwd fapgvi ceihleix ndawbiengz. Lai roengzrengz youq ndaw ginghci cujciz moq、sevei cujciz moq、gyoengqvunz couhnieb moq gensez aen Dangj. Gyarengz gungganq guenjleix sevei cujciz, doinyoengx hangznieb hezvei sanghvei gaijgwz hwngfat. Gyarengz aeu dangjgen bae dazyinx ceihleix gihcwngz caeuq hwnqguh cwnggenz gihcwngz, cienzmienh saedhengz mbawdan lied gij saehhangh yanghcin (gaihdau) aeu hengzguh de, laebcaez aen cidu cinjhawj saehhangh hongsaeh haeuj cunh (segih). Dingjmaenh caeuq guhhwng gij “gingniemh Funghgyauz” seizdaih moq, gyarengz ceihleix lajmbanj, caezcienz ceihleix segih. Langh’ok gij rengz yinzminz ginzcung guh goek, dazyinx gak fueng miz bouhloh bae caeuqfaenh ceihleix ndawbiengz. Doicaenh gwnz vangj laj vangj boiqhab ceihleix. Gyalai boiq gij vunz fugsaeh guenjleix gihcwngz, laebcaez gij sezsih fugsaeh caeuq gij gihci baujcang gingfeiq. Langh’ok gij rengz doengh gij iekdingh vunzgai、iekdingh vunzmbanj, gyarengz guh ndei gyadingz gya’gyauq gyafung, coihawj gaijbienq gij fungsug gaeuq rwix, caensaed gaijndei gij saeh rwix ndaw banh hoengzsaeh、begsaeh、hoihlaeuj daengj.
Laebndei aen gihci gietcomz fugsaeh vunzcungq, dwkmaenh aen giekdaej vunzcungq ceihleix ndawbiengz. Gyarengz aeu swhsiengj cwngci dazyinx, gaijndei guenjleix bae fugsaeh gak loih gyoengqvunz ndawbiengz, laebcaez gij cidu diuzhuz gvanhaeh leih’ik、baujcang gienzik habfap, gvansim gyaezhoh gyoengqvunz hoj、nyieg. Laebcaez aen dijhi fugsaeh simleix ndawbiengz caeuq aen gihci capfwngz fuengz oksaeh. Lai hawj diuz yezsen siminz doengh aen bingzdaiz fugsaeh caezcaemh neix fugsaeh vunzlai, doidoengh “vunzlai miz iugouz、raeuz cix miz hoizwngq”. Fazcanj yiengh fugsaeh gagnyienh, gyarengz guenjleix gij cujciz gagnyienh fugsaeh. Doicaenh gaiq hong sinfangj engq hab fapceih. Haeujlaeg doinyoengx daj gizgoek、lai miengloh、miz bouhloh bae vaqgej mauzdun cengnauh. Guhhung guh’ak aen doih boux guh hongsaeh ndawbiengz, daezswng naengzlig engq ciennieb fugsaeh.
Cibseiq、Ciuqgeiz Guhbaenz Aen Moegbiu Buekguh Laebbaenz Bingdoih It Bak Bi, Ciuq Yiengh Ceiq Ndei Bae Doicaenh Gozfangz Caeuq Bingdoih Guhbaenz Yendaiva
Gyamaenh gozfangz caeuq guh’ak bingdoih dwg gij canloz cengjdingj guh gij yendaiva yiengh Cungguek. Hengzndei Aen Swhsiengj Siz Ginbingz Lwnh Ak Bing, hengzndei diuz canloz fuengcim bingsaeh seizdaih moq, dingjmaenh seizseiz yienghyiengh aeu Dangj lingjdauj bingdoih yinzminz, hengzndei aen cidu ginhveij cujsiz rapdawz cwzyin, ciuq aen canloz moq “faen sam yamq byaij” hawj gozfangz caeuq bingdoih guhbaenz yendaiva, doicaenh baengh cwngci laeb bing、baengh gaijgwz ak bing、baengh gohgi ak bing、baengh vunzcaiz ak bing、baengh faplwd guenj bing， doq doucwngh、doq bwhhoenx、doq hwnq ndei，gyavaiq aeu gihgaiva sinsizva cinwngzva yungzhab hwngfat, daj gwnz canloz gyaak bonjsaeh henhoh gij cawjgienz、ancienz、leih’ik hwngfat guekgya.
