Vujmingz Gih Cietsaed Doicaenh Hong Vah Saw Minzcuz Vunznoix

来源：广西民族报网

发布时间：2020-02-27

　　Geij bi neix daeuj, Vujmingz Gih nyinhcaen gvancez hengzguh gij cwngcwz sawvah minzcuz dangj caeuq guekgya, cungfaen baujcang gij gienzik habfap vunzlai minzcuz vunznoix, daegbied dwg Swcigih Yinzda Cangzveijvei bi 2018 ndwen 5 fatbouh 《Aen Diuzlaeh Vah Saw Minzcuz Vunznoix Gvangjsih Bouxcuengh Swcigih》(baihlaj genjdanh heuhguh 《Diuzlaeh》) le, Vujmingz Gih hengzguh 《Diuzlaeh》 gak hangh gvidingh, youq hong vah saw minzcuz vunznoix fuengmienh aeundaej baenaj moq、daezswng moq.

　　Gig yawjnaek, giengzvaq roxyiuj. Aeu hong vah saw minzcuz vunznoix gyahaeuj Vujmingz Gih gak cin、gak danhvei nienzdoh cizyau gaujbingz cijbyauh dijhi neiyungz, baenz caengz baenz caengz doeksaed cizcwz, baujmaenh hong vah saw minzcuz vunznoix miz vunz ca、miz vunz guenj、miz vunz doeksaed、miz vunz dukbanh.

　　Giengzvaq senhconz cienzdoh, guhbaenz gij heiqfaenh naekna saedhengz 《Diuzlaeh》. Dingjmaenh yungh “hag fap yungh fap、senhconz bujfaz、yiemzgek hengzfap”, laebdaeb haiguh senhconz cienzdoh 《Diuzlaeh》, lai caengzmienh lai loh haiguh bujfaz haiguh 《Diuzlaeh》 senhconz hozdung. Haenqrengz saedhengz 《Diuzlaeh》 senhconz haeuj yanghcin、haeuj segih、haeuj hagdangz、haeuj gihgvanh、haeuj giyez daengj hozdung.

　　Doidoengh 《Diuzlaeh》 gvancez doeksaed, daezsang gij suijbingz hong vah saw minzcuz vunznoix. Vujmingz Gih guekgya gihgvanh、swyez danhvei、gak aen yanghcin gihgvanh caeuq hingzcwngcunh(segih) “sam veij” baiz、aenyaenq hingzcwng danhvei gihbwnj cungj guh daengz gveihfan yungh Cuengh Gun song cungj saw. Bued roengz 464.86 fanh maenz saedhengz doengh gij hanghmoeg daezswng hwnjguh hawsingz gyaudoeng sezsih, guh moq baiz dazroen miz Cuengh Gun song cungj saw 226 gep, 39 diuz roen miz baiz dazroen yungh Cuengh Gun song cungj saw, caemhcaiq cang gyaeu lohdaeng henz roen, cungj yaenq miz doz Mancuengh、aennyenz Bouxcuengh.

　　Cietsaed guh ndei hong gungganq vunzcaiz. Bingzdingh fazgvanh song vah 3 boux. Fazgvanh culij doenggvaq gauj gij naengzlig yungh Vahcuengh miz 7 boux, liedhaeuj aencang vunzcaiz bwhlaeng Vahcuengh Guengjsae fazyen. Vujmingz Gih hagdangz son Cuengh Gun song sawvah gyalai daengz 13 aen, hagseng ndaej hag Cuengh Gun song sawvah 12000 lai boux, vunz guh lauxsae son Cuengh Gun song sawvah 38 boux.(Veiz Hwngzli)

编辑：蒙树起