Gamjdoengh - 广西民族报网

Gamjdoengh

来源：广西民族报网

发布时间：2026-07-31

Gyoengq doengzhag doxgiet doxgyaez, dwg gij fungheiq ndei aen ban dou, neix gou ceiq rox.

Haenx dwg gij saeh bi’gvaq lo. Daengz seizneix gou lij geiqndaej cingcuj. Cuengqhag le, gou caeuq geij boux doengzhag guhdoih ma ranz. Dou youq gwnz roen miz gangj miz riu, bi gen dik ga.

Youq mwh dou gangj ndaej cingq angq, sawqmwh, gou roxnyinh baihlaeng deng gijmaz doxgaiq fwt daemj baez ndeu, dingqdaengz “gaca vala” sing ndeu, uk gou lij caengz hoiz gvaqdaeuj, gou couh deng laemx daengz gwnz namh bae, daegcoz gwih ci ndeu lienz vunz daiq ci at daengz gwnz ga gou, gou roxnyinh in yaek dai bae, boemz youq gwnz namh ndwn mbouj ndaej lo.

Daegcoz haenx ndwn hwnjdaeuj, fuz hwnj aen danci, ndaq naeuz: “Lwg fangzbyaiz, mwngz dafangz ha, byaij roen mbouj yawj ci! ” Gangj sat doi ci couh yaek deuz. Seizhaenx gou ga in dwk daej hwnjdaeuj, hix goq mbouj ndaej caeuq de gangj dauhleix lo. Seizneix Vangz Gaij cung gvaqbae, gaemdawz aen gyaq laengci naeuz: “Mwngz daemj vunz lijmiz dauhleix la! Youq gwnz roen vunzbyaij gwih ci daemj vunz dwg famh gyauhdungh gveihcwz o, lij naemj laih dem, hei dou lwgnyez ha!” Geij boux doengzhag mwngz coenz gou coenz caeuq daegcoz haenx gangj dauhleix.

Vangz Yingj gvaqdaeuj fuz gou, mboengj gij namh gwnz ndang gou, vix bouxvunz haenx naeuz: “Mwngz ganjvaiq daiq de bae yihyen hawj canghyw yawjyawj!” Lij Naz gvaqdaeuj dawz mbaw soujgaen okdaeuj hawj gou uet raemxda. Mbouj rox seizlawz, Sung Yaujmeiz daiq gingjcaz daeuj lo: “Daxau, vunz couh dwg de daemj.” Laxlawz cingq youq mwh daihgya caeuq bouxvunz haenx gangj dauhleix, de buet daengz bakroen cibcih bae heuh gingjcaz daxau. Bouxvunz haenx raen yienghneix cijndei nyinhloek, daiq gou bae yihyen.

Gou naengh youq gwnz danci, gyoengq doengzhag youq baihswix baihgvaz fuz gou, nai gou naeuz: “Mwngz in haenq lai lwi? Caiq nyaenx yaep he, daengz yihyen couh ndei lo. ” Vangz Yingj bang gou aemq daehsaw. Youq ndaw yihyen, gyoengqde geij boux faenhong, miz boux buenx gou, miz boux buet bae naeuz daxboh daxmeh gou.

Boux ndanghung Vangz Yingj caeuq Sang Minz gaen laeng bouxvunz haenx bae gvaqhauh、gyau ngaenz、aeu yw, yamq din he cungj mbouj liz. Ginggvaq canghyw duenqdingh, gij noh gwnz ga gou deng bungqsieng, aeu yietnaiq song ngoenz. Geij boux doengzhag itcig soengq gou daengz ranz.

Daegcoz haenx raen daengz gijneix mbouj ndaej mbouj naeuz: “Gyoengq lwgnyez neix gaeuq eiqsei, gaeuq baengzyoux!” Daengz ranz le, gyoengq doengzhag bouxboux cam gou: “Lij in lwi?” Vangz Yingj naeuz: “Boh gou dwg canghyw, ngoenzcog caiq hawj de daeuj yawjyawj mwngz!” Yawjcoh gyoengq doengzhag gij lwgda mizcingz haenx, dingq dwk gyoengq doengzhag gij vah coenzcoenz ndatndo’ndo haenx, gou cij roxnyinh miz raq raeujrubrub he nyoengx hwnj ndaw sim daeuj.

Gou youq ranz yietnaiq song ngoenz, gyoengq doengzhag boujgoq hawj gou, gij gunghgo gou di he mbouj doek. Gyoengq doengzhag gamjcingz caensaed, cingzngeih cinghseuq, gijneix itcig sawj gou gikdoengh raixcaix.

(Liengz Lubingz raiz

Yiz Ciz hoiz)

编辑：实习生王文萍复审：黄慧华终审：蒙树起