Cinz Gangh Youq Hozciz Diuyenz, Daegbied Gangj Daengz Aeu Baengh Nungzvwnzlij Yungzhab Hwngfat Coenghrengz Guhhoengh Lajmbanj Liuxliux

来源：

发布时间：2025-04-16

4 nyied 11 hauh, Swcigih Dangjveij suhgi、Swcigih Yinzda Cangzveijvei cujyin Cinz Gangh bae Hozciz Si Ginhcwngzgyangh Gih diuyenz, daegbied gangj daengz aeu haeujlaeg doekguh gij lwnhgangj youqgaenj hong “sam nungz” caeuq gij iugouz youqgaenj lwnhgangj hong Gvangjsih Siz Ginbingz cungjsuhgi, dingjmaenh caen guh daih’it, cauh- moq guh hoenz, aeu cingzcik gangjvah、hawj bouxminz bingzgyaq, cienzswnj gihyinh saekhoengz, ca ndei hong “sam nungz”, laebdaeb gyamaenh haigvangq yiengh saeh- baenz gungzhoj duetgungz aeundaej, haenqrengz doinyoengx nungzvwnzlij yungzhab hwngfat, coenghrengz guhhoengh lajmbanj liuxliux, caezhoz gaprengz ciuq yiengh ceiq ndei bae guh, haenqrengz guh ok gij goengrengz hungloet Gvangjsih yendaiva yiengh Cungguek.

Hozciz dwg aen dieg geq gwzming mizmingz, dwg aen dieggoek nungzminz yindung Gvangjsih, dwg dieg Dwng Siujbingz、Cangh Yinzyiz、Veiz Bazginz daengj gwzminggyah banlaux guhhong caeuq hoenxciengq gvaq. Youq Ginhcwngzgyangh Gih Hozciz Cin, Cinz Gangh gonqlaeng yawjngonz laeuzbyauhyij Hozciz Hungzginh caeuq aen geiqniemhguenj cingjbien Hozciz Hungzciz、Hungz- bazginh. Diuz dem diuz byauhyij raizva、mbaw dem mbaw siengq lizsij、aen dem aen ciengzgingj singjsien, cungj lwnhnaeuz gij ndwenngoenz hwnzngoenz hoenxciengq haenx, youh caiq yienh’ok gij ciengzgingj gwzming banlaux buekmingh hoenx- ciengq. Cinz Gangh nyinhcaen dingq gejgangj, ciengzseiz daengx din cimyawj, ciengzsaeq cam mizgven cingzgvang, daengq aeu henhoh ndei gij swhyenz lizsij saekhoengz, gangj ndei gij gojgaeq saekhoengz. Cinz Gangh naeuz, lizsij dwg cek sawsonhag ceiq ndei, aeu yungh ndei gij swhyenz saekhoengz dieg geq gwzming Coj Yougyangh, cienzswnj ndei gihyinh saekhoengz, baengh aen sim “baenzgoeng mbouj itdingh baengh gou” caeuq gij dangrap “baenzgoeng itdingh miz gou”, byaij ndei diuz roen cangzcwngh seizdaih moq, caezhoz comz rengz hwnqguh aen Gvangjsih maenghndei seizdaih moq, haenqrengz cauh gij cingzcik moq doiq ndaej hwnj gwzming banlaux maqmuengh、doiq ndaej hwnj lizsij caeuq bouxminz.

Ginhcwngzgyangh Gih Saek- hoengz Fungfeih Nungzvwnzlij Sifan Hanghmoeg yungh “giyez+dieggiek+nungzhu” doengh gij vunqsik neix, hwngfat aen dieggiek haeux- liengz(byaekheu)+makdumh, boiq miz gij canjyez gyagoeng doxgaiq reihnaz, ciuq saed dingh geiq hwngfat baeyouz lajmbanj, guh baenz bouxguhnaz lai miz ngaenz roengzdaeh、lajmbanj ndaej doxbae. Ngoenzhaenx, youq Ginhcwngzgyangh Gih Saekhoengz Fungfeih Nungzvwnzlij Sifan Hanghmoeg dangciengz, Cinz Gangh nyinhcaen dingqaeu cingzgvang gaisau, ciengzsaeq roxyiuj dangjgen coi guhhoengh lajmbanj caeuq nungzvwnzlij yungzhab suen doenghnaz cunghab、nungzyez miz daegsaek daihneix hwngfat ndaej baenzlawz.“Makdumh hangzgyaq gaen geijlai ngaenz?” “Doxgaiq cujyau gai bae gizlawz?” “Ndaej hawj henzgyawj geijlai ranz miz ngaenz roengz daeh?” Cinz Gangh byaij haeuj aen bungz ndaem makdumh, caeuq giyez boux fucwz gangjgoj, nyinhcaen cazyawj makdumh maj ndaej baenzlawz yiengh、mbaetsou baenzlawz yiengh, haengjdingh gij guhfap giyez lai yungh yinzgungh cinwngz coenghrengz nungzyez hwngfat. De daegbied gangj daengz, aeu gyaak dangjgen dazyinx, lai hwngfat nungzvwnzlij yungzhab yiengh moq, haenqrengz guh gij canjyez miz daegsaek lajmbanj, gungganq guh hung nungzyez giyez, gyalai rengz aeu gohgi bae bang guh nungzyez, coenghrengz nungzyez daihneix ciuq yiengh ceiq ndei bae guh, cien fueng bak geiq doinyoengx nungzyez lai raenhamq、lajmbanj lai hoengh、bouxguhnaz lai miz ngaenz, laebdaeb gyamaenh haigvangq yiengh saehbaenz gunghoj duetgungz aeundaej, doinyoengx guhhoengh lajmbanj liuxliux. (daj 《Gvangjsih Yizbau》 aeu daeuj genj hoiz Loz Canghlieng)

编辑：蒙树起