AEN GUNGHBAU AEN HOIH DAENGXCUNGQ BAEZ DAIHSEIQ CUNGHYANGH VEIJYENZVEI GAIQ NGEIHCIB CUNGHGOZ GUNGCANJDANGJ

(2025 nienz 10 nyied 23 hauh Aen Hoih Daengxcungq Baez Daihseiq Cunghyangh Veijyenzvei Gaiq Ngeihcib Cunghgoz Gungcanjdangj doenggvaq)

来源：新华社

发布时间：2025-10-24

Aen Hoih Daengxcungq Baez Daihseiq Cunghyangh Veijyenzvei Gaiq Ngeihcib Cunghgoz Gungcanjdangj, youq 2025 nienz 10 nyied 20 hauh daengz 23 hauh youq Baekging ciuhai.

Gij vunz daeuj hai baez cienzhoih neix, miz cunghyangh veijyenz 168 boux, boux deqbouj cunghyangh veijyenz 147 boux. Gyoengq veijyenz Aen Cangzvu Veijyenzvei Cunghyangh Gijliz Genjcaz Veijyenzvei caeuq gyoengq boux dungzci dangdaeuz mizgven fuengmienh de lezsiz baez hoih neix. Mbangj gihcwngz dungzci caeuq conhgyah yozcej boux daibyauj Ngeihcib Daih aen Dangj hix lezsiz baez hoih neix.

Cienzhoih youz Cunghyangh Cwngcigiz guhgoek. Cunghyangh Veijyenzvei cungjsuhgi Siz Ginbingz guh le gangjvah youqgaenj.

Cienzhoih dingqaeu caeuq yaenglwnh le aen baugau hongsaeh youz Cunghyangh Cwngcigiz dak Siz Ginbingz guh haenx, saemjlwnh doenggvaq le 《Gij Genyi Gvendaengz Ceiqdingh Aen Gveihva Haj Bi Daih Cibhaj Gozminz Ginghci Caeuq Sevei Fazcanj Cunghgung Cunghyangh》. Siz Ginbingz youq gwnz cienzhoih gangjmingz le 《Genyi (Faenh Gauj Yaenglwnh)》.

Cienzhoih cungfaen haengjdingh gij hongsaeh Cunghyangh Cwngcigiz Baez Sam Cungh Cienzhoih Gaiq Ngeihcib aen Dangj doxdaeuj guh haenx. Doengzcaez nyinhnaeuz, Cunghyangh Cwngcigiz nyinhcaen doeksaed gij cingsaenz Ngeihcib Daih caeuq gaiq ngeihcib gak baez cienzhoih aen Dangj, dawzmaenh aen goekdiuh guhhong youq ndaw onjdingh gouz baenaj, caezcingj cinjdeng cienzmienh hengzndei gij leixniemh hwngfat moq, doengbuenz maeuzveh doicaenh aen cungjdaej baijbouh “haj yiengh gap baenz aen”, dox boiqhab doicaenh aen canloz baijbouh “seiq aen cienzmienh”, doengbuenz maeuzveh ndei ndaw guek rog guek song aen daihbuenz, doengbuenz maeuzveh hwngfat caeuq ancienz, caiq bae cienzmienh gyalaeg gaijgwz, maenhsaed doinyoengx yiengh hwngfat coh ceiq ndei, doihaeuj hwnqguh yiengh minzcuj fapceih sevei cujyi, gyarengz guh gaiq hong senhconz swhsiengj vwnzva, saedcaih ca ndei gij hongsaeh baujcang gwndaenj beksingq caeuq baujhoh swnghdai vanzging, henhoh guekgya ancienz caeuq ndawbiengz onjdingh, guh yiengh sonhag baenzlawz haeujlaeg hengzndei gij cingsaenz Bet Hangh Gvidingh Duh Cunghyangh、haeujlaeg doihaeuj cienzmienh yiemzhaenq guenj Dangj, gyarengz hwnqguh gozfangz caeuq bingdoih habngamj ciuhneix, guh ndei gij hongsaeh Yanghgangj Aumwnz caeuq gij hongsaeh nangqdaengz Daizvanh, haeujlaeg doihaeuj yiengh vaigyauh guekhung miz gij daegsaek Cungguek, doinyoengx ginghci lienzdaemh dauq hwnj coh ndei, gij hongsaeh “Cibseiq Haj” cujyau aeu guh de yaek guhbaenz liuxcaez. Lungzcung geiqniemh Cunghgoz Yinzminz Gang Yiz Cancwngh Caeuq Seiqgyaiq Fanj Fazsihswh Cancwngh ndaejhingz 80 hopbi, gig daih saenqhwnj gij cingsaenz minzcuz、gikok gij sim gyaez guek、comzgiet gij rengz buekguh.

