Gouq Duzbonghndaeng - 广西民族报网

Gouq Duzbonghndaeng

来源：广西民族报网

发布时间：2026-08-18

Gou ciengzciengz siengj daengz duzbonghndaeng rieng goenq iqet haenx. Moix baez siengj daengz gienh saeh swhgeij haenqheiq bae baujhoh de haenx, ndaw sim gou couh raeujrubrub、diemzsisi.

Haenx dwg mwh gou doeg ngeih nienzgaep, miz baez ndeu roengzdangz yietbaeg, gij ndit raeujrub daj conghcueng ciuq haeuj gyausiz, gou cingq naengh youq baiz daih’it caeuq boux caemhnaengh gangjgoj. Fwt yiengj“ba” sing ndeu, lumjdwg lajroq miz bonj saw nanwd ndeu doek gwnz namh nei. Gou doeksaet yat, buet ok gyausiz bae yawj.

Ya! Daeg doengzhag hungsang ceiq manz ban dou cingq gaem gaiq sauqbaet raezrangh ndeu, da mbotngaungau cim gungxciengz. Ndaw gungxciengz, miz duz bonghndaeng ndeu suk ndang youq haenx! Gij naengnoh baihlaeng de saek henjnamh youh miz di raiz ndaem, rieng raez de gaenq goenq hoh dinj ndeu lo, loq ndiengq hwnjdaeuj. Song aen da lumj song naed cawbohliz de, mbouj doengh saekdi cimyawj daeg doengzhag haenx, ndang hix suk baenz ndaek.

Gou baez daih’it raen duzbongh- ndaeng caen! Gaxgonq cij youq gwnz saw gohyoz cazci raen gvaq mbawsiengq de, rox de gwn duznyungz、duzsap、nengznyaen, dwg doenghduz doiq raeuz mizik.

“Vaiq daeuj yawj ha, neix miz duzbonghndaeng! Moeb de dai! Moeb de dai!” Daeg haenx yaengx sauqbaet hemqcaca, cibgeij boux doengzhag yaepyet humx gvaqdaeuj, caenx baenz dong, cauzcaca gangjlwnh dwk.

Yawjraen duzbonghndaeng yienghneix gienjsuk aenndang, sim gou gaenj hwnjdaeuj: De baenzneix iq, sauqbaet yienghneix moeb roengzbae, yaek dai mingh ho! “Mbouj ndaej, mbouj hawj duzbonghndaeng dai bae!” Gou sim siengj. Mbouj yaemh- ywx saekdi, gou yaepyet cung daengz naj duzbonghndaeng, mbehai song gen, lumj duz roegmeh aj fwed nei, yiemzyiemz saedsaed hoh duzbongh- ndaeng youq laeng ndang gou.

“Mwngz guh maz?” Daeg doengzhag haenx nyaeuq najbyak, yungh rengz nyoengx gou mbat ndeu, siengj nyoengx gou deuz, “duzbonghndaeng rubmyaiz yaek dai, mwngz gaej guenj baenzlai!”

Daeg hungsang haenx rengz haenq yaek dai, ca di nyoengx gou laemx lo. Hoeng yawjraen duzbongh- ndaeng iq laeng ndang, gou mbouj bang de, de aiq deng daimingh bae! Yienghneix gou singhung hemq naeuz: “De hix miz sengmingh! Hix rox in!”

Daeg hungsang haenx doeksaek yat, daihgaiq siengj mbouj daengz gou rox caeuq de doiqdingj, mbwnjmbwnj bak, mbouj cingznyienh dwk “baenglaeng” ndek sauqbaet roengz dieg, ngeux gyaeuj couh deuz lo. Gyoengq doengzhag humxyawj haenx hix fwt sanq deuz lo.

Gou soeng gaemz heiq ndeu, maeuq roengzdaeuj, yaengyaeng gop de hwnjdaeuj. Ndang de unqnemnem, dungx de dep fwngz gou, dwggyaez dangqmaz. De mbouj ndengjcengq saekdi, hix mbouj sikhaek benz deuz, cij yawj gou, nyauj iq de yaengyaeng nyaq fwngz gou, humzyedyed. De haengjdingh dwg deng hwk yaek dai lo? Gou ganjgaenj cuengq de daengz ciengz engq sang bae, muengh de vaiqdi benz hwnj gwnz ranz bae, haenx ancienz youh ancingh, mbouj miz vunz bungq ndaej daengz de.

Lingz hwnjdangz yiengj lo, gou ma daengz vihnaengh. Gou lijdwg gig yousim, hoeng baez siengj daengz hwnjdangz le couh mbouj miz vunz geiq duzde lo, couh roxnyinh simsoeng haujlai. Gou gouz: Duzbonghndaeng vaiqdi benz deuz ba!

Roengzdangz le, gou cung ok gyausiz, daengz henz ciengz bae yawj duzbonghndaeng iq. Gwnz mienh- ciengz hausak maz cungj mbouj miz, duzbonghndaeng iq caen deuz lo!

Gou youq gungxciengz lajroq、gehdou gyausiz ra bae ra dauq, lijdwg mbouj yawjraen de. Gou miz di doeknaiq, gig siengj caiq lai yawj de geij da, gaen de gangj sing “dauq- raen” ndeu. Baez dauq siengj, de wnggai dwg benz daengz baihrog bae lo, gizhaenx cijdwg ranz de.

Ngoenz de cuengqhag dauq ranz le, gou lwnh gienh saeh neix hawj daxmeh, daxmeh sim’angq dwk doiq gou gangj: “Ndei ha! Mwngz guh ndaej deng!”

Gou rox, daxmeh dingq daengz itdingh sim’angq, aenvih de gyaez doenghduz. Gyanghongh ranz dou itcig dwg ranz duzmeuz louzlangh, haeuxliengz duzmeuz cungj dwg cawx baenz daeh baenz daeh, mbouj dingz mbouj duenh gueng meuz. Binaengz cungj miz meuzlwg youq neix doekseng、majhung, gizde couh lumj aen youwzyenz gyoengq duzmeuz louzlangh nei. Aiq dwg souh daengz daxmeh yingjyangj, gou daj iq hix haengj doenghduz iq, daegbied mbouj nyienh yawjraen miz vunz hangz gyoengqde!

Daxboh rox gienh saeh neix le, hix daegbied sim’angq, gangj: “Mwngz ndaej mbeilaux ndwn okdaeuj, henhoh diuzmingh duzbonghndaeng, gou vih mwngz miznaj!” De lij ciengzciengz caeuq vunz henzndang de gangj gienh saeh neix. Daxboh lwnh gou: Goeksim cingqdeng, gij saeh swhgeij roxnyinh wnggai guh couh mbeilaux bae guh!

Baez ginglig neix hawj gou gamjdaengz: Mbeilaux dwg faenh rengzhung youz simsienh、gyaez caeuq cingqngeih gyoebbaenz ndeu, de ndaej hawj bouxvunz bienq ndaej giengzak.

(bouxraiz : Fan Cuhhih

bouxhoiz: Nungz Cinfung)

编辑：实习生廖小凤复审：黄慧华终审：蒙树起