Saehyinx Dajgoeng - 广西民族报网

Saehyinx Dajgoeng

来源：广西民族报网

发布时间：2026-08-20

Youq ndaw sujgyaj miz ngoenz he, gou cingq guh cozyez, daxboh heuh gou gvaqbae, doiq gou naeuz：“Lanzlanz ha, daxboh baenzngoenz sinhoj dwgrengz guhhong, hoeng mwngz cij rox yungh ngaenz. Seizneix, mwngz maj hung lo, gij cingzgvang neix aeu gaijgaij lo, mwngz youq ranz guh hongranz, gou yawj mwngz guhhong ndei nauq caeuq vaiq menh hawj mwngz ngaenzlingzyungh.”Raen saeknaj daxboh gig yiemzsuk, gou dahlwg bingzseiz bohmeh cungj cungh neix hix cijndei ngaekgyaeuj dapwngq lo.

“Dang……”Gaenq caet diemj lo. Gwn caeuz gvaq, daxboh cuengq dawh roengzdaeuj, naeuz:“Lanzlanz, hainduj ‘dajgoeng’ ba!”Gou geizheih dangqmaz:“Dajgoeng?”Hoeng gou fwt roxsingj gvaqdaeuj, guhmuengz beuj vanj dawh haeuj ranzdajcawj bae. Gij vanj youzywdywd haenx, nywnx dwk gou cungj mbouj siengj swiq lo. Hoeng vihliux aeu ndaej ngaenzlingzyungh, cijndei nyaenxhoz guh roengzbae. Gou dawz aen vanj he gvaqdaeuj gonq, leuxcih hai suijlungzdouz, youq laj suijlungzdouz rubrab cung baez he, baenz lo, swiq“ndei”aen vanj he lo. Aen youh aen vanj, mbouj gvaq geijlai nanz, couh cungj swiq “liux”. Yawj daeuj, dajgoeng hix mboujmiz maz nanz ma! Gou doq ngon go doq gej mbawdox, buet daengz dingdangz.

“Vaiq aeu ngaenzgoeng hawj gou ba.” Gou iet song fwngz youzywdywd haenx okbae.“Baenzneix vaiq?”Daxboh ngeizvaeg dwk cuengq bauqceij roengzdaeuj, bae daengz ranzdajcawj. De liuq gij vanj swiq gvaq haenx da he, doiq gou naeuz:“Mwngz naeuznaeuz mwngz swiq gijmaz，gwnz vanj lij uq ne! Vanj swiq mbouj seuq, gaeu maenz he；gwnz namh cat mbouj seuq, caiq gaeu song maenz. Gungh gaeu mwngz sam maenz, mwngz dauqfanj yiemq gou maenz he.” Gou ging dwk iet linx okdaeuj, byongh ngoenz sup mbouj dauq bae.“Dang……”Gij singcung sug haenx youh roq hongz lo, gou youh hainduj guhhong lo. Siengjdaengz baezgonq swiq vanj rubrab deng gaeu ngaenz, gou hit lo, gou nyaenj di iengswiqvanj roengz aenvanj youz- ywdywd haenx bae gonq, yungh baengzmad dawz ndaw vanj rog vanj cungj swiq haj roek baez, leuxcih yungh raemxsaw cung seuq, doeklaeng youh yungh baengzmad uet seuq gij raemx ndaw vanj. Moix swiq sat aen vanj he, gou cungj aeu caiq saeqsim dwk cazyawj baez he, leuxcih dawz vanj baij haeuj ndaw ringj bae, sim siengj: Daxboh baezneix itdingh dwghoz luba.

Gou angqvauvau dwk doiq daxboh naeuz:“Cingj!”Daxboh aemq song fwngz dauq laeng, yamq raez byaij haeuj ranzdajcawj bae. Daxboh caen lumj gou liuhdaengz haenx dahraix, de cazyawj sat gig dwghoz. De daj ndaw daeh mbon maenz ngaenz moq he okdaeuj, oet haeuj ndaw fwngz gou daeuj, riunyumj naeuz:“Baezneix guh ndaej gig ndei, gou cibfaen dwghoz, guhhong couh aeu yienghneix, gaej rubrab, aeu nyinhcaen.”Gou song fwngz ciep ngaenz gvaqdaeuj, yawjyawj daxboh, youh yawjyawj maenz ngaenz haenx, ndaw sim gou angq dangqmaz.

Seizneix“dajgoeng”gaenq baenz gij sibgvenq gou lo. Gou itcig rom maenz ngaenz gou baez daih’it“dajgoeng”doz ndaej haenx hwnjdaeuj, sij mbouj ndaej yungh bae. Baez yawjdaengz de, gou couh gag roxnaeuz swhgeij aeu gyaez guhhong, aeu mbaet yungh ngaenz. (Yangz Lanz raiz

Lij Yungzcangh hoiz)

编辑：实习生石喜丹复审：黄慧华终审：蒙树起