(53) Gyavaiq guh’ak gij rengzhoenxciengq maenhndei. Guhhung gij rengzlig canloz haephwk, henhoh daengx seiqgyaiq canloz doxdaengh caeuq onjdingh. Doicaenh gij rengzlig hoenxciengq lingjyiz moq singqcaet moq guh baenz gveihmoz、baenz caen hoenx、baenz dijhi, gyavaiq lai baengh yiengh cinwngz hoenxciengq mbouj yungh vunz caeuq gij naengzlig naenxdauq, gyarengz swnggaep gaijcauh gij rengzlig hoenxciengq conzdungj. Doengbuenz maeuzveh hwnqguh yinhyungh aen dijhi vangjloz saenqsik, gyarengz haifat leihyungh swhyenz soqgawq, laebhwnj aen dijhi bingsaeh cinwngzva. Gyavaiq guh hawj houginz gaen hwnj seizdaih. Hengzguh gij gunghcwngz hungnaek fazcanj gozfangz, gyagaenj gozfangz cauhmoq gohgi caeuq cienjvaq gisuz akmoq, gyavaiq cauhguh gij vujgi canghbei akmoq. Gaijndei gij cwngcwz cidu vunzsaeh ndaw bingdoih, daezswng yenyau bingdoih engq ak banhhag ganq vunz, dajcauh aen doih vunzcaiz bingdoih yienghmoq suciz sang youh ciennieb. Hengzguh aen gunghcwngz doicaenh lijlun bingsaeh gaen hwnj seizdaih. Gyalaeg couzveh canloz caeuq hoenxciengq, maenhsaed ciuq biucinj caen hoenx bae lienh bing, gyarengz baenz dijhi bae gyoebgyonj gij naengzlig hoenxciengq, cauhmoq aen vunqsik laebguh caeuq yinhyungh rengzhoenxciengq, hawj bingsaeh doucwngh engq miz cimdoiq、engqgya cawjdoengh、engq ndaej dajcauh.
(54) Doicaenh bingsaeh ceihleix hab ciuhneix. Laebndei gij dijci gihci lingjdauj guenjleix bingdoih yinzminz, diuzcingj gaijndei aen dijhi lienzhab hoenxciengq. Gyarem caeuq gaijndei gaiq hong guenjleix canloz, gyalaeg doengbuenz maeuzveh hoenxciengq、hwnqguh、bwhhoenx, lai aeu gij hoenxciengq aeuyungh guh dazyinx, cauhmoq gij guhfap banhfap guenjleix, lai hawj ginhsw hidungj hengz ndaej engqgya swnhdoeng、gozfangz swhyenz yungh ndaej engqgya mizyauq. Gyarengz cazcam bingzguj gezcwz hungnaek caeuq gamguenj hanghmoeg hungnaek, doicaenh gaijgwz yiengh saeh guenjleix gij yawhsuenq gingfeiq bingsaeh, gaijndei aen cidu dajcawx bingsaeh, laebndei aen dijhi doengjgeiq bingzguj yiengh saeh gensez bingdoih, cienzmienh doeksaed diuz fuengcim gaenxgiemh ciengx bing, byaij diuz roen yauqik sang、cingzbonj daemq、ndaej lienzdaemh hwngfat. Laebdaeb gyalaeg gaiq hong coih son cwngci, hwngcienz gij conzdungj maenhndei, gyahaenq cwngjdun ceihleix gij hangznieb caeuq lingjyiz youqgaenj. Haeujlaeg doicaenh ciuq fapceih guenj bingdoih, lai ceiqdingh fapgvi cidu hawj bingdoih caeuq gamduk caephengz, caezcienz aen dijhi fapceih bingsaeh miz gij daegsaek Cungguek.
