AEN GIETDINGH CUNGHGUNG CUNGHYANGH GVENDAENGZ CAIQ CIENZMIENH GYALAEG GAIJGWZ DOIHAEUJ GIJ YENDAIVA YIENGH CUNGGUEK

来源：新华社

发布时间：2024-07-22

AEN GIETDINGH CUNGHGUNG CUNGHYANGH GVENDAENGZ CAIQ CIENZMIENH GYALAEG GAIJGWZ DOIHAEUJ GIJ YENDAIVA YIENGH CUNGGUEK

　　(2024 nienz 7 nyied18 hauhCunghgoz Gungcanjdangj Gaiq Ngeihcib Cunghyangh Veijyenzvei Baez Hoih Daengxcungq Daihsamdoenggvaq)

　　Vihliux doekguh gij canloz baijbouh Ngeihcib Daih aen Dangj guh’ok, Gaiq Ngeihcib Cunghyangh Veijyenzvei Baez Hoih Daengxcungq Daihsam munaemj le gij vwndiz caiq cienzmienh gyalaeg gaijgwz、doihaeuj gij yendaiva yiengh Cungguek, guh’ok doengh gij gietdingh lajneix.

　　It、Caiq Cienzmienh Gyalaeg Gaijgwz、Doihaeuj Gij Yendaiva Yiengh Cungguek Miz Maz Yiyi Hungnaek Caeuq Cungjdaej Iugouz Guhdaengz Yienghlawz

　　(1) Caiq cienzmienh gyalaeg gaijgwz baenzlawz youqgaenj caeuq vih maz aeu guh.Gaijgwz hailangh dwg aen fapbauj youqgaenj hawj saehnieb Dangj caeuq yinzminz yamq hung gyaep hwnj seizdaih. Baez Sam Cungh Cienzhoih Gaiq Cib’it aen Dangj dwg baez hoih hai ok seizdaih moq, guek raeuz daj neix byaij haeuj aen seizgeiz moq gaijgwz hailangh caeuq hwnqguh sevei cujyi yendaiva. Baez Sam Cungh Cienzhoih Gaiq Cibbet aen Dangj hix hai ok seizdaih moq, guek raeuz daj neix byaij hwnj diuz roen moq cienzmienh gyalaeg gaijgwz、daengxbuenz ndaveh doihaeuj gaijgwz, hawj gaijgwz hailangh guek raeuz haiok le aen yiengh moqsak.

　　Aen Dangjcunghyangh aeu Siz Ginbingz dungzci guh goek haenx doxgiet daiqlingx daengx Dangj daengx ginh daengx guek gak cuz yinzminz, yungh yiengh gag rox doi lizsij baenaj、yiengh cwngci damjceiq hungmbwk gamj guh、yiengh cwzyin gamj dawz rapnaek, cungbyoengq gij cughaed swhsiengj gvanhnen, cungbyoengq gij gazgit leih’ik dinghmaenh, gamj soemx haeuj giz raemx laeg, gamj gaet ndaek ndok genq, gamj dangh gvaq dieg raiq yiemj, nyenghdingh buqcawz yiengh yaez yiengh rwix ndaw gak aen dijci gihci, guhbaenz hawj gaijgwz daj guh saek giz saek yiengh damqra、mboengqbyuk cung okbae daengz hidungj comzbaenz、cienzmienh gyalaeg, aen gvaengxgyaq cidu dwk giek gak aen lingjyiz daihdaej laebbaenz, haujlai lingjyiz ndaej daj goek bengwz、daj gwnz daengz laj dauq nda、baenz aen bae dauq laeb, cungjdaej guhbaenz gij hongsaeh gaijgwz Baez Sam Cungh Cienzhoih Gaiq Cibbet aen Dangj doekdingh haenx, guhbaenz aen moegbiu daengz aen Dangj laebbaenz 100 hopbi seiz gak fuengmienh cidu engqgya cingzsug engqgya dinghyiengh aeundaej cingzcik yienhda, daj gwnz cidu mizrengz baujcang cienzmienh hwnqbaenz aen biengz siujgangh、guhdaengz aen moegbiu buekguh aen bak bi daih’it aen Dangj, doinyoengx guek raeuz byaij hwnj diuz roen moq bae cienzmienh hwnqguh aen guekgya sevei cujyi yendaiva.

　　Seizneix caeuq baezlaeng mboengq ndeu, dwg mboengq ceiq youqgaenj aeu yendaiva yiengh Cungguek bae cienzmienh doihaeuj gij saehnieb hungmbwk hwnqguh guekak、fukhwng minzcuz. Gij yendaiva yiengh Cungguek, dwg youq ndaw gaijgwz hailangh mboujduenh guh doxbae, ngoenzlaeng hix itdingh youq ndaw gaijgwz hailangh hai ok roennaj gvangqlangh. Najdoiq gij hingzseiq lai yiengh labluenh ndaw guek rog guek, najdoiq lwnz moq gohgi gwzming caeuq canjnieb bengwz, najdoiq gij maqmuengh moq yinzminz ginzcung, itdingh aeu laebdaeb doi gaijgwz guh baenaj. Neix dwg gaemmaenh caeuq caezcienz aen cidu sevei cujyi miz gij daegsaek Cungguek、gyavaiq guh aen dijhi ceihleix caeuq gij naengzlig ceihleix guekgya hab yienhdaih aeuyungh bietdingh aeu baenzneix guh, dwg doekguh yiengh leixniemh hwngfat moq、engq ndei hab’wngq gij sevei cujyau mauzdun bienqvaq guek raeuz bietdingh aeu baenzneix guh, dwg gaemmaenh aeu yinzminz guh goek、hawj gij cwngzgoj oklaeng yendaiva gensez engq lai engq goengbingz ndei doh daengxcungq yinzminz bietdingh aeu baenzneix guh, dwg aeu wngqdoiq yiemj hung saeh haenq、doinyoengx aen saehnieb Dangj caeuq guekgya byaij onj bae gyae bietdingh aeu baenzneix guh, dwg doinyoengx cauhlaeb aen minghyinh caezcaemh vunz lajmbwn、youq bak bi boekbienq gyavaiq yienjbienq ndawde ndaej gaem canloz youq ndaw fwngz raeuz bietdingh aeu baenzneix guh, dwg doihaeuj gaiq hong hungnaek moq guhhung guh’ak aen Dangj seizdaih moq、dajcauh aen cwngdangj Majgwzswh Cujyi engqgya mizrengz bietdingh aeu baenzneix guh. Gaijgwz caenh miz guh roengzbae, mbouj miz mwh guh sat. Daengx Dangj itdingh aeu gagrox baij gaijgwz youq giz engq youqgaenj, gaenjgaenj hopheux gaiq hong doihaeuj gij yendaiva yiengh Cungguek caiq bae cienzmienh gyalaeg gaijgwz.

　　(2) Caiq cienzmienh gyalaeg gaijgwz aeu maz swhsiengj cijdauj. Aeu dawzmaenh Majgwzswh Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cungyau Swhsiengj、Gohyoz Fazcanjgvanh, cienzmienh dawzdingh Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, haeujlaeg hagsib dawzdingh baenzroix swhsiengj moq、gvanhdenj moq、lwnhduenh moq Siz Ginbingz cungjsuhgi gangj cienzmienh gyalaeg gaijgwz, youh caez youh cinj cienzmienh doekguh yiengh leixniemh hwngfat moq, dawzmaenh aen diuhgoek guhhong youq ndaw onjmaenh gouz baenaj, seizseiz gaijfang swhsiengj、ciuq saedsaeh guh、riengz seiz baenaj、gouz caen guh saed, caiq bae langhcuengq caeuq guhhoengh gij swnghcanjliz ndawbiengz、gikfat caeuq dem’ak gij rengzhoengh ndawbiengz, daengxbuenz suenqveh ndaw guek rog guek song aen daihbuenz, daengxbuenz suenqveh doihaeuj aen cungjdaej baijbouh “haj yiengh gap baenz aen”, dox boiqhab bae doihaeuj aen canloz baijbouh “seiq aen cienzmienh”, aeu ginghci dijci gaijgwz daeuj yienyinx, aeu coihaeuj ndawbiengz goengbingz cingqngeih、gyalai fukheiq hawj yinzminz guh giz hwnjdin caeuq giz roengzdin, engqgya yawjnaek hidungj comzbaenz, engqgya yawjnaek lai haeujrengz giz youqgaenj, engqgya yawjnaek gaijgwz raen ndei raen baenz, doinyoengx swnghcanj gvanhhi caeuq swnghcanjliz、sangcwngz gencuz caeuq ginghci giekdaej、guekgya ceihleix caeuq aenbiengz hwngfat engq ndei doxhab doxngamj, aeu rengz hung caeuq aeu cidu coengh guh gaiq hong yendaiva yiengh Cungguek.

　　(3) Caiq cienzmienh gyalaeg gaijgwz aeu guhdaengz yiengh cungjmoegbiu lawz. Laebdaeb caezcienz caeuq hwngfat aen cidu sevei cujyi miz gij daegsaek Cungguek, doihaeuj aen dijhi ceihleix caeuq gij naengzlig ceihleix guekgya hab yienhdaih aeuyungh. Daengz 2035 nienz, cienzmienh guhbaenz aen dijci yiengh hawciengz ginghci sevei cujyi suijbingz sang, aen cidu sevei cujyi miz gij daegsaek Cungguek engqgya caezcienz, daihdaej guhbaenz aen dijhi ceihleix caeuq gij naengzlig ceihleix guekgya hab yienhdaih aeuyungh, daihdaej guhbaenz sevei cujyi yendaiva, vih daengz duenhgyang aen sigij neix ndaej cienzmienh hwnqbaenz aen guekak sevei cujyi yendaiva dwk roengz giekdaej maenhsaed.

　　——Comzrengz bae cauhlaeb aen dijci yiengh hawciengz ginghci sevei cujyi suijbingz sang, cungfaen langh gij rengz youz hawciengz daeuj dingh boiqceiq swhyenz, engq ndei langh rengz cwngfuj, gaemmaenh caeuq caezcienz aen gihbwnj ginghci cidu sevei cujyi, doihaeuj gij gohgi suijbingz sang gag laeb gag ak, doihaeuj gij doiq rog hailangh suijbingz sang, guhbaenz aen dijhi ginghci yendaiva, gyavaiq cauhlaeb yiengh gvaengxgaq hwngfat moq, doinyoengx hwngfat haeuj ndei haeuj ak.

　　——Comzrengz bae guh yiengh yinzminz minzcuj ronzdoeng goekbyai, gaemmaenh aen Dangj lingjdauj、yinzminz danggya guhcawj、ciuqfap guenj guek ndeindei dungjyiz, doinyoengx aen cidu yinzminz danggya guhcawj engqgya caezcienz、minzcuj doxyaeng gvangqlangh lai caengz baenz cidu bae guh、aen dijhi fapceih yiengh sevei cujyi miz gij daegsaek Cungguek engqgya caezcienz, hwnqguh aen guekgya fapceih sevei cujyi hwnj mbaek engq sang.

　　——Comzrengz bae hwnqguh aen vwnzva guekak sevei cujyi, dinghmaenh aen cidu aeu Majgwzswh Cujyi guhgoek cijdauj yisiz hingzdai lingjyiz, laebcaez gij dijci gihci hwngfat saehnieb vwnzva、canjnieb vwnzva, gyavaiq guhhoengh vwnzva, fungfouq gij cingsaenz vwnzva swnghhoz gyoengq beksingq, hawj gij saedlig’unq vwnzva guekgya engq ak caeuq hawj gij vwnzva Cunghvaz yingjyangj seiqgyaiq engq hung.

　　——Comzrengz bae hawj yinzminz gwndaenj engq ndei, caezcienz gij cidu faenboiq souhaeuj caeuq couhnieb, laebcaez aen dijhi ndawbiengz baujcang, gyarengz hawj yiengh fugsaeh vunzlai caezcaemh ceiq noix engqgya bingzyaenx caeuq engqgya yungzheih guhdaengz, doinyoengx bouxvunz yienghyiengh fatmaj、daengxcungq yinzminz doengzcaez fouqmiz caiq yamq ok yamq hung.

　　——Comzrengz bae hwnqguh aen Cungguek gyaeundei, gyavaiq ginghci sevei fazcanj cienjhingz baenz yiengh loegsaek liuxcaez bae, laebcaez aen dijhi ceihleix swnghdai vanzging, lai guh yiengh hwngfat hen swnghdai gonq、giemhmbaet gyonjconz、loegsaek danqnoix, coihawj vunz raeuz caeuq swyenz doxhuz caemhyouq.

　　——Comzrengz bae hwnqguh aen Cungguek an’onj suijbingz engq sang, laebcaez gij dijhi hawj guekgya ancienz, gyarengz hawj guekgya itcaez maeuzveh hongsaeh daengxbuenz, gyaak bonjsaeh henhoh guekgya ancienz, cauhmoq gij dijci gihci caeuq banhfap guenj biengz, hawj yiengh buenzmienh ancienz moq ndaej cauhlaeb raen ndei.

　　——Comzrengz bae hawj Dangj engq rox lingjdauj caeuq ciengzgeiz gaemgienz, cauhmoq caeuq gaijndei yiengh fuengsik lingjdauj caeuq gaemgienz, gyalaeg gaijgwz gij cidu gensez aen Dangj, laebcaez gij dijhi cienzmienh yiemzhaenq guenj Dangj.

　　Daengz 2029 nienz mwh Cunghvaz Yinzminz Gunghozgoz laebbaenz 80 hopbi, guhbaenz gij yinvu gaijgwz ndaw aen gietdingh neix daezok haenx.

　　(4) Caiq cienzmienh gyalaeg gaijgwz aeu gaemdawz gijmaz yenzcwz. Cungjgez caeuq yunghndei gij gingniemh dijbauj gaijgwz hailangh doxdaeuj daegbied dwg cienzmienh gyalaeg gaijgwz seizdaih moq, hengz ndei gij yenzcwz lajneix: Dawzmaenh seizseiz yienghyiengh aeu Dangj lingjdauj,laemxsim henhoh gij gienzvi caeuq yiengh gyonjcomz lingjdauj Dangjcunghyangh, langh ok gij rengz Dangj guhgoek gaemguenj daengxbuenz、diuzndei gak fueng, hawj aen Dangj lingjdauj ronzdoeng gaijgwz gak fuengmienh daengx gocwngz, saedbauj gaijgwz itloh riengz aen cwngci fuengyiengq cingqdeng guh baenaj; dawzmaenh cuengq yinzminz youq vih daih’it, gingqcungh aen diegvih guhcawj caeuq gij cingsaenz cauxnduj yinzminz, yinzminz miz iugouz、gaijgwz miz hoizwngq, guhdaengz gaijgwz vihliux yinzminz、gaijgwz baenghgauq yinzminz、cwngzgoj gaijgwz hawj yinzminz caezyungh; dawzmaenh souj goek cauhmoq, dawzmaenh yiengh sevei cujyi miz gij daegsaek Cungguek mbouj doenghngauz, riengz yamqdin seizdaih, swnh saedguh hwngfat, lai aeu vwndiz bae daz guh, youq giz hwnjdin moq bae doicaenh lijlun cauhmoq、sizcen cauhmoq、cidu cauhmoq、vwnzva cauhmoq caeuqlienz gak fuengmienh wnq cauhmoq; dawzmaenh aeu cidu gensez guh sienqmeh, lai guh caengzdingj ndaveh、daengxbuenz maeuzveh, buq laeb caez guh、laeb gonq buq laeng, cukmaenh gij cidu gaenbonj, laebndei gij cidu giekbonj, cauhmoq gij cidu youqgaenj; dawzmaenh cienzmienh ciuqfap guenj guek, doenggvaq fapceih bae gyalaeg gaijgwz、doicaenh gij yendaiva yiengh Cungguek, guhdaengz gaijgwz caeuq fapceih doxcaemh, gij gaijgwz hungnaek miz faplwd guh gaengawq、gibseiz dawz gij cwngzgoj gaijgwz hwnj baenz faplwd cidu; dawzmaenh hidungj gvanhnen, cawqleix ndei ginghci caeuq ndawbiengz、cwngfuj caeuq hawciengz、yauliz caeuq goengbingz、rengzhoengh caeuq cizsi、hwngfat caeuq ancienz doengh doiq gvanhaeh hungnaek neix, hawj gaijgwz lai baenz caemhroix、baenz caemhgyoengq、ndaej doxcoengh.

　　Ngeih、Cauhlaeb Gij Dijci Yiengh Hawciengz Ginghci Sevei Cujyi Suijbingz Sang

　　Gij dijci yiengh hawciengz ginghci sevei cujyi suijbingz sang dwg gij baujcang youqgaenj guh gij yendaiva yiengh Cungguek. Itdingh aeu engq ndei bae yungh ndei hawciengz gihci, cauh ok aen vanzging hawciengz engqgya goengbingz、engqgya miz rengzhoengh, guhdaengz swhyenz boiqceiq yauliz ceiq sang caeuq yauqik ceiq hung, gawq “cuengq ndaej hoengh” youh “guenj ndaej maenh”, engq ndei hen hawj hawciengz mbouj luenh、fuengzre hawciengz mbouj lingz, hawj gozminz ginghci baenqcienj doengrat, gikfat gij rengznyoengx baihndaw gag baenz caeuq gij rengzhoengh cauhmoq daengx biengz.

　　(5) Dingjmaenh caeuq doeksaed “song aen mbouj doenghngauz saekdi”. Aeu mbouj doenghngauz saekdi bae gyamaenh caeuq hwngfat gunghyoujci ginghci, mbouj doenghngauz saekdi bae nyoengxcoi、haeujcoengh、dazyinx gij ginghci mbouj dwg gunghyoujci hwngfat, baujcingq gak cungj sojyoujci ginghci ciuqfap bingzdaengj yungh swnghcanj yausu、goengbingz caeuqfaenh hawciengz doxdax、ityiengh ndaejdaengz faplwd baujhoh, coicaenh gak cungj sojyoujci ginghci doxbouj gijndei、doengzcaez hwngfat.

