Dingjlingz Bungz Rumz Fwn - 广西民族报网

Dingjlingz Bungz Rumz Fwn

来源：广西民族报网

作者：□ Sangswh Yen Saedniemh Cunghyoz 25(4) ban Luz Swhyih

发布时间：2026-08-18

Ngoenzhaenx banringz cuengq- hag, yaek daengz seizgan bae suzse ninzringz, gou dajlaih daj denva hawj daxmeh daeuj ciep gou dauq ranz. Daxmeh sim unq, dapwngq gou lo. Gou rox daxmeh soqlaiz ndiep gou, sim’angq dangqmaz. Youq gwnz loh ma ranz, ndaw sim gou angqfwngfwng naemj dwk: “Ngoenzneix gou youh ndaej youq gwnz mbonq moq gou ninz ndei lo!”

Ma daengz ranz, gou couh riengjvaiq byaij haeuj aen “dieg iq” bonjfaenh bae, hoeng baenzlawz cungj ninz mbouj ndaek. Yawjraen mauzbit, gou couh swnh fwngz dawz bit sij saw. Ha, mbouj loek, gou caen sij ok geij cih saw ndei daeuj lo, ndaw sim engqgya vuenheij lo.

Sawqmwh, fwj ndaemndwtndwt, rumz bongjhuhu, lij buenx miz fwn naed dem, mbawfaex yiengjcaca. Seizneix, caen dwg fwn riengz rumz daeuj. Daxmeh naeuz:“Mbwn bienq lo, aiq dwg rumzhwx yaek daengz.” Gangj sat, vaiqvit sou buh gven cueng.

Yaep ndeu, fwnraq riengz rumz roengzsasa. Raemxfwn hix daj congh- cueng set dumz gij cih saw gwnz daiz gou, raemxmaeg iemq daengz seiqlengq lo. Gou gaenjgip gven ndei conghcueng, daj conghcueng muengh gyae, gij ranzlaeuz haenx lumj youq ndaw fukveh raemxmaeg mumjgyumq, bya gyae cugciemh siu youq ndaw fwn hung.

Daxmeh nyoengx dou haeuj fuengz gou daeuj, gaenjgip doiq gou naeuz:“Mwngz ra ndei buhfwn, sikhaek bae hagdangz lobw.” O, gou ca di lumz lij aeu bae hwnjhag lo.

Roengz laeuz le, yaek hwnj ci seiz, gij rumz nyieg di lo, fwn lij baenz raq baenz raq biu gvaqdaeuj. Gou hamj hwnj aen denceh daxmeh bae le, couh vaiqvet ndonj haeuj laj buhfwn daxmeh bae, sou ndei song ga. Aenvih gaenj byaij roengz laeuz, seizneix daengx ndang lij ndatfwdfwd. Mwh denceh hai daengz dou hung siujgih, fwn rumz couh simgaenj hwnjdaeuj, raqraq raemxfwn doek bugbaeg bugbaeg…… Dub roengz gwnz gyaeuj、gwnz hwet dou daeuj, in dangqmaz.

Youq laj buhfwn, gou cij ndaej yawjraen gij fwn、gij raemx gwnz loh laelulu. Raemxfwn doek roengz gwnzdieg youh sikhaek sinz bae seiqlengq. Gou youq baihlaeng daxmeh, roxnyinh de cingq roengz- rengz dawz maenh gyaeujci hai baenaj. Yaep ndeu, gij dinvaq caeuq haiz gou couh deng fwn rwed dumz di lo.

“Bae hagdangz cij miz goengleix baedauq, wnggai daengz hagdangz hix mbouj dumz liux law.” Mwh gou cingq laeglemx baenz naemj, ci dou ngamq van gvaq bak loh, cingq dwg giz bakrumz, gij rumz vala song sing, lumj lwgmanz nei dawz buhfwn baihlaeng gou biengjhai bae, gij fwn dawz haiz、vaq daiq buh gwnz ndang gou cungj rwed dumz liux! “Caen boihseiz! Gou sim’angq caeux lai lo!”

“Gaej you, dou yaek daengz hagdangz lo.” Aiq dwg daxmeh roxnyinh gou simnyap, couh youq baihnaj nai gou. Mwh gou ngamq siengj cuengqsim, raq rumz fwn ndeu youh dawz denceh daiq vunz ci nyeng bae. Gou caeuq daxmeh ca di laemx dem.

Ci hai daengz bakdou hagdangz seiz, gou gipmuengz roengz ci, ganjvaiq cung bae gyausiz. Mwh gou lumj duzgaeq doek raemx ndonj haeuj gyausiz bae, gij lwgda gyoengq doengzhag sawj gou gig mbouj cwxcaih—— Ai! Caeux rox mbwn yaek doekfwn hung, gou caen mbouj cingjgyaj bae ranz lo……

Caeklaiq daxboh gou naeuz haemhneix guh gungqlungziq hawj gou gwn…… Gou youq ndaw sim nai swhgeij naeuz:“Lauheiq, seiqvunz couh dwg yienghneix, cungj aeu bungzdaengz saek raq rumz fwn ba, hoeng hix mbouj noix miz gij saedceij vuenyungz haenx.”

(lauxsae son raiz:

Vangz Binhyangz)

编辑：实习生廖小凤复审：黄慧华终审：蒙树起