Aen Hoih Yaenglwnh “Seihoih Byaraiz” Caeuq Canghraiz Lai Minzcuz Gvangjsih Minzcuz Bause Youq Nanzningz Banh

来源：广西民族报网

发布时间：2023-12-08

广西民族报社“岜莱诗会”与多民族作家座谈会在邕举行

▲12 nyied 1 hauh, Aen Hoih Yaenglwnh “Seihoih Byaraiz” Caeuq Canghraiz Lai Minzcuz Gvangjsih Minzcuz Bause youq Nanzningz banh.

　　Bonjbauq siusik (gicej Lij Daucih Vangz Yinz Vangz Yijsinh) 12 nyied 1 hauh, Aen Hoih Yaenglwnh “Seihoih Byaraiz” Caeuq Canghraiz Lai Minzcuz Gvangjsih Minzcuz Bause youq Nanzningz banh. Gvangjsih vwnzyoz caeuq okbanj lingjyiz Vangz Beivaz、Cinz Yuigyangz、Siz Cauzyungz、Youhraen、Veiz Vahyungz, caeuq gyoengq canghraiz Gvangjsih Cuengh、Gun、Yauz、Myauz、Mauznanz、Mulauj daengj lai minzcuz ca mbouj lai 50 boux camgya aen hoih.

Veih Yungjhungz gangjvah

　　Gwnz hoih, Gvangjsih Minzcuz Bause caeuq canghraiz Sawcuengh Yiz Ciz、Cungh Hihcwngh、Lingz Siuyangh、Danz Hijvah、Luz Vanjcinh、Vangz Civeij、Vangz Vazdingz daengj 10 boux canghraiz Sawcuengh ciemdingh, caeuq canghraiz Sawgun Giuh Vwnzgyauz、Ciz Yinzhaij、Dungzyij、Niuzyihhoz、Liginh、Couh Minj、Veiz Swhyenz daengj 8 boux canghraiz lai minzcuz ciemdingh, baez ciemdingh canghraiz neix gungh 18 boux, miz Nanzningz、Liujcouh、Bwzswz、Hozciz、Laizbinh、Fangzcwngzgangj daengj dieg.

ciemdingh yizsiz

　　Mwh fangjdanz, vwnzyoz guvwn daibyauj Vangz Beivaz, canghraiz ciemdingh daibyauj Luz Vanjcinh、Vangz Vazdingz、Dungzyij、Giuh Vwnzgyauz daengj faenbied hopheux aen cawjdaez “baenzlawz doenggvaq gij rengz lai minzcuz vwnzyoz, gangj ndei gij gojgaeq aen gungdungzdij Cunghvaz Minzcuz, cienzboq ndei gij sing’yaem Gvangjsih minzcuz doxgiet baenaj” gangjlwnh. Gyoengq canghraiz giethab gij saedsaeh Gvangjsih caeuq bonjndang cauhguh cingzgvang, lwnh gij fuengfap lohnaemj raiz ndei bien faenzcieng Gvangjsih aen gungdungzdij Cunghvaz Minzcuz、gangj ndei gij gojgaeq Gvangjsih minzcuz doxgiet; daj bause haidin, daezok yigen genyi dijbauj, dingjmaenh aeu couqmaenh gij eiqsik caezcaemh Cunghvaz Minzcuz guh sienqmeh, doidoengh seizdaih moq minzcuz vwnzyoz saehnieb hwngfat ndei saed; naeuz gij simcingz laebdaeb lai bi baenz canghraiz ciemdingh roxnaeuz bineix baez nduj ciemdingh, caeuq ciemdingh doiq bonjndang cauhguh raiz faenzcieng miz maz bangcoh daengj.

　　“Seihoih Byaraiz” dwg aen binjbaiz lanzmuz 《Gvangjsih Minzcuz Bau》(banj Sawgun) fuganh ndeu, 2019 nienz 5 nyied cauhbanh, ndwen geiz, geiz banj, dinghgeiz maeuzveh cawjdaez cauh sei, daeng gij cozbinj sei cauhnduj, miz canghraiz、canghsei lai minzcuz haeujcoengh caeuq camgya, bouxdoeg ndaw gih rog gih haeujrwz gyaezmaij raixcaix, yingjyangj hung. Geij bi neix daeuj, Gvangjsih Minzcuz Bause vih gujli caeuq haeujcoengh canghraiz lai minzcuz Gvangjsih gaenxmaenx cauhraiz faenzcieng, dap aen bingzdaiz daeng gij cozbinj cauhnduj Sawcuengh、Sawgun ndei, guhbaenz aen gihci canghraiz ciemdingh lai minzcuz. Daengz seizneix, gyoebsuenq caeuq 72 boux canghraiz lai minzcuz ciemdingh, gungh daeng gak loih faenzcieng 248 bien, daih’iek 200 fanh cih saw, vih gangj ndei gij gojgaeq aen gungdungzdij Cunghvaz Minzcuz, coihawj gak minzcuz gvangqlangh doxcunz doxgyau doxyungz, giet sim comz rengz hwnqguh Gvangjsih aen dieg yienghndei couqmaenh gij eiqsik caezcaemh Cunghvaz Minzcuz.

编辑：Laujmiz -