Dazfwngz Buekguh Seiqcib Bi Lozcwngz Sam Soem Raiz Bienmoq

—— Lozcwngz Mulaujcuz Swciyen Guh Yienghsaeh Angqhoh Laebbaenz 40 Hopbi

来源：广西民族报网

发布时间：2024-11-29

　　11 nyied 20 hauh, Lozcwngz Muzlaujcuz Swciyen youq yienh dijyuz cungsim hai hoih angqhoh laebbaenz 40 hopbi, gyoengq lingjdauj hekgviq Daengx Guek Yinzda Minzveij、 Guekgya Minzveij duenzcukhoh， Swcigih duenzcukhoh， Hozciz Si duenzcukhoh caeuq ganbu ginzcung dangdieg doxcomz, caemh hoh sw- ciyen laebbaenz 40 hopbi.

　　Hoih angqhoh gvaqlaeng, haiduj yienjheiq ndeiyawj, doenggvaq go foux、 caijdiuh、 cingzgingj yaemveh daengj yisuz hingzsik baijok gij daegdiemj Lozcwngz “gyaeujbya soem、 gyaeujdawh soem、 gyaeujbit soem” caeuq gij minzcuz vwnzva lai saek lai yiengh, yienh’ok gij yiengh- siengq cingsaenz ginzcung dangdieg doxgiet buekguh、 gaenxmaenx dox- hwnj.

　　Baez hozdung neix neiyungz fungfouq, hingzsik lai yiengh, cw- goemq gvangq. Gij langhbaij cwngzgoj swciyen laebbaenz 40 hopbi dauq- ngeix Lozcwngz gak cuz yinzminz caezcaemh doxgiet baenaj, caezcaemh mwnhoengh hwngfat, giendingh le gij gietsim caeuq saenqsim daihgya gamj Dangj aen、 dingq Dangj vah、 gaen Dangj byaij. Baihlaeng， lij miz hoih ginghci sevei hwngfat、 minzcuz dijyuz yindung yienjheiq、 feihyiz yienjok、 baijgai doxgaiq reihnaz daengj hozdung dem, hawj gij ginzcung dangdieg caeuq gyoengq vunzseng’eiq youq ndaw heiqfaenh naekna minzcuz doxgiet ranz vunz ndeu roxnyinh gij gyaeundei Lozcwngz, gamjsouh Loz- cwngz bienq yiengh hung.

　　40 bi daeuj, daegbied dwg Cibbet Daih Dangj doxdaeuj, Lozcwngz genhciz aeu aen swhsiengj sevei cujyi miz daegsaek Cungguek seizdaih moq Siz Ginbingz guh cijdauj, nyinhcaen gvancez lozsiz gij iugouz youqgaenj Siz Ginbingz cungjsuhgi gvendaengz lwnhgangj hong Gvangjsih, aeu couqmaenh gij eiqsik caezcaemh Cunghvaz Minzcuz guh diuz sienqmeh gak hangh hong daengx yienh, ronzgvaq daengx aen gocwngz hwnqguh ginghci、 hwnqguh cwngci、 hwnqguh vwnzva、 hwnqguh sevei、 hwnqguh swnghdai vwnzmingz caeuq hwnqguh aen Dangj, ginghci sevei gak hangh saehnieb aeu ndaej cingzcik doengh- baez caengz miz gvaq.

　　(Veiz Yingjcinh Vangz Yinz Vangz Yijsinh)

编辑：黄誉琦复审：黄慧华终审：蒙树起