Swcigih Minzcunghveij Daengz Gveilinz Si Diuyenz

来源：广西民族报网

发布时间：2025-03-04

2 nyied 17 hauh daengz 18 hauh， Swcigih Minzcunghveij dangj- cuj cwngzyenz、 fucujyin Veiz Sangyungz haj boux guhdoih daengz Gveilinz Si Hingh’anh Yen、Swhyenz Yen diuyenz gij cingzyauq hong mizgven couqmaenh gij eiqsik caezcaemh Cunghvaz Minzcuz，gij hong cauhlaeb minzcuz doxgiet baenaj，gij hong mizgven “sam hangh giva · Gvangjsih cingq hengzdoengh” caeuq gij cingzgvang minzcuz yangh hwngfat. Haeujlaeg liujgaij gij cingzyauq caeuq ginghyen hong minzcuz vwnzva cienzciep、lijyouz yungzhaeb hwngfat caeuq cauhlaeb minzcuz doxgiet baenaj daengj， vih doiqdoengh hong minzcuz aen dangj seizdaih moq hwngfat ndei daezhawj daemxcengj miz rengz.

Cujdiuyenz gonqlaeng daengz Hingh’anh Lingzgiz Bozvuzyen、Vazgyangh Yauzcuz Yangh Bozvuzgvanj、“Vazgyangh Gouj Mbanj” Swhyenz Yen Cehdenz Myauzcuz Yangh Mbanjsizsanhdij，guh saeddeih cazyawj、dingq veibau、lwnhgangj doxgyau daengj fuengsik， cienz gij iugouz moq baihgwnz gvendaengz hozdung guh ciet, lwnh gihcwngz ganbu cingcuj， hingzseiq moq miz gij dakdaih aen yienh gagguenj caeuq hawj minzcuz yangh hwngfat ndei saed guhlawz bae guhhong.

Cujdiuyenz cungfaen haengj- dingh gij cingzcik Hingh’anh Yen、Swhyenz Yen guh gih guhyiengh couqmaenh gij eiqsik caezcaemh Cunghvaz Minzcuz、doiqdoengh giz dieg minzcuz ginghci sevei hwngfat daengj aeu ndaej haenx. Caemhcaiq iugouz, aeu engq ndei fatok gij swhyenz ndei Lingzgiz vwnzva yizcanj caeuq mbanj minzcuz miz daegsaek， guh laeg guh saed hong couqmaenh gij eiqsik caezcaemh Cunghvaz Minzcuz， coicaenh gak minzcuz samgyau， lai hawj gak cuz ginzcung roxnyinh ndaej daengz、roxnyinh vuenyungz、roxnyinh ancienz， vih hwnqguh gih guhyiengh couqmaenh gij eiqsik caezcaemh Cunghvaz Minzcuz okrengz.

(Cinz Bungz/陈鹏 Hoz Yenyungz/何雁容)

编辑：黄誉琦复审：复审：黄慧华终审：蒙树起