　　Gyalaeg gaijgwz swhcanj guekmiz、giyez guekmiz, laebndei gij dijci gihci guenjleix caeuq gamduk, gyarengz hawj gak aen bouhmonz guenjleix mizgven ciuq canloz caez guh, coi hawj ginghci guekmiz gaijndei baijbouh caeuq diuzndei gapgyaq, nyoengx hawj swhbwnj guekmiz caeuq giyez guekmiz guh ak guh ndei guh hung, dem’ak gij goengnaengz ceiq youqgaenj, gyaak yiengh ceiq youqgaenj neix bae doxdax ceng’ak. Engq cingcuj bae dinghvih gij goengnaengz gak loih giyez guekmiz, guhndei gaiq hong guenjleix cwzyin bouxdaeuz yezvu goekdaeuz, mingzbeg doekdingh gij lingjyiz caeuq fuengyiengq swhbwnj guekmiz cungqdiemj douzcienz. Doinyoengx swhbwnj guekmiz gyonjcomz haeuj gij hangznieb caeuq lingjyiz youqgaenj nangq daengz guekgya ancienz、diuz minghmeg gozminz ginghci bae, gyonjcomz haeuj doengh gij lingjyiz fugsaeh caezcaemh、naengzlig gouqgip、hongsaeh goeng’ik nangq daengz ginghci guekgya gwndaenj beksingq bae, gyonjcomz haeuj gij canjnieb ngamq hwng hab daengzcog hab canloz bae. Laebcaez gij cidu anbaiz hawj giyez guekmiz lai guh yiengh cauhmoq baeznduj. Gyalaeg gaijgwz gij gunghswh youz swhbwnj guekmiz douzswh、yinyingz de. Laebhwnj aen cidu bingzgyaq giyez guekmiz hengzguh canloz sawjmingh, laebndei aen dijhi faenloih gaujhaed bingzgyaq giyez guekmiz, mbeguh yiengh saeh haedsuenq gij cwnghgyahciz ginghci guekmiz. Youq doengh aen hangznieb nwngzyenz、dietloh、densin、suijli、goengyungh saehnieb daengj, doinyoengx gaijgwz aen hothoh baenz gagciemq de gag bae guh caeuq aen hothoh doxdax ceng’ak de byaij hwnj hawciengz, laebcaez gij dijci gihci gamguenj.

　　Dawzmaenh gij fuengcim cwngcwz caenh rengz caux ndei vanzging caeuq hawj engq lai seizheiq hawj yiengh ginghci mbouj dwg gunghyoujci hwngfat. Dinghlaeb aen fap coicaenh minzyingz ginghci. Haeujlaeg buqcawz gij gitgaz cinjhaeuj hawciengz, doinyoengx gij lingjyiz ceng guh sezsih giekdaej haenx goengbingz hailangh hawj gij cawjdaej ginghyingz, laebndei gij gihci ciengzgeiz mizyauq hawj minzyingz giyez caeuqfaenh hwnqguh gij hanghmoeg hungnaek guekgya. Haeujcoengh gij minzyingz giyez miz bonjsaeh de yiendaeuz raphwnj faenh hong dwkroengz giz hoj gij gisuz hungnaek guekgya, caiq lai hailangh doengh gij sezsih giekdaej gohyenz hungnaek guekgya hawj minzyingz giyez. Laebndei gij cidu ok cwngcwz haeujcoengh minzyingz giyez yungzswh, buqgej gij nanzdaez yungzswh nanz、yungzswh bengz. Laebndei roix faplwd fapgvi bae ciengzgeiz mizyauq gamguenj yiengh saeh soucienz giyez caeuq bae boiz seuq gij cienz niengqyiemq giyez. Gyavaiq laebhwnj aen dijhi gyonjhab bingzgyaq minzyingh giyez saenqyungh ndeirwix, laebcaez aen cidu demgya gij saenqyungh minzyingz giyez rauh iq. Haeujcoengh dazyinx minzyingz giyez guhndei aen gezgou ceihleix caeuq aen cidu guenjleix, lai roengzrengz hawj giyez ndaej hab gveihcwz bae hwnqguh caeuq ndaej fuengzre gaemhanh gij fungyiemj seuqcingh. Gyarengz gamguenj mwh guh saeh caeuq saeh laeng, gveihfan gij hingzcwng genjcaz nangqdaengz minzyingz giyez.

　　Laebndei aen cidu giyez ciuhneix miz gij daegsaek Cungguek, hwngcienz gij cingsaenz giyezgyah, haeujcoengh caeuq dazyinx gak loih giyez engq miz yauliz bae yungh swhyenz yausu caeuq engq rox ginghyingz guenjleix、guh ndei faenhhong aenbiengz, gyavaiq hwnqguh gij giyez seiqgyaiq itlouz haenx engq lai.

　　(6)Cauhguh aen hawciengz hung daengx guek doengzcaemh. Aeu guh hawj gij cidu gveihcwz giekdaej hawciengz doengzcaemh、gamguenj hawciengz goengbingz doengzcaemh、sezsih hawciengz ciuq biucinj sang bae lienzdoeng. Gyarengz ap guh saemjcaz goengbingz doxdax, gyarengz fanj gagciemq caeuq fanj yiengh doxdax mbouj cingqdangq, cingleix caeuq feiqcawz gak cungj gvidingh caeuq guhfap gazngaih daengx guek gyoeb guenj hawciengz caeuq goengbingz doxdax. Gveihfan gij fapgvi cidu deihfueng ciuyinx seng’eiq caeuq douzswh, yiemzgimq guh gij saeh famhfap famh gvidingh bae hawj cwngcwz ndeileih. Cimdoiq ciubiu roengzbiu caeuq cwngfuj、swyez danhvei、giyez guekmiz dajcawx daengj gij swhyenz goenggungh, laebhwnj laebcaez aen bingzdaiz dijhi gaicawx dungjyiz gveihfan、caezyungh saenqsik, guhdaengz daj goek daengz byai goenghai guenjleix hanghmoeg. Engq ak engq rox gyonjhab gamguenj hawciengz. Laebcaez aen dijhi biucinj guekgya, gyalaeg gaijgwz gij cidu guenjleix biucinj deihfueng.

　　Laebndei gij cidu caeuq gveihcwz aen hawciengz yausu, nyoengx hawj swnghcanj yausu riuzdoengh doengrat、gak yiengh swhyenz boiqceiq vaiqndei、rengzndumj hawciengz lailai langh ok. Cauhguh aen hawciengz diegdajhwnq singz mbanj doengzcaemh. Laebndei gij cidu dajgiek coi hawj gij hawciengz swhbwnj gveihfan hwngfat. Gungganq aen hawciengz gisuz caeuq soqgawq daengx guek gyonjgyoeb. Laebndei gij gihci cujyau youz hawciengz mbiengj siugai caeuq mbiengj gunghawj daeuj gietdingh gyaqcienz yausu, fuengzre cwngfuj doiq gyaqcienz dinghbaenz guh yiengh capfwngz mbouj hab. Laebcaez gij gihci doengh yiengh swnghcanj yausu baudaengz lauzdung、swhbwnj、diegdeih、cihsiz、gisuz、guenjleix、soqgawq daengj youz hawciengz bingzgyaq goenglauz、ciuq goenglauz gietdingh cienzhong. Gyavaiq gaijgwz gij gyaqcienz raemx、nwngzyenz、gyaudoeng doengh aen lingjyiz neix, gaijndei gij cidu faen mbaek dingh gyaqcienz gihminz yungh raemx、yungh dienh、yungh heiq, laebndei aen gihci dinghgyaq cwngzbinjyouz.

　　Laebndei gij dijci riuzdoeng, gyavaiq guh vuzlenzvangj, laebcaez gij gveihcwz caeuq biucinj riuzdoeng baenz cingjdaej bae hamzciep, gyangqdaemq gij cingzbonj daehhuq daengx biengz. Gyalaeg gaijgwz aen dijci guenjleix nwngzyenz, hwnqguh aen hawciengz gai dienh cawx dienh daengx guek doengzcaemh, gaijndei aen gihci yinhhengz diuhdoh guenjmuengx youz heiq.

　　Gyavaiq gungganq aen dijhi caezcingj gij aeuyungh ndaw guek hawciengz, laebhwnj aen gihci ciengzgeiz mizyauq cwngfuj douzswh haeujcoengh hwnqguh gij hanghmoeg hungnaek guh giekdaej、ndeileih vunzlai、ndei daengz coglaeng, laebcaez gij dijci gihci cwngfuj douzswh mizyauq daiqdoengh ndawbiengz douzswh, gyalaeg gaijgwz gij cidu saemjbae douzswh, laebndei gij banhfap ndaej gikfat swhbwnj ndawbiengz lai guh douzswh caeuq coicaenh douzswh doek daengz dieg, guhbaenz yiengh gihci douzswh gag ndaej gyalai youz hawciengz dazyinx haenx. Laebndei gij banhfap ndaej ciengzgeiz gya hung siuhfei, gemjnoix gij guhfap hanhhaed, hableix gyalai yiengh siuhfei vunzlai caezcaemh, gyavaiq guh yiengh ginghci oknduj.

　　(7) Laebcaez gij cidu giekdaej hawciengz ginghci.Laebcaez gij cidu canjgienz, ciuqfap bingzdaengj ciengzgeiz baujhoh gij canjgienz gak cungj sojyoujci ginghci, laebhwnj aen dijci gyoebhab guenjleix cihsiz canjgienz rengzrwd. Laebndei gij cidu biengjloh saenqsik hawciengz, cauhlaeb gij cidu baujhoh baexmaed sanghyez. Doiq gij yienghsaeh ciemqfamh gij canjgienz caeuq gij leih’ik habfap gak cungj sojyoujci ginghci, hengzguh caemh faenhrap caemh aencoih caemh fadceih, laebndei gij cidu aeu dienzboiz guh ceihfad. Gyarengz doenggvaq dawzfap caepfap baujhoh canjgienz, fuengzre caeuq niujcingq gij yienghsaeh aeu soujduenh hingzcwng、hingzsaeh bae capfwngz ginghci cengnauh, laebcaez gij banhfap ciuqfap cazseuq niujcingq gij anquengj anqloek nanangq giyez.

　　Laebndei aen cidu cinjhaeuj hawciengz, gaijndei gij vanzging cinjhaeuj aen hawciengz yezdai moq lingjyiz moq. Gyalaeg gaijgwz aen cidu daenghgeiq gij swhbwnj nyinhgyau haeujbouh, saedhengz ciuqfap ciuqseiz nyinhgyau. Laebcaez gij gihci giyez buqcanj, damqra laebhwnj aen cidu gagboux buqcanj, doihaeuj gaiq hong boiqdauq gaijgwz siubae giyez, laebndei aen cidu giyez doiqok. Laebcaez aen dijhi saenqyungh ndawbiengz caeuq aen cidu gamguenj.

　　Sam、Laebcaez Gij Dijci Gihci Doinyoengx Ginghci Caetliengh Sang Bae Hwngfat

　　Caetliengh sang baehwngfat dwg aen yinvu ceiq youqgaenj cienzmienh hwnqguh aen guekgya sevei cujyi yendaiva. Itdingh aeu yungh gij leixniemh hwngfat moq daeuj dazyinx gaijgwz, ndwn youq duenhmbaek hwngfat moq, gyalaeg gaijgwz gij gezgou mbiengj gunghawj, caezcienz yiengh banhfap youh coi youh hanh doidoengh yiengh hwngfat caetliengh sang, dajcauh hwngfat rengznyoengx moq gijak moq.

　　(8) Laeb caezcienz gij dijci gihci yawj dieg dingh geiq bae hwngfat yiengh swnghcanjliz akmoq. Doidoengh gisuz ndaej boek giek hwnq moq、gaiqyiengh swnghcanj ndaej cauhmoq boiqhawj、canjnieb ndaej haeujlaeg vuenhyiengh swnggaep, hawj bouxguhhong、gij swhliu guhhong、gij doiqsiengq guhhong gapgyoeb bienq ndei caeuq vuenhmoq yatsang, coiok canjnieb moq、vunqsik moq、rengznyoengx moq, hwngfat gij swnghcanjliz aeu gisuzak、yauqnaengz lai、caetliengh ndei guh mai haenx. Lai roengzrengz cauhmoq gij gisuz doxdoengz youqgaenj、gij gisuz lingxdaeuz ceiq moq、gij gunghcwngz gisuz ciuhneix、gij gisuz boekbuenz, lai laeb cidu hawj aen lingjyiz moq diuz roen doxdax moq, laebhwnj gij gihci gyalai douz cienz guh yiengh canjnieb daengzcog, laebndei gij cwngcwz caeuq aen dijhi ceihleix coengh guh sinsiz gisuz daih moq、yinzgungh cinwngz、hangzgungh hangzdenh、nwngzyenz moq、caizliu moq、canghbei gaepsang、swnghvuz yihyoz、liengswj gohgi doengh gij canjnieb hawjrengz daengxbuenz neix, dazyinx gij canjnieb ngamq hwng miz bouhloh coh ndei guh bae. Ciuq gij biucinj guekgya bae daezswng dazyinx yiengh canjnieb ciuh cienz ciuh haenx gaijndei swnggaep, haeujcoengh giyez yungh gij gisuz soqcih cinwngz、gij gisuz loegsaek bae gaijcauh daezswng yiengh canjnieb ciuh cienz ciuh. Gyalai vanzbauj、ancienz daengj aeu cidu bae hanhhaed.

　　Laebcaez gij gveihcwz caeuq cwngcwz doxgven, gyavaiq guhbaenz yiengh swnghcanj gvanhaeh engq hab yiengh swnghcanjliz akmoq, coicaenh gak loih gaiqyiengh akmaenh swnghcanj comz haeuj guh yiengh swnghcanjliz akmoq, hawj daengx gaiqyiengh swnghcanj guh ok engq lai. Gujli caeuq gveihfan gaiq hong hwngfat denhsij douzswh、fungyiemj douzswh、gagliemx gujgienz douzswh, engq lai langh ok gij rengz aen douzswh gihginh cwngfuj, hwngfat yiengh swhbwnj naihsim.

　　(9) Laebcaez aen cidu coicaenh yiengh ginghci saeddaej caeuq yiengh ginghci soqcih haeujlaeg yungzhab. Gyavaiq doihaeuj gij gunghyezva yienghmoq, gungganq guhhung hangzdajcauh maenhndei comzgyoengq, coi hawj hangzdajcauh coh gaepsang、cinwngz、loegsaek bae guh. Cauhlaeb buek bingzdaiz gisuz hangznieb caemhyungh ndeu, gyavaiq gaijbienq vunqsik canjnieb caeuq cujciz hingzdai giyez, laebcaez gij dijci gihci hwnjsang aen diegvih lingxdaeuz yiengh canjnieb miz gijak. Gaijndei gij banhfap haiyungh caeuq gamguenj aen gihginh canjnieb hungnaek, saedbauj cienzngaenz cuengq haeuj guekgya daengxbuenz aeuyungh bae. Laebhwnj aen banhfap bauj hawj hangzdajcauh ndaej ciuq cingzsoq hableix bae douzhaeuj, hableix gyangqdaemq gij cingzbonj lai yiengh caeuq diuzrap gvaehfeiq.

　　Gyavaiq cauhlaeb gij dijci gihci coicaenh yiengh ginghci soqcih hwngfat, laebndei aen cwngcwz dijhi coicaenh soqcih guhbaenz canjnieb caeuq canjnieb baengh soqcih bae guh. Gyavaiq gizgiz yienghyiengh cungj yungh saenqsik gisuz daih moq, hwngfat gij hulenzvangj gunghyez, dajcauh yiengh canjnieb soqcih comzgyoengq ndaej caeuq guek wnq doxdax beijak. Coicaenh yiengh ginghci bingzdaiz cauhmoq bae hwngfat, laebcaez gij cidu ciuqciengz bae gamguenj yiengh ginghci bingzdaiz. Hwnqguh caeuq haiyungh gij sezsih giekdaej soqgawq guekgya, coicaenh soqgawq caezyungh. Gyavaiq laebhwnj aen cidu canjgienz soqgawq nyinhdingh gvisug、hwnjhaw gaicawx、faenboiq gienzik、baujhoh leih’ik, gyaak gaiq bonjsaeh ceihleix gamguenj soqgawq ancienz, laebhwnj aen gihci hawj soqgawq hamj gyaiq riuzdoeng youh vaiq youh bienh youh ancienz.

　　(10) Laebndei aen dijci gihci hwngfat hangzfugsaeh. Laebndei aen cwngcwz dijhi haeujcoengh hangzfugsaeh hwngfat, gaijndei gij haedsuenq hangzfugsaeh, coi hawj hangzfugsaeh ciuq biucinj hwnqguh. Comzrengz haeuj giz hothoh youqgaenj faen lingjyiz bae doicaenh hangzfugsaeh swnghcanj coh ndei guh baenaj, hwngfat aen bingzdaiz hulenzvangj canjnieb, buqcawz gij gazgit hingzcwng hamj digih bae guh, doicaenh hangzfugsaeh swnghcanj yungzhab hwngfat. Laebcaez gij banhfap gyavaiq hangzfugsaeh gwndaenj hwngfat baenz lai yiengh. Laebndei aen dijhi fapgvi cidu hawj gij gihgou youzyaz fugsaeh, coicaenh gij gihgou youzyaz fugsaeh lauxsaed souj saenqyungh、ciuqfap rap faenhhong.

　　(11) Laebcaez aen dijci gihci hwnqguh gij sezsih giekdaej yendaiva. Cauhlaeb aen dijhicimdoiqsezsih giekdaej yienghmoqbae okgviveh caeuqok biucinj, laebcaez gij banhfap yungzhab yungh ndei sezsih giekdaej yienghmoq, gyavaiq gaij gij sezsih giekdaej conzdungj baenz yiengh soqcih, haigvangq gij roenloh cuengqcienz couxcienz lai cungj lai yiengh, laebcaez gij gihci boiqhab doxngamj bae hwnqguh sezsih giekdaej hungnaek. Gyalaeg gaijgwz aen dijhi lai cungj gyaudoeng daehyinh, doicaenh gaijgwz gij dijci hangz dietloh, hwngfat yiengh hangzgungh doengyungh caeuq yiengh ginghci byonghmbwn daemq, gyavaiq gaijndei gij cwngcwz goengloh sou feiq. Gyaak gij naengzlig yiengh baujyiemj gwnzraemx daehyinh rapdawz baujyiemj caeuq engq rox fugsaeh daengx seiqgyaiq, doicaenh cauhmoq gij cidu gveihcwz caizdingh saeh gwnzhaij. Laebcaez gij banhfap hwnqguh、haiyungh、guenjleix suijli gunghcwngz hungnaek.