(55) Gyamaenh daezsang gij dijhi guekgya canloz caeuq gij naengzlig canloz gyoebbaenz cingjdaej haenx. Gyalaeg yiengh gaijgwz hamj bingdoih caeuq deihfueng, cauhlaeb aen buenz hong hamj bingdoih caeuq deihfueng gag hengz faenhhong、gaenjmaed doxgap、gveihfan miz bouhloh. Gyavaiq cauhlaeb gij naengzlig canloz doengh aen lingjyiz ngamq hwng, doinyoengx yiengh swnghcanjliz rengzmoq caeuq yiengh rengzhoenxciengq singqcaet moq ndeivaiq yungzhab、doxrag doxnyoengx. Hwnqguh aen dijhi gozfangz gohgi gunghyez akmoq，gaijndei aen baijbouh gozfangz gohgi gunghyez, doicaenh gij biucinj bingyungh minzyungh doxdoeng. Gyarengz guh gaiq hong mwh gensez gozfangz daezok caeuq coh gwnz bauq gij aeuyungh bingsaeh nem bingdoih deihfueng doiqciep, doinyoengx gij sezsih giekdaej hungnaek yienghyiengh cungj ciuq gij iugouz gozfangz bae guh, lai rox yawhguh gozfangz canloz. Gyavaiq laebguh gij naengzlig gozfangz dungyenz, gyarengz guhhung gij rengzlig bwhlaeng, gyarengz guhmaenh gij henzguek、dieghaij、gwnzmbwn、gozfangz ciuhneix, doinyoengx dangj cwng ginh gingj minz gaprengz guh’ak henzguek gyamaenh gozfangz. Gyalaeg yiengh gyauyuz hawj bouxboux rox gozfangz caeuqfaenh gozfangz, guh hawj bingdoih caeuq cwngfuj、bingdoih caeuq beksingq engq doxgiet.
Cibhaj、Daengx Dangj Daengx Guek Gak Cuz Yinzminz Aeu Caez Sim Caemh Hoz Baedrengz Guhbaenz Aen Gveihva “Cibhaj Haj”
Dawzmaenh caeuq gyaak yienghyiengh cungj aeu Dangj lingjdauj dwg gij baujcingq goekgaen doihaeuj gij yendaiva yiengh Cungguek. Dawzmaenh aeu Dangj gag gaij bienq ndei bae dazyinx ndawbiengz gaij ndei, dingjnanz mbouj soeng bae doihaeuj gaiq hong cienzmienh yiemzhaenq guenj Dangj, hawj Dangj engq miz gij bonjsaeh lingjdauj cwngci、yinxlingx swhsiengj、cujciz ginzcung、haucauh ndawbiengz, hawj Dangj engq ak engq rox lingjdauj ginghci sevei fazcanj, vih doicaenh gij yendaiva yiengh Cungguek comzgiet gij rengzlig hungloet.
(56) Dawzmaenh caeuq gyaak Dangjcunghyangh gyonjcomz lingjdauj. Laebndei aen gihci baijbouh doeksaed gij gezcwz hungnaek Dangjcunghyangh, saedbauj gwnz laj doxdoeng、caephengz mizrengz. Laebdaeb yungh gij lijlun cauhmoq aen Dangj daeuj dungjyiz swhsiengj、dungjyiz ceiqheiq、dungjyiz hengzdoengh. Fazcanj gij minzcuj ndaw Dangj, laebcaez caeuq doeksaed aen cidu minzcuj cizcungh, gaemmaenh hableix gezcwz、minzcuj gezcwz、ciuqfap gezcwz. Gaemmaenh aen yinxyiengq cingqdeng yungh vunz, seizseiz aeu cwngci biucinj cuengq youq vih daih’it, laebhwnj caeuq hengzguh gij yawjfap cwngciz cingqdeng, laebndei aen gihci gaujhaed bingzgyaq ganbu, diuzcingj gij ganbu mbouj miz bonjsaeh hengzguh faenhong mwh dangsaeh, doicaenh lingjdauj ganbu hwnj ndaej roengz ndaej baenz yiengh saeh ciengzseiz. Gyarem son’gyauq beizyin caeuq saedguh muzlienh, gyaak gij bonjsaeh gyoengq ganbu guh yendaiva gensez. Aeu yiemzguenj youh aeu ndiepgyaez、aeu gikcoi youh aeu hanhhaed, guh hawj aen doih ganbu gag rox roengzrengz caeuq engq miz rengzhoengh. Doengbuenz maeuzveh youq gak aen lingjyiz doicaenh gihcwngz dangjcujciz gensez, gyaak gij cwngci goengnaengz caeuq cujciz goengnaengz dangjcujciz, langh’ok gij rengz dangjyenz guh yienghndei. Laebdaeb mbouj cuengqsoeng doeksaed gij cingsaenz bet hangh gvidingh duh cunghyangh, haenqrengz sab dingz gak cungj fungheiq mbouj cingq, doicaenh yiengh saeh guhmaenh cozfungh ciengzseiz guh ciengzgeiz mizyauq. Haeujlaeg guh gaiq hong cingjceih gij saeh guhyiengh bae hawj gihcwngz gemjmbaeu diuzrap. Laebndei aen dijhi gamduk duh Dangj caeuq guekgya, gyarengz gveihfan caeuq gamduk yiengh saeh boiq gienz、yungh gienz. Seizseiz singjsag laemxsim bae fanj nduknaeuh, doengzcaemh doihaeuj mbouj gamj nduknaeuh、mbouj ndaej nduknaeuh、mbouj siengj nduknaeuh, laemxsim dwkndei ciengz ciengq haenqrengz naihnanz daengxbuenz fanj nduknaeuh. Caux ok aen cwngci swnghdai fungheiq cinghseuq.
