Gij Mingzcoh Unqswnh “Boux Hungcoek Laekgaek”

来源：广西民族报网

发布时间：2026-08-19

Rumzhwx youh heuhguh rumz- daizfungh, de bongj gvaq le, gij hoengheiq ndaw hagdangz lumj deng swiq gvaq nei, singjsien dangqmaz. Aenvih “bouxhek gag daeuj” neix daeuj cunz, dou loeklak ndaej cuengq song ngoenz gyaj, dauq daengz gyausiz le, gij vah caezgya vanzlij liz mbouj ndaej de.

Fangh Cwngyenz sien hai bak:“Gou lij iq itcig nyinhnaeuz, rumzdaizfungh couh dwg gij rumz daj Cungguek Daizvanh digih bongj daeuj haenx!”

“Neix caen dwg aen lijgaij loek lo.” Lauxsae riunyumj, “rumzhwx saedcaeq dwg seng ok ndaw gij raemxgeujgaeq hungloet gwnz haij ranghdieg yezdai roxnaeuz fuyezdai haenx daeuj. ”

Gou nyaenx mbouj ndaej cam naeuz:“Gij mingzcoh rumzhwx cien geiz bak gvaiq, gyoengqde dauqdaej dwg baenzlawz an coh ne?”

“Cam ndaej ndei!” Lauxsae gejhoiz, “caen dahraix, gij mingzcoh rumzhwx cungj dwg sien dingh ndei gonq, mbouj dwg laemzseiz ukhai le seizbienh an coh. Ndaw mingzdan an coh rumzhwx daengxgungh miz 140 aen mingzcoh, youz 14 aen guekgya caeuq digih dwg daizfungh veijyenzvei cwngzyenz haenx doengzcaez dingh roengzdaeuj, ciuq gonqlaeng baenqcienq sawjyungh. ”

“W! Aenvih gak aen guekgya caeuq digih gapbaenz daizfungh veijyenzvei haenx vwnzva beigingj mbouj doengz, an coh hawj rumzhwx hix mbouj doengz, gij mingzcoh Cungguek daezhawj haenx dingzlai daj ndaw gojgaeqfangz caeuq vahriuz daeuj, lumjbaenz, ‘Vugungh’ ‘Haijsaenz’ ‘Denmuj’; Yizbwnj maij aeu ndaundeiq singhco daeuj an coh, lumjbaenz, ‘Mohgez’ ‘Denhdu’……” Canh Lizyenz lumj geq dijbauj ndaw ranz nei.

“Lij miz ‘Beibizgyah’, neix dwg niuznaij budingh vunz Aumwnz maij haenx!” Cinz Gwzsiuj dem naeuz.

Daihgya mwngz coenz gou coenz, ndaw gyausiz doq nauhyied hwnjdaeuj.

“Gou raen gij mingzcoh neix dingzlai cungj hamzeiq ndei, caeuq gij beizheiq rumzhwx boux hungcoek laekgaek neix mbouj doxha saek di. ” Ouhyangz Lanzlanz naeuz.

Lwgda lauxsae baez rongh, ngaekngaek gyaeuj:“Gij mingzcoh neix, caen dak miz gij maqmuengh gyaeundei gyoengqvunz, maqmuengh rumzhwx unqswnh saekdi, lai daiq daeuj raemxfwn, noix daiq daeuj caihaih. ”

“Mboujgvaq, ”lauxsae najhaen hwnjdaeuj, “gij rumzhwx manzyak lai ne, aen mingzcoh de couh yaek ngaiz ‘muedsou’. ”

“Mingzcoh hix rox ngaiz muedsou?” Dou doeksaet dwk da byaengq.

“Youq mwh moux baez rumzhwx cauhbaenz gij caihaih daegbied hungnaek, aen mingzcoh de couh yaek deng ‘muedsou’、ciengxlwenx dingz yungh. Couh lumj ‘Lungzvuengz’, seizneix gaenq deng ‘Haijgveiz’ dingjlawh, lij miz ‘Maxhaij’ hix deng ‘Muzlanz’ dingjlawh…… ”

Seizneix, ndaw gyausiz caem roengzdaeuj. Laxlawz, moix aen mingzcoh rumzhwx cungj aemq cwzyin ha!

Lauxsae riunyumj dwk naeuz:“Geiq ndei, rumzhwx mboujdan dwg ciengz swyenz caihaih ndeu, de hix dwg gohyoz, dwg vwnzva, dwg mwh vunzloih najdoiq swyenz seiz aen goqdaez doxdoengz ndeu. ”

(Vangz Sauyoz raiz

Lij Lungzfangh hoiz)

编辑：实习生石喜丹复审：黄慧华终审：蒙树起