Yaep De，Gou Fwt Majhung - 广西民族报网

Yaep De，Gou Fwt Majhung

来源：广西民族报网

发布时间：2026-07-07

Youq ndaw ndaejgeiq gou，miz yaep seiz ndeu，lumj aen ndaundeiq ronghmyanmyan nei，ciuq diuzroen majhung gou ronghsagsag，hawj gou caen roxnyinh daengz swhgeij majhung lo.

Neix dwg ngoenz singhgiz dinghcaem ndeu，ndit con gvaq yiemhcueng ciuq haeuj ndaw ranz daeuj，daxboh caeuq daxmeh cungj miz saeh ok rog bae，louz gou gag youq ranz. Hainduj，gou lij ing youq gwnz sahfaz gagraen cwxcaih，fajfwngz gikgyatgyat mbaenq gaiqbaengh sahfaz，mbehai ndangdaej soeng- swtswt，lwgda mbouj yaep dwk yawj densi，yiengjsouh gij seizgan gag youq hojndaej neix. Hoeng mbouj gvaq geijlai nanz，aendungx gou couh yiengjgugu mbouj dingz. Yawjraen ndaw ranzding hoengqvatvat，gou daihdamj byaij haeuj ndaw ranzdajcawj bae.

Ndwn youq henz cauq，yawjraen gij doxgaiq dajcawj youh sugrox youh najseng haenx, caiq yawj dong byaek henz cauq ngamq cawx ma haenx，sim gou miz di vueng. Maj baenzneix hung，gou lij caengz gag cawj haeux gvaq. Hoeng aendungx iek hawj gou mbouj caiq yaemhywx，gou laemxsim sawq guh faenh haeuxcaujgyaeq ndeu.

Gou hag gij yienghceij daxmeh，sien diemj feiz hawj aen rek ndat gonq，caiq raix youz roengzbae. Ciepdwk，aeu aen gyaeqgaeq fag ndei neix raix roengz ndaw rek bae，gyaeqgaeq vaiqvid bongq hwnjdaeuj，vanzlij fatok di singyaem ndeu，yaep ndeu couh bienqbaenz saek henjgim，sanq ok gij heiq rang yinx vunz haenx. Doeklaeng，gou youh aeu ngaizhaeux raix roengzbae，boekbinq cauj geij baez，dwk di gyu caeuq mbouq. Mwh boekbinq cauj，ngaizhaeux soengsanq seiz mbouj seiz daj ndaw rek“diuq”okdaeuj，fajdin fajfwngz gou luenhlablab，gwnz najbyak hanh conh rim liux.

Ginggvaq roengzrengz, faenh haeuxcaujgyaeq ndeu dauqdaej guh ndei lo. Yawj faenh haeuxcaujgyaeq gij yienghceij rwixngonz cix sanq ok heiq hom haenx，gou gag raen swhgeij ak dahraix. Mwh gwn gij haeuxcauj swhgeij gag cauj neix，gou fwt rox，bonjfaenh mbouj caiq dwg laeq lwgnyez cijrox ingbaengh bohmeh lo，gou ndaej gag gaijgez vwndiz、ciuqgoq swhgeij lo.

Gwn duix haeuxcaujgyaeq haenx sat，gou fwt roxnyinh swhgeij majhung lo. Baez ginglig cauj haeux neix，hawj gou roxnyinh rox gag guh saeh gig youqgaenj，hix hawj gou roxyiuj ngoenznaengz guhhong caen dwg sinhoj dwgrengz. Gou roxndeq，bungz saeh cijaeu daihdamj rox naemj，moix mbat ginglig cungj hawj swhgeij bienq ndaej engqgya giengiengz、engqgya ak.

（Maj Swjcin raiz

Vangz Funghgwz hoiz）

编辑：实习生陆彤复审：黄慧华终审：蒙树起