Cienzhoih gig haengjdingh gij cingzcik hungloet mboengq “Cibseiq Haj” guek raeuz hwngfat aeundaej. Mboengq “Cibseiq Haj” diuz roen guek raeuz byaij daeuj gig mbouj bingzciengz、gig mbouj yungzheih. Najdoiq gij hingzseiq rog guek fukcab doxgeuj caeuq gij hongsaeh ndaw guek gaijgwz fazcanj onjdingh gannanz naekcaem, aen Dangjcunghyangh aeu Siz Ginbingz dungzci guh goek de doxgiet dazyinx daengx Dangj daengx guek gak cuz yinzminz, nyig nanz bae guh、haenqrengz baenaj, dingj gvaq gij binghraq baenz sigij noix raen haenx yiemzhaenq cungdongj, mizyauq wngqdoiq baenzroix fungyiemj deuqnyex hungnaek, doinyoengx saehnieb Dangj caeuq guekgya youh caiq aeundaej cingzcik hungloet. Gij saedlig ginghci、saedlig gohgi、gueklig gyoebhab guek raeuz yat hwnj mbaek moq, gij yendaiva yiengh Cungguek caiq yamq onj byaij maenh baenaj, gij moegbiu buekguh aen bak bi daihngeih ndaej ndeinduem byaij hwnj diuz roen moq.

Cienzhoih vixok, guhbaenz sevei cujyi yendaiva dwg duenh roen raez baez mbaek hwnjsang、mboujduenh hwngfat doxbae ndeu, aeu lienzdaemh roengzrengz、doxciep buekguh. Mboengq “Cibhaj Haj” dwg mboengq ceiq youqgaenj daihdaej guhbaenz sevei cujyi yendaiva cuknet giekdaej、cienzmienh fatrengz haenx, youq ndaw roenloh daihdaej guhbaenz sevei cujyi yendaiva miz aen diegvih youqgaenj ciep gonq hai laeng. Mboengq “Cibhaj Haj” gij hwngfat guek raeuz bungzdaengz bienqvaq fukcab dangqmaz, guek raeuz hwngfat cawqyouq mboengq canloz seizgei caeuq fungyiemj deuqnyex caez miz、gaiq nanz liuh hoj dingh de gyalai. Gij ginghci guek raeuz giekdaej onj、gij ndei lai、rengzniu ak、rengzndumj hung, gij diuzgienh dingjcengj caeuq gaenbonj byaijyiengq ciengzgeiz coh ndei mbouj bienq, gij ndei aen cidu sevei cujyi miz gij daegsaek Cungguek、gij ndei hawciengz gveihmoz hungloet、gij ndei aen canjnieb dijhi caezcingj、gij ndei vunzcaiz laidaih engqgya yienh ok hawj rengz. Daengx Dangj aeu laegdaeuq rox daengz “song aen doekdingh” ndaej gietdingh guhbaenz hongsaeh, gyaak “seiq aen roxyiuj”、dawzdingh “seiq aen gagsaenq”、guh daengz “song aen henhoh ”, baujciz rengzdingh canloz, gyaak gij saenqsim itdingh ndaej hingz, lailai rox bienq wngq bienq gouz bienq, gamj doucwngh、rox doucwngh, mbeilaux najdoiq doengh yiengh gaujniemh hungnaek rumz hung fwn raq engqlij raemx git langh haenq, baengh gagrox doinyoengx lizsij bae gung nanzgvan、dingj fungyiemj、coux deuqnyex, comz rengz banh ndei gij saeh swhgeij, ciep sij bien sawfaenz moq ginghci hwngfat riengjvaiq caeuq ndawbiengz ciengzgeiz onjdingh song yiengh mbouj bingzciengz neix, haenqrengz haicauh aen buenzmienh moq hwnqguh gij yendaiva yiengh Cungguek.

