Aen Hawj Raemx Cinghseuq Saenzgeiz

来源：广西民族报网
发布时间：2026-07-07
Gij raemx swlaizsuij raeuz ngoenznaengz gwn yungh haenx aeu ginggvaq haujlai bouhloh fukcab hawj de bienq seuq, gij saeh neix ciengzseiz dwg ndaw cangj swlaizsuij guh liux. Hoeng mwngz rox lwi? Geij cungj caizliuh dou ngoenznaengz ciengz raen haenx hix ndaej guh baenz aen doxgaiq hawj raemx cinghseuq! Gou raen geizheih lai, couh siengj damqrox gij baexmaed hawj raemxuq bienq saw haenx.
Gou ra bingzsuliu、danqsupak、 sa saeq、rin’gyaeq daeuj, lij ra baengzsa、 faiqdaih daeuj dem, youh cang bingz raemxdaemz ndaw siujgih ndeu.
Mwh guh aen hawj raemx cinghseuq, gou daj cungqgyang raed aen bingzsuliu goenq gonq, dawz donh baihgwnz aen bingz fanj gvaqdaeuj dangguh aenlaeuh. Ciep roengzdaeuj “daj saeq daengz hung” baenz yamq baenz yamq bu caizliuh: Caengz ceiq daej saek gaiq faiqdaih, riengz dwk, bu gaiq baengzsa ndeu, ndingq caengz danqsupak he, caiq bu gaiq baengzsa ndeu, yienzhaeuh ndingq sasaeq, bu baengzsa,    caengz   ceiq   gwnz   baij  rin’gyaeq, moix  caengz  cungj  bu ndaej cuknet bingzyaenz.
Gou youh simgaenj youh maqmuengh, yaengyaeng ndingq bingz raemxdaemz roengz ndaw aen hawj raemx cinghseuq bae. Raemx gudu gudu con gvaq gij gehrin haenx gig vaiq lae roengzbae, caengz sasaeq lumj fan muengxdeih nei, dawz namhsa iq laengz roengzdaeuj; daengz caengz danqcupak haenx, raemx sawqmwh menh lo, lumjdwg cingq ciepsouh “daengx ndang genjcaz”. Caj raemx gvaq caengz faiqdaih iemq okdaeuj seiz, lwgda gou rongh lo, gij raemx yienzbonj  henjyubyub haenx bienq saw haujlai. Gou youh caiq daih baez ndeu, baezneix gij raemx iemq okdaeuj haenx, di labcab cungj mbouj miz, depgyawj mup hix mbouj miz gij haeuhauz  raemxdaemz.
Vihmaz aen hawj raemx cinghseuq iqet neix miz gij rengz baenzneix hung ni? Gou fan yawj gij saw gohbuj, hwnj vangj caz swhliu le cij rox, ndaek rin’gyaeq yienzlaiz ndaej dangj gij doxgaiq uq hung, sasaeq ndaej laengz naezsa iq, danq- supak lumj “gaiq haijmenz sup uq” nei, faiqdaih dawz aen’gvan doek- laeng, baengzsa cix hawj gyoengqde gag hengz ndei gij hong bonjfaenh.
Baez saedniemh neix saenzgeiz lai lo! Laxlawz cenj raemx seuq baihlaeng, yo miz baenzlai baexmaed gohyoz. (Yangz Swnhhih raiz
Vangz Civeij hoiz)
编辑：实习生陆彤复审：黄慧华终审：蒙树起