Dah Iq Ranzmbanj

来源:广西民族报网

发布时间:2026-08-24

Najranz gou miz ga dah iq ndeu.

Geiq ndaej mwh lij iq, daxmeh daiq gou bae henzdah guhcaemz, gou vix bae coh gij raemx laecaca haenx, geizheih dwk cam: “Meh, baenzlai raemx lae bae coh gizlawz va?” Daxmeh riu dwk naeuz: “Neix dwg ‘Dahdoj’, raemx coh baihdoeng lae haeuj daihhaij bae.” Daj baezhaenx hwnj “Dahdoj” aen coh neix couh laeglaeg dwk yaenq youq ndaw ukgyaeuj gou.

Gou couh lumj gofaex iq gwnzhaenz ityiengh, gaen gadah raemxlae yaengyaeng majhung.

Seizcin daengz lo, gou yawj raen gij nae ndaw dah vaq lo, gwnz nye goliux biendah did ok mbawoiq lo. Yaengyaeng dwk, gij vadauz hoengznonh haenx hix damqok byai nye lo. Roegenq daj baihnamz mbin dauq lo, youq gwnz raemx sawdikdik haenx mbin bae mbin dauq. Cuengqhag lo, gou couh daengz ndaw bak va doxceng hai neix bae, youq ndaw raiqdah heuswdswd haenx ciengqgo diuqfoux.

Seizhah daengz lo, gingjsaek song haenz engq gyaeu lo. Gwnz haenzdah faexheu raemhrwd, ndaw raiqdah gva mak rim suen. Cuengqhag le, dou mizseiz lij daengz ndaw dah bae youzraemx, youz baeg lo, couh buet daengz ndaw suen’gva bae gwn gva. Gij gva’byot naeng hau, gij gvadiemz naengraiz haenx ndeigwn raixcaix. Mizseiz dou lij youq laj faexraemh gwnzhaenz bang daxmeh saeg buh, cigdaengz banhaemh soengq gij ndat gyangngoenz baema.

Seizcou daengz lo, gij bya gungq ndaw dah biz lo, gij makbingzgoj gwnzhaenz cug lo. Ndaw gyajgeiz seizcou, gou cungj gyaez caeuq daxgoeng bae yawj suenmak. Angq lo, youh buet daengz ndawdah bae gaeb bya mo gungq. Raemxdah ingj raen aen najriu gou, rumzcou eu hwnj gij fwen fungsou.

Dah’iq seizdoeng hix mbouj haengj mbwq, nyig gij naefaiq mbin rim mbwn, dou youh guhdoih daengz ndaw dah bae rodnae, nauhyied dangqmaz.

Gou gyaez dah’iq ranzmbanj, bi seiqgeiq cungj gyaez de. Gou gyaez gij raemx lae mbouj goenq mbouj gat haenx, gou gyaez gingjsaek gyaeundei song haenz, engq gyaez gij reihnaz song haenz de aeu raemxlae daeuj nyinhciengx haenx, hawj vunz soengq daeuj gij vaiqvued fungsou. Youq mwh raiz faenzcieng, gou raiz “Dahdoj” gadah iq ranzmbanj gou gyaez haenx. Lauxsae aeu bitnding vet bae cih “doj”, dienz hwnj “duzhaiz” song cih saw, gou cij rox diuz dah’iq gou maij haenx caenmingz heuhguh Dahduzhaiz.(Yenz Cauyungz raiz    Yiz Ciz hoiz)


编辑:实习生 石喜丹  复审:黄慧华  终审:蒙树起