Cienzhoih daegbied gangj daengz, mboengq “Cibhaj Haj” aeu hawj ginghci sevei fazcanj, itdingh aeu dawzmaenh Majgwzswh Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cungyau Swhsiengj、Gohyoz Fazcanjgvanh, cienzmienh gvancez Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, haeujlaeg gvancez gij cingsaenz Ngeihcib Daih caeuq gaiq ngeihcib gak baez cienzhoih aen Dangj, hopheux cienzmienh hwnqbaenz aen guekak sevei cujyi yendaiva、guhbaenz gij moegbiu buekguh aen bak bi daihngeih, aeu gij yendaiva yiengh Cungguek bae cienzmienh doicaenh Cunghvaz Minzcuz fukhwng hungmbwk, doengbuenz maeuzveh doicaenh aen cungjdaej baijbouh “haj yiengh gap baenz aen”, dox boiqhab doicaenh aen canloz baijbouh “seiq aen cienzmienh”, maeuzveh ndei ndaw guek rog guek song aen daihbuenz, caezcingj cinjdeng cienzmienh gvancez gij leixniemh hwngfat moq, gyavaiq cauhlaeb aen buenzmienh hwngfat moq, dawzmaenh aen goekdiuh guhhong youq ndaw onjdingh gouz baenaj, dawzmaenh aeu ginghci gensez guh cungsim, aeu doidoengh yiengh hwngfat coh ceiq ndei guh cawjdaez, aeu gaijgwz cauhmoq guh gaenbonj doenghlig, aeu muenxcuk yinzminz gij aeuyungh gvaq saedceij gyaeundei ngoenz beij ngoenz demmaj haenx guh gaenbonj muzdiz, aeu cienzmienh yiemzhaenq guenj Dangj guh gaenbonj baujcang, doidoengh ginghci guh daengz caetliengh caencingq daezswng caeuq soqliengh hableix demmaj, doinyoengx bouxvunz yienghyiengh fatmaj、daengxcungq yinzminz doengzcaez fouqmiz byaij ok yamqdin maenhsaed, saedbauj daihdaej guhbaenz sevei cujyi yendaiva aeundaej gij cincanj miz gietdingh cozyung.

Cienzhoih vixok, mboengq “Cibhaj Haj” aeu hawj ginghci sevei fazcanj itdingh aeu ciuqei doengh aen yenzcwz lajneix, dawzmaenh yienghyiengh aeu Dangj lingjdauj, dawzmaenh aeu yinzminz cuengq youq vih daih’it, dawzmaenh yiengh hwngfat coh ceiq ndei, dawzmaenh cienzmienh gyalaeg gaijgwz, dawzmaenh aen hawciengz mizyauq caeuq aen cwngfuj ak guhsaeh dox giethab, dawzmaenh doengbuenz maeuzveh hwngfat caeuq ancienz.

Cienzhoih daezok le gij cujyau moegbiu ginghci sevei fazcanj mboengq “Cibhaj Haj”: Yiengh hwngfat coh ceiq ndei aeundaej cingzyauq yienhda, gohgi gag guh gag ak bonghyat hwnj sang, caiq cienzmienh gyalaeg gaijgwz ndaej miz cungbyoengq moq, sevei vwnzmingz mingzyienj daezswng, saedceij yinzminz yied gvaq yied ndei, hwnqguh aen Cungguek gyaeundei byaij ok yamq hung, gaiqdangj hawj guekgya ancienz engqgya maenhdwt. Youq gwnz giekdaej neix caiq haenqrengz buekguh haj bi, daengz 2035 nienz guh daengz gij saedlig ginghci、saedlig gohgi、saedlig gozfangz、gueklig cunghab caeuq gij rengzlig yingjyangj gozci guek raeuz bonghyat hwnj sang, swnghcanj cungjciz ndaw guek dan bingz daengz gak boux dabdaengz gij suijbingz aen guekgya fatdad cungdaengj, ndwenngoenz yinzminz engqgya vuenyungz gyaeundei, daihdaej guhbaenz sevei cujyi yendaiva.