(57) Doicaenh laebguh yiengh minzcuj fapceih sevei cujyi. Laemxsim mbouj bienq byaij diuz roen cwngci fazcanj sevei cujyi miz gij daegsaek Cungguek, dawzmaenh aen Dangj lingjdauj、yinzminz danggya guhcawj、ciuqfap guenj guek ndeindei dungjyiz, fazcanj yiengh yinzminz minzcuj ronz goek daengz byai, laebndei aen dijhi fapceih sevei cujyi miz gij daegsaek Cungguek. Dawz ndei、laeb ndei、yungh ndei aen cidu yinzminz daibyauj daihhoih, saedbauj guekgya gihgvanh ciuqfap yungh gienz、hengz cizcwz, saedbauj gij minzcuj gienzleih、gienzik habfap yinzminz ginzcung ndaej henhoh caeuq saedyienh. Dawzmaenh caeuq laebndei aen cidu lai dangj doxgap caeuq yiengh cwngci doxyaeng youz Cunghgoz Gungcanjdangj lingjdauj, langh’ok gij rengz yinzminz cwnghez dangguh aen gihgou cienmonz doxyaeng, lai hawj gak cungj miengloh doxyaeng doxgap boiqhab, doicaenh yiengh minzcuj doxyaeng gvangqlangh、lai caengz、baenz cidu bae hwngfat. Laebcaez aen cidu gihcwngz minzcuj, baujcang yinzminz ciuqfap guenjleix gij hongsaeh vunzlai caeuq gij saehnieb goeng’ik gihcwngz. Laebndei aen gihci supsou gij yigen yinzminz、gyonjcomz gij dungxcaiz yinzminz. Lailai langh rengz gunghvei、gungcinghdonz、fulenz daengj ginzcung donzdij cujciz, gyarengz aeu cwngcwz bauj hawj aen doih canjnieb gunghyinz laeb ndei、bouxcoz nyezrauh fatmaj、saehnieb mehmbwk lwgnyez hwngfat. Coicaenh aen saehnieb vunzgienz cienzmienh hwngfat. Laebndei aen buenz hong daih dungjcan, gyamaenh guhhung aen gyaezguek dungjyiz cansen ceiq gvangqlangh. Couqmaenh gij eiqsik Cunghvaz Minzcuz ranz vunz ndeu, doicaenh hwnqbaenz Cunghvaz Minzcuz ranz vunz ndeu. Dawzdingh aen fuengyiengq cunghgyau guek raeuz hab gij saedsaeh Cungguek, gyarem ciuq fapceih guenjleix hongsaeh cunghgyau. Cienzmienh saedhengz gij cwngcwz hongsaeh vazgyauz aen Dangj, engq ndei bae comz sim comz rengz gyoengq vazgyauz.
