来源：广西民族报网
发布时间：2026-08-19
Singhgiz haj banringz, ciuqciengz aeu guh daih baetsauq. Vangz lauxsae ngamq haeuj dou gyausiz, Goz Yaujdenh caeuq Sinj Yazgvangh couh ciengj bauqmingz:“Dou uet gingq.”
Vangz lauxsae nyaeuqnyaeuq najbyak, youh ngaekngaek gyaeuj, naeuz sat aeu haeujsim gijmaz, daihgya couh nyaengq hwnjdaeuj lo.
Sinj Yazgvangh riuj doengj raemx daeuj, gyoengqde vunz ndeu youq ndaw gyausiz uet, vunz ndeu youq rog gyausiz uet, song vunz doxdoiq lumj ciuq gingq ityiengh. Uet ndaej yaep ndeu, songde couh aeu soujgaen yomxyomx raemx, geux di raemx ok couh laebdaeb uet. Mbangq gingq yienzbonj miz di mong, gig vaiq couh bienq ronghsagsag, song vunz gek gingq doxdaeuq gaujgvaiq, youh gangj youh riu.
“Sou guh ndei la? ” Vangz lauxsae sawqmwh byaij gvaqdaeuj cam.
“Senq guh ndei lo!” Song vunz daekeiq fwngfwng, caez bak hoizdap naeuz.
Vangz lauxsae najhawq, gangj:“Yawjyawj sou, uet baenz maz yiengh?” Goz Yaujdenh caeuq Sinj Yazgvangh mbouj caiq riuhehe, ngiengx gyaeuj yawj, haxbaenh gaiq gingq lij ronghsagsag, baenzlawz seizneix cungj dwg riz raemx？
Sinj Yazgvangh najhoengz gangj:“Lauxsae, dou uet mbouj saw, sikhaek dauq uet.” Doq naeuz doq riuj aendoengj coh funghswiq buet bae.
Vangz lauxsae riu naeuz:“Mbouj gip, gizsaed couh dwg raemx uet lai gvaq lo. Sou riengz gou bae aeu geij mbaw bauqceij gaeuq ba.”
Goz Yaujdenh caeuq Sinj Yazgvangh mbouj rox gijmaz eiqsei, hoeng hix mbouj gamj cam lai, couh riengz Vangz lauxsae bae aeu bauqceij gaeuq. Vangz lauxsae naeuz:“Uet gingq hix miz gi’gyauj, sou uet raemx lai baenzhaenx, yawj daeuj dwg saw lo, gizsaed mbouj saw. Uet gingq yiengh hong neix aeu haeuj uk siengj cij ndaej, bauqceij gaeuq bang ndaej raeuz.”
Goz Yaujdenh caeuq Sinj Yazgvangh aeu bauqceij gaeuq daeuj, vunz ndeu youq baihndaw uet, vunz ndeu youq baihrog uet. Gig vaiq, riz raemx gwnz gingq couh uet saw dahraix, najriu gyoengqde ingj youq mbangq gingq ronghsag haenx.
（Sunh Davuj sij
Lij Yanghlenz hoiz）
编辑：实习生 石喜丹 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291
汉文版电子邮箱：gxmzbzb@163.com 壮文版电子邮箱：gxmzb2@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com