Raedceij Lozcwngz: “Dinfwngz Ak” Mulaujcuz Bakgeuz Ok

来源：广西民族报网

发布时间：2019-05-16

罗城剪纸：剪刀下的仫佬族“绝艺”

□ Gauh Dunghfungh

Canghraedceij haeuj hagdangz son raedceij.

Hagseng baij gij doz raedceij hag raed baenz.

Canghraedceij son hagseng hag raedceij.

Dahniq Mulaujcuz angq hag raedceij.

Canghraedceij saeqsim raedceij.

　　Lozcwngz dwg guek raeuz aen Mulaujcuz swciyen dog ndeu, dangz dinfwngz raedceij Mulaujcuz dwg mbanjbya Mulauj cungj hingzsik biujyienh vwnzva youqgaenj ndeu, aeu gij dinfwngz ndeiraeuh caeuq daegsaek minzcuz naekgywg de, ndaej daengz vunzlai haengjgyaez. Vih le swnjcienz hangh dinfwngz ndawbiengz neix, geij bi neix daeuj, bouxswnjcienz raedceij Mulaujcuz Lozcwngz Loz Vazcingh sou lwgsae mbouj aeu ngaenz, guhhoengq dwk yiengq gyoengq bouxcoz nyezcauq cienzson gij dinfwngz raedceij cojcienz ranz bonjfaenh, hawj dangz dinfwngz raedceij Mulaujcuz ndaej swnjcienz roengzbae.

　　Raedceij ndawbiengz Mulaujcuz lizsij gyaenanz, funggek daegbied, youq Ciuhdangz couh raen miz, ginggvaq Sung、Yenz、Mingz、Cingh geij ciuh neix hwnghoengh, daengz seizneix gaenq miz baenz cien bi lizsij. Gij raedceij ndawbiengz Mulaujcuz miz daengngoenz、ronghndwen、funghvuengz、geizlaenz、vumzvauz、mbungqmbaj、roeggacak caeuq gova go’nywj gofaex daengj dozanq hamz miz gitleih hab’eiq haenx, gij dozanq aennda lwgnding gwnzde, cungj dwg sien aeu ceij raed baenz yiengh le cij oemjsiuq hwnjbae. Raedceij Mulaujcuz ndaej faen baenz seiq loih: It dwg guh gaiqnem, couh dwg cigciep nem youq gwnz dou cueng、bangxciengz、daengloengz、mauhnyinz lai saek daengj guh canglengj; ngeih dwg baijdak yungh, couh dwg canglengj huqlaex、huqhaq、huqcaeq、huqdajcuengq daengj; sam dwg daejyiengh seujsiuq, yungh youq seuj cang buh vaq、haiz mauh、aennda、aenswiz、gaenfwngz daengj; seiq dwg dajnyumx yungh, couh dwg dangguh banjyaenq baengzva lamz, yungh guh baengzbuh、najdenz、yiemzdou、fandox daengj.

　　Bouxswnjcienz raedceij Mulaujcuz Loz Vazcingh dwg seng youq Mbanjsiujnen Swhbingz Cunh Swbaj Cin Lozcwngz aenranz canghraedceij daih cienz daih ndeu, geq doxhwnj geij daih cungj miz boux banlaux dinfwngz raedceij、vehveh sugsed cingdoeng, youq dangdieg gig mizmingz, caemhcaiq aeu raedceij、vehveh dangguh ra ngaenz gvaq saedceij gvaq. Dangz dinfwngz neix daih cienz daih, daengz Loz Vazcingh daih neix gaenq dwg daih daihseiq. De daj 8 bi couh hag dinfwngz raedceij, gaenx hag fwngz soem, seizneix raedceij、seujsiuq、vehveh、caiznyib、vehlengj ribfwngz daengj yienghyiengh cungj guh ndaej baenz. De vih demlai ndaw ranz souhaeuj okrog guh seng’eiq gvaq, daxmeh de gvaqseiq le, bi 2013 hixnaengz vutvak gij seng’eiq gwnz fwngz dauqma mbanjranz, swnjcienz dangz dinfwngz raedceij daxmeh cienz roengzdaeuj neix. Vih engq ndei bae swnjcienz caeuq hoengzyiengz dangz dinfwngz raedceij daegbied neix, de dauqcawq bae hagsib、laemxsim mumaeq, mboujduenh guhcaez caeuq gaijndei gij dinfwngz raedceij bonjfaenh. Geij bi neix daeuj, de yungh gij fapraed dangz dinfwngz raedceij cojcienz neix dawz cietyihfan、gogeq、seujsiuq、lungznywj Mulaujcuz daengj 17 hangh feih vuzciz vwnzva yizcanj hanghmoeg gaeuqgeq youh ronghsien haenx lumjlili dwk “raed” okdaeuj, raed baenz fuk raedceij 《Feihyiz Mulaujcuz》 raez 4 mij ndeu, baez daih’it bae camgya Gvangjsih Gunghyi Meijsuz Cozbinj “Betgveiq Diengoeng Ciengj” couh dued ndaej gimciengj.

　　Seizneix, gij hagseng Loz Vazcingh yied daeuj yied lai, cawz geij aen hagdangz caeuq saunenzgungh dangdieg le, Gvangjsih Dayoz、Hozciz Cizyez Gyauyuz Cungsim Hagdangz daengj yenyau caemh cingj de bae hawj hagseng hwnjdangz. Dangz dinfwngz raedceij Mulaujcuz ndaej swnjcienz roengzbae, caemhcaiq byaij ok le mbanjbya Mulauj.

编辑：蒙树起