Dingjmaenh cienzmienh ciuqfap guenj guek, doxgap doicaenh gohyoz laebfap、yiemzgek caepfap、goengcingq dawzfap、bouxboux soujfap. Gyarengz hengzguh Yenfaz faplwd caeuq doiq neix guh gamduk, laebndei aen cidu gihci henhoh gij fapceih guekgya dungjyiz. Gyarem gveihva laebfap caeuq saemjcaz laebfap, hawj laebfap guh ndaej engq ndei. Lai roengzrengz hwnqguh aen cwngfuj fapceih, cienzmienh doeksaed yiengh hong bwh’anq saemjcaz gij vwnzgen hingzcwng gveihfan, laebndei aen gihci saedcaih bae vaqgej hingzcwng doxcwngq. Doicaenh dajcauh aen bingzdaiz doenggvaq soqcih bae guh hongsaeh cwngfaz, gyarem hamj bouhmonz doxgap caeuq gamduk caepfap dawzfap. Gveihfan bae yungh aen gienz dawzfap, laebndei aen gihci guhdaengz caeuq bingzgyaq goengcingq dawzfap, hawj dawzfap caizbuenq engq goengcingq、engq onjdingh、engq miz gienzvi. Gyarengz genjcaz gamduk, gyaak yiengh dajgauq coengh vunzbiengz. Ciuqfap baujcang gienzndangvunz、gienzcaizcanj、gienzyinzgwz, laebcaez aen gihci ciengzgeiz mizyauq gveihfan yiengh caepfap nangqdaengz giyez, fuengzre caeuq niujcingq yiengh caepfap hamj dieg famhgvi、yiengh caepfap lauhcienz aeundei. Laebcaez aen dijci guekgya caephengz, mizyauq gaijgez gij yienghsaeh “caephengz nanz”. Gyavaiq laebbaenz aen dijhi fapceih nangqdaengz rog guek caeuq ganq ak bonjsaeh dawzfap, laebcaez gij gihci diuzgaij、cungcaiz、dajgauq saeh seng’eiq gozci daengj. Gyarengz gamduk genjcaz lingjdauj ganbu ciuqfap banhsaeh, caezcienz aen gihci gyoebhab bingzgyaq hongsaeh fapceih. Doicaenh hwnqguh aen biengz fapceih, caux ok aen vanzging maenhndei daengx biengz yawjnaek fapceih、dawzndaet gveihcwz、gingqcungh iekdingh、henhoh goengcingq.
(58) Coicaenh Yanghgangj、Aumwnz ciengzgeiz mwnhoengh onjdingh. Dawzdingh mbouj bienq gvancez diuz fuengcim “aen guekgya ndeu song cungj cidu”、“vunz Yanghgangj guenj Yanghgangj”、“vunz Aumwnz guenj Aumwnz”、gagguenj cingzdoh gig sang neix, doeksaed aen yenzcwz “boux gyaezguek guenj Yanghgangj”、“boux gyaezguek guenj Aumwnz”, daezswng gij cingzyauq Gangj Au ciuqfap ceihleix, coicaenh Gangj Au ginghci sevei fazcanj. Haeujcoengh Gangj Au engq ndei yungzhaeuj caeuq fugsaeh aen daihbuenz guekgya hwngfat, gyarengz hawj Gangj Au caeuq diegndaw gapguh ginghmou、gohgi、yinzvwnz daengj, laebndei gij cwngcwz banhfap fuengbienh vunz Gangj Au youq diegndaw hwngfat caeuq gvaq ndwenngoenz. Lailai langh’ok gij ndei gag miz caeuq gij rengz youqgaenj Gangj Au laeng ing guekcoj、lienzdoeng seiqgyaiq, gyamaenh daezsang aen diegvih Yanghgangj dwg giz cungsim ginhyungz、hangzyin、mouyiz gwnz gozci, haeujcoengh Yanghgangj hwnqguh aen cungsim gohgi cauhmoq gozci, mboujduenh yienh’ok gij rengz Aumwnz “aen cungsim ndeu、aen bingzdaiz ndeu、aen gihdi ndeu”, doinyoengx Aumwnz ginghci habdoh lai yiengh hwngfat, haeujcoengh Gangj Au dajcauh giz diegsang gyonjcomz vunzcaiz gaepsang gwnz seiqgyaiq.
(59) Doinyoengx gij gvanhaeh song hamq hozbingz hwngfat、doihaeuj aen daihnieb guekcoj dungjyiz. Haeujlaeg gvancez aen geiqmaeuz daengxbuenz seizdaih moq Dangj raeuz gaijgez Daizvanh vwndiz, laemxsim dwkceih gij seiqlig faenmbek “Daizduz”, fanjdoiq gij seiqlig baihrog capfwngz, henhoh Daizvanh Haijyaz hozbingz onjdingh, gaemndaet gaemmaenh gij gienz dazyinx caeuq gij gienz gag guhcawj cawqleix gvanhaeh song hamq. Gyalaeg song hamq doxgyau doxgap, doengzcaez cienzciep hwngcienz vwnzva Cunghvaz. Ciuq yiengh maenhndei bae doicaenh hwnqguh giz dieg yienghndei song hamq yungzhab hwngfat, lai guh canjnieb doxgap, doinyoengx song hamq ginghci doxgap. Doeksaed gij cwngcwz beixnuengx Daizvanh ndaej yiengh dakdaih doxdoengz, cauh’ok diuzgienh engq ndei hawj gyoengq beixnuengx Daizvanh youq daluz doegsaw、guhhong、gvaq ndwenngoenz, hawj beixnuengx song hamq lai dem fukheiq.