　　(12) Laebcaez aen cidu hawj diuzlienh canjnieb diuzlienh gunghawj engq dingjndaej engq ancienz. Cagaenj dajcauh diuzlienh canjnieb diuzlienh gunghawj gag guhbaenz ndaej gaemhanh haenx, laebcaez gij dijci gihci gyarengz bae hwngfat gij diuzlienh canjnieb youqgaenj baudaengz cizcwngz denlu、gunghyez mujgih、gaiqyungh yihliuz、yizgi yizbyauj、yonjgen goekgiek、yonjgen gunghyez、caizliu senhcin daengj, daengx diuzlienh doihaeuj gungroengz gizhoj gisuz、wngqyungh cwngzgoj. Laebhwnj gij gihci bingzguj caeuq dingjdoiq diuzlienh canjnieb diuzlienh gunghawj oksaeh. Laebndei aen gihci doxgap faen mbaek miz bouhloh youq ndaw guek senjnod canjnieb, coi baenz giz dieg cienjok caeuq giz dieg ciepcoux caezyungh leih’ik. Laebguh gizdieg gyangsim guekgya canloz caeuq bwhfaenh doengh aen canjnieb ceiq youqgaenj. Gyavaiq laebndei aen dijhi guekgya rombwh. Laebndei aen dijhi gyonjguenj caeuq hamzciep gaiq hong damqra、swnghcanj、gunghawj、cwkrom、siugai doengh cungj gvangcanj swhyenz coengh daengxbuenz haenx.

　　Seiq、Cauhlaeb Gij Dijci Gihci Haeujcoengh Yienghyiengh Cauhmoq

　　Gyauyuz、gohgi、vunzcaiz dwg doengh yiengh daj giekdaej、daj daengxbuenz dingjcengj gij yendaiva yiengh Cungguek. Itdingh aeu haeujlaeg saedhengz aen canloz gohgyau hwng guek、aen canloz vunzcaiz ak guek、aen canloz aeu cauhmoq coi guh hwngfat, gyoebgyonj doengzcaemh gaijgwz gij dijci gihci yiengh vunzcaiz gyauyuz gohgi, laebcaez gij dijci yienghmoq daengx guek comzrengz guh, hawj daengx aen dijhi cauhmoq guekgya lai ndaej cingjdaej langh rengz.

　　(13) Gyalaeg gyonjhab gaijgwz gyauyuz. Gyavaiq hwnqguh aen dijhi gyauyuz caetliengh sang, gyoebgyonj coi hawj gaijgwz aen fuengsik ganq vunz、aen vunqsik banhhag、aen dijci guenjleix、aen banhfap baujndei. Laebndei aen gihci guh ndei son vunz, doinyoengx baenz cingjdaej bae gaijgwz cauhmoqmonz goq swhsiengj cwngcindaw dayoz、cunghyoz、siujyoz, laebcaez aen dijhi ganq vunz baenz dwz ci dij meij lauz yienghyiengh maenhndei, demrengz hawj lauxsae engq rox son saw ganq vunz, laebcaez aen gihci ciengzgeiz son’gyauq lauxsae guh ndei yiengh lauxsae, gyalaeg gaijgwz gij hongsaeh bingzgyaq gyauyuz. Gaijndei gauhdwngj gyauyuz baijbouh. Gyavaiq hwnqguh gij dayoz caeuq yiengh yozgoh ak gvaq vunz youh gag miz gij yiengh Cungguek、seiqgyaiq itlouz haenx. Faenloih doihaeuj gauhyau gaijgwz, laebhwnj gij gihci ndalaeb diuzcingj yozgoh caeuq gij vunqsik gungganq vunzcaiz youz gohgi hwngfat、guekgya canloz aeuyungh dazyinx, lai gvaq bingzciengz bae baijbouh gij yozgoh ciennieb gaenjyungh, lai roengzrengz bae guh’ak gij yozgoh dwkgiek、gij yozgoh ngamq hwng、gij yozgoh camca caeuq gungganq gij vunzcaiz ak gvaq vunz, baedrengz gyaak gungganq gij naengzlig cauhmoq. Laebndei aen gihci gauhyau cauhmoq gohgi, hawj cwngzgoj engq vaiq engq lai ndaej baenzyungh. Gyarengz caez guh gohgi gyauyuz caeuq yinzvwnz gyauyuz. Gyavaiq cauhlaeb aen dijhi cizyez gyauyuz baenz yiengh cizyez cunghconh caeuq bujdungh gauhcungh yungzdoeng、canjnieb caeuq sonhag yungzhab. Laebcaez gij cidu hagseng lienhfwngz saedguh. Dazyinx gveihfan gij gyauyuz minzbanh hwngfat. Doihaeuj hailangh gij gyauyuz suijbingz sang, lai hawj doengh aen lijgungh dayoz rog guek suijbingz sang de daeuj Cungguek doxgap banhhag.

　　Gaijndei gij gyauyuz swhyenz ranghdieg boiqceiq, laebhwnj aen gihci daezhawj yiengh fugsaeh gyauyuz vunzlai caezcaemh caeuq vunzgyaeuj bienqvaq doxhab doxdaengh. Laebndei aen gihci doinyoengx yivu gyauyuz youh ndei youh doxdaengh hwngfat, sawq cugbouh gyadaih aen gvaengx doegsaw mbouj sou cienz. Laebcaez aen gihci baujcang yiengh gyauyuz caengz haeuj hag caeuq yiengh gyauyuz daegbied、yiengh gyauyuz cienmonz. Doihaeuj gyauyuz lai yungh soqcih gisuz, bangrengz dajcauh aen biengz maij hagsib, lai roengzrengz bauj hawj vunzlai ndaej baenzciuh hagsib.

　　(14) Gyalaeg gaijgwz aen dijci gohgi. Dingjmaenh yawj coh gij gohgi ceiq moq ceiq ak gwnz seiqgyaiq、yawj coh gij ginghci hungnaek youqgaenj、yawj coh gij aeuyungh hungnaek guekgya、yawj coh gij sengmingh ndangcangq beksingq, gaijndei aen gihci cujciz guh gohgi cauhmoq hungnaek, doengbuenz maeuzveh gyarengz gungroengz gij gisuz ceiq ak ceiq youqgaenj, doinyoengx hawj gij rengzhoengh cauhmoq gohgi、yausu boiqceiq、aendoih vunzcaiz baenz dijhi、baenz genci youh doxboiq doxcoengh. Lai roengzrengz gyaak gij rengzlig yiengh gohgi hawjrengz daengxbuenz guekgya, laebndei aen dijhi sizyensiz guekgya, engq ndei bae dinghvih caeuq ndabaij doengh aen gohyenzgihgouguekgya、doengh aen dayoz ak guh yenzgiu suijbingz sang、doengh aen giyez gohgi lingxdaeuz haenx, doihaeuj cunghyangh caeuq deihfueng doxgap guh gohgi cauhmoq, gyoebgyonj ngeixnaemj bae guh gij bingzdaiz gak cungj gohgi cauhmoq, gujli caeuq gveihfan banh gij gihgou yienghmoq guh yenzgiu haifat, hawj aen hawciengz gveihmoz hungloet guek raeuz ndaej langh rengz bae dazyinx, gyarengz gyoebgyonj gij swhyenz cauhmoq caeuq cujciz gij rengzlig cauhmoq, doinyoengx gohgi cauhmoq caeuq canjnieb cauhmoq yungzhab hwngfat. Cauhlaeb aen dijhi gamcaek yawhgingj caeuq wngqdoiq gij fungyiemj gohgi ancienz, gyarengz gag bauj gij diuzgen giekdaej gohgi. Laebcaez aen cidu guenjleix gij sedonz guh gohgi. Caeuq guek wnq lai guh gohgi doxgap doxhag, lai hawj youq Cungguek banh gozci gohgi cujciz, gaijndei aen gihci guenjleix gij yienghsaeh gauhyau、gohyenz yensoj、gohgi sedonz doiq rog guh ciennieb doxhag doxgap.

　　Gaijndei gij hongsaeh guenjleix gohgi giva, dawznaek daj yawj bae gyae、ndaej yinxlingx bae baijbouh aen lingjyiz gihcuj yenzgiu、aen lingjyiz camca lingxdaeuz、aen lingjyiz cungdenj. Gyarengz miz cujciz bae guh gihcuj yenzgiu, hawj gij cienz yungh youq gohyoz gisuz de ndaej engq lai yunghhaeuj gihcuj yenzgiu, caezcienz aen gihci douzcienz guh gihcuj yenzgiu dwg genj ndei haeujcoengh caeuq onjdingh haeujcoengh dox giethab, haenhcoi gij dieg、gij giyez、sevei cujciz、bouxvunz miz diuzgen de haeujcoengh guh gihcuj yenzgiu, haeujcoengh gihcuj yenzgiu daj lai aen fuengmienh bae genjdaez, haenhcoi guh gij gihcuj yenzgiu fungyiemj sang、gyaciz hung haenx. Gyalaeg gaijgwz aen dijhi bingzgyaq gohgi, gyarengz ceihleix gohgi lunzlij, yiemzsuk cingjceih gij yienghsaeh guh yozsuz sim mbouj cingq.

　　Lai gyarengz coengh giyez baenz gij cawjdaej guh gohgi cauhmoq, laebhwnj aen gihci gungganq guhhung aen giyez gohgi lingxdaeuz, lai roengzrengz hawj gij swnghcanj sonhag yenzgiu youz giyez guhgoek de yungzhab haeuj laeg bae, laebhwnj aen cidu giyez bwhcwk ngaenzcienz guh yenzgiu haifat, haeujcoengh giyez gag bae yiendaeuz roxnaeuz caeuqfaenh gij hongsaeh gunggvan gohgi guekgya. Cauhlaeb aen gihci guhhung guhhoengh gij giyez rauh giyez iq cien cing daeg moq haenx. Haenhcoi yiengh giyez rauh iq ak guh gohgi haenx roengzcienz engq lai bae guh yenzgiu haifat, diuzsang aen beijlaeh cienzyungh yenzgiu haifat gyasuenq caiq gaeucawz. Haenhcoi caeuq dazyinx gauhyau、gohyenz yensoj ciuq gij guhfap yungh gonq cij hai cienz, cinjhawj aeu gohgi cwngzgoj bae hawj giyez rauh giyez iq yungh.

　　Laebndei aen gihci faenboiq caeuq guenjleix sawjyungh gij cienz cunghyangh caizcwng yungh youq gohgi haenx, laebcaez aen dijci caephengz gij giva cunghyangh caizcwng haeujcoengh gohgi caeuq aeu gihgou conhyez daeuj guenjleix. Gyadaih aengvaengx “bau guh” yiengh gohyenz hanghmoeg youz caizcwng buedcienz haenx, hawj gohyozgyah miz gienz engq hung bae dingh gisuz lohsienq、yungh ginghfei、diuh swhyenz. Laebhwnj aen gihci raenggenj gij hanghmoeg miz yawjfap mbouj doengz oklaeng cien’gya caencoh doigawj de. Cinjhawj doengh gij swyez danhvei guh gohyenz beij itbuen swyez danhvei engq lingzvued guenjleix, damqra gij yiengh ciuq giyez bae guenj.

　　Gyalaeg gaijgwz aen gihci cienjvaq gohgi cwngzgoj, gyarengz hwnqguh aen dijhi senjnod gisuz guekgya, gyavaiq baijbouh hwnqguh buek bingzdaiz guh gainen niemhcingq、duenhgyang niemhcingq ndeu, laebndei gij cwngcwz wngqyungh daiz ( dauq ) nduj、buek baez nduj、banj baez nduj, hawj cwngfuj lai bae dajcawx gij canjbinj gag cauhmoq. Lai roengzrengz bae guhhung guh’ak aen doih gisuz ginghlijyinz.

　　Cinjhawj boux guh gohgi miz gienz engq hung gag bae faen gij souik cienjvaq gohgi cwngzgoj ndaej haenx, laebhwnj aen cidu dan lied guenjleix gij swhcanj gohgi cwngzgoj mwh dangsaeh aeundaej, gyalaeg gaijgwz gij yienghsaeh hawjgienz boux guh gohgi gaemmiz roxnaeuz sawjyungh gij gohgi cwngzgoj mwh dangsaeh guh’ok. Gyalaeg gaijgwz gij hongsaeh gauhyau、gohyenz yensoj faenboiq souhaeuj. Cinjhawj gij giyez guekmiz engq lai hab diuzgen haenx aeu cauhmoq dajcauh daeuj dazyinx, haiguh lai yiengh hingzsik bae ciengzgeiz gikleih gij vunz guh gohyenz.

　　Cauhlaeb aen dijci gohgi ginhyungz hab’wngq gohgi cauhmoq haenx, gyarengz baengh ginhyungz bae haeujcoengh guh gij yinvu gohgi hungnaek guekgya caeuq haeujcoengh gij giyez rauh iq guh gohgi de, caezcienz gij cwngcwz haeujcoengh yiengh swhbwnj ciengzgeiz douz caeux、douz iq、douz ciengzgeiz、douz gij gohgi geng. Laebcaez aen gihci faensanq gij fungyiemj oklaeng gunggvan gisuz hungnaek, laebhwnj gij cwngcwz dijhi gohgi baujyiemj. Hawj swhbwnj guekrog youq Cungguek guh gujgenz douzswh、fungyiemj douzswh engq fuengbienh.

　　(15) Gyalaeg gaijgwz gij dijci gihci gungganq vunzcaiz. Saedhengz gij vunzcaiz cwngcwz engq coh ndei、engq hailangh、engq raenhamq, laebndei aen gihci gag guhcawj gungganq vunzcaiz, gyavaiq hwnqguh giz diegsang gungganq gij vunzcaiz suijbingz sang guekgya caeuq aen bingzdaiz supyinx conzgyonj vunzcaiz. Gyavaiq ganq’ok gij vunzcaiz guekgya canloz aeuyungh, haeujrengz gungganq dajcauh canloz gohyozgyah、gij vunzcaiz lingxdaeuz gohgi caeuq aendoih cauhmoq itlouz, haeujrengz gungganq dajcauh gij gunghcwngzswh maenhndei、gij lauxcangh guek hung、gij vunzcaiz dinfwngz raeh, hawj gak loih vunzcaiz suciz engq ndei bae. Hwnqguh aendoih gisuz gunghyinz itlouz ndaw canjnieb. Laebndei aen gihci hawj vunzcaiz miz bouhloh riuzdoengh, coihawj vunzcaiz hableix nda youq gak ranghdieg, lailai hawj gij vunzcaiz baihdoeng cungqgyang baihsae haeujlaeg gapguh. Laebndei aen gihci ra’ndaej、genjaeu、gungganq gij vunzcaiz cauhmoq bouxcoz, engq ndei baujcang gij dakdaih gyoengq bouxcoz guh gohgi. Laebcaez gij cidu bauj hawj boux guh gohyenz ndaej itsim guh gohyenz.

　　Gyarengz guh gij gihci gikleih vunzcaiz, dawzdingh hawjgienz hawj aen cawjdaej yungh vunz、hawj vunzcaiz soengcag. Laebhwnj aen dijhi bingzgyaq vunzcaiz aeu yawj bonjsaeh cauhmoq、ndeiyaez、saedyauq、goenglauz daeuj dingh. Dwk doeng roenloh hawj vunzcaiz ndaw gauhyau、gohyenz yensoj caeuq giyez gyaulouz. Laeb caezcienz aen gihci baujcang haeujcoengh yinxhaeuj vunzcaiz rog guek, cauxbaenz aen cidu dijhi vunzcaiz ndaej youq gozci ceng’ak. Damqra laebhwnj aen cidu yinx vunzcaiz gisuz maenh’ak guekrog roengzhoh.

　　Haj、Laebcaez Aen Dijhi Ceihleix Hungzgvanh Ginghci

　　Hungzgvanh diuzgung gohyoz、cwngfuj ceihleix mizyauq, dwg langh ok gijndei aen dijci yiengh hawciengz ginghci sevei cujyi itdingh aeu baenzneix guh. Itdingh aeu laebndei gij cidu dijhi hungzgvanh diuzgung, gyoebgyonj doihaeuj gaijgwz caizsui、ginhyungz doengh gij lingjyiz youqgaenj neix, hawj gij byaijyiengq hungzgvanh cwngcwz engqgya doxdoengz.

　　(16) Laebndei aen dijhi guekgya canloz gveihva caeuq aen gihci doengbuenz hezdiuz cwngcwz. Cauhlaeb aen gihci ceiqdingh caeuq saedhengz gij canloz guekgya, gyarengz hawj gij canloz hungnaek guekgya yungzhab haeujlaeg, gyaak aeu canloz guekgya guh hungzgvanh dazyinx、doengbuenz hezdiuz. Laebcaez aen cidu dijhi hengzguh aen gveihva guekgya ginghci sevei hwngfat, gyaak aen gihci ciep ndei doek ndei gveihva, hawj gij fazcanj gveihva guekgya ndaej langh ok yiengh cozyung dazyinx daengxbuenz, gyaak gij cozyung yiengh giekdaej gveihva gyanghoeng diegguek, dem’ak gij cozyung cengjdaemx oklaeng saedhengz aen gveihva cienhangh caeuq aen gveihva ranghdieg. Laebcaez aen cidu lauxhangz caeuqfaenh gunghgung gezcwz.

　　Hopheux hengzguh gij fazcanj gveihva、aen canloz hungnaek guekgya coihawjdoengh gij cwngcwz caizcwng、hobi、canjnieb、gyagwz、couhnieb bae gapdoengz okrengz, hawj gak loih swhyenz demlai boiqceiq bienq ndei caeuq diuzcingj aen gapgyaq swhyenz gaenq miz. Damqra saedhengz hungzgvanhbaeguenjleix aen biuj swhcanj dawzcaiq guekgya. Dawz gij cwngcwz ginghci nem gij cwngcwz mbouj nangq ginghci haenx cungj nab bae bingzguj de caeuq hungzgvanh cwngcwz byaijyiengq doengz mbouj doengz. Laebcaez aen gihci guenjleix yawhgeiz. Laebcaez aen dijhi haedsuenq gij ceijbiu doengjgeiq cengjdaemx yiengh hwngfat caetliengh sang, gyalai aen gvaengx ginghci moq lingjyiz moq nabhaeuj doengjgeiq. Gyarengz youq gij danhvei guh canjnieb de dwk giek guh doengjgeiq, gaijndei gij banhfap cungjbu caeuq gihgou faennga guh doengjgeiq, cugbouh doigvangq youq giz dieg aen cawjdaej guh ginghyingz de doengjgeiq. Laebcaez aen gihci hungzgvanh cwngcwz caeuq guek wnq dox boiqhab.

