Daxbuz Gou - 广西民族报网

Daxbuz Gou

来源：广西民族报网

发布时间：2026-07-07

Daxbuz gou bineix gaenq ndaej roekcib sam bi lo, fajnaj unqswnh de cungj nyaeuqnyatnyat liux. Byoemgyaeuj de hau caez, song mbaw rwz de miz di hung, yawjdaeuj gig miz fukheiq dem. De baez riu, hawj vunz raen youh huzsienh youh ndeigyaez. Aen hwet daxbuz cungj dwg sohrwdrwd, ngoenzngoenz doq cingsaenz cibcuk daengznauq, gij sailwed doed ok laeng fwngz de lumjnaeuz baenz duz baenz duz ndwen nei, baez yawj couh rox, neix dwg fajfwngz ciengzgeiz guh hong ndeu.

Daxbuz dwg ranz gou boux ceiq mbaetyungh ndeu. Daj gou hainduj miz geiqsingq, de cungj dwg daenj dauq buhvaq saeklamz caeuq gouh haizbaengz ndeu, bibi gvaq cieng, boux ndaw ranz cawx buh moq hawj de, de cungj dwg naeuz: “Dauq buh neix lij daenj ndaej, gij buh moq haenx lij dwg ce baezlaeng caiq daenj lunw.” Ndaejgeiq miz baez ndeu, gwn ngaizromh, gij haeuxngaizromh dwg aemj, gou gwn dwk gwn dwk, couh mbouj siengj caiq gwn lo, daxbuz yawjraen le couh naeuz: “Mbouj ndaej, mwngz itdingh aeu gwn bae.” Gou naeuz: “Daxbuz, gou caiq gwnz couh rueg ok bak lo.” Daxbuz cix naeuz: “Gou dwg boux caencingq guh hongnaz dozgwn ndeu, ndaemnaz baenzlawz dwgrengz gou rox gvaq mwngz, gaej luenh saisaengq haeuxgwn.” Gou mboujmiz banhfap, cijndei naeuz: “Yienghneix gou banringz dauqma le menh gwn, ndaej mbouj ndaej ne?” Gangj sat, couh beq daehsaw okbae dap banci bae hagdangz lo.

Banringz dauqma, daxbuz naeuz yaek cawj nohhungzsauh hawj dou gwn. Gou angq dangqmaz, hoeng, daxbuz cix siengj gwn byongh duix aemj lw haenx bae, vunz ndaw ranz mbouj doengzeiq. Baezneix daxbuz hix mbouj miz gijmaz banhfap lo, mbouj ndaej mbouj caeuq dou doengzcaez gwn nohhungzsauh.

Daengz banhaemh le, daxbuz naeuz gou: “Daegyangz, coengh gou hai aen heiqmoiz ndaej lwi?” Gou naeuz: “Daxbuz, mwngz dwg mbouj dwg dungxiek ni?” “Mbouj dwg, gou siengj gwn byongh duix aemj lw haenx bae.” “Haemhneix raeuz gwn gyaujswj, gij aemj haenx couh gaej gwn luba?” Daxbuz naeuz: “Baenzlawz ndaej yienghneix, byongh duix aemj haenx youh yaek dawz bae gizlawz cuengq? Daegyangz, mwngz rox mbouj rox, naed haeuxgok ndeu yaek ginggvaq song hob goeng cij ndaej bienq- baenz haeuxsan ne.” Dingqnyi gij vah daxbuz le, gou gaemhanh mbouj ndaej swhgeij gag bae hai cauq- heiqmoiz lo. Yawj daxbuz youq bangxhenz cauqheiqmoiz haenx, gou caen siengj daihsing hemq coenz ndeu: “Daxbuz, mwngz ndei lailai!”

(Cau Vazyangz raiz

Liengz Cauzcieng hoiz)

编辑：实习生陆彤复审：黄慧华终审：蒙树起