(60) Doinyoengx cauhlaeb aen minghyinh caezcaemh vunz lajmbwn. Iudaeuz dizcang yiengh lajmbwn lai giz cungsim bingzdaengj mbouj luenh、yiengh ginghci lajmbwn doxnangq doxik doxyungz, gya’gvangq aen muengx daengx lajmbwn guhdoih, doinyoengx cauhlaeb cungj gozci gvanhaeh yienghmoq. Gyalaeg seiqhenz hwngfat yungzhab, gyaak caezcaemh ancienz, gyamaenh canloz doxsaenq, cauhlaeb aen minghyinh caezcaemh seiqhenz. Henhoh gij gvanhaeh guek hung cungjdaej onjdingh, gyalaeg caeuq doengh aen guekgya cingq hwngfat haenx doxgiet gapguh, doeksaed aen iudaeuz lajmbwn hwngfat、aen iudaeuz lajmbwn ancienz、aen iudaeuz lajmbwn vwnzmingz、aen iudaeuz lajmbwn ceihleix, dazyinx gozci cizsi byaij coh aen fuengyiengq engqgya goengcingq hableix. Haeujcoengh doengh aen guekgya cingq hwngfat de lienzhab gag ak, gyarengz bangcoengh rog guek, daezhawj yiengh canjbinj lajbiengz caezcaemh engq lai. Laemxsim fanjdoiq yiengh guhfap hengzak hengzmanz hengzyak, henhoh gozci goengbingz cingqngeih, henhoh gij leih’ik caezcaemh gak guek yinzminz. Hwngcienz gij gyaciz caezcaemh vunz lajmbwn, doinyoengx hwnqguh aen seiqgyaiq doxhuz naihnanz、daihdaej ancienz、doengzcaez mwnhoengh、hailangh bauyungz、cinghseuq gyaeundei, vih cauhlaeb aen minghyinh caezcaemh vunz lajmbwn ok gij goengrengz Cungguek.
(61) Lailai coihawj daengx biengz hwnjheiq bae、gagrox bae、cauhmoq bae camgya hwnqguh gij yendaiva yiengh Cungguek. Ciuq gij cingsaenz baez cienzhoih neix, ceiqdingh aen gveihva ganghyau “Cibhaj Haj” guekgya caeuq deihfueng nem gij gveihva cienhangh daengj, cauxbaenz aen dijhi guekgya gveihva dinghvih cinjdeng、bien’gyaiq cingcuj、goengnaengz doxbouj、doengzcaemh hamzciep. Gyarengz gamcaek bingzguj caeuq gamduk hengzguh gveihva, laebcaez aen gihci hezdiuz cwngcwz caeuq boiqhab guhhong, saedbauj gij gezcwz baijbouh Dangjcunghyangh caen guh daengz dieg. Gvancez diuz fuengcim gingqcungh guhhong、gingqcungh cihsiz、gingqcungh vunzcaiz、gingqcungh cauhnduj, gikfat gij rengzhoengh daengx biengz guhsaeh cauhnieb、cauhmoq cauhnduj, cauxbaenz yiengh buenzmienh ndei vunz caenh dungxcaiz、yungh caenh dungxcaiz、bouxboux doengzsim、gaprengz baenaj.
Daengx Dangj daengx ginh daengx guek gak cuz yinzminz aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh goek neix, vih daihdaej guhbaenz sevei cujyi yendaiva bae doengzcaez buekguh, mboujduenh haiok aen buenzmienh moq aeu gij yendaiva yiengh Cungguek bae cienzmienh doihaeuj aen saehnieb hungmbwk hwnqguh guekak、fukhwng minzcuz.
编辑：韦亦玮 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291 电子邮箱：gxmzbzb@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com