Cienzhoih daezok, hwnqguh aen dijhi canjnieb yendaiva, guhmaenh guhhung aen goekgaen yiengh ginghci saeddaej. Dawzmaenh guh ginghci aeu coq rengz guh yiengh ginghci saeddaej, dawzmaenh aen fuengyiengq baenz cinwngz、baenz loegsaek、dox yungzhab, gyavaiq hwnqguh aen guekak dajcauh、aen guekak caetliengh、aen guekak hangzdenh、aen guekak gyaudoeng、aen guekak vangjloz, bauj hawj hangz cauhguh beijfaenh hableix, cauhlaeb aen dijhi canjnieb yendaiva aeu hangz cauhguh maenhndei guhdaeuz haenx. Aeu gaijndei swngsang doengh aen canjnieb conzdungj, ganq ok guh hung gij canjnieb ngamq hwng caeuq yiengh canjnieb daengzcog, coicaenh hangz fugsaeh ndei youh vaiq bae hwngfat, laebhwnj gij dijhi sezsih giekdaej hab ciuhneix.

Cienzhoih daezok, gyavaiq guh yiengh gohgi suijbingz sang haenx guh daengz gag guh gag ak, lingxdaeuz hwngfat yiengh swnghcanjliz rengzmoq. Cadawz aen lizsij seizgei lwnz gohgi gwzming caeuq canjnieb bengwz moq, doengbuenz maeuzveh hwnqguh aen guekak gyauyuz、aen guekak gohgi、aen guekak vunzcaiz, daezswng gij cingjdaej yauqnaengz aen cauhmoq dijhi guekgya, cienzmienh gyaak gij bonjsaeh gag cauhmoq, ciemqhah giz diegsang gohgi hwngfat, mboujduenh coiok yiengh swnghcanjliz rengzmoq. Gyarengz guh codaeuz cauhmoq caeuq gung roengz gij gisuz ceiq youqgaenj, doinyoengx gohgi cauhmoq caeuq canjnieb cauhmoq yungzhab haeuj laeg, baenz cingjdaej doinyoengx gyauyuz gohgi vunzcaiz fatmaj, haeujlaeg doinyoengx hwnqguh soqcih Cungguek.

Cienzhoih daezok, hwnqguh aen hawciengz ndaw guek hung’ak, gyavaiq cauhlaeb aen buenzmienh hwngfat moq. Dingjmaenh gyadaih ndaw guek aeuyungh aen canloz dajdaeuz neix, dingjmaenh ndeileih beksingq gwndaenj caeuq coi siufeiq、douzcienz haeuj huq caeuq douzcienz haeuj vunz gaenjmaed giethab, aeu yiengh aeuyungh moq dazyinx yiengh gunghawj moq, aeu yiengh gunghawj moq daeuj cauh ok yiengh aeuyungh moq, coi hawj siufeiq caeuq douzswh、gunghawj caeuq aeuyungh doxcoi doxhab, hawj aen loek ndaw guek engq ak dwk gag fat rengz baenqcienj caeuq engqgya baengh ndaej. Aeu roengzrengz guhhoengh siufeiq, gyalai yiengh douzcienz raenhamq, laemxsim cekcawz giz gaz giz saek ngaih daengz hwnqguh aen hawciengz hung daengx guek doengzcaemh haenx.

Cienzhoih daezok, gyavaiq cauhlaeb aen dijci yiengh hawciengz ginghci sevei cujyi suijbingz sang, dem’ak gij rengznyoengx coi hwngfat guh coh ceiq ndei. Dawzmaenh caeuq laebndei gij gihbwnj ginghci cidu sevei cujyi, engq ndei langh’ok gij rengz bengrag ginghci dijci gaijgwz, laebndei aen dijhi ceihleix hungzgvanh ginghci, saedbauj hwngfat coh engq ndei dwk byaij onj bae gyae. Aeu lailai gikfat gij rengzhoengh gak loih ginghyingz cawjdaej okdaeuj, gyavaiq laebndei gij dijci gihci youz hawciengz ndaboiq yausu, daezswng gij yauqnaengz ceihleix hungzgvanh ginghci.

Cienzhoih daezok, gyagvangq yiengh doiq rog hailangh suijbingz sang, haicauh aen buenz moq gapguh caezhingz. Onjbouh gyadaih hailangh hawj cidu doiqciep gozci, henhoh aen dijci lai mbiengj guh gaicawx, haigvangq aen baenqloek gozci, aeu hailangh coi gaijgwz coi hwngfat, caeuq seiqgyaiq gak guek caezyiengj seizgei、doengzcaez hwngfat. Aeu lai gag bae gyadaih hailangh, doinyoengx cauhmoq hwngfat gij gaicawx doiq rog, haigvangq aen diendeih suengyiengq douzcienz gapguh, hwnj mbaek sang caez guh “it rangh it loh”.

