Gij Ndiep Daxmeh Gou Ngahmuengh Haenx

来源：广西民族报网

发布时间：2026-07-07

Lajmbwn gyoengq boux bohmeh, cungj muengh lwgsai baenz lungz, lwgmbwk baenz fungh. Youq ranz gou dahnuengx ceiq iq, hagsib cingzcik hix ceiq ndei. Yienghneix, daxmeh gig ndiep de, dawz de dangq naed caw cuengq ndaw fwngz gyaezgyoh. Aenvih gou cingzcik mbouj ndei, ciengz deng daxmeh ndaq, mbangjbaez lij deng de mboengj dem, gou lumjnaeuz mbouj raen daxmeh ndiep gou gvaq, gou geijlai ngahmuengh miz ngoenz he, gou hix ndaej daxmeh ndiep.

Miz ngoenz ndeu, dahnuengx dawz aen heiqci iq gou saeqsim guhbaenz haenx cek vaih lo, gou geijlai siengsim ha. “Dwg mbouj dwg daxmeh cungh de lai, de daegdaengq loengh gou ni?” Ndaw sim gou yied ngeix yied hozndat, couh yunghrengz dwk dahnuengx mbat fak ndeu, dahnuengx dingj mbouj ndaej mbat fak naek neix couh daej hwnjdaeuj.

Daxmeh dingqnyi singdaej couh roemx haeuj ndaw rug daeuj, de mbouj cam goekrag, couh laxdawz sauqbaet coh gou moeb gvaqdaeuj. Gou roxnyinh daengx ndang inswdswd, ienuengj daej hwnjdaeuj. “Mwngz gyawz lumj daeggo saekdi ha? Doegsaw mbouj roengzrengz, lij dam guhcaemz dem!” Daxmeh hozndat dwk naj bienq lumj fazheu, “bwng” sing ndeu, yunghrengz gven dourug hwnjdaeuj. Daxmeh ha, mwngz gaej yienghneix gangj! Gou vih swhgeij miz dahnuengx neix sim’angq, hoeng…… Daxmeh ha, mwngz baenzlawz mbouj rox daeglwg mwngz saekdi? Gou hix ngah hawj mwngz ndiep gou ha!

Seizhaenx, dahcej gvaqdaeuj nai gou naeuz: “Daxmeh hix dwg ityiengh ndiep mwngz, hoeng gij cingzcik mwngz mbouj bingq dahnuengx iq ndei, mbouj ndaej rimhoz daxmeh, ndigah, daxmeh cungjdwg lai biensim dahnuengx, gijmaz cungjdwg lai ungjcungh de di.” Gou baez menhmenh ngeix, daengz doeklaeng cij roxyiuj aen sim daxmeh lo: Daxmeh dwg muengh gou baenz lungz, hix muengh dahnuengx ndaej baenz fungh simgaenj lai, maqmuengh dou ndaej baenz vunz okcot cij yienghneix.

Daj baezde hwnj, gou couh haenqrengz hagsib. Moix ngoenz ranz caengz rongh, gou couh laeglemx hwnqdaeuj, boemz youq henz daiz nyinhcaen hagsib. Baez bungz daengz daezmoeg hoj seiz, gou cungjdwg swhgeij gag naemj, saedcaih ngeix mbouj ok lo, couh bae cam bouxwnq. Mbangjbaez, gou cingq roengzsim hagsib, baihrog cueng gyoengq doengzdoih guhcaemz guh’angq cienz gij sing riugeggeg daeuj, ndaw sim gou humznyebnyeb, caen siengj ndonj okbae riengz gyoengqde guhcaemz. Hoeng, ngahmuengh ndaej daxmeh ndiep aen siengjfap haenx youh sawj gou laebdaeb dingj roengzbae. Baez vunz naeuz: “Roeg hwnq romh miz non gwn, vunz hwnjheiq caiz rim dungx.” Couh yienghneix, doeklaeng gij cingzcik gou ganj ndaej hwnjdaeuj lo. Miz baez ndeu suyoz doxdax gou lij ndaej daihngeih mingz dem. Baez daengz gou dawz mbaw ciengjcang cuengq youq dangqnaj daxmeh, de simsangj riu lo. Daxmeh daegdaengq bae cawx aen daehsaw moq gyaeundei ndeu hawj gou, haemhhaenx lij vih gou guh donq byaek ndeigwn ndeu. Seiz gwn haeuxcaeuz, daxmeh mbouj dingz dwk nip byaek ndei hawj gou, gij byaek ndaw vanj haenx moj lumj “goengq bya iq” nei, daxmeh lij laebdaeb coi gou gwn vaiqdi. Gou lumj dahnuengx ityiengh ndaej meh ndiep lo.

A, gij ndiep daxmeh gou ngahmuengh haenx cungjsuenq daeuj daengz lo !

(Dungj Cangboz raiz

Vangz Gijveiz hoiz)

编辑：实习生陆彤复审：黄慧华终审：蒙树起