　　(17) Gyalaeg gaijgwz aen dijci caizsuiq.Laebcaez aen cidu yawhsuenq, gyaak daengxbuenz couzveh caizcwng swhyenz caeuq yawhsuenq, dawz gij souhaeuj doenggvaq gienzlig hingzcwng、saenqyungh cwngfuj、swhyenz swhcanj guekmiz aeundaej haenx cienzbouh nabhaeuj yawhsuenq cwngfuj bae guenj. Laebndei aen cidu bingzgyaq gij ginghyingz yawhsuenq caeuq cikyauq swhbwnj guekmiz, lai roengzrengz bae baujhawj miz cienz guh gij hongsaeh canloz hungnaek guekgya caeuq coengh beksingq gwn imq daenj raeuj. Gyarengz hungzgvanh cijdauj gij hong bienguh yawhsuenq caeuq caizcwng cwngcwz. Gyarengz guenjleix gij cikyauq yiengh fugsaeh vunzlai caezcaemh, lai youq saehgonq sien bingzguj gij goengnaengz de. Gyalaeg gaijgwz gij yawhsuenq mbouj miz soqgiek. Dungjyiz gij gienz faenboiq yawhsuenq, engqgya dungjyiz、gveihfan bae guenj yawhsuenq, laebndei aen cidu goenghai yawhsuenq. Laebndei aen cidu baugau hongsaeh caizvu gyoebhab cwngfuj dwg gienz cwz gaenq dingh haenx.

　　Laebcaez gij cidu sougvaeh ndeileih yiengh hwngfat caetliengh sang、ndawbiengz goengbingz、hawciengz doengzcaemh, gaijndei gij gezgou suici. Yenzgiu gij cidu sougvaeh caeuq yezdai moq doxhab haenx. Cienzmienh doekguh aen yenzcwz sougvaeh fapdingh, gveihfan gij cwngcwz sougvaeh hawj ndei, laebndei aen gihci haeujcoengh aen lingjyiz youqgaenj caeuq giz hothoh ceiq youqgaenj. Laebcaez aen dijhi gvaehsohsou, laebndei aen cidu goyinz sojdwzsui miz gyoebhab youh miz faenloih, gveihfan gij cwngcwz sougvaeh doenggvaq guhcanh aeundaej、swhbwnj aeundaej、caizcanj aeundaej, gyonjcomz doiq cienzhong sou cienzgvaeh. Gyalaeg gaijgwz gaiq hong sou guenj cienzgvaeh.

　　Laebhwnj gij yiengh caizcwng cunghyangh caeuq deihfueng aeu gienz hong cingcuj、caizlig doxha、ranghdieg bingzyaenx. Lai hawj deihfueng gag dawz cienz yungh cienz, haigvangq goekgvaeh deihfueng, habdangq gya’gvangq gienzhanh hawj deihfueng guenjleix cienzgvaeh. Laebndei aen dijhi caizcwng senjnod ceihawj, cingleix gveihfan gij senjnod ceihawj cienhangh, gyalai yiengh senjnod ceihawj baeznaengz, hawj gij caizlig si yienh caeuq saehgienz de engq doxboiq. Laebhwnj aen gihci youh coi youh hanh aeu yiengh hwngfat caetliengh sang bae senjnod ceihawj. Nod laeng cwngsou cienzgvaeh siufeiq caemhcaiq onjbouh veh roengz deihfueng bae, laebndei gij cwngcwz cwnghcizsui louz dingj doiq gvaeh caeuq diuzlienh dingjgaeu, gaijndei aen beijlaeh faenyungh gij cienzgvaeh caezyungh. Munaemj aeu yiengh gvaeh henhoh hwnqguh hawsingz、yiengh cienz bengxgya gyauyuz、yiengh cienz bengxgya gyauyuz deihfueng gyoeb baenz yiengh gvaeh bengxgya deihfueng, hawjgienz hawj deihfueng youq ndaw gvaengx hanhdingh ndeu doekdingh habyungh geijlai suiqlwd. Hableix gyadaih aen gvaengx yungh mbawcaiq cienhangh cwngfuj deihfueng, habdangq gyadaih gij lingjyiz、gveihmoz、beijlaeh yungh guh cienzgoek. Laebndei aen cidu guenjleix ngaenzcaiq cwngfuj, laebhwnj aen dijhi gamcaek gamguenj sojmiz gij caiq deihfueng caeuq aen gihci ciengzgeiz mizyauq fuengzre vaqgej gij fungyiemj caiq ndumj, gyavaiq aen bingzdaiz yungzswh deihfueng gaijgwz cienjhingz. Gveihfan guenjleix gij souhaeuj mbouj dwg cienzgvaeh, habdangq cuengq mbangj gij gienzhanh guenj yiengh souhaeuj mbouj dwg cienzgvaeh haenx roengz deihfueng bae, youz deihfueng gak giz gag ciuq saedsaeh bae guenj.

　　Habdangq gyaak gij saehgienz cunghyangh、daezsang aen beijlaeh cunghyangh caizcwng ceiok. Gij saehgienz cunghyangh caizcwng ciuq yenzcwz daeuj gangj doenggvaq gaep cunghyangh bae anbaiz ceiok, gemjnoix gij saehgienz cunghyangh caizcwng dakhawj deihfueng bang hengz haenx. Mbouj ndaej boihfanj gvidingh aeu deihfueng anbaiz gij cienz boiqdauq, saedcaih aeu dakhawj deihfueng hengzsawj saehgienz ne, cix doenggvaq yiengh senjnod ceihawj cienhangh bae anbaiz ngaenzcienz.

　　(18) Gyalaeg gaijgwz aen dijci ginhyungz.Gyavaiq laebndei aen cidu cunghyangh yinzhangz, swnhdoeng aen gihci doenggvaq hobi cwngcwz cienzyinx. Lai guh ginhyungz gohgi、ginhyungz loegsaek、ginhyungz ndeidoh、ginhyungz ciengxlaux、ginhyungz soqcih, gyalai yungh yiengh ginhyungz ndei bae fugsaeh gij canloz hungnaek、aen lingjyiz youqgaenj、giz hothoh mbangnyieg. Laebndei gij dinghvih ginhyungz gihgou caeuq guhndei ceihleix, laebcaez aen gihci youh coi youh hanh bae fugsaeh yiengh ginghci saeddaej. Haiguh lai yiengh gujgenz yungzswh, gyavaiq hwngfat aen hawciengz caigen lai caengz, daezsang aen beijlaeh cigsoh yungzswh. Gaijndei aen dijci guenjleix yiengh swhbwnj ginhyungz guekmiz.

　　Laebcaez gij goengnaengz swhbwnj hawciengz douzswh caeuq yungzswh doxha haenx, fuengz fungyiemj、ak gamguenj, coihawj swhbwnj hawciengz cangqheiq onjdingh hwngfat. Haeujcoengh gij swhginh ciengzgeiz de douzhaeuj hawciengz. Daezsang gij caetliengh gunghswh hwnjhaw, gyaak hengz aen cidu gamguenj gij gunghswh hwnjhaw caeuqaen cidu nyenghdinghokhaw.Laebhwnj aen gihci ciengzgeiz mizyauq hawj swhbwnj hawciengz gag lai onjdingh. Laebcaez aen gihci gveihfan gij hingzveiz boux gujdungh hung、boux saedsaeh gaemhanh. Laebndei aen gihci youh coi youh hanh gij gunghswh hwnjhaw faenhoengz. Laebcaez aen gihci baujhoh bouxdouzcienz. Nyoengx hawj gij gujgenz hawciengz ranghdieg ndaej gveihcwz doiqciep、biucinj doengzcaemh.

　　Ceiqdingh aen fap ginhyungz. Laebndei aen dijhi gamguenj ginhyungz, ciuqfap gamguenj gij yienghsaeh ginhyungz liuxliux,gaemndaet aen cidu gamguenj cwzyin caeuq cazdawz cwzyin, lai guh yiengh hong cunghyangh caeuq deihfueng dox boiqhab gamguenj. Hwnqguh gij sezsih giekdaej ginhyungz ancienz rem’ak, dungjyiz gij gveihcwz caeuq cidu ginhyungz hawciengz daenghgeiq dakguenj、gietsuenq cingsuenq, laebhwnj aen cidu nyengh yaek hanhhaed youq geizcaeux niujcingq fungyiemj, cukmaenh aen dijhi baujhawj ginhyungz onjdingh ndaej mizyauq fuengzre gaemhanh gij fungyiemj baenzroix. Laebcaez aen gihci baujhoh boux guh ginhyungz siufeiq caeuq dwkceih gij yienghsaeh ginhyungz mbouj habfap, laebhwnj faj “ciengz refeiz” hawj canjnieb swhbwnj caeuq ginhyungz swhbwnj. Doinyoengx ginhyungz suijbingz sang bae hailangh, onjbouh siujsim netsaed bae doi yinzminzbi dwk haeuj gozci, laebguh aen hawciengz yinzminzbiliz hamqhaeuj guekrog bae. Onjdangq doihaeuj yenzfat caeuq lai yungh cungj yinzminzbi soqcih. Gyavaiq hwnqguh Sanghaij baenz aen ginhyungz cungsim lajmbwn.

　　Laebndei aen vunqsik guenjleix gaiq hong youq cinjhaeuj gaxgonq hawj yiengh dakdaih caeuq ndawguek douzswh doxdoengz gya mbawdan gimq haeuj, haeujcoengh doengh aen vaiswh gihgou hab diuzgen de caeuqfaenh sawq guh gij yezvu ginhyungz. Onjbouh siujsim gya’gvangq ginhyungz hawciengz doxlienz doxdoeng, gaijndei aen cidu bouxdouzswh rog guek habgek. Doihaeuj hwnqguh aen dijhi hamj gyaiq ceihawj ndaej gag gaemhanh, gyaak hengz aen gihci youq mwh hailangh bauj ginhyungz ancienz. Laebhwnj aen dijhi doengzcaemh gamguenj sojmiz gij caiq yiemq guekrog haenx. Lailai caeuqfaenh ceihleix ginhyungz gozci.

　　(19) Laebndei gij gihci saedhengz aen canloz ranghdieg doxdaengh hwngfat. Cauhlaeb yiengh baijbouh ginghci ranghdieg doxbouj gijndei caeuq aen dijhi hoenggan diegguek. Laebcaez aen dijhi doenggvaq cidu caeuq cwngcwz bae doinyoengx gij hongsaeh daih haifat baihsae guhbaenz buenz hong moq、cienzmienh guhhoengh doengbaek aeundaej cungbyoengq moq、gyavaiq hwnghwnj dieg cungqgyang、gyavaiq doihaeuj dieg baihdoeng guhbaenz yendaiva. Doinyoengx Gingh Cinh Gi、Cangzsanhgoz、Yez Gangj Au Davanhgih doengh benq dieg neix dang rengzgoek coengh guh yiengh hwngfat caetliengh sang, gaijndei gij gihci hwngfat rangh ginghci Dahcangzgyangh、baujhoh gij swnghdai rangh dieg Dahvangzhoz caeuq yiengh hwngfat caetliengh sang. Ciuq biucinj sang caetliengh sang bae doihaeuj hwnqguh Yungzanh Sinhgih. Doinyoengx dieg Cwngzduh Cungzging hwnqguh gvaengx ginghci suengsingz haeuj laeg haeuj saed guh bae. Laebcaez gij cidu dijhi cujdij gunghnwngzgih, gyaak aen gihci baujcang gaij ndei guh ndei gyanghoeng diegguek. Laebndei aen gihci ranghdieg baenz cingjdaej bae hwngfat, cauhlaeb aen gihci moq hamj diegguenj doxgap hwngfat, lai hawj baihdoeng cungqgyang baihsae gapguh canjnieb. Laebndei gij dijci gihci guhhoengh ginghci haijyangz.

　　Roek、Laebndei Gij Dijci Gihci Hawsingz Lajmbanj Yungzhab Hwngfat

　　Hawsingzlajmbanj yungzhab hwngfat, dwg gij yendaiva yiengh Cungguek iugouz itdingh baenzneix guh. Itdingh aeu dungjcouz gij gunghyezva yienghmoq、gij cwngzcinva yienghmoq caeuq cienzmienh guhhoengh lajmbanj, hawj gviveh、hwnqguh、ceihleix singz mbanj ndaej cienzmienh yungzhab engq ndei, hawj gij yausu singz mbanj bingzdaengj doxvuenh、suengyiengq riuzdoengh, hawj singz mbanj cengca bienq iq, coihawj singz mbanj doengzcaez mwnhoengh hwngfat.

　　(20) Laebcaez aen dijci gihci doicaenh gij cwngzcinva yienghmoq. Cauhlaeb aen gihci hawj canjyez swnggaep、vunzgyaeuj gyonjcomz、hawsingz hwngfat doxbaengh doxcoi guh ndei. Doihengz aen cidu youz giz dieg ciengz youq daenghgeiq hugouj daeuj daezhawj yiengh fugsaeh caezcaemh ceiq noix, hawj doengh gij bouxguhnaz senj haeuj singz hab diuzgen de ndaej caeuq doengh boux miz huciz giz dieg de senjhaeuj haenx ityiengh miz ndawbiengz baujyiemj、ranzyouq baujcang、lwgnyez gaen senj haeuj hag, gyavaiq hawj doengh gij bouxguhnaz senj haeuj singz de bienqbaenz vunzndawsingz. Baujcang doenghgijbouxguhnaz haeuj singz roengzhoh miz gij gienzik diegdeih habfap, ciuqfap henhoh bouxguhnaz haeuj singz roengzhoh miz gienz bauguh diegdeih、sawjyungh diegranz、faenboiq souik cizdij, damqra laebhwnj gij banhfap gagnyienh aeucienz doiqok.

　　Dingjmaenh hawsingz yinzminz yinzminz hwnq、hawsingz yinzminz vih yinzminz. Laebcaez aen dijhi gveihva hawsingz, dazyinx gij hawsingz hung rauh iq caeuq cwngzcin iq doxdaengh hwngfat、gyonjconz deihmaed bae baijbouh. Gyalaeg gaijgwz gij dijci hwnqguh、yinyingz、ceihleix hawsingz, gyavaiq cienjbienq gij fuengsik hwngfat hawsingz. Doidoengh cauxbaenz aen dijhi moq ndaej gvairaeh ndeivaiq ceihleix gij hawsingz hungloet hungdaih, laebhwnj gij dijci gihci hawj gien hawsingz hwngfat baenz hawsingz doengzcaemh. Gyalaeg gaijgwz hawj gij cin hungdaih miz aen gienz guenjleix ginghci ndawbiengz hab gij vunzgyaeuj nem ginghci gveihmoz aen cin haenx. Laebhwnj gij vunqsik hawsingz vuenhmoq caeuq cwngcwz fapgvi ndaej lienzdaemh, gyarengz hwnqguh gij luengqguenj lai yiengh lajnamh caeuq gaijcauh swnggaep gij guenjsienq gaeuq nduk, haeujlaeg guh yiengh saeh hawj hawsingz engq ancienz engq naihnyangq.

　　(21) Gyamaenh caeuq laebndei aen ginghyingz cidu giekbonj lajmbanj. Miz bouhloh bae doicaenh gaiq hong sawqdiemj lwnz daihngeih bauguh diegdeih daengz geiz le caiq gyaraez 30 bi, gyalaeg gaijgwz yiengh saeh faen laeb gij gienzgaemmiz、gienzbauguh、gienzginghyingz diegbauguh, hawj nungzyez miz yiengh gveihmoz habdoh bae ginghyingz. Laebndei aen dijhi ginghyingz nungzyez, laebndei aen gihci cauxbaenz gij gyaqcienz riuzcienj gienzginghyingz diegbauguh, coinyoengx bouxguhnaz doxgap ginghyingz, doinyoengx hangh cwngcwz bangfuz aen cawjdaej ginghyingz nungzyez yienghmoq riengz daiqdoengh ranz guhnaz demlai souhaeuj dox ngaeulienz. Laebcaez aen dijhi hawj gwnzbiengz caeuqfaenh fugsaeh nungzyez fuengbienh ndeivaiq. Hwngfat gij cizdij ginghci lajmbanj yienghmoq, cauhlaeb aen gihci aeu canjgienz cingcuj、faenboiq hableix, hawj bouxguhnaz ndaej daengz gij gienzik caizcanj engq lai.

　　(22) Laebcaez aen cidu haeujcoengh guh’ak nungzyez youh hawj bouxguhnaz ndaej leih bienq fouq. Dingjmaenh nungzyez lajmbanj hwngfat gonq, laebndei aen gihci douzhaeuj hangz guhhoengh lajmbanj. Guhhung gij canjnieb hawj bouxguhnaz ndaw yienh bienq fouq, cauhlaeb aen dijhi gunghawj gijgwn lai yiengh, gungganq gij canjnieb moq yezdai moq lajmbanj. Gaijndei aen dijhi cwngcwz boujdiep nungzyez, hwngfat yiengh baujyiemj nungzyez lai mbaek. Laebndei aen gihci ciengzseiz fuengzre dauq gungz bienq gungz goq doh vunzgyaeuj lajmbanj, laebhwnj aen cidu faen mbaek faen loih bae bangfuz doengh boux souhaeuj daemq lajmbanj caeuq giz dieg mbouj fatdad. Laebcaez aen gihci ciengzgeiz mizyauq guenjleix yiengh saeh hawj gij cienz guekgya douzhaeuj haenqrengz duetgungz cauxbaenz swhcanj. Yungh gij gingniemh “aen gunghcwngz cienfanh”, laebcaez aen gihci ciengzgeiz mizyau doidoengh lajmbanjcienmienh guhhoengh.

　　Gyavaiq laebcaez aen gihci baujcang gij souik bouxguhnaz ndaem haeux, coibaenz aen gyaqcienz haeuxgwn doengh gij nungzcanjbinj youqgaenj neix cungj itcig habngamj. Doengbuenz maeuzveh laebhwnj aen gihci sengj gap sengj boizbouj gij leih’ik giz ok giz siu haeuxgwn laidaih, youq boizbouj gij leih’ik giz ok haeuxgwn laidaih yamq ok yamq maenh. Gyoebgyonj doicaenh gaijgwz gij dijci gihci guenjleix gaicawx caeuq bwhcwk haeuxgwn, laebhwnj gij vunqsik moq gamguenj. Laebcaez aen gihci ciengzgeiz mizyauq bae mbaetyungh haeuxgwn caeuq gijgwn.

　　(23) Gyalaeg gaijgwz aen cidu diegdeih. Gaijgwz laebndei aen cidu hawj ciemqyungh caeuq dembouj reihnaz doxdaengh, ciemqyungh gak loih reihnaz aeu itcaez guenjleix, laebcaez aen gihci niemhsou reihnaz dembouj ndeirwix, saedbauj dabdaengz aen biucinj ciemq bouj doxdaengh. Laebndei gij gihci hwnqguh、niemhsou、guenjhoh gaiq reihnaz biucinj sang. Laebcaez aen dijhi guenjleix yiengh saeh baujcang reihnaz yungh daeuj ndaem cungj gomiuz ngoenznaengz gwn yungh. Cinjhawj ranz guhnaz doenggvaq okco、haeujguj、doxgap doengh gij guhfap neix buenzhoengh yungh ndei gij ranzyouq habfap de. Miz bouhloh bae doicaenh hangh gaijgwz hawj gij dieg dajhwnq cizdij lajmbanj ndaej gaicawx haenx haeuj hawciengz, laebcaez aen gihci faenboiq gij souik diegdeih demsou ndaej haenx.

