Ciengqdaeng Lozyez: Euciengq Saedceij Vuenyungz Huzndei

来源：广西民族报网

发布时间：2019-05-16

乐业唱灯：唱响幸福和谐生活

□ Mingzcuz Yenzhungz

Canghyienj dajcang vadgei yinxvunz.

Daxgoeng dahlan yawj dwk maezmwd.

Canghheiq cangndang ndei yaek hwnjdaiz yienj.

　　Ciengqdaeng Lozyez, youq citheiq Guengjsae ndawde ciemq miz diegvih youqgaenj, dwg citheiq deihfueng caeuq daeng’va Yinznanz、Gveicouh caez ndeiyawj okmingz. De dwg citheiq vwnzva ndawbiengz maenhndei ranghdieg Bouxgun luegbya baihsaebaek Guengjsae, dwg gij lemqlw heiqdaeng gaeuqgeq. Bi 2010, heiq ciengqdaeng Lozyez ndaej lied haeuj swcigih feih vuzciz vwnzva yizcanj mingzloeg.

　　Ciengqdaeng Lozyez daj Ciuhcingh seiz Ganghhih、Genzlungz couh miz, daengz seizneix gaenq miz 300 lai bi lizsij, youq Ganhdenz、Lozsah、Dungzloz、Youbingz daengj gij yangh Lozyez Yen ranghdieg Bouxgun comzyouq neix caeuq Yihungz Yangh Lingzyinz Yen, Langbingz Yangh Denzlinz Yen daengj dieg henzgyawj de riuzcienz lai. Lozyez daj ciuhgeq couh miz gij vwnzva cienzdoengj ciengqdaeng foux lungz, moix bi seiz hongsoeng roxnaeuz ngoenzangq ngoenzciet, cungj miz doihdaeng haeuj mbanj daengz ranz angqhoh cieng moq roxnaeuz goenghoh guhranz、aeubawx haqlwg daengj. Itbuen doihdaeng youz cibroek boux vunz gyoebbaenz, miz bouxcouj bouxdan, song boux roq gyonglaz caeuq bet boux roxnaeuz cibngeih boux riuj daeng lai saek. Moix aen daeng gwnzde cawz veh miz dujva go’nywj duznon duzbya le, lij faenbied sij miz “goeng”“hoh”“cieng”“moq”“rumz”“swnh”“fwn”“yinz” doenghgij cihsaw neix, diuq fouxdaeng seiz mboujduenh baij ok coij saw “goenghoh cieng moq”“rumz swnh fwn yinz” coenz vah gitleih neix, doq foux doq ciengq gij diuqgo ndawbiengz, neiyungz dwg hoh ngoenzangq, vunz dangdieg heuhguh cet mbanj caijdaeng, itbuen cungj haeuj daengz gyanghongh、ranzding bae biujyienj. Youq goekdaej go foux caijdaeng gwnzde, canghheiq doihdaeng (bouxcouj bouxdan) mboujduenh demgya neiyungz moq, yienjciengq gij gojgaeq miz di cingzciet haenx. Gyoengq canghheiq youq seiznanz yienjciengq ndawde, mboujduenh supsou “fwen gingq ien”“diuq gaujvaq”“diuq soengq beix” daengj fwen, lij supsou le mbangj diuqciengq canghmo, aeu daeuj yienjciengq gojgaeq, go foux caijdaeng caeuq ciengqdaeng cugciemh biekliz, baenz le cungj citheiq miz daegsaek deihfueng ndeu.

　　Ciengqdaeng Lozyez dwg daj yisuz ndawbiengz foux lungz caij daeng hwngfat hwnjdaeuj, daiq miz yiengh go foux haenqrem, biujyienj doq ciengq doq foux, aeu ciengq lawh faenz, aeu duenh swzciengq raezrangh diemj ok bouxvunz、lwnhgangj gojgaeq, youq citheiq cienzdoengj ndawde ciengzseiz miz gij swzciengq baenz geijcib coenz guh duenh ndeu. Gij hongdawz mwh biujyienj dwg fanbeiz caeuq gaenfwngz lai. Gij yaem’wenq de, diuqciengq faen miz “cingqbanj” caeuq “diuqiq” song loih; swzciengq dwg faen coenz gwnz coenz laj, dingzlai dwg coenz haj cih、caet cih、cib cih, caemh miz coenz raez coenz dinj. Vah gwnz daizheiq dwg aeu Vahgun Gveiqliux ciengq. Gij gizbaiz buenxciengq de miz “fanh bi angq” “daih haimonz” daengj. Yozgi buenx ndaekroq ragngod miz gyong、laz、moegnyawz、cacemq、ngeihyienz、nyiedgimz、aendig daengj, aen sigij gonq caetcib nienzdaih mboengqlaeng, demgya le yiengzgimz、loxlez daengj yozgiz buenx ndaekroq ragngod.

　　Heiq ciengqdaeng diuqgo ndei dingq、citheiq loihhingz lai yiengh, youq Lozyez miz goekdaej nanwt, vunzlai mboujdan bonjfaenh gyaez yawj, vanzlij gyaez hwnjdaiz biujyienj, comz banh “aenciet vwnzva lijyouz ciengqdaeng” baenzdauq hozdung, gaenxmaenx dwk hoengzyiengz le minzcuz vwnzva caeuq hawj saedceij vunzlai lai cungj lai yiengh.

编辑：蒙树起