Aen Ndang Ceiq Gyaeu Haenx - 广西民族报网

Aen Ndang Ceiq Gyaeu Haenx

来源：广西民族报网

发布时间：2026-07-08

doz dwg AI guh

Seiz cuengqgyaj seizhwngq, daxgoux hai ci daiq gou okbae youzcet, guhcaemz baenz ngoenz. Youq gwnz roen ma ranz haenx, gou naet dwk ndang unq rengz nyieg, doq siengj riengjret ma daengz ranz gyaenfwfw ninz donq ndeu.

Aenmbwn mbouj couh vunz, fwnraq doekbya’bya, aenci van haeuj goengloh ndaw cin bae, daxgoux cij ndaej menh di hai ci. Raemxfwn doek youq gwnz ci, couh lumj ngon’go nei, gou moengjmoengj doengjdoengj ninz ndaek lo……

Sawqmwh, raq sing lahbah ndeu ndwet ndiu gou. Gou ngiengx gyaeuj baez yawj, yawjraen gizgyae miz boux vunz ndeu cingq haenqrengz vad mbaw geiz ndaw fwngz de. Dingqnyi mboengqneix miz vunz gag youq gwnz roen sou cienzgvaqloh, ae, baenzlawz yienghneix boihseiz, hawj dou roeb daengz ni? Gou ngamq iet gyaeuj ok cueng siengj yawj dwg baenzlawz yiengh, raq fwn ndeu fat gvaqdaeuj, gou riengjret suk gyaeuj doxdauq. Gek aen cuengci sijsaeq baez ngonz, cij yawjraen goenglaux roekcib lai bi ndeu, de fwngz ndeu gaem geiz, lingh fwngz vadfwngz. Gou cimda baez yawj, goenglaux haenx daemqdetdet, aennaj youh byoem youh nyaeuq, song gumz da mboep doxhaeuj, gwnz naj hix mbouj rox dwg hanh roxnaeuz fwn ndikrikrik. Gou ngeix: Caen dwg aeu cienz mbouj aeu mingh, nienzgeij baenzlai geq, mbouj youq ndaw ranz yiengjfuk, dauq youq ndaw fwnraq sou cienzgvaqloh. Gij vunz seizneix baenzlawz caenh ndonj haeuj conghcienz bae ni!

Daxgoux ndenq 10 maenz cienz hawj goenglaux, naeuz: “Dawz bae yungh lu, fwn doek baenzlai hung, vaiqdi ma ranz!” Goenglaux baez ngawh, mbouj ciepaeu. Daxgoux youh ndenq 10 maenz cienz, goenglaux lij dwg mbouj ciep. Geizheih lo, dwg yiemz cienz noix lwi? Guekgya goengloh sou cienzgvaqloh it baez ceiq lai mbouj mauh 10 maenz, caiq gya boix ndeu, hix wnggai rimhoz luba! Gou gig mbouj sim’angq.

Seizneix, goenglaux aj hoz hemq: “Gou mbouj dwg boux sou cienzgvaqloh. Dwg aenvih rumz rem lai, diuz dienhsienq baihnaj deng ngefaex daenx goenq doek roengzdaeuj, gaenq miz vunz bae ra goengcoihdienh lo, hoeng gyoengqde lij caengz daengz. Gou lau miz dienh, gij vunz gvaqloh sou mbouj rox miz yungyiemj, couh youq gizneix lwnh sou nyi. Cingj sou daj gizwnq gvaengz roen gvaqbae ba!” “Ndaej, ndaej, ndaej! Dou gvax roen gvaqbae!” Daxgoux lienz naeuz sam cih “ndaej”, cungj miz di bakbamz lo. Dingq gij vah goenglaux le, gou hix naj hoengzgodgod. Goenglaux neix, vih le bouxwnq ancienz, mbouj insik aen- ndang bonjfaenh, youq ndaw fwnraq cijveih gyaudoeng, neix couh dwg boux beksingq simsienh Cungguek ho! Aenndang goenglaux sikhaek youq ndaw uk gou sangradrad, gou cix baenz yienghhaenx iqetet. Seizneix, aenci gaenq baenq gyaeuj gvaqdaeuj, gou hix goq mbouj ndaej rumz ci fwn rwed, ngauz roengz cuengci, coh baihlaeng hemq: “Daxgoeng, docih mwngz!” Goenglaux lij dwg vad mbawgeiz, coh dou hemq naeuz: “Fwn doek roen raeuz, haeujsim ancienz!” Daxgoux hix dingz ci roengzdaeuj, coh goenglaux vadfwngz docih.

Boux vunz aenndang mbouj mbauq, youq lajmbanj gvaq ndwen- ngoenz, mbouj yiengjsouh gvaq geijlai yienhdaih vwnzmingz neix, gij cingsaenz de dauq dwg baenzneix fouqmiz! Muenghyawj goenglaux ciemhciemh bae gyae haenx, gou roxnyinh neix dwg aen ndang ceiq gyaeu ndeu! (bouxraiz: Yiz Mingz

bouxhoiz: Yinj Fuzgen)

编辑：实习生陆彤复审：黄慧华终审：蒙树起