　　Gaijndei diegdeih guenjleix, laebcaez aen cidu guenjleix diegdeih caeuq hungzgvanh cwngcwz nem ranghdieg hwngfat ndeivaiq doxciep hwnjdaeuj, baujcang gij canjnieb guhdaeuz、hanghmoeg hungnaek hableix yungh dieg gonq, hawj giz dieg miz gijndei lai de engq ndaej guh hung guh gvangq. Laebhwnj aen gihci boiqceiq aen cijbyauh gyalai dieg dajhwnq hawsingz caeuq vunzgyaeuj ciengz youq demlai doxdaengh. Damqra aen gihci aeu gij reihnaz guekgya gyonjcomz haifwz cauhguh haenx cien yungh youq gij hanghmoeg caeuq giz dieg daegdingh bae doeksaed ciemq bouj doxdaengh. Engq rox yungh ndei diegdeih gunghsanghyez hawsingz, gyavaiq hwngfat aen hawciengz ngeihgaep dieg dajhwnq, doinyoengx doxgyaux haifat leihyungh diegdeih、hableix cienjvuenh yunghcawq diegdeih, buenzhoengh gij diegdeih yienhmiz caeuq gij diegdeih yungh noix de. Mbeguh yiengh saeh cienhangh ceihleix gij yunghdieg gak loih canjyez yenzgih. Ceiqdingh yiengh cwngcwz gyaraez aen geizhanh sawjyungh gij yunghdieg gunghsanghyez caeuq daengzgeiz le swnjgeiz.

　　Caet、Laebndei Aen Dijci Gihci Doiq Rog Hailangh Suijbingz Sang

　　Hailangh dwgcungj geiqhauh sienmingz gij yendaiva yiengh Cungguek. Itdingh aeu dawzmaenh doiq rog hailangh aen gihbwnj gozcwz neix, dawzmaenh aeu hailangh coi gaijgwz, baenghgauq gijak guek raeuz miz aen hawciengz gveihmoz hungloet, youq mwh gyadaih riengz guek wnq doxgap bae gyaak hailangh, hwnqguh aen dijci moq yiengh ginghci hailangh suijbingz engq sang.

　　(24) Onjbouh gyadaih hailangh hawj cidu doiqciep gozci. Gag bae doiqciep gij ginghmou gveihcwz biucinj sang gwnz gozci, youq baujhoh canjgienz、boujdiep canjnieb、vanzging biucinj、baujhoh lauzdung、cwngfuj dajcawx、denswj sanghvu、ginhyungz lingjyiz daengj guhdaengz gveihcwz、gveihci、guenjleix、biucinj doxdoeng doxyungz, dajcauh aen cidu vanzging ronghcingx onjdingh youh ndaej yawhgeiz. Lai gag bae hailangh, miz bouhloh gya’gvangq doiqrog hailangh aen hawciengz sanghbinj、hawciengz fugsaeh、hawciengz swhbwnj、hawciengz vunzhong guek raeuz, gya’gvangq mbiengj dog hailangh hawj gij guekgya ceiq mbouj fatdad. Gyalaeg gaijgwz gij dijci gihci bang guekrog, guhdaengz daengx diuzlienh guenj liux.

　　Henhoh aen dijci mouyiz lai mbiengj aeu Seiqgyaiq Mouyiz Cujciz guh goek, lailai caeuqfaenh gaijgwz aen dijhi ceihleix ginghci lajmbwn, daezhawj gij canjbinj lajmbwn caemh yungh haenx engq lai. Gya’gvangq aen vangjloz swyouz mouyizgih biucinj sang doiqciep lajmbwn, laebhwnj aen gihci habgvi caeuq gij gveihcwz gozci doengyungh doxciep, gaijndei aen vanzging hailangh doxgap.

　　(25) Gyalaeg gaijgwz aen dijci vaimou. Gyarengz hawj mouyiz cwngcwz caeuq caizsui、ginhyungz、canjyez cwngcwz doxboiq doxhab, dajcauh aen dijhi aeu cidu daemxcengj caeuq aeu cwngcwz haeujcoengh hawj mouyiz ak guek, gyavaiq gyonjgyoeb gaijgwz gij mouyiz doiq ndaw doiq rog, haeujsim wngqdoiq aen byaijyiengq mouyiz cienj yungh soqcih、baenz loegsaek. Doicaenh cauhmoq gamguenj doenggvan、suivu、vaivei daengj, cauh ok aen cidu vanzging ndeileih hwngfat yezdai moq vunqsik moq. Cauhmoq hwngfat yiengh mouyiz soqcih, doicaenh hwnqguh aen diegsawq gyonjhab densangh hamj gyaiq. Hwnguh aen cungsim gaicawx daihbuek sanghbinj, hwnqguh aen cungsim comzsanq faenbued gaep seiqgyaiq, haeujcoengh gak loih cawjdaej miz bouhloh youq rog guek baijbouh gij sezsih riuzdoeng, haeujcoengh giz dieg miz diuzgen de hwnqguh aen cotsim cungsim guh vuzliuz daengx seiqgyaiq caeuq aen cotsim boiqceiq daihbuek sanghbinj swhyenz. Laebcaez aen gihci fuengzre gaemhanh fungyiemj mouyiz, laebndei aen dijhi gamguenj cuzgouj caeuq aen cidu yiengh mouyiz gouqcaeq.

　　Cauhmoq daezswng yiengh mouyiz fugsaeh, cienzmienh saedhengz mbawdan gimq haeuj yiengh mouyiz fugsaeh hamj gyaiq, doicaenh gyoebhab sawqdiemj guh yienghndei gya’gvangq hailangh hangzfugsaeh, gujli aen gihgou cienmonz guh fugsaeh gyaak bonjsaeh fugsaeh daengx seiqgyaiq. Gyavaiq doicaenh hwngfat yiengh mouyiz lizhamq, haiguh gij yezvu gozci mouyiz lizhamq yienghmoq. Laebhwnj laebcaez aen dijhi fugsaeh ginhyungz hamj gyaiq, gunghawj gij canjbinj caeuq fugsaeh ginhyungz engq lai.

　　(26) Gyalaeg gaijgwz aen dijci guenjleix canghseng’eiq guekrog douzswh caeuq doiq rog douzswh. Dajcauh aen vanzging guh seng’eiq maenhndei hab hawciengz、hab fapceih、hab gozci aeuyungh haenx, ciuqfap baujhoh gij gienzik douzswh canghseng’eiq guekrog. Gyalai aen moegloeg canjnieb gujli canghseng’eiq guekrog douzswh, hableix sukgemj mbawdan gimqhaed swhbwnj guekrog cinjhaeuj, doeksaed doengh gij banhfap cienzmienh siubae gij hanhhaed cinjhawj swhbwnj guekrog haeuj ndaw lingjyiz hangzdajcauh, doidoengh densin、hulenzvangj、gyauyuz、vwnzva、yihliuz doengh gij lingjyiz neix miz bouhloh bae gyadaih hailangh. Gyalaeg gaijgwz gij dijci gihci coicaenh canghseng’eiq guekrog douzswh, baujcang gij giyez guekrog okbonj haenx youq aeundaej yausu、cinjhawj swhciz、ceiqdingh biucinj、cwngfuj dajcawx daengj fuengmienh yiengjmiz dakdaih guekminz, haeujcoengh camgya duenhgwnz duenhlaj diuzlienh canjnieb boiqdauq gapguh. Laebndei aen cidu fuengbienh vunz guekrog haeuj gyaiq daeuj youq、ywbingh、ceihawj daengj. Laebndei gij dijci gihci coicaenh caeuq baujcang doiq rog douzswh, laebcienz aen dijhi guenjleix fugsaeh doiq rog douzswh, doidoengh diuzlienh canjnieb diuzlienh gunghawj caeuq guek wnq gapguh.

　　(27) Gaijndei gij baijbouh ranghdieg hailangh. Gyamaenh aen diegvih dieg henzhaij baihdoeng dazroen sien hailangh, hawj dieg cungqgyang dieg baihsae caeuq dieg doengbaek engq hailangh, gyavaiq cauxbaenz yiengh gvaengxgyaq cienzmienh hailangh dwg diegndaw dieghaij ndaw rog lienzdoengh、baihdoeng baihsae suengyiengq doxbang doxbouj. Langh ok gijmaenh henzhaij、henzguek、henzdah caeuq doengh giz roengoek, hawj gij goengnaengz faengoeng ranghdieg hailangh bienq ndei, dajcauh giz diegsang hailangh lai cungj lai yiengh. Hengzguh aen canloz daezswng giz sawqguh swyouz mouyiz, haenhcoi rox cauhdaeuz、comzgyonj bae damqra. Gyavaiq hwnqguh Haijnanz Swyouz Mouyiz Gangj.

　　Langh ok gijndei aen cidu “aen guekgya ndeu song cungj cidu”, gyamaenh daezswng aen diegvih Yanghgangj dwg giz cungsim gozci ginhyungz、hangzyin、mouyiz haenx, haeujcoengh Yanghgangj、Aumwnz dajcauh giz diegsang gyonjcomz vunzcaiz gaepsang gwnz seiqgyaiq, laebcaez aen gihci hawj Yanghgangj、Aumwnz youq guekgya doiq rog hailangh ndawde ndaej engq ndei langh ok goengrengz. Gyalaeg Yez Gangj Au Davanhgih doxgap, gyarengz guh gveihcwz hamzciep、gihci doiqciep. Laebndei gij cidu caeuq cwngcwz hawj song hamq ginghci vwnzva doxhag doxgap, hawj song hamq lailai yungzhab hwngfat.

　　(28) Laebndei aen gihci doicaenh caetliengh sang bae caezlaeb “it rangh it loh”. Laebdaeb hengzguh aen giva gvendaengzgijyienghsaeh gohgi cauhmoq “it rangh it loh”, lai yunghrengz laebguh aen bingzdaiz hawj lai mbiengj doxgap guh gij hongsaeh loegsaek fazcanj、yiengh ginghci soqcih、yinzgungh cinwngz、nwngzyenz、suisouh、ginhyungz、gemj cai daengj. Guhndei dieghawq gwnzhaij gwnzmbwn gwnzvangj itcaez baijbouh, cauhlaeb aen vangjloz “it rangh it loh” seiqlengq doxlienz doxdoeng. Caemhcaez doihaeuj gij gunghcwngz hungnaek baenz biugeiq haenx caeuq gij hanghmoeg minzswngh “iq youh ndei” haenx.

　　Bet、Laebcaez Aen Cidu Dijhi Yiengh Yinzminz Minzcuj Ronzdoeng Goekbyai

　　Fazcanj yiengh yinzminz minzcuj ronzdoeng goekbyai dwg gij yendaiva yiengh Cungguek itdingh aeu baenzneix guh. Bietdingh aeu byaijdingh diuz roen cwngci fazcanj yiengh sevei cujyi miz gij daegsaek Cungguek, hengzdingh caeuq laebndei gij cwngci cidu gaenbonj、gij cwngci cidu giekbonj、gij cwngci cidu youqgaenj guek raeuz, fungfouq gij minzcuj hingzsik gak caengzgaep, dawz yinzminz danggya guhcawj caensaed、saedcaih guh haeuj daengz guekgya cwngci swnghhoz caeuq sevei swnghhoz gak aen fuengmienh bae.

　　(29) Gyarengz laebguh aen cidu yinzminz danggya guhcawj.Dawz ndei、guh ndei、yungh ndei aen cidu yinzminz daibyauj daihhoih. Laebcaez gij cidu yinzda gamduk hingzcwng gihgvanh、genhcaz gihgvanh、saemjbuenq gihgvanh、genjcaz gihgvanh, caezcienz aen fap gamduk caeuq gij gihci saedhengz de, lai haeujrengz gamduk yinzda saemjcaz yawhsuenq gietsuenq caeuq gamduk swhcanj guekmiz guenjleix、ngaenzcaiq cwngfuj guenjleix. Laebcaez gij lwnhsaeh gveihcwz yinzda caeuq gij cidu lwnhcingq、bingzguj、bingzngeix、dingqcingq. Gyalai gij neiyungz caeuq hingzsik yinzda daibyauj lienzhaeh yinzminz ginzcung. Laebcaez gij gihci supsou yigen yinzminz、gyonjcomz dungxcaiz yinzminz. Lailai baengh rengz gunghvei、gungcinghdonz、fulenz daengj ginzdonz cujciz dangq diuzgiuz diuzsai

　　bae lienzhaeh fugsaeh ginzcung.

　　(30) Laebcaez gij gihci yiengh minzcuj doxyaeng. Langh ok gij rengz yinzminz cwnghez dangguh aen gihgou cienmonz doxyaeng, laebcaez gij gihci haeujlaeg doxyaeng doxdoengh、yigen ndaej lailai gangjok、gietcomz gij nyinhrox doxdoengz engq lai, lai roengzrengz laeb ndei aen gihci yinzminz cwnghez fanjyingj cingzgvang ndawbiengz sim’eiq beksingq、lienzhaeh ginzcung、fugsaeh yinzminz. Laeb caezcienz aen gihci yinzminz cwnghez guh minzcuj gamduk.

　　Laebndei aen dijhi yiengh minzcuj doxyaeng, lai dem gij fuengsik doxyaeng, laebcaez aen bingzdaiz hawj cwngdangj doxyaeng、yinzda doxyaeng、cwngfuj doxyaeng、cwnghez doxyaeng、yinzminz donzdij doxyaeng、gihcwngz doxyaeng caeuq sevei cujciz doxyaeng baenz cidu bae, gyaak hawj gak cungj miengloh doxyaeng doxcaez boiqhab. Laebcaez gij gihci doeksaed yiengh guhfap youq caengz guh gezcwz caeuq mwh hengz gezcwz aeu miz doxyaeng, laebndei aen gihci aeuyungh、doeksaed、hoizdauq gij cwngzgoj doxyaeng.

　　(31) Laebcaez gij cidu gihcwngz minzcuj. Laebcaez gij gihci gihcwngz ginzcung gagguenj youz gihcwngz dangjcujciz lingjdauj haenx, caezcienz gij cidu dijhi caeuq gunghcoz dijhi gihcwngz minzcuj, haigvangq gij roenloh hawj gihcwngz gak loih cujciz caeuq ginzcung miz bouhloh bae camgya gihcwngz ceihleix. Laebndei aen cidu banhsaeh goenghai. Laebcaez gij cidu giyez swyez danhvei minzcuj guenjleix aeu cizgungh daibyauj daihhoih guh gihbwnj hingzsik haenx, laebndei gij guhfap ndeiyungh giyez cizgungh camgya guenjleix.

　　(32) Laebndei aen gvaengxgyaq guh hong daih dungjcan.Laebndei gij cwngcwz guhfap ndaej hawj dungjyiz cansen dawzok yiengh cwngci cozyung gietcomz simvunz、gyonjcomz rengzvunz de. Dawz ndei、guh ndei、caezcienz ndei aen cidu cwngdangj yienghmoq Cungguek. Engq ndei langh rengz gyoengq vunz rog Dangj, laebcaez gij cidu guhndei aendoih gyoengq daibyauj rog Dangj. Ceiqdingh aen fap coicaenh minzcuz doxgiet baenaj, laebcaez gij cidu gihci couqmaenh yiengh eiqsik caezcaemh Cunghvaz Minzcuz, hawj Cunghvaz Minzcuz engqgya sim caez rengz comz. Baenzroix bae doihaeuj gij cunghgyau guek raeuz habngamj guekcingz Cungguek, lai roengzrengz ciuq fap guenjleix hongsaeh cunghgyau. Laebndei aen gihci aeu cwngci dazyinx gyoengq cihsiz fwnswj rog Dangj caeuq gyoengq vunz sevei gaihcwngz moq. Cienzmienh cauhlaeb yiengh gvanhaeh cwngfuj caeuq canghseng’eiq youh gyawj youh seuq, laebcaez aen gunghcoz gihci hawj gij ginghci mbouj dwg gunghyoujci de cangqheiq fatmaj、doengh boux guh gij ginghci mbouj dwg gunghyoujci de cangqheiq hungmaj. Laebndei aen gihci guh hongsaeh Gangj Au Daiz caeuq vazgyauz.

　　Gouj、Laebndei Aen Fapceih Dijhi Sevei Cujyi Miz Gij Daegsaek Cungguek

　　Fapceih dwg gij baujcang youqgaenj guh baenz gij yendaiva yiengh Cungguek. Itdingh aeu cienzmienh gvancez saedhengz Yenfaz, henhoh gij gienzvi Yenfaz, gapdoih doicaenh gaijgwz gak aen hothoh ndaw laebfap、caepfap、dawzfap、soujfap, laebcaez aen gihci bauj hawj dangqnaj faplwd bouxboux bingzdaengj, hwngcienz gij fapceih cingsaenz sevei cujyi, henhoh sevei goengbingz cingqngeih, cienzmienh doicaenh guekgya gak yiengh hongsaeh ciuqfap daeuj guenj.

　　(33) Gyalaeg gaijgwz aen lingjyiz laebfap. Laebndei aen faplwd dijhi sevei cujyi miz gij daegsaek Cungguek aeu Yenfaz guh goek haenx, laebcaez aen cidu dijhi baujcwng Yenfaz ndaej cienzmienh saedhengz, laebhwnj aen cidu baugau gij cingzgvang saedhengz Yenfaz. Laebndei gaiq hong laebfap youz dangjveij lingjdauj、yinzda cujdauj、cwngfuj dakbaengh、gak fueng camgya. Doengbuenz maeuzveh dinghlaeb、coihgaij、feiqcawz、cekgej、biensij faplwd, gyarengz cimdoiq aen lingjyiz cungdenj、aen lingjyiz ngamq hwng、aen lingjyiz nangq daengz guekrog laebfap, laebndei aen cidu saemjcaz hab mbouj hab Yenfaz、saemjcaz bwh’anq, hawj laebfap guh ndaej engq ndei. Damqra ranghdieg gapdoih laebfap. Laebcaez gij gihci fapgvi ndaw Dangj caeuq faplwd fapgvi guekgya doxciep doxha. Hwnqguh aen saenqsik bingzdaiz faplwd fapgvi caeuq vwnzgen gveihfan daengx guek doengzcaemh.

