Bi 2019 “Sam Nyied Sam Bouxcuengh·Aen Ciet Angq Guengjsae” Cawjhoihciengz Hozdung Youq Namzningz Banh

来源：广西民族报网

发布时间：2019-05-15

　　Ndwen 4 ngoenz 4 banhaet, bi 2019 “sam nyied sam Bouxcuengh·aen ciet angq Guengjsae” cawjhoihciengz hozdung youq Gvangjsih Minzcuz Bozvuzgvanj hoenghhwd haimuq, vunzlai gak cuz soujfuj caeuq bouxhek gak dieg ciengqgo diuqfoux, ciengqyiengj yaem’wenq angqyangz ngoenzciet.

　　Gicej rox daengz, cawjhoihciengz hozdung baugvat biujyienj coux hek、haimuq biujyienj、langhbaij daejniemh sam aen neiyungz, fwen ndeidingq、diuqfoux angqyangz、langhbaij dinfwngz daegbied gagmiz、doengzcaez daejniemh hingzsik lai yiengh, ropcomz langhbaij le gij vwnzva minzcuz fungfouq lai yiengh、ndwenngoenz vuenyungz huzndei、gij cingz hwngfat gagsaenq hailangh caeuq gij yienghsiengq hoenghvuengh minzcuz doxgiet Guengjsae.

　　Ciengz hawfwen Mbanjcuengh nauhyied ndeu hainduj baez haimuq biujyienj neix, aen doih doiq fwen youz 600 lai boux beixnuengx gak gyaiq soujfuj gapbaenz haenx ciengqgok hot fwen gvenqsug, ciengq ok gij angqyangz caeuq cingz hwnjguh mbanjranz、saedyienh loqsiengj lwgminz gak cuz Guengjsae.《Betgveiq Daihgodangz》 comz biujyienj doiq fwen 《Fwenfeiz》 Yizcuz、《Hoihfwen》 Bouxcuengh、《Fwenmbungqmbaj》 Yauzcuz、《Golaux Dungcuz》 daengj lai aen minzcuz, langhbaij gij cingzgvang hoenghvuengh hawfwen Mbanjcuengh; hagseng louzhag youq Guengjsae daj Dunghmungz cib guek daeuj haenx hix ndang daenj buhvaq moqsag hwnj daiz yienjheiq, fwngz doxdaz sim doxlienz caezcaemh ciengq fwen cingzngeih……Haimuq biujyienj ndeiyawj, dawz gij hohfuk gyaeundei soengq hawj moix bouxhek daengz ciengz haenx.

　　Byaij haeuj dieg langhbaij fungsug, Minzcuzcunh ranzcanx Boux- cuengh cingq langhbaij fungcingz maez vunz, ciengz biujyienj “aeu gwiz” daegsaek Bouxcuengh ndeu hawj vunzlai humx yawj haenx riu ndaej dungx in bae; luengqhongh gijgwn ndei baij ok ngaiz faenj cienzdoengj Guengjsae, dangciengz langhbaij 6 hangh dinfwngz guh faenj; luengqhongh giuzbumz cingq langhbaij dinfwngz guh muhmeh Boux- cuengh Yougyangh、guh beiz faexcuk Gveilinz、deu gaeu Hozbuj daengj langhbaij dinfwngz fwngzguh cienzdoengj minzcuz Guengjsae cingj bouxyawj dangciengz caeuqfaenh daejniemh nyauznyauz; dieg langhbaij huq mizmingz “baenzdauq Guengjsae” hix daezhawj cimz caeuq guh gaiq gwn……Bouxhek daeujdaengz cawjhoihciengz caenhcingz gwn、ndoet、 guhcaemz、 guh’angq、 cawx, caenhcingz yiengjsouh gij fukheiq neix.

　　Mboengq “sam nyied sam Bouxcuengh”, daengx gih hopheux “Guengjsae heiq Mbanjcuengh noengz”“angj dijyuz minzcuz” “doxiu youz Guengjsae”“muengx e angq cawx”“huzndei youq Betgveiq” daengj 5 aen vangqhung, banh daih’iek 900 ciengz minzsuz vwnzva hozdung, cienzbouh langhbaij gij yienghsiengq moq Guengjsae swnghdai habyouq、yiedcingz gyaez hek、seizdaih moq vuenyungz huzndei.(Liengz Cingz)

编辑：蒙树起