Liuz Ningz Bae Cungzcoj Bingzsiengz Cungh Yez Civei Goujan Hanghmoeg Hwnqguh Yienhciengz Diuyenz

来源：广西民族报

发布时间：2024-08-28

　　8 nyied 18 hauh, Swcigih Dangjveij suhgi Liuz Ningz bae Cungzcoj Bingzsiengz Cungh Yez Civei Goujan Hanghmoeg hwnqguh yienhciengz diuyenz, diuyenz hanghmoeg cungjdaej gviveh、bienhleih doenggvan caeuq swdung goujan、saenqsikvaq gensez daengj cingzgvang. De daegbied gangj daengz, aeu haeujlaeg hagsib doeksaed gij cingsaenz Samcung Cienzhoih Gaiq Ngeihcib Dangj caeuq gij iugouz youqgaenj Siz Ginbingz cungjsuhgi lwnhgangj hong Gvangjsih, doeksaed gij anbaiz baijbouh Gaiq Cibngeih Swcigih Dangjveij Baez Hoih Daihbet, doinyoengx caez- hwnq diuz roen moq luzhaij suijbingz sang, baengh suijbingz sang coi hwngfat ndei saed, gyavaiq cauh “it gih song dieg it suen it roenloh”, fugsaeh cauhlaeb aen minghyinh caezcaemh Cungh Yez gig miz canloz yiyi de.

　　Youjyizgvanh——Youjyiz Huyin Dunghdau Civei Goujan dwg aen hanghmoeg civei goujan hamj gyaiq daih’it Cungguek Yeznanz, yungh veisingh daujhangz、dajyinh sieng- cangcomz mbouj yungh vunz hai ci、gag diuhcang caeuq civei cijveih diuhdoh, hwnqbaenz le vuzliuz hamj gyaiq Cungguek Yeznanz ndaej daengx ngoenz 24 diemjcung mbouj yungh vunz couh gvaqgvan ndaej, yawhsuenq demlai ci gvaqgvan moix ngoenz 2000 aen(baez). Liuz Ningz daeuj daengz hanghmoeg hwnqguh yienhciengz, ciengzsaeq roxyiuj doicaenh cingzgvang, cungfaen haengjdingh hanghmoeg gensez cingzgvang. De naeuz, caezhwnq aen civei goujan Cungh Yez, dwg gij guhfap youqgaenj Gvangjsih caeuq Yeznanz Liengsanh song swngj gih caezcaemh doeksaed gij doxrox youqgaenj bouxdaeuz song dangj song guek Cungguek Yeznanz、fugsaeh cauhlaeb aen minghyinh caezcaemh Cungh Yez gig miz canloz yiyi de, yienqmienx gak fueng guh hanghmoeg caezhoz caemhrengz gyavaiq guh hanghmoeg, baujmaenh bineix mued duenh mbiengj Cungguek ndaej sawqyungh. Doengzseiz, aeu lai caeuq mbiengj Yenznanz dox gangjgoj doiqciep, doidoengh duenh mbiengj Yeznanz gyavaiq guh, ceng’aeu civei goujan vaiqdi hwnqbaenz ndaej yungh, dem rengzmoq hawj Cungh Yez seng’eiq doxgap.

　　“Samcung Cienzhoih Gaiq Ngeihcib Dangj doiq aen dijci gihci laebcaez suijbingz sang doiqrog haicuengq guh’ok anbaiz, mingzbeg dwen daengz dingjmaenh baengh haicuengq coi gaijgwz, hwnqguh aen dijci moq ginghci yiengh haicuengq suijbingz engq sang.” Liuz Ningz naeuz, Cungzcoj Si dangguh guek raeuz diuz roen hung doeng coh Dunghmungz ceiq riengjret caeuq aen hawsingz dieg youqgaenj “it rangh it loh”, gijndei diegyouq yienhda, aeu haenqguh civei goujan daengj doxlienz doxdoeng hanghmoeg, caenh’itbouh guhndei goujan doenggvan liuzcwngz, daezsang gvaqgvan yauqlwd, gyangqdaemq cienzgoek vuzliuz, lai hawj hamj gyaiq gaicawx ndaej bienhleih caeuq demlai goujan rengz doxceng. Aeu fatok ndei civei goujan dazyien daiqdoengh naengzlig, haeujlaeg hamj gyaiq canjnieb doxgap, doidoengh hwnqguh canjyezyenz henz gyaiq henz sok, guhbaenz aen ciengzgingj haicuengq suijbingz sang, coenghrengz cauh aen dieg bienhleih hawciengz guenjguh doxhop ndaw guek rog guek, engq ndei bae fugsaeh caeuq yungz- haeuj aen gwzgiz hwngfat moq.

　　(daj 《Gvangjsih Yiz Bau》 aeu daeuj genj hoiz)

编辑：黄誉琦复审：黄慧华终审：蒙树起