Cienzhoih daezok, gyavaiq gij yendaiva nungzyez lajmbanj, netsaed doicaenh cienzmienh guhhoengh lajmbanj. Dawzdingh aeu gaijgez ndei gij vwndiz “sam nungz” dangguh hongsaeh daengx Dangj gaiq ceiq youqgaenj de, coihaeuj singz mbanj yungzhab hwngfat, lienzdaemh gyamaenh gya’gvangq gij cwngzgoj haenqrengz duetgungz, doinyoengx lajmbanj daihdaej bwhmiz gij diuzgienh ndwenngoenz ciuhneix, gyavaiq hwnqguh aen guekak nungzyez. Aeu gyaak gij rengz nungzyez gyoebhab swnghcanj caeuq hawj nungzyez lai ndei lai sou, doihaeuj hwnqguh cungj lajmbanj hab youq hab hong youh gyaeundei, lai hawj gij cwngcwz guh’ak nungzyez、ndeileih lajmbanj、nungzminz ndaej fouq haenx engqgya raenhamq.

Cienzhoih daezok, gaijndei gij baijbouh ginghci gvaengxdieg, coicaenh gvaengxdieg doxdaengh hwngfat. Langh’ok gij yauqgoj baengh aen canloz gvaengxdieg doxdaengh hwngfat、aen canloz hungnaek gvaengxdieg、aen canloz cujdij gunghnwngzgih、aen canloz hawsingzvaq yienghmoq doxdaeb, gaijndei baijbouh gij swnghcanjliz hungnaek, langh’ok gij rengz gyaeujdemmaj gvaengxdieg youqgaenj, cauhlaeb aen baijbouh ginghci gvaengxdieg caeuq aen dijhi gyanghoeng diegguek gizak doxbouj、ndeivaiq hwngfat. Aeu gyaak yiengh doxdaengh gvaengxdieg hwngfat, coicaenh gvaengxdieg gapfwngz hwngfat, gaijndei aen gvaenghgaq gyanghoeng diegguek hwngfat, haeujlaeg doicaenh gij hawsingzvaq yienghmoq aeu vunz guh goek, gyarengz haifat leihyungh baujhoh dieghaij.

Cienzhoih daezok, gikfat daengx aen minzcuz raeuz ak cauhmoq ak cauhguh vwnzva, guhhoengh yiengh vwnzva sevei cujyi. Dingjmaenh aen diegvih Majgwzswh Cujyi dazyinx yisiz hingzdai, ingbaengh gij vwnzmingz Cunghvaz gvangqlangh naekna, swnh’wngq aen cauzliuz saenqsik gisuz hwngfat, hwngfat yiengh vwnzva sevei cujyi miz gij daegsaek Cungguek seizdaih moq youh miz gij rengzak dazyinx swhsiengj、gij rengzak gietcomz cingsaenz、gij rengzak dazyinx gyaciz aeuyiengq、gij rengzak yingjyangj seiqgyaiq, maenhsaed doicaenh dajcauh aen guekak vwnzva. Aeu hwngcienz caeuq hengzguh aen hwzsinh gyacizgvanh sevei cujyi, roengzrengz guhhoengh gij saehnieb vwnzva, gyavaiq hwngfat yiengh canjnieb vwnzva, lai hawj gij vwnzmingz Cunghvaz cienzboq bae gvangq yingjyangj bae gyae.

