Suenbyaek Iq - 广西民族报网

Suenbyaek Iq

来源：广西民族报网

作者：□ Sangswh Yen Swhyangz Cin Daihngeih Siujyoz roek (1) ban Vangz Caizyi

发布时间：2026-08-18

Giz liz ranz gou mbouj gyae haenx, miz aen suenbyaek iq ndeu, ndaw suen mbouj hung mbouj iq haenx, yo miz haujlai doxgaiq mizyinx.

Dwg gijmaz ne? Youh yo youq gizlawz? Hai aen dousuen daxbuz yungh mbaw ndoek heu gap baenz haenx, da daih’it couh yawjraen caet bet baiz byaekhau lumj baizbaiz bouxbing nei daenj buh bing saekloeg hen aen suenbyaek iq neix. Henz de miz luengx byaekhing, lumj dujduj va hung saekloeg cangdiemj youq gwnz namh. Gij miuz duhlanhdou youq ndaw suen song mbiengj cingq bin hwnj faexsaux iq, loq raen miz di va aeuj iq, lumj lahbah iq nei seiz mbouj seiz daj ndaw caz mbawloeg ndonj okdaeuj! Mwngz yawj, geij duz mbaj gyaeundei haenx cingq humx youq henz gij va haenx diuqfoux ne——Danghnaeuz gou hix dwg duz mbaj gyaeundei ndeu, geijlai ndei ha, gou hix bae umj gij va gyaeundei neix, youq gwnz limq va mbaeu- mbengmbeng douh youq gwnz va, geijlai hab’eiq ha.

Youq gyang reihbyaek, lij ndaem miz majlingzsuz ne. Hoeng, gij lwg majlingzsuz ndeigyaez haenx cungj yo hwnjdaeuj lo. “Gyoengqde youq gizlawz ne? Vaiq di siengj banhfap ra gyoengqde okdaeuj ba!” Daxbuz riunyumnyum doiq gou naeuz. Daxbuz gangj gvaq, gizlawz namhsa miz riz dek, laj de haengjdingh miz aen majlingzsuz hung. Gou aeu faggvak menhmenh vat roengzbae, gij majlingzsuz luenzlulu haenx, couh baenz bang baenz bang daj ndaw namh unq haenx loh okdaeuj lo, lij miz mbangj ndeu lij launyaenq dwk ndoj youq laj namh dem, ndeigyaez raixcaix.

Mwh gou gungj hwet gip majlingzsuz, raen henz gyawj miz geij roix makyungz hoengzgywggywg. Gou mbaet aen ndeu gwn, soemj van hab bak. Gij makyungz neix, daxbuz gou haengj aeu daeuj cawj baenz gij raemx makyungz, gyaux haeux hawj gou gwn, caen feih raixcaix!

Aiya! Haiz gou nem miz ndaek namh mbaeqmbat ndeu, gou sikhaek byaij ok suenbyaek, bae daengz henz rij swiq haiz. Laj rij couh dwg aen vaengz hung ndeu, raemx sawdikdik. Gou naengh youq gwnz rin henz rij guhcaemz. Sawqmwh miz duz roeg ndeu daj gwnz raemx mbin gvaq, gwnz raemx fubfeb mbouj dingz, lumj gij ngaeuz ngaenz soiq nei lwenq da dwk. Gizgyae, bang bit iq ndeu angqyangz dwk youz gvaqdaeuj coh gou, duz riengz duz, couh lumj dou baizdoih guh caujcauh nei.

Gou ngiengx gyaeuj yawjyawj gwnzmbwn, bang roegcaeuq ndeu daj gwnz gyaeuj gou mbin gvaq, mbin coh baih ndoengfaex doiqnaj bae. Seizgan gvaq ndaej caen vaiq, baez yaepda, couh daengz banhaemh lo. Aen suenbyaek iq youq laj daengngoenz menhmenh bienq baenz saekgim lo.

Gou gig maij aen suenbyaek iq gou neix. Aenvih de daiq haujlai dauqngeix gyaeundei hawj gou.

(lauxsae son raiz：Luz Vanjcinh)

编辑：实习生廖小凤复审：黄慧华终审：蒙树起