Doxdax Dwkyienq - 广西民族报网

Doxdax Dwkyienq

来源：广西民族报网

发布时间：2026-08-24

Bancozvwnz dou gawjhengz baez dwkyienq(踢毽子) doxdax ndeu. Dingqnaeuz baez doxdax neix dwg dwkyienq, boux doengzhag ndeu doeksaet dwk swenj hwnjdaeuj, ciep daeuj swenj gawq dem gawq “gou mbouj rox dwk” “gou mbouj rox dwk ha”, gij sing de laeblaeb daebdaeb cienz haeuj ndaw rwz gou daeuj. Ban dou boux ak doxbuet、diuqcag、dwk lanzgiuz、dwk cuzgiuz lai dangqmaz, hoeng boux rox dwkyienq, geq lwgfwngz cix mbouj miz geijlai boux.

Mbouj yaep he, lauxsae dawz ok aenyienq yungh gij bwn gak cungj saek dapboiq guh baenz haenx, dawz dou faen baenz A、B song aen cuj, gou faen youq B cuj.

Hainduj doxdax lo, boux daih’it ok ciengz dwg B cuj Ciz Yiz caeuq A cuj Ciz Beihoz. Gyoengqde song boux cungjdwg vaizlwg mbouj lau guk haeb. Aenyienq Ciz Yiz dik dwk fwt gwnz fwt laj、fwt swix fwt gvaz、fwt gyae fwt gyawj, gip ndaej Ciz Yiz din fwngz cungj luenh liux, din he baez dik gvaqbae, aenyienq doek youq bangxdin, hoeng aenyienq haenx cix lumj ndaundeiq mbin bae gyaep ronghndwen nei,“bya” sing he mbin okbae, laemx doek youq gwnznamh.

B cuj aen doihgyayouz hix mbouj youqndwi, gyoengqde youq henz swenjsaengsaeng bang rengz, da yawj Ciz Yiz dwkyienq gij cingzgvang yied daeuj yied cuet, caeuq gyoengqde gaxgonq naemj yienghhaenx doxca gyae lai, daihgya cungj sim gip lumj feiz coemh, daemhdin mbouj dingz. Doeklaeng, Ciz Yiz ndaej faen 8 beij 17 deng dwkbaih lo.

Youq ciengz doxdax neix, hawj gou geiq ndaej ceiq laeg couhdwg Couh Cwzcinz caeuq Luj Cinz doxdax dwkyienq seiz. Couh Cwzcinz dwg ban dou boux ceiq biz, dwg daegbiz iq he, hoeng yawj vunz mbouj ndaej dan yawj yienghsiengq, raemxhaij mbouj ndaej aeu rok rau. Gaej yawj Couh Cwzcinz yienghhaenx bizbwd cangqcwt, hoeng de gag miz aen fuengfap de dwkyienq. Vunzwnq cungjdwg yungh bangxdin daeuj dwkyienq, hoeng Couh Cwzcinz cix cingq din yungh byaidin dawz aenyienq ngaeu hwnjdaeuj.

“Gijneix lawz dwg dwkyienq, gaenbonj couhdwg ngaeu aenyienq luba?”Cangh Veij vah byot ok bak. Sawj vunz doeksaet Couh Cwzcinz yienghneix dwkyienq lij haemq ak, doeklaeng gingqyienz caeuq Luj Cinz mbouj faen sawhingz, song boux dwk bingz gvaqbae.

Doeklaeng dwg boux dwkyienq ceiq ak Lij Yengiz ok ciengz lo, mbatneix, Lij Yengiz dik mbouj swnh geijlai, gaxgonq de cungj dwg haj roek aen gyoeb lienz dik baez he, aenyienq buet daengz gizlawz, de vunz couh gaen daengz gizlawz. Hoeng baezneix, Lij Yengiz ceiqlai hix song sam aen dik baez he, A cuj gij duiyenz cungj vih de simgip gaenjcieng. Hoeng dauqdaej dwg bouxak, mbouj yaep he, Lij Yengiz couh yied dik yied baenz lo, gwnz din de lumjbaenz cug miz diuz mae yawj mbouj raen he nei, rag dwk aenyienq mbin doxhwnj youh foek doxroengz, aenyienq couh lumj duz mbungqmbaj saekraiz ndeu youq aen ndang dangqnaj de foux mbin. Gyoengqvunz nyaenx mbouj ndaej dopfwngz roebroeb.

Doxdax sat lo, ban dou ndaej faen 281 beij 330 deng dwkbaih lo. Mbouj gvaq doenggvaq ciengz doxdax dwkyienq neix, sawj gyoengq doengzhag engq gyaez dwkyienq lo. Mwngz yawj, cijaeu baez roengzdangz, couh miz cib lai duz mbungqmbaj saekraiz youq lajroq mbin doxhwnj youh foek doxroengz ne!

(Linz Vei raiz/Danz Hijvah hoiz)

编辑：实习生石喜丹复审：黄慧华终审：蒙树起