Vameizgveiq Hai Hoengh Lo - 广西民族报网

Vameizgveiq Hai Hoengh Lo

来源：广西民族报网

作者：□ Sangswh Yen Daihsam Siujyoz roek (2) ban Liz Myaugingz

发布时间：2026-08-18

Mehmbwn lamzyubyub, gwnz faex ndaw hagdangz miz geij duz roeg youq de ciengqgo. Roengzdangz lo, gyoengq doengzhag youq ndaw hagdangz guhcaemz、dwkgiuz……Nauhyied dangqmaz. Raq rumz ndeu ci gvaqdaeuj, daiq raq hom vameizgveiq ndeu, sawj vunz simsangj dangqmaz.

Youq henz suen vameizgveiq, Cangh Mingz gag maeuq youq haenx nam: “Gij va neix youh gyaeu youh hom, gou aeu mbaet geij duj dauqbae cijndaej!” Gangj le mbaet va yaek yo laj buh bae.

Banhcangj Vangz Bingh dingjlingz byaij gvaqdaeuj, yawjraen de mbaet va. Banhcangj hemq naeuz: “Cangh Mingz! Mwngz guh gijmaz ne?” Cangh Mingz doeksaet yat, muengz dawz gij va ndaw fwngz yo gvaq baihlaeng bae, cang lumj mbouj miz saeh nei, hoeng ndaw sim hix gag siengj: Dai lo, gingqyienz deng banhcangj “dwgcaengz” raen lo……

Vangz Bingh raen de cang ngoemx mbouj han, sikhaek song fwngz cap hwet, youh sing hung naeuz:“Mwngz dauqdaej guh gijmaz la? Vaiq gangj! ” Cangh Mingz mbajmbwdmbwd han:“Mbouj…… Mbouj guh gijmaz ni. Gou raen gij va neix ndeiyawj…… Couh lumh mbat ndeu.”

Vangz Bingh mbouj saenq, faek cam: “W? Mwngz couh dwg caeg mbaet va! Gou cungj yawjraen lo, mwngz lij mbouj nyinh!” Gangj liux, couh rag fwngz Cangh Mingz coh bangunghsiz Lij lauxsae byaij bae……

Seizneix, banhcujyin Lij Ginh ngamq byaij gvaq, yawjraen song lwgnyez doxrag, couh gaenjgip byaij gvaqbae, yungh song fwngz hung raeujrubrub de bekbek aen mbaq gyoengqde, cam naeuz:“Cangh Mingz, baenzlawz yiengh? Vih gijmaz saeh?” Cangh Mingz ngaem gyaeuj mbouj guhsing. Vangz Bingh cingq yaek aj bak gangj vah, cix deng Lij lauxsae heuh dingz roengzdaeuj. Aenvih Lij lauxsae gaenq yawjraen gij va ndaw fwngz Cangh Mingz lo. De maeuq roengzdaeuj, sing mbaeu dwk doiq Cangh Mingz naeuz:“Gaej gaenjcieng, gangj okdaeuj, hawj gou dingqdingq dauqdaej dwg saeh maz. ”

Cangh Mingz cij menhmenh dawz saeh haenx daj goek daengz byai lwnh okdaeuj.

Lij lauxsae dingq le, najbyak mbouj nyaeuq lo, riunyumj dwk naeuz:“W, mwngz aeu rox, boux vunz famh loek le mbouj lau, ceiq youqgaenj dwg aeu rox loek couh gaij! Gij va gyaeundei ndaw hagdangz, dwg hawj daihgya caez yawj. Danghnaeuz bouxboux cungj vih gag ciemq couh mbaet va bae ranz, aen hagdangz raeuz yaek bienq baenz yiengh lawz ni?”

Cangh Mingz najmong dwk ngaekngaek gyaeuj, naeuz:“Lauxsae, gou rox loek lo, baezlaeng mbouj yienghneix guh lo. Docih lauxsae! Hix docih mwngz, banhcangj!”

Geij ngoenz gvaqbae, gij vameizgveiq hix lumj gaenq yienzliengh Cangh Mingz lo, youh hai hoenghhwdhwd、homfwdfwd……Youq henz gij va haenx, ngoenznaengz cungj rox raen song daeg hagseng caenhsim henhoh gova……

(lauxsae son raiz: Luz Saicinh)

编辑：实习生廖小凤复审：黄慧华终审：蒙树起