Cienzhoih daezok, haenqrengz baujcang caeuq gaijndei gwndaenj beksingq, netsaed doicaenh daengxcungq yinzminz doxcaemh fouqmiz. Seizseiz aeu caenhrengz bae guh、aenq rengz bae guh, gyarengz guh gij hongsaeh ndaej ik doh、ndaej dajdaej、ndaej baujdaej beksingq gwndaenj haenx, gaijgez ndei gij vwndiz yinzminz ginzcung gaenjgip hojnanz youheiq deqmuengh gaijgez de, dwkdoeng diuz miengloh ndawbiengz dox baedauq, hawj ndwenngoenz beksingq yied ngoenz yied ndei. Aeu coicaenh cukgaeuq youh onjmaenh dwk couhnieb, laebndei aen cidu faenboiq souhaeuj, banh ndei gij gyauyuz hawj yinzminz habhoz, laebcaez aen dijhi yiengh baujcang ndawbiengz, doinyoengx fangzdicanj caetliengh sang bae hwngfat, gyavaiq hwnqguh aen Cungguek bouxboux ndangcangq, coihawj vunzgyaeuj gig ndei bae fatmaj, onjbouh doihaeuj yiengh fugsaeh caezcaemh ceiq noix bouxboux doxdoengz.

Cienzhoih daezok, gyavaiq ginghci sevei fazcanj cienj baenz yiengh loegsaek liuxcaez, cauhlaeb aen Cungguek gyaeundei. Laebmaenh caeuq hengzguh aen leixniemh raemx saw bya heu couh dwg bya gim bya ngaenz, aeu danqdaemxdingj danqcunghuz daeuj dazyinx, doengzseiz doihaeuj gyangq danq、gemj uq、dem loeg、demmaj, cukmaenh gaiqdangj hawj swnghdai ancienz, demrengz doinyoengx loegsaek hwngfat. Aeu lienzdaemh haeujlaeg doihaeuj gaiq hong haenqrengz fuengzceih uqlah caeuq gaijndei swnghdai hidungj, gyavaiq laebguh aen dijhi nwngzyenz yienghmoq, hwnjheiq onjdangq doihaeuj caeuq guh daengz danqdaemxdingj, gyavaiq cauxbaenz yiengh swnghcanj swnghhoz loegsaek.

Cienzhoih daezok, doicaenh aen dijhi caeuq gij naengzlig guekgya ancienz habngamj ciuhneix, hwnqguh aen Cungguek bingzan suijbingz engq sang. Dawzdingh hengzguh aen swhsiengj guekgya daengxbuenz ancienz, byaij diuz roen ceihleix ndawbiengz yiengh sevei cujyi miz gij daegsaek Cungguek, saedbauj ndawbiengz hwnghoengh fwdfwd youh caezcingj mbouj luenh. Aeu laebcaez aen dijhi guekgya ancienz, gyarengz guh’ak gij bonjsaeh hawj lingjyiz youqgaenj guekgya ancienz, daezsang gij suijbingz ceihleix yiengh ancienz caezcaemh, laebndei aen dijhi ceihleix ndawbiengz.

Cienzhoih daezok, ciuqgeiz guhbaenz aen moegbiu buekguh laebbaenz bingdoih bak bi, ciuq yiengh ceiq ndei bae doicaenh gozfangz caeuq bingdoih guhbaenz yendaiva. Hengzndei Aen Swhsiengj Siz Ginbingz Lwnh Ak Bing, hengzndei diuz canloz fuengcim bingsaeh seizdaih moq, dingjmaenh seizseiz yienghyiengh aeu Dangj lingjdauj bingdoih yinzminz, hengzndei aen cidu ginhveij cujsiz rapdawz cwzyin, ciuq aen canloz moq “faen sam yamq byaij” hawj gozfangz caeuq bingdoih guhbaenz yendaiva, doicaenh baengh cwngci laeb bing、baengh gaijgwz ak bing、baengh gohgi ak bing、baengh vunzcaiz ak bing、baengh faplwd guenj bing, doq doucwngh、doq bwhhoenx、doq hwnq ndei, gyavaiq aeu gihgaiva sinsizva cinwngzva yungzhab hwngfat, daj gwnz canloz gyaak bonjsaeh henhoh gij cawjgienz、ancienz、leih’ik hwngfat guekgya. Aeu gyavaiq guh’ak gij rengzhoenxciengq maenhndei, doicaenh bingsaeh ceihleix hab ciuhneix, gyamaenh daezsang gij dijhi guekgya canloz caeuq gij naengzlig canloz gyoebbaenz cingjdaej haenx.

