Sing Dig Ranzmbanj - 广西民族报网

Sing Dig Ranzmbanj

来源：广西民族报网

作者：□ Sangswh Yen Swhyangz Cin Daihsam Siujyoz roek (6) ban Lij Cijyenh

发布时间：2026-08-18

Ranzmbanj gou, dwg Fangzcwngzgangj Si Sangswh Yen Swhyangz Cin. Gizhaenx mbouj lumj ndawsingz nei miz ci bae dauq mbouj dingz, cijmiz Sizvandasanh gyaeundei dwddwd, caeuq gij sing dig ndaw ndoengcuk haenx.

Daxgoeng dwg canghsanduk ndaw mbanj, hix dwg boux ci dig maenh’ak ndeu dem. Seiz lij iq, gou cungj maij riengz de ndonj haeuj ndoengndoek laeng ranz bae. Fwn raq gvaq le, gij faexndoek heuswdswd, daiq miz heiqraemx. Daxgoeng dawz fag caxfwnz, ra go’ndoek oiq ceiq daengj haenx, raemj roengzdaeuj laet gij nga bae, caiq aeu feizdanq menhmenh coemh le euj goz、muz ndei, mbouj geij nanz, aen dig ndeu couh guh baenz yiengh lo. De dawz aen dig doq haeuj henz bak, gij sing ndeidingq cix ndonj okdaeuj lo. Mizseiz lumj raemxrij sawdikdik laelulu, mizseiz lumj gij roeg ndaw ndoeng nei angqciengq.

Vunz Mbanjnaginz haenx, saedceij gvaq ndaej lumj sing dig ityiengh damh. Haetromh, gij mok mbang caengz sanq liux, gwnz haenznaz couh miz bouxguhnaz gwed faggvak bae naz; banhaemh, gij hoenzngeungeu swng hwnj mbwn, gij hom byaek gak ranz gak hoh gyaux gij mbaw faexndoek mbin rim ndaw mbanj.

Moix bi sam nyied sam, ndaw mbanj cungj guh hawfwen. Daxgoeng dawz aendig naengh youq laj gorungz laux bakmbanj caeuq gyoengq beixnuengx guh fwen, gij sing dig buenx gij sing fwen, rwenz youq ndaw lueg nanznanz mbouj sanq, lienz gij rumz gvaq loh haenx, cungj lumj cuengq yamqdin menh lo.

Gou hwnjhag le, daxgoeng guh aen dig iqet ndeu hawj gou. De son gou nyinh yaemmbaek, nyinhcaen son gou dawz ndei congh dig. Haidaeuz gou boq mbouj baenz diuh, de hix mbouj simnyap, cij riu naeuz:“Gaej gaenj, aendig yaek caeuq bya hung gyau sim, cij boq ndaej ok gij sing dig ndeidingq.”

Doeklaeng, gou rox dingzdingz duenhduenh ci ok gij diuh daxgoeng son haenx. Moix baez sing dig yiengj hwnj, gij bit gaeq gok hongh couh dingz roengzdaeuj, lienz gij raemxrij naj dou, hix lumj lae ndaej engq unqswnh lo.

Seizneix gou biek ranzmbanj daengz yienhsingz doegsaw, ndaw daeh cungj cang aen dig daxgoeng guh hawj gou haenx. Moix baez siengj ranzmbanj, gou couh boq hot diuh sug haenx. Sing dig ndawde, miz gij hom ndoeng faexndoek, miz sing fwen ndeidingq, lij miz gij gvaqniemh ranzmbanj.

(lauxsae son raiz: Vuz Gveiyenz)

编辑：实习生廖小凤复审：黄慧华终审：蒙树起