Daxgoeng Gwn Laeuj Couh Cauxhux - 广西民族报网

Daxgoeng Gwn Laeuj Couh Cauxhux

来源：广西民族报网

发布时间：2026-07-08

Daxgoeng gou dwg bouxgeq gyaez gwn laeuj ndeu, moix ngoenz cawz le gyanghaet mbouj gwn laeuj, haeuxringz、haeuxcaeuz cungj gwn, noix fwx ndeu cungj mbouj ndaej. Ngoenz lawz mbouj miz laeuj gwn, daxgoeng couh roxnyinh gwn haeux mbouj roengz, ninz mbouj van. Geij naed duhnamh, huz laeujmeg ndeu, daxgoeng couh daekeiq haujlai nanz. Ngiengx gyaeuj, laep da, laeuj haeuj hoz, “ha” sing ndeu rimcaw habhoz. Seizneix, daxbuz rox youq henz gyawj “hw”, youh caengz de da ndeu——Daxgoeng gwn laeuj, couh mbouj lumj de lo. Mwngz yawj, de youh cauxhux lo.

Gwn caeuz sat, daxgoeng laeuj doh haeux imq, lumj bingzciengz bibuengq gen byaij bae aen siujgih wnq yawj vunz dwkgeiz. Hoeng gyanghaemh gouj diemj lo, lij mbouj raen ngaeuz de. Daxbuz gip lo, doq dwk denva cam de seizlawz daengz ranz, daxgoeng youq denva baihhaenx hamxhawz naeuz:“Yaek daengz lo, yaek daengz lo.”

Ndaep denva le gvaq baenz aen cungdaeuz lo, daxgoeng lij caengz daengz ranz. Daxbuz caiq dwk denva gvaqbae cam, daxgoeng vanzlij naeuz coenz gaeuq “yaek daengz lo, yaek daengz lo.” Daxbuz hozndat:“Nanz baenzneix, mwngz dauqdaej buet gizlawz bae la?” Daxgoeng youq denva baihhaenx bakmbaet geij miux, naeuz:“Gou lumj dwg byaij loeng roen lo……”

Gyanghwnz, daxboh hai danci daiq daxbuz youq gwnz haw seiqcawq ra. Vunz ndeu yawj gwnz roen, vunz ndeu coh ndaw gehhongh yawj, mbouj gamj yaep da. Hei! Laj lohdaeng, aen gyaeujndoq sugrox ndeu cingq rex danci ndwn youq gizhaenx, gyaeuj de rongh dangqmaz, lumj aen daengdap ndaw haij, daxbuz da ndeu couh yawjraen daxgoeng.

Daxbuz vazmuengz heuh coh daxgoeng, daxgoeng yawjraen daxbuz couh lumj yawjraen bouxsien daeuj gouq. Byaij gyawj yawj, gwnz din daxgoeng mbouj raen ga haizdaz ndeu, naengnoh ga gvaz lij sieng mbangq hung ndeu.

Daxbuz youh hozndat youh sim’in, capeiq naeuz:“Ma ranz couh vut laeuj mwngz liux! Baezlaeng caiq loeng roen, yawj bouxlawz lij ra mwngz!” Daxgoeng lumj boux lwgnyez guh saeh loeng ndeu, lienzmuengz ngauz gyaeuj naeuz:“Mbouj gwn lo, mbouj gwn lo, baezmoq goj mbouj gwn lo.”

(Ciengj Gyahgiz raiz

Lij Yanghlenz hoiz)

编辑：实习生陆彤复审：黄慧华终审：蒙树起