Singhemq Louz Ndawsim Haenx - 广西民族报网

Singhemq Louz Ndawsim Haenx

来源：广西民族报网

发布时间：2026-07-31

Gvaq banringz duzbid swenjngeungeu, ndaw rumz biu gij heiqremj lohbwzyouz deng ndit dak nyinh haenx. Gou cingq riz diuz sietdiuz duhheu daxbuz hawj haenx, fwt dingqnyi sing ngi’ngat ndeu, lumj faggeuz hwnj myaex ndeu cingq raed hai gij rumz oem. Gij sing sug neix hawj gou baez lingzgik, raemxsietdiuz ndik daengz gwnz fwngz hix goq mbouj ndaej uet.

“Dwg Cangh daxgoeng sou huqfeiq haenx daeuj lo!” Gou ndiengq din muenghyawj rogcueng.

Gyaq cisamloek myaexyatyat haenx menhnyednyed youz haeuj bakmbanj, loekci baez baenq gien ndeu couh ngi’ngat ngi’ngat gyangz dwk. Laeng buh saeklamz Cangh daxgoeng iemq ok benq rizhanh laeglumx ndeu, gyae’gyang couh nyouq daengz gij heiq daegbied myaexdiet cab heiqhanh gwnz ndang de. De fwngz ngauz gyongbuedlangh yiengjdungdung, gij dozanq byaleix saekhoengz gwnz gyong yaek muz seuq bae lo.

Sou huqfeiq lo! Singhemq Cangh daxgoeng lumj fag caxgoem nei, bag hai raemxlangh niugwd. De cungj youq laj gofaexyiz yietdin, yungh mbaw soujgaen fat henj de uet hanh, gwnz hoz nyaeuq de cungj dwg hanhnaed ronghrikrik. Seizneix dou geij lwgnyez couh humx hwnjbae, ndaw daeh de cungj oet dwk dangzmak, gij heiqrang diemzwen cab dwk heiqmyaexdiet gwnz ndang de, baenz gij heiq ceiq daegbied ndaw ndaejgeiq.

Ceiq saenzgeiz dwg singhemq neix lumj vahmieng nei. Vangz daxbuz doiqnaj ranz couh saenzdedded dwk got gij bauqceij gaeuq cug ndei de daeuj, heiq youzmaeg bauqceij cab dwk gij heiqhom siengfaexcueng ranz de. Lij daeg’au ranznden buen ok bingzbizciuj seiz, bakbingz lij louz miz gij heiqsoemj oemq ngazmienh dem. Daxbuz cungj oet diuz sietdiuz ndeu hawj gou: “Vaiq bae aeu gij siengceij yangzdaiz daeuj.” Gou got dwk siengceij buet bae seiz, gij heiqrang sietdiuz、heiqmwt siengceij, lijmiz heiqmyaexdiet gwnz ndang Cangh daxgoeng, cungj youq ndaw rumzndat gyaux itheij.

Seizneix dauq ranzmbanj, lohbwzyouz coih gvaq lo, faexyizgeq hix deng raemj lo. Hoeng baez dingqnyi sing loekci yiengj ngi’ngi ngatngat, gou lijdwg mbouj roxnyinh dwk muengh coh rogcueng. Moengzloengz youh yawjraen Cangh daxgoeng ngauz dwk gyongbuedlangh byaij daeuj, buh saeklamz de deng hanh cimq ndaej ronghlwenq, ndaw rumz mbin dwk gij heiq myaexdiet、bauqceij gaeuq caeuq heiq dangzmak. Gij heiqfeih neix lumj gyoengh yaekseiz ndeu, cungj ndaej dajhai seizhah duzbid heuhnya’nya ndaw ndaej- geiq gou.

(Yenj Yinh raiz

Nungz Cinfung hoiz)

编辑：实习生王文萍复审：黄慧华终审：蒙树起