Ceizngaih Homfwd Mbanjranz - 广西民族报网

Ceizngaih Homfwd Mbanjranz

来源：广西民族报网

作者：□ Sangswh Yen Swhyangz Cin Daihsam Siujyoz roek (6) ban Vuz Yinhyiz

发布时间：2026-07-08

▲Bouxraiz Vuz Yinhyiz.

Mbanjranz gou dwg lajmbanj aen mbanj iq caemdingh ndeu. Baez daengz seizcin, youq gwnz haenznaz、gwnz ndoi couh aiq maj ok baenz bumh baenz bumh go’ngaih youh oiq youh heu daeuj. Rumz baez ci gvaqdaeuj, gij heiq ngaih hom couh biu doh daengx mbanj. Seizneix, daxbuz cungj haengj yien fwngz gou, bae mbaet nyod go’ngaih, guh gij ceizngaih gou ceiq maij gwn haenx.

Haetromh gij raiz lij venj youq gwnz mbaw ngaih, gij mbaw heuswdswd oiqunq haenx lumh hwnjdaeuj unqnupnup. Haeuj gyawj baez mup, raq heiq rang moqsien youh daegbied haenx couh ndonj haeuj ndaw ndaeng daeuj. Gou hag gij yiengh daxbuz, siujsim mbaet gij nyod go’ngaih ceiq oiq haenx, mbouj geij nanz couh mbaet rim aen lamz ndeu lo. Daxbuz riu dwk naeuz, yungh gij nyod oiq go’ngaih guh ceiz, cij ceiq unq ceiq rangdiemz.

Ma daengz ranz, daxbuz hainduj nyaengq hwnjdaeuj. De dawz mbawngaih swiq seuq gonq, youh cuengq roengz ndaw raemxgoenj bae log baez ndeu. Gij mbaw ngaih gaxgonq heuswdswd haenx bienq ndaej engqgya unqnemnem lo. Ciep roengzdaeuj, daxbuz dawz gij mbawngaih haenx faeg mienz, caeuq mba haeuxcid doxgyaux, caiq gya raemx cai yinz, cai baenz ndaek mba youh hung youh heu ndeu. Ndaek mba unqnemnem, lumj gaiq nyawh heu ndeu, ndeiyawj raixcaix.

Gou ceiq muengh suek ceiz yiengh hong neix. Daxbuz dawz ndaek mba hung haenx faen baenz ndaek baenz ndaek mba iq. Gou hag gij yiengh de, dawz gij ndaek mba iq haenx nyaenj baenzlumj aen vanj iq nei, hamh gij hamh lwgraz diemzsub haenx haeuj ndawde bae, caiq menhmenh nyaenj bak de gaenj, laenh baenz aen ceiz iq luenzlulu. Gij ceiz gou guh haenx hung iq mbouj doxdoengz, aen mbeujmbetmbet, yiengh de yaez cix youh dwggyaez. Daxbuz yawj gou swixgvatgvat, riu dwk da cungj sej lumj diuz mae nei.

Doeklaeng, daxbuz dawz gij ceiz guh ndei haenx cuengq haeuj ndaw caengq bae, hai feizhung naengj hwnjdaeuj. Mbouj geij nanz, ngaih hom caeuq haeuxcid hom daj ndaw ranzdajcawj biu okdaeuj, sawj gou ngah dwk myaizsaw rih bae.

Ceiz naengj ndei la! Gou ganjvaiq dawz aen ndeu, yaengyaeng haeb gaemz ndeu, unqnemnem, homfwdfwd, gij ngaih hom youq ndaw bak sanqhai, van cix mbouj nywnx, cungj dwg gij feih seizcin. Daengx ranz vunz humx youq itheij, gwn gij ceizngaih ndatfwdfwd haenx, miz gangj miz riu, ndaw ranz cungj cang rim gij angqyangz caeuq vuenyungz liux.

Ceizngaih iqet, yo miz gij gyaeundei seizcin lajmbanj, yo miz gij ndiep daxbuz gou. Cungj feihdauh mbanjranz gagmiz neix, dwg gij feihdauh ceiq van、ceiq nanzlumz mwh iq gou. Mboujlwnh bae daengz gizlawz, gou cungj ciengxlwenx lumz mbouj ndaej gij mbawngaih homfwdfwd neix, lumz mbouj ndaej aen mbanjranz lajmbanj raeujrub haenx.

家乡的艾叶糍粑香

上思县思阳镇第三小学六（6）班吴欣瑜

我的家乡是个宁静的小乡村。每到春天，田埂边、山坡上就会长出一丛丛鲜嫩的艾草。微风一吹，淡淡的艾草清香飘满整个村子。这时候，奶奶总会牵着我的手，去采摘艾草，做我最爱吃的艾叶糍粑。

清晨，露珠还挂在艾叶上，绿油油的叶子摸起来软软的，凑近轻嗅，一股清新又独特的香味钻进鼻子里。我学着奶奶的样子，小心翼翼地摘下最嫩的艾叶尖，不一会儿就摘了满满一篮子。奶奶笑着说，用嫩艾叶做出来的糍粑，才最软糯香甜。

回到家，奶奶开始忙活起来。她先把艾叶洗得干干净净，放入沸水中焯烫片刻。原本翠绿的艾叶变得更鲜亮了。接着，奶奶把焯好的艾叶剁成碎末，和雪白的糯米粉拌在一起，再加入温水，用力揉成一个大大的青绿色粉团。粉团软软的，像一块碧绿的翡翠，好看极了。

我最期待包糍粑的环节。奶奶把粉团分成一个个小团子。我学着她的样子，把小团子捏成小碗的形状，放上甜甜的红糖芝麻馅，再慢慢把口子捏紧，搓成圆圆的小糍粑。我亲手做的糍粑大小不一，形态歪歪扭扭，模样笨拙又可爱。奶奶看着我笨拙的模样，笑得眼睛都眯成了一条缝。

最后，奶奶把做好的糍粑放进蒸锅里，开大火蒸上十几分钟。没过多久，浓郁的艾香混合着糯米的香甜，从厨房里飘了出来，馋得我直咽口水。

糍粑蒸好啦！我迫不及待地拿起一个，轻轻咬上一口，软软糯糯的，艾香在嘴里散开，甜而不腻，满是春天的味道。一家人围坐在一起，吃着热乎乎的艾叶糍粑，聊着家常，整个屋子都充满了暖暖的幸福。

小小的艾叶糍粑，藏着乡村春天的美好，藏着奶奶对我的疼爱。这独属于家乡的味道，是我童年里最香甜、最难忘的滋味，无论走到哪里，我都永远忘不了这浓浓的艾叶香，忘不了温暖的乡村老家。

(lauxsae son raiz: Vangz Cauzan / 指导老师：黄朝岸)

编辑：实习生陆彤复审：黄慧华终审：蒙树起