Denhngoz Ciengj Doenghgij Canjnieb Miz Daegsaek

来源：广西民族报

发布时间：2020-03-12

　　Ndwen 3 ngoenz 5, youq aen hoih hong nungzyez lajmbanj bi 2020 Denhngoz Yen hai haenx, aen yienh neix yenveij、cwngfuj cingjhab gij ngaenz gih、si、yienh sam gaep caizcwng ciengjbouj 1000 fanh maenz, ciengj 35 aen dieg (suen、diemj) guhyiengh canjnieb daegsaek daihneix caeuq 4 aen hozcozse ciennieb vunzguhnaz, neix dwg baez ciengj ceiq hung、ngaenz ceiq lai Denhngoz ciengj “sam nungz”.

　　Baez neix Denhngoz Yen ciengjbouj 35 aen dieg guhyiengh canjnieb daegsaek daihneix hamz miz bi 2019 swcigih gaep dieg guhyiengh cehsim nungzyez daegsaek daihneix 2 aen、bi 2019 Hozciz Si dieg guhyiengh yienh gaep nungzyez daegsaek daihneix aen ndeu、bi 2019 Denhngoz Yen suen guhyiengh yangh gaep nungzyez daeg- saek daihneix 8 aen caeuq bi 2019 Denhngoz Yen diemj guhyiengh cunh gaep nungzyez daegsaek 24 aen. Doengzseiz ciengj swcigih gaep aen hozcozse doxgap vunzguhnaz 4 aen.

　　Geij bi neix daeuj, Denhngoz Yen giengzvaq dangj cienzmienh daiqlingx hong lajmbanj, aeu hong “sam nungz” baij youq dieg youqgaenj, dungjcouz guh ndei gij yinvu youqgaenj dwkhingz cienzmienh hwnjguh baenz aenbiengz siujgangh、dwkhingz vut gungz gunggeng, haenqrengz doicaenh hwnjguh lajmbanj goenggungh giekdaej sezsih, guh ndei lajmbanj goenggungh fugsaeh, bouj caez banjdinj, lai cungj banhfap caez yungh guh ndei “sam nungz” hwngfat giekdaej. Doengzseiz gaem maenh aen seizgei cauhguh dieg guhyiengh cehsim canjnieb daegsaek daihneix, yungh ndei gak loh cwngcwz, doidoengh hwngfat guh hung daegsaek canjnieb, coicaenh nungzyez demyauq、vunzguhnaz laisou, vih giengiet dwkhingz ciengz ciengq vut gungz gunggeng caeuq cienzmienh hwnjguh aenbiengz siujgangh dwk roengz giekdaej maenhsaed.

　　Daengz seizneix, Denhngoz Yen gungh hwnjguh baenz swcigih gaep dieg guhyiengh nungzyez daegsaek daihneix 6 aen、yienh gaep dieg guhyiengh nungzyez daegsaek daihneix 5 aen、yangh gaep suen guhyiengh nungzyez daegsaek daihneix 21 aen、cunh gaep diemj guhyiengh nungzyez daegsaek daihneix 78 aen.(Vuz Sunghboh)

编辑：蒙树起