Cienzhoih daegbied gangj daengz, daengx Dangj daengx guek gak cuz yinzminz aeu caez sim caemh hoz baedrengz guhbaenz aen gveihva “Cibhaj Haj”. Gaemmaenh aeu Dangj gag gaij bienq ndei bae dazyinx ndawbiengz gaij ndei, dingjnanz mbouj soeng bae doihaeuj gaiq hong cienzmienh yiemzhaenq guenj Dangj, hawj Dangj engq miz gij bonjsaeh lingjdauj cwngci、yinxlingx swhsiengj、cujciz ginzcung、haucauh ndawbiengz, hawj Dangj engq ak engq rox lingjdauj ginghci sevei fazcanj, vih doicaenh gij yendaiva yiengh Cungguek comzgiet gij rengzlig hungloet. Aeu dawzmaenh caeuq gyaak Dangjcunghyangh gyonjcomz lingjdauj, doicaenh laebguh yiengh minzcuj fapceih sevei cujyi, lailai coihawj daengx biengz hwnjheiq bae、gagrox bae、cauhmoq bae camgya hwnqguh gij yendaiva yiengh Cungguek. Coicaenh Yanghgangj、Aumwnz ciengzgeiz mwnhoengh onjdingh, doinyoengx gij gvanhaeh song hamq hozbingz hwngfat、doihaeuj aen daihnieb guekcoj dungjyiz, doinyoengx cauhlaeb aen minghyinh caezcaemh vunz lajmbwn.

Cienzhoih vixok, dangnaj caeuq gvaqlaeng mboengq ndeu, hagndei hengzndei gij cingsaenz cienzhoih dwg aen cwngci yinvu hungnaek daengx Dangj daengx guek. Aeu yungh lai cungj banhfap, guh ndei gaiq hong cujciz hagsib、cienzgangj gij cingsaenz cienzhoih, hawj daengx Dangj daengx biengz rox daeuq gij cingsaenz cienzhoih. Aeu caencaen ca ndei gaiq hong daengzdaej doekguh gij cingsaenz cienzhoih, laemxsim mbouj bienq doinyoengx yiengh hwngfat coh ceiq ndei, gyavaiq cauhlaeb aen gvaenghgaq hwngfat moq, doinyoengx daengxcungq yinzminz doengzcaez fouqmiz byaij ok yamqdin maenhsaed, engq ndei doengbuenz maeuzveh hwngfat caeuq ancienz, doengbuenz maeuzveh doicaenh gaiq hong hwnqguh ginghci caeuq gij hongsaeh gak aen lingjyiz, cuknet giekdaej hawj daihdaej guhbaenz sevei cujyi yendaiva.

Cienzhoih daegbied gangj daengz, guenj guek itdingh sien aeu guenj Dangj gonq, Dangj hwng cijndaej guek ak. Guenj Dangj ceih Dangj yied raenhamq, gij baujcang ginghci sevei fazcanj couh yied mizrengz. Itdingh aeu ciengxlwenx dingjmaenh caeuq laemxsim guh roengz bae, dingjnanz mbouj soeng bae doihaeuj gaiq hong cienzmienh yiemzhaenq guenj Dangj, nyenghdingh guh gij iugouz aen Dangj gag gaij bienq ndei doek daengz dieg bae, doicaenh ciengzseiz ciengzgeiz guhmaenh gij cozfungh aen Dangj, laemxsim mbouj bienq dwk ndei ciengz ciengq fanj nduknaeuh, vih guhbaenz aen moegbiu ginghci sevei fazcanj mboengq “Cibhaj Haj” daezhawj baujcingq maenhdwt.

Cienzhoih faensik le gij hingzseiq caeuq hongsaeh dangnaj, daegbied gangj naeuz aeu laemxsim guhbaenz gij moegbiu ginghci sevei fazcanj daengx bi aeu guh. Aeu laebdaeb dawzcinj doekguh gij gezcwz baijbouh Dangjcunghyangh, roengzrengz onj couhnieb、onj giyez、onj hawciengz、onj yawhgeiz, onjmaenh aen buenzgoek ginghci, gyamaenh gya’gvangq aen seiqdaeuz ginghci dauq hwnj coh ndei. Hungzgvanh cwngcwz aeu lienzdaemh fatrengz、habseiz gyarengz, doekguh ndei gij cwngcwz bangfuz giyez, haeujlaeg hengzguh gaiq hong cienhangh guhhoengh siufeiq, lamx maenh diuz daejsienq “sam bauj” gihcwngz, engq rox onjdangq vaqgej gij fungyiemj dawzcaiq deihfueng cwngfuj.