　　(34) Haeujlaeg doicaenh ciuqfap hingzcwng. Doicaenh gij gihgou、ciznwngz、gienzhanh、cwngzsi、cwzyin cwngfuj baenz fapdingh bae, coicaenh cwngvu fugsaeh hab biucinj、hab gveihfan、bienq fuengbienh, laebndei aen bingzdaiz doengzcaemh youq gwnz vangj guh cwngvu fugsaeh daengx guek caez yungh haenx. Laebndei aen gihci saemjcaz gij gezcwz hungnaek、gij vwnzgen gveihfan hab mbouj habfap. Gyarengz saemjcaz gaiq hong laebfap cwngfuj. Gyalaeg gaijgwz aen dijci hingzcwng caepfap, laebndei gij dijci gihci gihcwngz gyoebhab caepfap, laebcaez gij dijci gihci gamduk hingzcwng caepfap. Laebndei aen cidu dingh gij gihcunj aen gienz hingzcwng buenqgiet cawqfad ndaw lingjyiz hingzcwng cawqfad daengj, doidoengh gij biucinj hingzcwng caepfap ndaej hamj dieg hamzciep. Laebndei aen cidu hingzcwng cawqfad caeuq hingzsaeh cawqfad song mbiengj hamzciep. Laebcaez gij dijci gihci hingzcwng fuklwnh. Laebndei aen cidu hingzcwng caizgiet. Laebndei aen dijci cigsoh guenjleix caeuq aen dijci deihfueng faengaep guenjleix, laebcaez gij gihci aen gihgou cigsoh guenjleix caeuq deihfueng doxgap boiqhab. Onjdangq doihaeuj doengh aen yienh vunz noix de gaijndei gihgou bae. Gyalaeg gaijgwz aen cidu guenjleix gaihfazgih. Gaijndei gij gezgou baijbouh swyez danhvei,hawj de lai guh hongsaeh goeng’ik.

　　(35) Laebcaez gij dijci gihci goengcingq caepfap dawzfap. Laebcaez gij dijci gihci genhcaz gihgvanh、gungh’anh gihgvanh、genjcaz gihgvanh、saemjbuenq gihgvanh、swhfaz hingzcwng gihgvanh gag dawz faenhhong bonjfaenh, gienzgamcaz、gienzdamqcaz、gienzgenjcaz、gienzsaemjbuenq、gienzcaephengz dox boiqhab、dox hanhhaed, saedbauj hengzguh caepfap dawzfap gak aen hothoh daj goek daengz byai cungj ndaej mizyauq hanhhaed gamduk. Gyalaeg gaijgwz gienzsaemjbuenq caeuq gienzcaephengz doxfaen, laebcaez aen dijci guekgya guh gij hong caephengz, gyalai hawj bouxnangqsaeh、genjcaz gihgvanh caeuq vunzlai ndawbiengz daj gyaeuj daengz byai gamduk yienghsaeh caephengz. Laebndei aen cidu baujhoh gouqcaeq caepfap dawzfap, laebndei aen cidu guekgya dienzboiz. Gyalaeg caeuq gveihfan yiengh hong dawzfap goenghai, doeksaed caeuq laebndei aen cidu rapdawz cwzyin dawzfap. Gveihfan bae ndalaeb aen fazyen cienmonz. Gyalaeg gaijgwz faen gaep guenj、gyoebgyonj guenj、dieg wnq guenj gij anq hingzcwng. Cauhlaeb gij dijci gihci guhdoih riengjvaiq bae guh hongsaeh gingjcaz, doihaeuj gaiq hong gaijgwz guenjleix gij gihgou benhci gungh’anh gihgvanh deihfueng, laebdaeb doihaeuj gaijgwz aen dijci guenjleix minzhangz gungh’anh gihgvanh caeuq haijgvanh aen bouhmonz cazgaeb coujswh de. Gveihfan aen cidu guenjleix doengh boux bang guh hongsaeh gingjcaz.

　　Dawzmaenh cungj yinzgenzgvanh cingqdeng, lai roengzrengz baujcang gaiq hong caepfap dawzfap mizgven vunzgienz, laebndei aen gihci guhhong dwg banhsaeh gaxgonq aeu saemjcaz、mwh banhsaeh aeu gamduk、oksaeh le aeu niujcingq daengj, laebndei gij cidu nangqdaengz yiengh giengzceih cosih ndangvunz gienzleih gunghminz caeuq yiengh giengzceih cosih cazfung、gaeuat、funggiet daengj, ciuqfap cazbanh yiengh famhcoih leihyungh cizgenz vih seicingz uengjfap、mbouj habfap gyaeng vunz、yungh hingz bik nyinh daengj. Doihaeuj gij anq hingzsaeh miz lizswh buekhoh caez. Laebhwnj aen cidu funglouz gij geiqloeg famhcoih mbaeu de.

　　(36) Laebndei aen gihci doihaeuj hwnqguh aen biengz fapceih.Laebcaez aen dijhi yiengh faplwd fugsaeh caezcaemh cw doh hawsingz lajmbanj, gyalaeg gaijgwz aen cidu lizswh、aen dijci gunghcwng、aen cidu bingzbuenq、aen cidu diuzgaij、aen dijci guenjleix gij gamqdingh dawzfap. Gaijndei gij hong cienzgangj sonrox fapceih, laebndei aen gihci aeu saedguh daeuj dazyinx fazyoz yenyau son vunz ganq vunz. Gyarengz caeuq gaijndei gij hong baujhoh gienzik bouxcaengzhung, gyarengz yawhfuengz caeuq ceihleix bouxcaengzhung famhcoih, ceiqdingh gij gvidingh cienmonz son vunz gaijndei.

　　(37) Gyarengz laebguh yiengh fapceih nangqdaengz guekrog.Laebhwnj aen gihci guh hongsaeh doengzcaemh doicaenh gij laebfap、caepfap、dawzfap、soujfap caeuq yiengh fugsaeh faplwd、gungganq vunzcaiz fapceih nangqdaengz guekrog haenx. Laebndei gij dijhi faplwd fapgvi caeuq gij dijhi saedhengz fapceih nangqdaengz guekrog, gyalaeg caeuq guek wnq doxgap caepfap dawzfap. Laebndei gij cidu dawzfap saemjbuenq gvendaengz youq ndaw gvanhaeh faplwd minzsaeh nangqdaengz guekrog bouxnangqsaeh ciuqfap iekdingh guenjat、genjaeu gij faplwd habyungh rog guek daengj. Laebcaez aen cidu bingzbuenq caeuq diuzgaij saehseng’eiq gozci, gungganq aen gihgou bingzbuenq、aen lizswh swvusoj maenhndei youq gwnz seiqgyaiq ndaej baiz youq gonq de. Lailai caeuqfaenh ceiqdingh gozci gveihcwz.

　　Cib、Gyalaeg Gaijgwz Aen Dijci Gihci Vwnzva

　　Gij yendaiva yiengh Cungguek dwg yiengh yendaiva vuzciz vwnzmingz caeuq cingsaenz vwnzmingz doxha. Itdingh aeu lai gagsaenq vwnzva bonjfaenh, hwngfat yiengh vwnzva senhcin sevei cujyi, hwngcienz yiengh vwnzva gwzming, cienzciep yiengh conzdungj vwnzva maenhndei Cunghvaz, gyavaiq hab’wngq yiengh hingzseiq moq saenqsik gisuz hwngfat riengjvaiq, gungganq guhbaenz aendoih vunzcaiz vwnzva maenhndei lailai daihdaih, gik ok gij rengzhoengh cauhguh cauhmoq vwnzva daengx aen minzcuz raeuz.

　　(38) Laebndei aen cidu rapdawz gij cwzyin gaiq hong yisiz hingzdai. Laebcaez aen gunghcoz dijhi yungh gij lijlun cauhmoq aen Dangj daeuj gyaak daengx Dangj、son’gyauq yinzminz、dazyinx saedguh, laebndei aen cidu dangjveij (dangjcuj) lijlunyozsizcunghsinhcujbae hagsib, laebndei aen dijhi guh hong swhsiengj cwngci. Cauhmoq aen gunghcwngz yenzgiu caeuq laebndei gij lijlun Majgwzswh Cujyi, hengzguh aen gunghcwngz cauhmoq cezyoz sevei gohyoz, cauhlaeb aen dijhi miz gij cihsiz cezyoz sevei gohyoz Cungguek bonjfaenh. Laebndei aen cidu sinhvwnz fazyenzyinz. Cauhlaeb aen gihci guhhong caeuq aen dijhi bingzgyaq hab’wngq cenzmeizdij swnghcanj cienzboq, doihaeuj doengh aen meizdij gaemgoek de guh baenzroix bengwz. Laebndei aen gihci dazyinx baklinx caeuq aen gihci doxgap wngqdoiq yienghsaeh baklinx.

　　Doidoengh gij hongsaeh son’gyauq lijsiengj saenqniemh baenz cidu baenz ciengzseiz guh. Laebndei gij cidu gihci gungganq caeuq hengzguh aen hwzsinh gyacizgvanh sevei cujyi. Gaijndei aen gihci cauhmoq gaiq hong gungganq vwnzmingz、saedguh vwnzmingz、cauhlaeb vwnzmingz. Guh aen gunghcwngz youq lajmbanj laeb fungheiq vwnzmingz. Gaijndei aen gihci haenhgangj hagsib doengh boux yinghyungz mozfan, cauhmoq aen gihci cujciz yienghsaeh sonrox aigoz cujyi caeuq gak loih cawjdaez hozdung vunzlai caeuqfaenh haenx, doidoengh daengx biengz gingqcungh yinghyungz、siengjniemh senhlez、ceng guh bouxmaenh. Cauhlaeb aen dijhi cienzciep gij conzdungj meijdwz Cunghvaz, laebcaez gij dijci gihci hwnqguh sevei gunghdwz、cizyez daudwz、gyahdingz meijdwz、goyinz binjdwz, laebcaez aen gihci ciengzgeiz mizyungh coi vunz lauxsaed soujsaenq, son’gyauq dazyinx daengx biengz gagrox ciuqsouj faplwd、ciuqsouj gvigawj vunzlai caeuq fungsug ndei, laemxsim fanjdoiq doengh gij yienghsaeh cienzngaenz daih’it、youqlag daih’it、bonjfaenh daih’it caeuq mbouj nyinh lizsij. Guhbaenz aen gihci faen gyoengq、dawzcinj youq gwnz vangj son’gyauq swhsiengj daudwz. Laebhwnj laebcaez aen gihci doxgap ceihleix gij vwndiz haenqrem ndaw lingjyiz daudwz, laebndei aen gihci ciengzgeiz mizyauq “baetcawz doxgaiq coujndauq, dwkceih mbouj habfap okbanj”.

　　(39) Gaijndei aen gihci gunghawj yiengh fugsaeh vwnzva caeuq gij canjbinj vwnzva. Laebndei aen dijhi yiengh fugsaeh vwnzva vunzlai caezcaemh, laebhwnj aen gihci cigsoh soengq vwnzva swhyenz ndei daengz gihcwngz, laebcaez aen gihci hawj goengrengz ndawbiengz caeuqfaenh yiengh fugsaeh vwnzva vunzlai caezcaemh, doihaeuj gaijgwz faenlaeb gij gienzgaemmiz caeuq gij gienzsawjyungh doengh gij sezsih vwnzva vunzlai caezcaemh. Gyalaeg gaijgwz gij swhbwnj guekmiz caeuq gij giyez guekmiz ndaw lingjyiz vwnzva, faenloih doihaeuj vwnzva swyez danhvei gyalaeg baihndaw gaijgwz, laebndei aen gihci guhndei guhhoengh vwnzyi yendonz.

　　Dawzmaenh aen yinxyiengq hopheux yinzminz bae cauhguh cozbinj, dawzmaenh ok cwngzgoj caeuq ok vunzcaiz dox giethab、ca cozbinj caeuq ca vanzging dox ronzdoeng, gaijndei aen gihci guh gij hong fugsaeh、dazyinx、cujciz cauhguh swnghcanj vwnzyi cozbinj. Laebcaez aen dijhi vwnzva canjnieb caeuq aen dijhi vwnzva hawciengz, laebndei gij cwngcwz vwnzva ginghci. Damqra aen gihci ndaej hawj vwnzva caeuq gohgi yungzhab ndei, gyavaiq hwngfat gij vwnzva yezdai yienghmoq. Gyalaeg gaijgwz aen cidu bwh’anq gij hingzcwng saemjbae ndaw lingjyiz vwnzva, lai roengzrengz youq mwh banhsaeh gamguenj caeuq youq saehlaeng gamguenj. Gyalaeg gyoebhab ceihleix aen lingjyiz vwnzva yizloz.

　　Laebhwnj aen gihgou hezdiuz gij hongsaeh baujhoh cienzciep vwnzva yizcanj, laebhwnj aen cidu dukcaz vwnzva yizcanj baujhoh, doidoengh baenzroix bae baujhoh caeuq caezcaemh gamguenj vwnzva yizcanj. Cauhlaeb aen dijhi maigeiq Cunghvaz vwnzmingz. Laebcaez gij dijci gihci hawj vwnzva caeuq lijyouz haeujlaeg yungzhab hwngfat. Laebndei aen dijhi fugsaeh vunzlai bouxboux lienhndang, gaijgwz laebndei aen dijci guenjleix yiengh dijyuz doxdax caeuq aen gihci yinhhengz de.

　　(40) Laebcaez aen dijhi gyoebhab ceihleix vangjloz. Gyalaeg gaijgwz aen dijci guenjleix vangjloz, cingjhab gij ciznwngz dajcauh neiyungz ndei gwnz vangj caeuq guenjleix vangjloz, doihaeuj sinhvwnz senhconz caeuq baklinx gwnz vangj itcaez guenjleix. Laebndei aen gihci hwngfat caeuq guenjleix yiengh yinzgungh cinwngz ndaej ok gijyiengh haenx. Lai roengzrengz laeb fap daeuj guenj aen hoenggan vangjloz, laebcaez aen gihci ciengzgeiz mizyungh ceihleix vangjloz swnghdai, laebcaez aen dijhi guh gij hong youq aen hoenggan vangjloz baujhoh bouxcaengzhung.

　　(41) Cauhlaeb aen dijhi doiq rog guek cienzboq engq riuz engq ndei. Doicaenh dauqlaeb aen gapgyaq doiq rog guek cienzboq, gyalaeg gaijgwz cauhmoq aen gihci meizdij gaemyiengq doiq rog guek cienzboq, gyavaiq cauhlaeb aen gapgyaq doiq rog cienzboq miz lai mbiengloh、lai caengz haenx. Gyavaiq cauhlaeb aen dijhi Cungguek gangjvah caeuq Cungguek lwnhsaeh, cienzmienh hawj doiq rog guek cienzboq guh ndaej engq mizyauq. Cauhlaeb gij gihci hengzguh aen iudaeuz hawj lajmbwn vwnzmingz. Doidoengh hawj gij guenjleix byaij okbae、cingj haeujdaeuj bienq fuengbienh bae, gyalai caeuq guek wnq guh yinzvwnz gyaulouz doxgap. 

　　Cib’it、Laebcaez Aen Cidu Dijhi Baujcang Caeuq Gaijndei Gwndaenj Beksingq

　　Youq mwh hwngfat baujcang caeuq gaijndei gwndaenj beksingq dwg aen yinvu hungnaek gij yendaiva yiengh Cungguek. Bietdingh aeu seizseiz caenh rengz bae guh、aenq rengz bae guh, laebndei aen cidu dijhi yiengh fugsaeh vunzlai caezcaemh ceiq noix, lai roengzrengz guhndei doengh gij yienghsaeh gwndaenj beksingq ndei doh、guhgiek、baujdaej haenx, gaijgez ndei gij vwndiz nanangq leih’ik ceiq yienhsaed ceiq cigsoh beksingq ceiq gvansim de, mboujduenh muenxcuk gij siengjmuengh yinzminz gvaq saedceij gyaeundei.

　　(42) Laebndei aen cidu faenboiq souhaeuj.Cauhlaeb gij cidu dijhi baez faenboiq daih’it、baez faenboiq daihngeih、baez faenboiq daihsam doxdaengh boiqdauq de, youq mwh faenboiq gozminz souhaeuj hawj gihminz souhaeuj ciemq cingzsoq engq lai, youq baez faenboiq daih’it hawj cienzhong ciemq cingzsoq engq lai. Laebndei aen gihci gietdingh、hableix gyalai、bauj ndaej ceihawj gij gunghswh bouxguhhong, laebcaez gij cwngcwz cidu ciuq yausu faenboiq. Laebndei aen gihci diuzcez baez faenboiq daihngeih baudaengz gvaehsuiq、ndawbiengz baujcang、senjnod ceihawj daengj. Haeujcoengh hwngfat gij saehnieb goeng’ik swnzsienh.

　　Gveihfan aen bouhloh faenboiq souhaeuj, gveihfan aen gihci cwkrom cienzcaiz, lai diuz miengloh bae demgya gij souhaeuj oklaeng caizcanj gyoengq gihminz singz mbanj, cauxbaenz aen cidu dijhi caen ndaej gyalai gij souhaeuj gyoengq vunz souhaeuj noix、onjbouh hawj gyoengq vunz souhaeuj cungdaengj bienq lai、hableix diuzcez gij souhaeuj sang gvaqbouh. Gyalaeg gaijgwz aen gihci gietdingh gij gunghswh giyez guekmiz, hableix doekdingh caemhcaiq yiemzgek gveihfan cienzhong、cinhdez bujdez bouxfucwz gak gaep ndaw giyez guekmiz. 

　　(43) Laebndei gij cwngcwz couhnieb baiz youq gonq.Laebcaez gij gihci coi hawj boux couhnieb guh ndaej onj youh nanz, laebndei aen dijhi fugsaeh vunzlai couhnieb, roengzrengz gaijgez gij mauzdun couhnieb oklaeng gezgou de. Laebndei aen dijhi haeujcoengh gauhyau bizyezswngh、nungzminzgungh、bouxbing duiyiz daengj gyoengq vunz cungdenj neix couhnieb, laebcienz aen cidu baenzciuh sonlienh gij dinfwngz ciknieb. Doengbuenz nda ndei aen cwngcwz dijhi couhnieb singz mbanj, doengzbouh doicaenh gaijgwz gij fugsaeh huciz、yungh vunz、dangjan daengj, gaijndei aen vanzging laeb gij cwngcwz aeu cauhnieb coicaenh couhnieb, haeujcoengh caeuq gveihfan bae hwngfat gij yiengh couhnieb moq. Laebndei gij cidu gihci coihawj gihvei goengbingz, deudoeng diuz miengloh ndawbiengz riuzdoengh. Laebndei aen gihci doxyaeng diuzndei gij gvanhaeh guhhong, gyarengz baujcang gij gienzik bouxguhhong. 

