Huz Cunhvaz Youq Gvangjsih Duzdauj Aen Yienh Ndaej Cungdenj Bangfuz Lajmbanj Saenqhwng Guh Hong Gyamaenh Gya’gvangq Cwngzgoj Vutgungz Gunggeng

胡春华在广西督导乡村振兴重点帮扶县巩固拓展脱贫攻坚成果工作

来源：广西民族报

发布时间：2022-01-14

　　1 nyied 6 hauh daengz 9 hauh, Cunghgung Cunghyangh Cwngcigiz veijyenz、Gozvuyen fucungjlij Huz Cunhvaz daeuj Gvangjsih duzdauj aen yienh ndaej cungdenj bangfuz lajmbanj saenqhwng guh hong gyamaenh gya’gvangq cwngzgoj vutgungz gunggeng, Swcigih Dangjveij suhgi Liuz Ningz caeuq Swcigih Dangjveij fusuhgi、swcigih cujsiz Lanz Denhliz faenbied bae buenx. Huz Cunhvaz giengzdiuh, aeu haeujlaeg gvancez gij cingsaenz cijsi youqgaenj Siz Ginbingz cungjsuhgi, ciuq gij baijbouh Aen Hoih Hong Ginghci Cunghyangh caeuq Aen Hoih Hong Lajmbanj Cunghyangh, yungh banhfap rengzrwd raenhamq, giengiet soujmaenh diuz daejsienq mbouj hawj dauq baenzgungz lai, doengzseiz aeu rengz cujyau cienq daengz hawj dieg vutgungz laebdaeb hwngfat bae, yienghneix cietsaed gyamaenh gyagvangq cwngzgoj vutgungz gunggeng.

　　Huz Cunhvaz daeujdaengz aen yienh ndaej cungdenj bangfuz lajmbanj saenqhwng guekgya Liujcouh Si Sanhgyangh Dungcuz Swciyen caeuq Yungzsuij Myauzcuz Swciyen、Laizbinh Si Yinhcwngz Yen caeuq aen yienh ndaej cungdenj bangfuz lajmbanj saenqhwng Gvangjsih Gveilinz Si Lungzswng Gak Cuz Swciyen, bae canjnieb yenzgih、giyez、aen segih dieg senj youq、ranz vutgungz daengj, daengz dieg diuyenz fuengzre gamcaek bangfuz mbouj hawj dauq baenzgungz、 vutgungz canjnieb hwngfat、vunzlai vutgungz couhnieb laisou daengj cingzgvang.

　　Huz Cunhvaz naeuz, aeu doeksaed gij baijbouh gezcwz Dangjcunghyangh、Gozvuyen, gyalai rengz haeujcoengh aen yienh ndaej cungdenj bangfuz lajmbanj saenqhwng, gyavaiq gyalai rengz de gag hwngfat. Aeu caenh’itbouh laebndei caeuq doeksaed aen gihci gamcaek bangfuz fuengzre mbouj hawj dauq baenzgungz, gibseiz cawz fungyiemj huxndumj bae, baujmaenh mbouj hawj dauq baenzgungz lai. Aeu haenqrengz hawj vunzlai vutgungz laebdaeb demsou, baujmaenh ndaw duenh gvaqdoh vunzlai vutgungz caeuq bouxguhnaz dangdieg、bouxguhnaz dieg vutgungz caeuq bouxguhnaz daengx guek souhaeuj beijlaeh laebdaeb daezsang. Aeu gyamaenh daezswng lajmbanj canjnieb miz daegsaek, gyavaiq hwngfat gizdieg canjnieb hawj beksingq baenzmiz, caenh’itbouh cukmaenh gij goekrag hwngfat. Aeu gaenxmaenx haeujcoengh okrog guh hong, gyavaiq diuzroen couhnieb vunzlai dieg senj youq, hawj goengrengz vunz vutgungz ndaej couhnieb onjdingh. Doeng sae doxgap daengj gij rengz bangfuz caeuq cwngcwz banhfap aeu comz coh coicaenh hwngfat, haenqrengz cukmaenh gij giek gyamaenh gya’gvangq cwngzgoj vutgungz gunggeng.

　　Duenh youq Gvangjsih, Huz Cunhvaz lij bae gaujcaz hong guh dangz、guh youz dem.

　　(Vei Hwngz)

编辑：韦亦玮

Huz Cunhvaz Youq Gvangjsih Duzdauj Aen Yienh Ndaej Cungdenj Bangfuz Lajmbanj Saenqhwng Guh Hong Gyamaenh Gya’gvangq Cwngzgoj Vutgungz Gunggeng

胡春华在广西督导乡村振兴重点帮扶县 巩固拓展脱贫攻坚成果工作

胡春华在广西督导乡村振兴重点帮扶县巩固拓展脱贫攻坚成果工作