来源：广西民族报网
发布时间：2026-08-18
Ngoenz singhgiz ndeu, gou caeuq daxbuz bae ranzcoj youq. Haemh haenx, dou dingh ndei ngoenzlaeng haetromh 5 diemj hwnqdaeuj bae sou maklaeq. Ranz ngamq yaek rongh, dou couh daeuj daengz suen maklaeq. Dou sien gip gij maklaeq ngoenzlwenz caengz gip liux haenx, daxbuz gaeuzhwet youq baihnaj gip, gou gaen youq baihlaeng. Daxbuz nanz mbouj nanz lij ae geij bak, dingq daengz gij sing ae haenx gou sim gig in. Daxbuz gip yaep he, couh naengh daengz gwnz rin laj gofaex yietbaeg, gou byaij gvaqbae bang de dimh baihlaeng. Daxbuz ndwn hwnjdaeuj ietiet song gen, yawj coh gou riunyi’nyi, lumj- naeuz gaenq mbouj baeg lo.
Gip ndaej ca mbouj geijlai lo, daxbuz fwngz gaem diuz faexcuk hung ndeu, haiheij fad go faexlaeq, bap bap bap, maklaeq daj gwnz go loenq roengzdaeuj, lajgoek faexlaeq loenq rim maklaeq. Daxbuz fad yaep he, daengxndang dumz hanh. Gou sikhaek dawz gaenceij daeuj, hawj daxbuz uet hanh, de riu naeuz: “Lan ha, daxbuz mbouj baeg.”
Daxbuz gaenq dawz maklaeq fad roengzdaeuj liux lo, gou riuj aen doengj he, youh hainduj gip maklaeq. Faj fwngz gou nanz mbouj nanz cungj rox deng gij oen gwnz “giuz bwn maklaeq” coeg baez he, daxbuz dinfwngz gig riengjvaiq, gou haeujsim yawj de, hag gij yiengh de laebdaeb gip, yaep he couh gip ndaej doengj iq he. Gou siujsim riri dwk hai bakdaeh, daxbuz riuj doengj hwnjdaeuj dawz maklaeq cala baezdog ndingq roengz ndaw daeh bae. Daxbuz bek mbaq gou naeuz: “Yangzyangz, mwngz yietnaiq yaep he ba, lij lw geijlai gou gag gip cix ndaej.” Gangj sat, daxbuz riuj aen doengj iq bae gaeuzhwet gip maklaeq lo, gwnz ndang de lumjnaeuz miz gij rengz yungh mbouj rox liux haenx.
Buenx daxbuz sou maklaeq, yienznaeuz sinhoj, hoeng angq lai angq daih！
(Sung Youhyangz raiz
Luz Yau hoiz)
编辑：实习生 石喜丹 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291
汉文版电子邮箱：gxmzbzb@163.com 壮文版电子邮箱：gxmzb2@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com