10 Maenz Ngaenz Naekna - 广西民族报网

10 Maenz Ngaenz Naekna

来源：广西民族报网

发布时间：2026-07-08

doz dwg AI guh

Haetromh, daxmeh heuh gou bae ndaw cangj bang guhhong. Hainduj gou mbouj cingznyienh, dwkdaengz de riu naeuz “bang gou guh di hong, hawj mwngz 10 maenz ngaenz gag cawx gaiq guhcaemz iq”, gou coh cakndang.

Ndaw cangj doi rim baengzliuh caeuq mbawdan. Gou naengh youq baihnaj aen congz bit dem bit haeddoiq soqmoeg, mbouj nanz couh simfanz simluenh, hixnaengz gaij yungh “sim suenq”. Bouxlawz rox geij baez suenq roengzdaeuj, gezgoj gingqyienz gak mbouj doxdoengz. Gou gaenj ndaej naj ndat, sozsim mbouj loengh lo. Gij soq neix nanz haeddoiq lai, lij dwg guh di saeh wnq ba.

Riengzlaeng, daxmeh got bit baengz ngeihcib lai gaen ndeu gvaqdaeuj, yaengyaeng dap youq gwnz mbaq gou, naeuz:“Soengq haeuj ndaw cang bae.” Fwngz daxmeh baez soeng, baengz at ndaej ndang gou caem bae, ajngab cungj nanz. Ndaw sim gou nyaenx mbouj ndaej ienq naeuz:Neix mbouj dwg hawj gou “dang vaiz guh max” ha? Ngiengx gyaeuj cix raen daxmeh mboujdan dap bit ndeu youq gwnz mbaq, lij gab bit ndeu youq lajeiq, yamqdin onj youh mbaeu dwk byaij coh ndaw cang. Gou sikhaek mbouj miz coenz gangj, cij ndaej haeb heuj gwdgwd, byaij coh baihnaj bae.

Soengq baengz daengz cang lo, gou ngamq soeng gaemz heiq ndeu, youh ngaiz heuh bae buen gij sienghuq gwnz gajceh. Youq mwh caeuq daxmeh caemh ram aen sieng gig naek haenx, gou daengx ndang cungj ok rengz, hanh conh da myox liux.

Banringzgvaq, gou cingq siengj caeg youqndwi yaep ndeu, daxmeh youh hemqheuh lo. Caeklaiq seizneix boux dajcoih daeuj lo, naeuz gihgi vaih lo, ngoenzneix mbouj yungh caiq aemq baengz. Gou nyaenx mbouj ndaej riuhaha, daxmeh vix gou naeuz:“Mwngz ‘duzlingz iq’ neix, lij biuhhoz dem!”

Mwh fuemx, daxmeh ei coenz vah de dawz 10 maenz ngaenz ndenq hawj gou. Gaemdawz mbaw ngaenzceij haenx, ndaw uk gou fouzyienh gaiq guhcaemz iq itcig siengj cawx haenx, hoeng ngiengx gyaeuj yawj daxmeh mbat he——Gij byoem song mbiengj mik de nem faiqmienz, ndaw da yo miz gij naetnaiq mbouj yungzheih yawj ok, ndaw sim gou nyoengx hwnj raq heiq geizgvaiq ndeu mbouj rox baenzlawz gangj.

Sawqmwh, gou mingzbeg lo: Mboujlwnh dwg haeddoiq soqmoeg roxnaeuz dwg gwed baengz, cungj dwg daxmeh yungh sim anbaiz, de dwg vihliux hawj gou caenndang daejniemh guhhong. Ngoemx bak yaep ndeu, gou dawz cienz menhmenh cuengq dauq ndaw doengjdaiz hawj daxmeh lo. (bouxraiz: Cangh Yihsoz

bouxhoiz: Lij Lungzfangh)

编辑：实习生陆彤复审：黄慧华终审：蒙树起