　　(44) Laebcaez aen dijhi ndawbiengz baujcang. Laebndei aen cidu daengx guek doengbuenz suenqveh yiengh baujyiemj ciengxlaux ceiq noix, laebcaez aen bingzdaiz goenggungh fugsaeh sebauj daengx guek caezcaemh de. Laebcaez aen dijhi hawj sebauj gihginh mbouj bienqcienh、lai dijcienz caiqlij gamguenj ancienz. Laebcaez aen gihci couzcienz hawj yiengh baujyiemj ciengxlaux ceiq noix、yiengh baujyiemj ywbingh ceiq noix caeuq hableix diuzcingj gij dakdaih gyoengqde, cugbouh daezsang gij cienzgoek ciengxlaux yiengh baujyiemj ciengxlaux ceiq noix boux gihminz singz mbanj. Laebcaez gij sebauj cidu boux gag ragwn、nungzminzgungh、boux guh gij yiengh couhnieb moq, gyalai gyoengqvunz ndaej daengz yiengh baujyiemj saetnieb、sienghong、senglwg de, cienzbouh siubae cungj hanhhaed baengh huciz youq dieg couhnieb camgya baujyiemj, laebndei aen cwngcwz senjdieg ciepswnj gij gvanhaeh sebauj. Gyavaiq hwngfat aen dijhi yiengh baujyiemj ciengxlaux miz lai caengzmbaek、lai yiengh dingjdaemx haenx, gyahung aen gvaengx hengz gij cidu nenzginh, doihengz aen cidu cienzciengxlaux gagboux. Hawj gak loih sanghyez baujyiemj ndaej bae boujcung gak cungj baujcang. Doicaenh sengjgaep daengxbuenz vehsuenq yiengh baujyiemj ywbingh ceiq noix, gyalaeg gaijgwz yiengh fuengsik ceihawj yihbauj, laebndei aen cidu baujyiemj binghnaek caeuq yihliuz gouqbang, gyarengz gamguenj gij gihginh yihbauj. Laebcaez aen dijhi ndawbiengz gouqbang. Laebcaez aen cidu baujcang gij gienzik habfap mehmbwk lwgnyez. Laebcaez gij cidu ndawbiengz baujcang bouxbueg caeuq aen dijhi gvansim in’gyaez fugsaeh bouxbueg. 

　　Gyavaiq laebhwnj aen cidu ranzyouq ndaej co ndaej cawx, gyavaiq laebhwnj yiengh vunqsik moq hwngfat fangzdicanj. Gyalai hwnqguh caeuq gunghawj gij ranz bauj miz youq, hawj gyoengq vunz lingx gunghswh ndaej cawx dauq ranz an’gya. Haeujcoengh gyoengq gihminz singz mbanj ndaej doenggvaq lai cungj fuengsik bae vuenh gij ranz haemq ndeiyouq. Cungfaen hawj gij cwngfuj gak aen hawsingz miz gienz gag guhcawj bae diuzgung aen hawciengz fangzdicanj, yawj singz dingh geiq, cinjhawj aen hawsingz mizgven siubae roxnaeuz gemjnoix gij cwngcwz hanhhaed cawx ranz、siubae gij biucinj ranzyouq bingzciengz caeuq ranzyouq mbouj bingzciengz. Gaijgwz gij fuengsik yungzswh haifat fangzdicanj caeuq yiengh cidu daezgonq gai ranzsanghbinj. Caezcienz aen cidu sougvaeh fangzdicanj. 

　　(45) Gyalaeg gaijgwz aen dijci yihyoz veiswngh.Saedhengz aen canloz hwngfat gij saehnieb ndangcangq baiz youq gonq, laebcaez aen dijhi goenggungh veiswngh, coicaenh ndawbiengz caez guenj、yw fuengz gapdoih、yw fuengz yungzhab, gyaak gij naengzlig gamcaek yawhgingj、bingzguj fungyiemj、diucaz yozlij binghlah、genjniemh cazniemh、cawqleix dangqhaenq、yihliuz gouqyw daengj. Coicaenh yihliuz、yihbauj、yihyoz gapdoih hwngfat caeuq ceihleix. Coihawj gij yihliuz swhyenz ndei haenx gyalai、roengz daengz baihlaj bae caiqlij ranghdieg baijbouh bingzyaenx, gyavaiq hwnqguh aen dijhi faengaep yawjbingh ywbingh, doicaenh hwnqguh yiengh yihliuz lenzhozdij gaenjmaed, gyarengz guh yiengh fugsaeh yihliuz veiswngh gihcwngz. Gyalaeg yiengh gaijgwz hawj yihyen goenglaeb cienj coh loih goeng’ik bae, laebhwnj aen gihci aeu sou gij cienz fugsaeh ywbingh guh goek, laebndei aen cidu cienzhong, laebhwnj aen gihci riengzseiz diuzcingj benhci. Dazyinx gveihfan yihyen minzyingz hwngfat. Cauhmoq gij fuengfap gamguenj yihliuz veiswngh. Laebcaez aen gihci haeujcoengh gij yw cauhmoq caeuq gaiqdawz ywbingh hwngfat, laebndei aen gihci ciepswnj cauhmoq hwngfat cunghyihyoz. 

　　(46) Laebcaez aen dijhi haeujcoengh caeuq fugsaeh vunzgyaeuj demlai.Aeu wngqdoiq bouxgeq bienq lai、lwgnyez bienq noix guh cungdenj bae laebndei aen canloz hawj vunzgyaeuj demlai, laebcaez aen dijhi fugsaeh vunzgyaeuj goq daengz bouxboux、guenj daengz baenzciuh, coicaenh vunzgyaeuj gig ndei bae fatmaj. Laebndei aen cwngcwz dijhi haeujcoengh senglwg caeuq aen gihci gikleih senglwg, doidoengh hwnqguh aen biengz haenhndei senglwg de. Caencingq gyangqdaemq gij cingzbonj senglwg、ganqciengx、doegsaw, laebndei aen cidu senglwg youhgyaj, laebhwnj aen cidu boujdiep senglwg, hawj yiengh fugsaeh vunzlai caezcaemh nangqdaengz gihbwnj senglwg caeuq lwgnyez yihliuz guh ndaej engq ndei bae, gyalai dingjgaeu goyinz sojdwzsui. Gyarengz hwnqguh aen dijhi fugsaeh ganq lwgnomj ndei doh vunzlai, haeujcoengh aen danhvei yunghvunz banh giz dakciengx、segih saeb haeuj giz dakciengx、aenranz guh giz dakciengx daengj lai cungj vunqsik hwngfat. Dawzndei gij gwzgvanh gvilwd vunzgyaeuj riuzdoengh, doidoengh yiengh fugsaeh vunzlai caezcaemh doxgven de riengz vunz byaij, coihawj gij vunz singz mbanj、vunz gak dieg hableix gyonjcomz、miz bouhloh riuzdoengh. 

　　Haeujrengz bae wngqdoiq bouxgeq bienq lai, laebndei gij cwngcwz gihci hwngfat saehnieb ciengxlaux caeuq canjnieb ciengxlaux. Hwngfat yiengh ginghci bouxgeq, cauh’ok gij couhnieb gangvih lai cungj lai yiengh、gag miz daegdiemj habngamj bouxgeq de. Ciuq aen yenzcwz gagnyienh、ndaej bienq, onjdangq miz bouhloh bae doicaenh yiengh gaijgwz cugciemh doilaeng aen bisoq duiyouh fapdingh. Engq ndei bae gunghawj yiengh fugsaeh ciengxlaux ceiq noix, gungganq aen gihgou fugsaeh ciengxlaux ndaw segih, laebcaez aen gihci yinhhengz gij gihgou ciengxlaux goengbanh, gikcoi caeuq dazyinx giyez daengj rengz ndawbiengz lai daeuj caeuqfaenh, doicaenh yiengh fugsaeh doxbang ciengxlaux, coihawj ywbingh ciengxlaux dox giethab. Gyavaiq bouj caez giz nyieg yiengh fugsaeh ciengxlaux lajmbanj. Engq ndei bae fugsaeh gyoengq bouxgeq daegbied gunnanz baudaengz bouxmaiq、bouxbueg gagleix mbouj ndaej neix, gyavaiq laebhwnj aen cidu yiengh baujyiemj ciengzgeiz hohleix. 

　　Cibngeih、Gyalaeg Gaijgwz Aen Dijci Swnghdai Vwnzmingz

　　Gij yendaiva yiengh Cungguek dwg cungj yendaiva bouxvunz caeuq swyenz doxhuz caemhyouq. Bietdingh aeu laebndei aen cidu dijhi swnghdai vwnzmingz, gapdoih doicaenh gyangq danq、gemj uq、gya loeg、demmaj, lai bae wngqdoiq dienheiq bienqvaq, gyavaiq laebndei aen dijci gihci doeksaed yiengh leixniemh raemx saw bya heu couh dwg bya gim bya ngaenz.

　　(47) Laebndei aen dijci giekdaej swnghdai vwnzmingz.Saedhengz aen cidu guenjleix swnghdai vanzging dwg faen ranghdieg、mizcengca、dawzcinj guenjhanh haenx, laebcaez aen cidu gamcaek caeuq bingzgyaq swnghdai vanzging. Laebhwnj laebcaez aen cidu guenjhaed yunghcawq caeuq cinjhawj gveihva gyanghoeng diegguek ndaej cw doh sojmiz diegdeih sojmiz loihhingz、caezcaemh doxciep haenx. Laebcaez aen dijhi hangh cidu canjgienz caeuq hangh cidu guenjleix swhcanj swyenz swhyenz, laebndei aen gihci dakhawj daihleix gij gienzgaemmiz cungj swhcanj swyenz swhyenz dwg daengxcungq yinzminz gaemmiz haenx, laebhwnj doengh gij cidu gaujhaed gamduk faenh cwzyin baujhoh swnghdai vanzging、baujhoh leihyungh swyenz swhyenz caeuq hawj swhcanj swyenz swhyenz mbouj bienqcienh lai dijcienz daengj. Laebndei aen gihci dox boiqhab guh gaiq hong swnghdai ancienz guekgya. Biensij bouh fazdenj swnghdai vanzging.

　　(48) Laebcaez aen dijhi ceihleix swnghdai vanzging.Doihaeuj hwnqguh doengh gij dijhi ceihleix swnghdai vanzging, baudaengz aen dijhi dawzrap、aen dijhi gamguenj、aen dijhi hawciengz、aen dijhi faplwd fapgvi cwngcwz. Laebndei gij cidu gihci dawzcinj ceihleix uqlah、gohyoz ceihleix uqlah、ciuqfap ceihleix uqlah, doeksaed gij cidu gamguenj giz goek uqlah doekdingh aeu aen cidu cinjhawj baizuq guh goek haenx, laebhwnj aen dijhi guhdoih ceihleix cungj huquqlah moq caeuq gamguenj vanzging fungyiemj, doicaenh lai cungj huquqlah guhdoih gemjbaiz. Gyalaeg gaijgwz aen cidu ciuqfap byoqloh gij saenqsik vanzging, cauhlaeb aen dijhi gamguenj gij saenqyungh vanzging. Doidoengh ranghdah youqgaenj cauhlaeb aen dijhi ceihleix swnghdai vanzging aeu duenhgwnz duenhlaj caezcaemh guh haenx. Cienzmienh doihaeuj hwnqguh aen dijhi giz dieg swyenz baujhoh aeu guekgya gunghyenz guh daeuz haenx.

　　Hengzndei aen cidu guenjleix diuz sienqhoengz baujhoh swnghdai, laebcaez aen gihci doengbuenz baujhoh caeuq baenzroix ceihleix bya raemx ndoeng naz huz nywj sa, hwnqguh aen gihci lai yiengh douzhaeuj baujhoh coihfuk swnghdai. Doekguh aen cidu hanhhaed swhyenz raemx baenzbaenz aeu hengz ndei haenx, cienzmienh mbeguh doiq swhyenz raemx youz soufeiq gaijbaenz sougvaeh. Gyaak aen gihci doxdaz guh gij hong baujhoh doenghgo doenghduz lai cungj lai yiengh. Laebcaez aen cidu haifat baujhoh swhyenz haijyangz. Laebcaez aen gihci hawj canjbinj swnghdai miz ok gyaciz. Gyalaeg gaijgwz aen cidu ok cienz sawjyungh swyenz swhyenz. Doihaeuj gaiq hong gyoebhab boizbouj swnghdai, laebcaez aen gihci giz gap giz doxbouj baujhoh swnghdai, daengxbuenz maeuzveh doihaeuj gaiq hong sonjhaih swnghdai vanzging aeu dienzboiz.

　　(49) Laebcaez gij gihci loegsaek danqnoix bae hwngfat.Saedhengz gij cwngcwz caizsui、ginhyungz、douzswh、gyagwz caeuq gij dijhi biucinj haeujcoengh yiengh hwngfat loegsaek danqnoix, lai guh gij canjnieb loegsaek danqnoix, laebcaez aen gihci gikleih yiengh siufeiq loegsaek, coihaeuj hwnqguh aen ginghci dijhi dwg loegsaek danqnoix sinzvanz hwngfat de. Gaijndei gij cwngcwz cwngfuj dajcawx doenghyiengh loegsaek, laebndei aen suici loegsaek. Laebndei aen cidu guenjleix cungjliengh caeuq cienzmienh mbaetyungh swhyenz, laebcaez aen dijhi ndaej caiq yungh huqfeiq. Laebcaez aen gihci cinghseuq yauqlwd sang bae leihyungh meizdan. Gyavaiq gviveh hwnqguh aen dijhi nwngzyenz yienghmoq, laebndei gij cwngcwz cosih ndwnjhaiz caeuq diuzgung nwngzyenz moq. Laebndei aen gunghcoz dijhi hab’wngq dienheiq bienqvaq. Laebhwnj aen gihci moq daj song yiengh caez hanh (hanh cungjliengh hanh giengzdoh) siuyungh nwngzyenz cienzmienh cienj daengz song yiengh caez hanh baizcuengq danq. Cauhlaeb aen dijhi gyoebsuenq haedsuenq danq baizcuengq、aen cidu nyinhcingq canjbinj gij maigeiq danq、aen dijhi guenjleix canjbinj gij rizdin danq, laebcaez aen cidu youq hawciengz gaicawx gij gienz baizcuengq danq、aen cidu gagnyienh gaicawx gemjnoix baizcuengq heiq ranzraeuj, lai gaenx lai onj bae doihaeuj danqdaemxdingj danqcunghuz.

　　Cibsam、Doicaenh Aen Dijhi Caeuq Gij Naengzlig Guekgya Ancienz Habngamj Yienhdaih Aeuyungh

　　Guekgya ancienz dwg aen giekdaej youqgaenj hawj gij yendaiva yiengh Cungguek byaij onj byaij gyae. Itdingh aeu cienzmienh hengzndei aen swhsiengj guekgya daengxbuenz ancienz, laebndei gij dijci gihci henhoh guekgya ancienz, hawj yiengh hwngfat caetliengh sang caeuq yiengh ancienz suijbingz sang ndaej doxdoeng doxcoi, caen ndaej baujcang guekgya ciengzgeiz andingh.

　　(50) Laebcaez aen dijhi guekgya ancienz. Gyaak aen gihci dox boiqhab guh gaiq hong guekgya ancienz, laebndei gij dijhi fapceih、dijhi canloz、dijhi cwngcwz、dijhi gamcaek yawhgingj fungyiemjhawjguekgya ancienz, laebndei aen dijhi baujhawj gij lingjyiz youqgaenj ancienz caeuq aen dijhi doxgap cijveih gij cienhangh youqgaenj. Cauhlaeb aen dijhi fuengzhen guekgya ancienz gapfwngz guh gig mizyauq haenx, doicaenh gohgi coenghrengz gyamaenh guekgya ancienz.

　　(51) Laebndei aen gihci ceihleix goenggungh ancienz.Laebcaez aen dijhi baujcang cawqceq gij goenggungh saehgienh fwtfat, laebndei aen gihci youq laj aen gvaenghgyaq daih ancienz daih dangqhaenq cijveih hongsaeh dangqhaenq, gyaak aen giekdaej caeuq gij rengz dangqhaenq gihcwngz, engq ak bae fuengz cai gemj cai gouq cai. Laebndei aen gihci baizcaz cingjceih gij fungyiemj ancienz swnghcanj caeuq dauqcaz gij cwzyin ancienz swnghcanj. Laebndei aen dijhi rapdawz faenh cwzyin gijgwn gijyw ancienz. Laebcaez aen dijhi gamguenj yawhgingj fuengzhaed swnghvuz ancienz. Gyarengz hwnqguh aen dijci vangjloz ancienz, laebhwnj aen cidu gamguenj yinzgungh cinwngz ancienz.

　　(52) Laebcaez aen dijhi ceihleix ndawbiengz.Hengzdingh caeuq hwngfat gij “gingniemh Funghgyauz” seizdaih moq, laebcaez aen dijhi ceihleix gihcwngz singzmbanj aeu gagguenj、fapguenj、daekguenj dox giethab youz dangjcujciz lingjdauj haenx, laebndei aen cidu ceihleix aen biengz caezlaeb caezguenj caezyungh de. Damqra laebhwnj aen cidu guenjleix vunzgyaeuj daengx guek caezcaemh haenx. Laebcaez gij dijci gihci guh hongsaeh ndawbiengz, gyarengz aeu dangjgen bae dazyinx ceihleix gihcwngz, gyarengz guh ndei aen doih boux guh hongsaeh ndawbiengz, doidoengh hwnqguh aen dijhi gagnyienh fugsaeh. Doihaeuj ciuqfap bae guh gaiq hong saenqfangj. Gyaak gij bonjsaeh ceihleix aen biengz hawsingz, hawj doengh aen bingzdaiz lumjbaenz diuz yezsen siminz daengj ndaej engq ndei fugsaeh vunzlai, laebcaez aen gihci lied mbawdan daeuj guenjleix gij saehhangh youqgaenj “vaiqdangq banhbaenz gienh saeh ndeu” caeuq aen gihci ciuqciengz doihaeuj gij yienghsaeh neix. Laebcaez aen dijhi fugsaeh simleix ndawbiengz caeuq aen gihci capfwngz fuengz oksaeh. Laebcaez gij gihci langh ok yiengh rengz guh ndei gyadingz gya’gyauq gyafung coenghrengz gihcwngz ceihleix. Gyalaeg gaijgwz gij hezvei sanghvei ndaw hangznieb. Laebcaez aen cidu guenjleix sevei cujciz.

