Gienh Saeh Geiq Ndaej Ceiq Laeg Ndeu

来源：广西民族报网

发布时间：2026-08-18

Ga dahraez ndwenngoenz cungswiq bae haujlai saehgaeuq, dingzlai gou cungj lumzbae lo, hoeng miz gienh saeh ndeu, daengz seizneix gou lij roxnyinh moqsaksak——Haenx dwg mwh gou doeg ngeih nienzgaep gienh saeh ndeu.

Aen haggeiz moq haihag ngoenzhaenx, daxboh doiq gou naeuz:“Lili, geizmued gaujsi, mwngz gaem mbaw ciengjcang ndeu ma hawj gou, gou ciengj aen saiceh he hawj mwngz.”“Dwg caen lwi？” Gou youh doeksaet youh angq cam naeuz.“Dwg caen!” “Ndei lai lo!” Gou angq dwk saet hwnjdaeuj, iet nyienghlwg daeuj caeuq daxboh doxngaeu. Gaxgonq miz geij baez, gou gouz daxboh hawj gou cawx aen saiceh he, hoeng de cungj mbouj cawx, seizneix daxboh gingqyienz gag gangj cawx aen saiceh hawj gou, gaej naeuz gou ndaw sim geijlai angq lo.

Vih buek aeu saiceh, gou hagsib engq yunghsim haenqrengz lo. Hoeng saehcingz cix mbouj dwg gou naemj yienghhaenx, youq geizmued gwnz hoih fatciengj, gou youh doekbuengj lo. Cuengqhag le, gou naiqnueknuek ma daengz ranz. Baenzlawz guh ne? Gou naemj dwk aen gyaeuj yaek dek bae. Sawqmwh, gou myaeg raen mbaw ciengjcang laj gingq gwnz daiz, lwgda fwt ronghsag hwnjdaeuj, vihmaz mbouj dawz aen mingzcoh dahcej gwnz mbaw ciengjcang mad bae, sij aen mingzcoh cihgeij hwnjbae ne? Gangj guh couh guh, gou yaengyaeng gven ndei fadou, yungh gonj bit mozsuz dawz aen mingzcoh dahcej mad bae, caiq nyinhnyinh caencaen sij hwnj aen mingzcoh gou, yienzhaeuh sijsaeq yawj bae yawj dauq, roxnyinh mbouj miz maz loengcak lo, cij cuengqsim.

Daxboh roengzban dauq ranz, baez raen gou coenz daih’it couh cam naeuz:“Baezneix ndaej ciengj lwi?”Gou dawz mbaw ciengjcang bungj daengz dangqnaj daxboh, lij daegdaengq dawz aen aek enj ndaej sangsiusiu bae, caj daxboh daeuj haenh.

Daxboh naj riunyumnyum, de gipmuengz ciep gvaq mbaw ciengjcang, gig rimhoz yawj dwk. Sawqmwh, daxboh najbyak baez nyaeuq, aen sim gou sikhaek diuqbubbub mbouj dingz. Gvaq yaep ndeu, gij najbyak daxboh cienz mbehai lo, yienh ok gij yiengh gig angq, naeuz:“Lwg ha, mwngz mbouj yungzheih bw! Ngamq doeg ngeih nienzgaep, couh ndaej mbaw ciengjcang haj nienzgaep!”Gou baez dingq, roxnyinh gij vah daxboh ndaw vah miz vah, ndiengq din iet diuz hoz bae raezrangrang, yawj mbaw ciengjcang da he. Cuet lo, laxlawz mbaw ciengjcang baihlaj gaep miz“Dabuj Siujyoz Haj Nienzgaep”aen yaenq hung he. Gou naemj: Cihgeij guh saeh baenzlawz yienghneix rubrab, sawj saehcingz cienz laeuh liux lo. Seizneix, daxboh gaenq hozndat dwk byoemgyaeuj daengjdwddwd, ndaq gou can haenq he.

Gienh saeh neix yienznaeuz gaenq gvaqbae haujlai bi lo, hoeng gou lij geiq ndaej seuqsaksak bae. Gienh saeh neix sawj gou rox, youq gwnz diuz loh seiqvunz, aeu cug yamq cug aen rizdin byaij baenaj.

(Cangh Li raiz/Danz Hijvah hoiz)

编辑：实习生廖小凤复审：黄慧华终审：蒙树起