Cienzhoih vixok, aeu caencaen ca ndei gaiq hong baujcang gwndaenj beksingq, lai miengloh vatok rengzndumj, gyarengz guh gaiq hong onj gangjvei coi couhnieb, coicaenh gyoengq vunz cungdenj ndaej onjdingh miz hong guh, lai roengzrengz cingj gij saeh yiemq cienzhong, gyarengz guh yiengh fugsaeh caezcaemh ceiq noix, gaijgez ndei gij vwndiz yinzminz ginzcung gaenjgip hojnanz youheiq deqmuengh gaijgez de. Ca ndei gaiq hong caihaih gvaqlaeng dauq coih dauq hwnq、anceiq caeuq baujcang gwndaenj gyoengq ginzcung deng cai gahraix, saedbauj gyoengq ginzcung deng cai raeujrup gvaq doeng.

Cienzhoih daegbied gangj daengz, aeu guh ndei gaiq hong ancienz swnghcanj caeuq henhoh onjdingh, naenx ndaet naenx net diuz rap ancienz swnghcanj, yiemzhaenq doekguh gak hangh cidu gamguenj, baenzbaenz cungj aeu fuengzre caeuq naenxhaed ok gij saehhux hungnaek、saehhux daegbied hungnaek. Gyarengz daj goek daengz byai gamguenj gijgwn gijyw. Haeujlaeg baizcaz vaqgej doxdawz doxceng, gyarengz cingjdaej fuengzhaed cianh ndawbiengz, ciuqfap dwkceih gak loih famhfap famhcoih. Gyarengz dazyinx ndei baklinx vunzlai, mizyauq fuengzre vaqgej gij fungyiemj yisiz hingzdai.

Cienzhoih gietdingh, dembouj Cangh Swnghminz guh boux fucujsiz Cunghgung Cunghyangh Ginhsw Veijyenzvei.

Cienzhoih ciuq gij gvidingh Dangjcangh, gietdingh dembouj Yiz Veivwnz、Maj Hancwngz、Vangz Gen、Vangz Hih、Vangz Yungjhungz、Vangz Dingzgaij、Vangz Sinhveij、Veiz Dauh、Dwng Yizvuj、Dwng Siuhmingz、Luz Hungz doengh boux veijyenz deqbouj Cunghyangh Veijyenzvei neix guh boux veijyenz Cunghyangh Veijyenzvei.

Cienzhoih saemjlwnh caemhcaiq doenggvaq le faenh baugau Cunghgung Cunghyangh Gijliz Genjcaz Veijyenzvei saemjcaz gij vwndiz famh gijliz famhfap youqgaenj Dangz Yinzgen、Ginh Sienghginh、Lij Sizsungh、Yangz Fazswnh、Cuh Cihsungh, saemjlwnh caemhcaiq doenggvaq le faenh baugau Cunghgung Cunghyangh Ginhsw Veijyenzvei saemjcaz gij vwndiz famh gijliz famhfap youqgaenj Hoz Veidungh、Myauz Vaz、Hoz Hungzginh、Vangz Siubinh、Linz Yangyangz、Cinz Sudungz、Yenz Vazci、Vangz Cunhningz、Cangh Fungcungh, doekdingh gij cawqfaen Cunghyangh Cwngcigiz doekgonq guh ok haicawz Hoz Veidungh、Myauz Vaz、Dangz Yinzgen、Ginh Sienghginh、Hoz Hungzginh、Vangz Siubinh、Linz Yangyangz、Cinz Sudungz、Yenz Vazci、Vangz Cunhningz、Lij Sizsungh、Yangz Fazswnh、Cuh Cihsungh、Cangh Fungcungh ok Dangj.

Cienzhoih iuheuh, daengx Dangj daengx ginh daengx guek gak cuz yinzminz aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh goek neix, vih daihdaej guhbaenz sevei cujyi yendaiva bae doengzcaez buekguh, mboujduenh haiok aen buenzmienh moq aeu gij yendaiva yiengh Cungguek bae cienzmienh doihaeuj aen saehnieb hungmbwk hwnqguh guekak、fukhwng minzcuz.

编辑：韦亦玮复审：黄慧华终审：蒙树起