来源:广西民族报网
发布时间:2026-08-24
Gou daj iq couh gig lau caeuq boux najseng gangjvah、doxgyau, dwg boux lau dongx vunz ndeu. Cigdaengz ngoenzneix, lauxsae iugouz gyoengq gicej iq dou caijfangj gij doengzhag camgya banyinx ciengqgo haenx, gou dauqdaej hai damj lo, bienqbaenz boux gag ra vunz gangjvah ndeu, dauqdaej cimz daengz gij feih guhbaenz haenx!
“Fanh saeh hainduj nanz”, di he cungj mbouj loek! Gou ndaw sim youh angq youh gaenjcieng daeuj daengz aen rug ciengqgo daihngeih. Daihgya lumj gyoengq rwi nei byaij haeujbae, miz vunz gig vaiq couh ra raen bouxvunz de naemj ra haenx, miz di vunz lij ra bae ra dauq, gou caeuq boux doih gou gyaxgedged ndwn youq mbiengj he, doeklaeng gou caeuq boux doih gou gig mbouj yungzheih cij ra daengz boux vunzsug ndeu.
Hoeng, mbouj rox vih gijmaz, conghhoz gou baenzlawz hix gangj mbouj ok saek coenz vah, lumj boux vunzngoemx nei, “nguh mwngz yaep seizgan ndeu” gig mbouj yungzheih coenz vah ndeu cij daj ndaw bak gou saet okdaeuj. Boux doengzhag haenx bakmwt yaep ndeu, cij dapwngq hawj dou caijfangj. Seizneix gou cij caemdingh roengzdaeuj. Gou swngzgei ciuq gij vwndiz geiq youq gwnz bonjbitgeiq haenx cam hwnjdaeuj, hoeng cungj roxnyinh gij singyaem swhgeij mizdi saenz. Gou cij rox ngaem gyaeuj geiq, mbouj gamj cim vunz. Dauqdaej, cam sat boux caijfangj daih’it lo, ndaek rin ndaw sim hix cuengqroengz lo, aensim naekngae’ngae mwhnduj bienq ndaej soengswdswd lo.
“Hainduj guh ndaej baenz couh suenq baenzgoeng dingz he.” Caijfangj baez he, damj na lo, sim onj lo, caijfangj hix miz saenqsim lo. Gangj daeuj hix geizgvaiq, caijfangj roengzbae cibfaen swnhleih, aiqdwg gyoengqde gamjsouh daengz gij caensim dou, cibfaen boiqhab dou caijfangj, baez cam baez dap gig vaiq couh guh liux lo. Gou lumj guhbaenz baez yinvu hungmbwk youh dwgrengz he nei.
Baez caijfangj neix yienznaeuz hanh rih hanh roenx、hoz gan bak hawq, hoeng, neix dwg ndaw seiqvunz gou baez daih’it caijfangj ndaej baenz, gou dauqdaej cimz daengz gij feih guhbaenz haenx lo. Gij feih neix dwg fouzfap aeu vah daeuj beij. Yaek aeu lumj gyoengq gicej ndaw densi haenx baenzde vifung fwdfwd, gou seizneix lij guh mbouj daengz, hoeng lauheiq gvaq mbouj geijlai nanz, mwngz itdingh youq gwnz bingzmu yawjraen aen ndang caemdingh onjwt gou!
(Liengz Gyahyungj raiz/Luz Yau hoiz)
编辑:实习生 石喜丹 复审:黄慧华 终审:蒙树起