　　Laebcaez gij cidu hawj cizcwz yanghcin(gaihdau) caeuq gienzlig、swhyenz doxha, gyalai gij rengzlig guenjleix fugsaeh yanghcin (gaihdau). Laebndei aen dijhi cingjdaej fuengzhaed cianh ndawbiengz, laebcaez gij gihci hawj baet yak cawz rwix baenz yiengh hong ngoenznaengz bae, ciuqfap yiemzfad gak yiengh famhfap famhcoih cungqvunz fanjyingj haenqrem haenx.

　　(53) Laebndei gij gihci hawj guekgya ancienz nangqdaengz guekrog.Laebhwnj laebcaez aen gihci gapguh gaiq hong bauj gij ancienz seiqhenz guek raeuz. Gyaak gij dijci gihci doiq gij leih’ik caeuq douzswh youq rog guek de guh fungyiemj yawhgingj、fuengzhaed、baujhoh, gyalaeg youq ancienz lingjyiz caeuq guek wnq doxgap caepfap, henhoh gij gienzik habfap gunghminz、fazyinz guek raeuz youq rog guek haenx. Laebcaez aen gihci fanj ceihcaiz、fanj capfwngz、fanj “iet gen daeuj guenj”. Laebcaez aen gihci henhoh gij gienzik haijyangz. Laebndei aen gihci caeuqfaenh ceihleix gij ancienz daengx seiqgyaiq.

　　Cibseiq、Laebdaeb Gyalaeg Gaijgwz Gozfangz Caeuq Bingdoih

　　Gozfangz caeuq bingdoih yendaiva dwg aen bouhfaenh youqgaenj gapbaenz gij yendaiva yiengh Cungguek. Itdingh aeu dawzmaenh seizseiz yienghyiengh aeu Dangj lingjdauj yinzminz bingdoih, haeujlaeg saedhengz aen canloz baengh gaijgwz ak bing, vih ciuqgeiz guhbaenz aen moegbiu buekguh laebbaenz bingdoih it bak bi、daihdaej guhbaenz gozfangz caeuq bingdoih yendaiva daezhawj baujcang rengzrwd.

　　(54) Laebndei gij dijci gihci lingjdauj guenjleix yinzminz bingdoih.Laebcaez gij cidu gihci gvancez aen cidu ginhveij cujsiz rapdawz cwzyin, haeujlaeg doihaeuj baengh cwngci laebguh bingdoih. Gaijndei gaiq hong boiqnda gij ciznwngz doengh aen bouhmonz ginhveij gihgvanh, laebcaez aen gihci daengxbuenz maeuzveh guh ndei gij hong hoenx、laeb、bwh, laebndei aen gihci guh gezcwz hungnaek aeu cazcam bingzguj, gyalaeg cauhmoq guenjleix canloz, laebndei aen dijhi ceihleix saehbing. Laebcaez aen gihci guh gij hong ciuqfap guenj bing. Laebndei gij cwngcwz cidu boiqdauq doengh aen lingjyiz hoenxciengq bwhhoenx、vunzsaeh ndaw bingdoih daengj. Gyalaeg gaijgwz doengh aen yenyau bingdoih, doidoengh yenyau baengh rengzndaw bae hwngfat. Guh yiengh gaijgwz diuzcingj gij giyez swyez danhvei bingdoih.

　　(55) Gyalaeg gaijgwz aen dijhi lienzhab hoenxciengq.Laebndei gij ciznwngz Ginhveij Lienzhab Hoenxciengq Cijveih Cungsim, laebcaez gij goengnaengz cijveih aen lingjyiz ancienz hungnaek, laebhwnj aen gihci caeuq cunghyangh nem guekgya gihgvanh boiqhab yinhhengz de. Gaijndei gij bienboiq beijlaeh cangih lienzhab hoenxciengq cijveih cungsim, laebndei gij vunqsik biencuj cijveih yinvubingdoih lienzhab hoenxciengq. Gyaak daengxbuenz maeuzveh hwnqguh caeuq yinhyungh aen dijhi vangjloz saenqsik. Cauhlaeb gij gezgou baijbouh ginhcungj bingcungj yienghmoq, gyavaiq hwngfat gij ligliengh haephwkndaejcoenghrengz daengxbuenzhaenx, roengz rengzhung hwngfat yiengh ligliengh youq lingjyiz moq guh yiengh moq hoenxciengq, daengxbuenz maeuzveh gyaak yiengh ligliengh hoenxciengq conzdungj. Gaijndei gij bienboiq beijlaeh nga liglienghbingdoihvujgingj.

　　(56) Gyalaeg yiengh gaijgwz hamj bingdoih caeuq deihfueng.Laebcaez aen gihcihwnqguh gij dijhi canloz guekgya gyonjgyoebcaezcaemhcaeuqgyaakgijnaengzlig de, laebcaez aen dijci gihci hezdiuz gaiq hong yaenglwnh gietdingh gij saehhung nangqdaengz saehbing. Laebcaez aen gihci gozfangz gensez daezok nem bauqsoengq gij aeuyungh saehbing caeuq bingdoih nem deihfueng doiqciep, laebcaez aen dijhi gozfangz dungyenz. Gyalaeg gaijgwz aen dijci gozfangz gohgi gunghyez, gaijndei gij baijbouh gozfangz gohgi gunghyez, gaijndei aen cidu dajcawx gaiqyungh dwkciengq, laebguh aen gihci hoizbauq ndadoq huqbing, cauhlaeb aen dijhi yendaiva guenjleix gaiqyungh dwkciengq. Laebcaez aen gihci gyonjguenj gaiq hong dingh gij biucinj bingdoih caeuq deihfueng. Gyarengz doengzcaemh hwnqguh caeuq guenjleix doengh aen lingjyiz hangzdenh、gaicawx huqbing. Gaijndei gij dijci gihci lingjdauj guenjleix benhfangz haijfangz, laebndei aen gihci dangj cwng ginh gingj minz gaprengz ceihleix henzguek. Gyalaeg gaijgwz minzbingh cidu. Laebcaez gij banhfap guh hongsaeh song yungj.

　　Cibhaj、Gyaak Gij Bonjlingx Dangj Lingjdauj Gaiq Hong Caiq Cienzmienh Gyalaeg Gaijgwz、Doihaeuj Gij Yendaiva Yiengh Cungguek

　　Cienzhoih daegbied gangj daengz, aen Dangj lingjdauj dwg daj goekgaen bae baujcingq raeuz ndaej caiq cienzmienh gyalaeg gaijgwz、doihaeuj gij yendaiva yiengh Cungguek. Itdingh aeu laegdaeuq rox daengz “song aen laebdingh” ndaej gietdingh guhbaenz hongsaeh, gyaak “seiq aen roxyiuj”、dawzdingh “seiq aen gagsaenq”、guhdaengz “song aen henhoh”, seizseiz cungj gagrox aeu Dangj gag gaij bienq ndei bae dazyinx ndawbiengz coh ndei baenaj, dawzmaenh aeu yiengh cingsaenz gaijgwz caeuq ciuq biucinj yiemz bae guenj Dangj ceih Dangj, laebcaez baenzroix cidu gveihfan hawj Dangj gag gaij bienq ndei, mboujduenh coi hawj Dangj gag bienq cinghseuq、gag guh caezcienz、gag gaij bienq ndei、gag bae daezsang, baujmaenh Dangj seizseiz ndaej baenz aen goek akmaenh bae lingjdauj yiengh saehnieb sevei cujyi miz gij daegsaek Cungguek.

　　(57)Dingjmaenh youz Dangjcunghyangh gyonjcomz lingjdauj gaiq hong caiq cienzmienh gyalaeg gaijgwz. Dangjcunghyangh lingjdaeuj gij daengxbuenz ndaveh、gyoebgyonj boiqngamj、daengxaen doidaeuj gaijgwz. Laebcaez aen gihci doeksaed gij gezcwz baijbouh hungnaek Dangjcunghyangh, saedbauj Dangjcunghyangh lingh roengz daengz couh gimq guh. Gak gaep dangjveij (dangjcuj) rapdawz faenhhong doeksaed gij gezcwz baijbouh Dangjcunghyangh, maeuzveh doihaeuj gij gaijgwz bonj digih bonj bouhmonz, gujli ciuq saedsaeh bae hairoen cauhmoq, cauxok gij gingniemh moq ndaej ciuq hag、ndaej lai yungh de. Byaij ndei diuz lohsienq ginzcung aen Dangj seizdaih moq, dawz gij maqmuengh gwnzbiengz、dungxcaiz vunzlai、yigen conhgyah、gingniemh caengzlaj yungh haeuj dajveh gaijgwz bae. Hopheux gaijgez gij mauzdun haenqrem bae ndalaeb gij lwnhdaez gaijgwz, gaijndei gij banhfap guhbaenz aen fueng’anq dawznaek gaijgwz, seizseiz dawzdingh caenleix、coihcingq loengloek, gibseiz yawjok vwndiz、niujcingq giz mbieng. Laebcaez gij gihci gikcoi gaijgwz caeuq dazyinx baklinx, hawj gwnzbiengz cungj haeujcoengh gaijgwz.

　　(58) Gyalaeg gaijgwz aen cidu guhhung guh’ak aen Dangj.Aeudiuhhwnj daengx Dangj gag maij、gag rox、rox cauhmoq bae ca gaijgwz caeuq coi baenaj guh giz haeujrengz, laebcaez gij cidu gihci guhhung guh’ak aen Dangj. Lai aeu gij lijlun cauhmoq aen Dangj daeuj cang’uk, laebhwnj laebcaez aen gihci ciengzgeiz aeu hag couq hoenz、aeu hag dem dungxcaiz、aeu hag cingq cozfungh、aeu hag coi guh. Gyalaeg gaijgwz aen cidu guenj yinzsw ganbu, doekdingh laebhwnj aen dazyiengq cingqdeng genj vunz yungh vunz, roengzrengz genjok boux ganbu cwngci dingj ndaej gaujniemh、gamj bae dawz rap、naebsim gaijgwz、cingzcik ok lai、goengcingq cinghseuq de, roengzrengz gaijgez gij vwndiz ganbu luenh guh saeh、mbouj guh saeh、mbouj gamj guh saeh、mbouj rox guh saeh. Laebhwnj caeuq hengzguh yiengh cwngcizgvanh cingqdeng, laebcaez aen gihci guhhong ndaej caen fuengzre caeuq niujcingq giz mbieng cwngcizgvanh. Aeu guhdaengz “sam yiengh faen okdaeuj”,gikcoi ganbu hailoh baenaj、guhsaeh cauhnieb. Coi hawj lingjdauj ganbu ndaej hwnj ndaej roengz baenz yiengh saeh baeznaengz bae, gyarengz vuenh boux ganbu mbouj habngamj dang gij cizvu seizneix bae. Laebcaez aen gihi ciengzseiz guh sonlienh daegbied dwg yiengh sonlienh noix mbouj ndaej, lai bae guh conhyez sonlienh caeuq saedguh lienhfwngz, daj fuengfueng mienhmienh hawj ganbu miz gij dungxcaiz hwnqguh yendaiva. Laebcaez caeuq doeksaed aen cidu nyaemhgeiz lingjdauj ganbu, laebcaez aen cidu bienqvuenh gyauciep boux guhgoek guenj saeh ndaw lingjdauj banhswj. Gyaak gij cwngci gunghnwngz caeuq cujciz gunghnwngz dangjcujciz. Damqra diuz roenloh youq ndaw ginghci cujciz moq、sevei cujciz moq、gyoengqvunz couhnieb moq gyarengz guhhung guh’ak aen Dangj. Laebndei aen gihci son’gyauq guenjleix dangjyenz、langh rengz dangjyenz. Laebndei gij fapgvi ndaw Dangj, hawj gij fapgvi ndaw Dangj engq miz gienzvi caeuq caephengz engq ak.

　　(59) Haeujlaeg bae guh dangjfungh lenzcwng gensez caeuq fanj nduknaeuh doucwngh. Laebcaez aen gihci hawj cwngci gamduk guh ndaej saeq、guh ndaej cinj、guh ndaej cingqciengz. Mbouj cuengqsoeng laebdaeb bae hengz ndei gij cingsaenz Cunghyangh Bethangh Gvidingh, laebcaez gij cidu gihci fuengzceih hingzsiz cujyi、gvanhliuz cujyi. Laebdaeb gemjnoix nem gveihfan gij vwnzgen haihoih caeuq gak yiengh saeh cauhlaeb yienghbanj、bingzbeij dabbiu、hai canjvei lundanz angqhoh cietheiq, yiemzgek gaemhanh gij baezsoq bae gihcwngz guh duzcaz、genjcaz、gaujhaed, hawj diuyenz guh ndaej engq mizyungh, roengz rengzhung gaijgez gij vwndiz diuyenz deih gvaqbouh cab gvaqbouh. Ceiqdingh mbawdan lied gij saehhangh yanghcin (gaihdau) aeu hengzguh de, laebcaez aen gihci ciengzseiz bae bang gihcwngz gemjmbaeu diuzrap. Cauhguh aen gihci ciengzseiz guh caeuq gyonjcomz guh gijliz gyauyuz, haeujlaeg bae yunghndei“seiq yiengh”gamduk caephengz gijliz, gyoebhab langh ok gij cozyung gij gijliz aen Dangj guh gyauyuz hanhhaed、baujcang gikcoi dangyenz.

　　Laebcaez aen gihci gyoebgyonj doihaeuj gij hong mbouj gamj nduknaeuh、mbouj ndaej nduknaeuh、mbouj siengj nduknaeuh, roengzrengz conxcawz diegung caeuq gizrungx nduknaeuh. Laebndei aen gihci caez caz caez ceih gij saeh mbouj cingq caeuq gij vwndiz nduknaeuh, gyalaeg cingjceih gij nduknaeuh doengh aen lingjyiz gienzlig gyonjcomz、cienzngaenz comzmaed、swhyenz comzlai de, daj yiemz cazbanh gij vwndiz cwngfuj caeuq canghseng’eiq doxyuk buqvaih gij swnghdai cwngci caeuq aen vanzging hwngfat ginghci, laebcaez aen gihci lienzhab ceihfad boux oetcienz famhfap naek, lai miz banhfap ndei bae fuengzceih yiengh nduknaeuh moq caeuq yiengh nduknaeuh ndumjndaw. Gyarem ceihleix yiengh saeh luenh gauq. Laebcaez aen gihci gyaepdawz bouxdeuzfamh、fuengzre deuzndoj、gyaepdauq cienzcang. Lai roengzrengz bae hwnqguh yiengh vwnzva cinghseuq seizdaih moq.

　　Laebcaez aen gamduk dijhi Dangj caeuq guekgya. Gyarem gij cwzyin rapsaeh caeuq cwzyin gamduk cienzmienh yiemzhaenq guenj Dangj. Laebcaez gij cidu boiqdauq bae gyarem gamduk “ bouxdaeuz daih’it ” caeuq lingjdauj banhswj. Laebcaez aen gihci boiqhawj gienzlig caeuq hanhhaed gaemyungh gienzlig, fanjdoiq cungj swhsiengj saj daeggienz caeuq yienhsiengq saj daeggienz. Coihawj guhdaengz caephengz gijliz faplwd caeuq hingzsaeh dawzfap doxciep ndeindup. Laebcaez gij dijci gihci guh gaiq hong liebyawj liebcaz. Gaijndei gij ciznwngz doengh aen gihgou gamduk genjcaz caeuq saemjcaz diucaz, laebcaez aen dijci gijgenj genhcaz doengh aen danhvei gaepgwnz cigsoh guenjleix de, doihaeuj gaiq hong baij aen cuj gijgenj genhcaz caphaeuj sojmiz gij giyez cunghyangh guenj de. Gyalaeg gaijgwz aen dijci gihci gamduk gihcwngz. Doihaeuj guekgya laebfap bae guh fanj nduknaeuh, coihgaij aen fap gamcaz, okdaiz aen fap fanjdoiq hamj gyaiqguek guh saeh nduknaeuh.

　　(60)Aeu yiengh cingsaenz dok ding bae guhndei gaijgwz. Doiq gij gezcwz baijbouh Dangjcunghyangh caiq cienzmienh gyalaeg gaijgwz, daengx Dangj itdingh aeu gouz caen guh saed、gamj guh rox guh bae doeksaed ndei, dingjmaenh gwnzlaj gapdoih、vangraeh doxgap, hableix ceiqdingh bonjbouh faenhhong gaijgwz、aen biuj seizgan、guh gonq guh laeng, mingzbeg doekdingh gij cawjdaej hengzguh gak hangh gaijgwz caeuq gij cwzyin gyoengqde, dawz doeksaed gaijgawz hungnaek ndei mbouj ndei nabhaeuj gij neiyungz gamduk genjcaz caeuq liebyawj liebcaz bae, aeu gij cingzcik nem gij saeh caen guhbaenz de caeuq yinzminz ginzcung habhoz lainoix daeuj genjniemh gaijgwz.

　　Gij yendaiva yiengh Cungguek dwg yiengh yendaiva byaij diuz roen huzbingz fazcanj. Itdingh aeu dawzdingh ciuqhengz aen cwngcwz huzbingz vaigyauh doglaeb gag guhcawj neix, coi hawj cauhlaeb aen minghyinh caezcaemh vunz lajmbwn, hengzguh gij gyaciz caezcaemh vunz lajmbwn, doeksaed aen iudaeuz lajmbwn hwngfat、aen iudaeuz lajmbwn ancienz、aen iudaeuz lajmbwn vwnzmingz, daiqdaeuz dizcang yiengh lajmbwn lai giz cungsim bingzdaengj mbouj luenh、yiengh ginghci lajmbwn doxnangq ndaej doxleih doxyungz, gyalaeg gaijgwz gij fuengfap guh hongsaeh nangqdaengz rog guek, caeuqfaenh dazyinx gaijgwz caeuq hwnqguh aen dijhi ceihleix seiqgyaiq, laemxsim henhoh gij cawjgienz、ancienz、leih’ik hwngfat guekgya, vih caiq cienzmienh gyalaeg gaijgwz、doihaeuj gij yendaiva yiengh Cungguek cauxok aen vanzging baihrog ndeileih raeuz de.

　　Daengx Dangj daengx ginh daengx guek gak cuz yinzminz aeu engqgya gaenjmaed hopheux youq seiqhenz aen Dangjcunghyangh aeu Siz Ginbingz dungzci guh goek neix, yaengxsang fangeiz gaijgwz hailangh, comz sim comz rengz、haenqheiq guh baenaj, vih cienzmienh hwnqbaenz aen guekak sevei cujyi yendaiva、guhbaenz gij moegbiu buekguh aen bak bi daihngeih, aeu gij yendaiva yiengh Cungguek bae cienzmienh doicaenh Cunghvaz Minzcuz fukhwng hungmbwk cix haenqrengz buekguh!　

编辑：蒙树起 -