Geiq Baez Dwkbya Ndeu - 广西民族报网

Geiq Baez Dwkbya Ndeu

来源：广西民族报网

发布时间：2026-07-07

Ngoenzneix dwg ngoenz singhgiz, daengngoenz dak daengz caekhaex lo, hoeng gou lij caem youq ndaw fangzhwnzloq diemzsubsub haenx. Mbouj rox bouxlawz niuj gou baez ndeu, hawj gou daj ndaw fangzhwnzloq doeksaet ndiu dauq, gig mbouj yungzheih hai da baez yawj, laxlawz dwg daxmeh.

Gou da mumjgyumq dwk cam:“Meh, guh gijmaz ha?” Daxmeh naeuz:“Ngoenzneix ranz daxdaiq dwkbya, raeuz bae bang de ndei mbouj ndei?”Gou dingq le, angq dwk ca di saet hwnjdaeuj, gij baiqninz yaepyet mbin gvaq gizlawz bae liux, mbouj naemj caiq ninz lo. Gou muengzfoeddoed daenj buh ndei, gwn gvaq ngaizromh, gwih hwnj danci lumj mbin nei buet bae coh ranz daiq.

Gij dienheiq ngoenzneix ndei lumj gij simcingz gou nei, youq gwnzmbwn heuyauyau haenx fouz miz geij duj fwjhau lumj faiq nei, yienznaeuz dwg seiznit, hoeng daengngoenz daxgoeng cix angqhoho ciuq ok gij ronghlwenq ronghsagsag. Mbouj rox mbouj nyinh, dou couh daeujdaengz ranz daxdaiq lo. Ho! Ranz daxdaiq caen nauhyied ha, daxheiz ngeih、daxheiz sam cungj ganj daeuj lo, mwngz yawj, couhdwg daegnuengxbiuj ngamq bi buenq haenx hix daeuj comz nauhyied.

Dou vunzlai baenz bang raezradrad bae daengz henz daemzbya, cijraen ndaw daemzbya giet miz caengz naehang nanwtnwt ndeu, lumjbaenz gij gyap geng bouxbing ciuhgeq nei, youq laj ndit ciuq ndaej luemjyapyap, lumjnaeuz ndaeng- ndiengq dwk naeuz:“Gaej siengj vanq muengx, mwngz ndaej gung byoengq gij ciengzdoengz ciengzdiet gou lwi?” Bohnax raen le mbouj gangj lai coenz vah, boux daih’it diuq roengz ndaw daemzbya bae, gingz fag so, yungh rengz dub naehang. Yaep ndeu, gij baujleij caengznae gaenjmaenh neix deng gung byoengq lo.

Hainduj vanq muengx gaebbya lo, fan muengx dwkbya sou gaenj le, fouzsoq bya ngauz aenndang saetdiuq bwngbwng, lumj lau deng doeklaeng nei diuqfoux hwnjdaeuj. Gij gyaep gyoengqde youq laj ndit ciuq ronghmyabmyab, hawj vunz dava bae. Cijraen gyoengqvunz dwkbya haenx humx baenz aen gvaengz ndeu, iet ok fwngzhung lumj gimzdiet nei bae gaemh bya. Gij bya haxbaenh lij diuqbwngbwng haenx, seizneix laux- laux saedsaed deng vunz gaeb lo.

Hoeng, lij miz mbangj bya lumjnaeuz mbouj fugheiq, haenqrengz baet rieng, siengj daj ndaw muengx deuz okbae. Cijraen bohnax song fwngz lumj mbaw golinxgaeq nei yungh rengz coemj dawz gyaeujbya caeuq riengbya, duzbya couh mbouj miz banhfap, lauxsaed deng gaemh lo.

Gou yawj ndaej sim humz- nyapnyap, hix siengj baij gij bonjsaeh gou, hoeng duzbya lumjnaeuz caeuq gou doxndoj nei, daegdaengq daeuj loengh gou. Baenqcienq baenz buenq ngoenz, hix mbouj caengz gaeb ndaej saek duz bya. Gou ngamq siengj hwnj daemzbya daeuj, mbouj gaeb bya lo,hoeng youh gag naemj, guh saeh aeu miz naihsim, mboujnex couh guh mbouj baenz saek yiengh. Siengj daengz gizneix, gou youh youq ndaw raemx lumh hwnjdaeuj, sawqmwh yawjraen ndaw raemxnae miz duz byaleix hung ndeu, de lumj aenruz hung ndaem laj raemx nei cingq yaengyaeng youz, de cingq vih ndaej deuz okbae daekeiq fwngfwng ne! Gou menhmenh heux gvaqbae, song fwngz riengjret baez gaeb, duz bya neix couh deng gou gaeb ndaej lo. Dou vaiq hoenx vaiq sat, banringz seiz, ndaw loz cungj dwg gij doxgaiq ndaejhingz dou—duzbya. Goengda raen gaeb ndaej baenz loz baenz loz bya, angq ndaej riu dwk da laep baenz diuz ngab ndeu, angq ndaej bak aj mbouj rox haep bae, ndaej fungsou de angq baenzmaz bae.

Gou yawj goengda angq baenz- neix, sim siengj, caen dwg “goengfou mbouj yiemq bouxmizsim”, cijmiz gaenx guhhong, cij ndaej makdiemz gwn; danghnaeuz gik guh, couh guh mbouj baenz saek yiengh.

（Suh Linz raiz

Dwngz Dwngz hoiz）

编辑：实习生陆彤复审：黄慧华终审：蒙树起