Daxboh Gou - 广西民族报网

Daxboh Gou

来源：广西民族报网

作者：□ Sangswh Yen Swhyangz Cin Daihngeih Siujyoz roek (1) ban Yangz Swhyauz

发布时间：2026-08-18

Cungj naeuz “gij gyaez daxboh lumj bya hung, gij cingz daxmeh lumj raemxsaw”, gyoengq bohmeh gwnzbiengz dingzlai cungj gyaez lwgnyez bonjfaenh, bohmeh gou hix yienghneix. Boh gou yienznaeuz gangjvah mbouj lai, hoeng cix gig gyaez dou.

Daxboh gou ngoenznaengz bae rog daj lingzgoeng, de dwg diuz saeudongh ndaw ranz, daxmeh dwg boux mehmbwk youq ranz guhnaz. Ndaw ranz cienzngaenz sawjyungh dingzlai dwg daxboh bae ra. Daxboh guh hong sinhoj dwgrengz, bi ndeu cij ra ndaej sam fanh maenz baedauq, caeuq bouxwnq ndwen lingx 5 cien maenz cienzhong haenx beij mbouj ndaej. Gyoengqde guh haj roek ndwen couh dingj boh gou guh bi ndeu lo. Ai, daxboh ciengz ienqhoij seizcoz doegsaw noix, dinfwngz mbouj gaeuq, seizneix ra ndaej cienz mbouj lai……Hoeng, guh boux daxboh ndeu, de cix gig in geij beixnuengx dou, daj iq daengz seizneix, de cungj doq ra cienz ciengx ranz, doq buenx dou menhmenh majhung, mbouj hawj dou guh lwgnyez dawz ranz.

Boh ndang mbouj sang, lij miz di nyieg. De ciengzseiz gig haemh cij ma ranz. Moix ngoenz seiz souhong dauqma, cungj raen de gwed aen dienhhanh naekcaem haenx ma, yiengh de naetnaiq raixcaix. Gij buh guh hong haenx deng raemxhanh cimq dumz liux, gwnz buh cungj dwg faenx, song fwngz de ciengzseiz miz haujlai sieng iq. Hoeng, de baez raen dou geij beixnuengx humx gvaqbae, gwnz naj couh fwt riunyumnyum. Daxboh mbouj rox baenzlawz gangj vah ndeidingq, hoeng, yienghneix gou rox de gig ndei, gij gyaez mbouj gangj ok bak neix, sawj dou gig cwxcaih.

Moix haemh gwn caeuz seiz, de haengj ndoet di laeuj, doq gwn doq yawj soujgih, gwn imq le de youh ing youq gwnz sahfaz yietnaiq, saekseiz hix ndoet geij gaemz ien. Lauheiq neix couh dwg gij fuengsik yietnaiq de loba!

Yawj daxboh vih ndaw ranz baenz sinhoj, gou roxnyinh gig sim’in. Gou mboujdan roengz- rengz doegsaw, youq ranz hix lai bang bohmeh guh hongranz, maqmuengh ngoenzlaeng majhung okcot le, couh ndaej ndeindei bauqdap bohmeh lo.

Daxboh gou yienznaeuz gig bingzciengz, hoeng, de gwnhoj naihhaemz, haenqrengz cauh ndwenngoenz ndei. Gou gig gyaez daxboh gou.(lauxsae son raiz:

Luz Cincangh)

编辑：实习生廖小凤复审：黄慧华终审：蒙树起