Gij Gyaez Daxboh Naekgywdgywd - 广西民族报网

Gij Gyaez Daxboh Naekgywdgywd

来源：广西民族报网

发布时间：2026-07-07

Daengz bineix daxboh ndaej 41 bi, de miz mij bet lai sang. De ceiq maij daenj buh saecang saeklamz、vaq ndaemmong, yiuq hwnjdaeuj daenj ndaej habndang vunz youh sangliuliu. De naj seiqfueng, najbyak miz geij diuz nyaeuq laeglele. De baez riu, song faj heuj caezcupcup de couh loh okdaeuj hauseksek, caen dwggyaez dwgcoh.

Ndaejgeiq gou ngamq haeuj yozyau mwhhaenx, gou baenz ciengz bingh naek ndeu, daxboh cungjdwg gek ngoenz roxnaeuz gek song sam ngoenz couh buenx gou bae yihyen. Miz baez ndeu, gou daj digih yihyen cienj daengz sengjgaep yihyen, baez haeuj yihyen couh deng gyau ngaenz baenz fanh haj maenz. Aenvih dwgrengz youh yousim lai, gyahwnj ndaw ranz mbouj miz ngaenz, gij byoem daxboh haemh dog couh hau yaek caez lo, gwnz najbyak geij rangh nyaeuq de engq laeg lo, aen hwet sohgyaenggyaeng de hix miz di gaeuz lo. Ngaiznged geij ngoenz, de beij gaxgonq byom lai lo, baeg daengz ciengzciengz naengh youq henz mbonqbingh baiqlaeujninz.

Lij miz baez ndeu, gij bingh gou sawqmwh haeujndang, bae yihyen seiz buhvaq mbouj daiq gaeuq, dangseiz cingq bungz laebdaeb mbwn’oemq doekfwn, dienheiq sawqmwh bienq nit. Daxboh naeuz:“Gou okbae cawx buh hawj daeglwg.”

Daxboh soemh fwnhung, song ga dangh raemx, bae daengz aen hawciengz liz yihyen geij bak mij gyae haenx, cawx buhvaq dauq hawj gou. Mwh daxboh ndang ndaek- saebsaeb, fwngz got dawz gij buhmoq aeu daeh suliu duk ndaej ndaetndingnding haenx yamq haeuj bakdou ranzbingh, raemxda gou foemhfwd rihnangnang okdaeuj, gou muengz heuh sing ndeu:“Daxboh……”Daxboh caenx geu riu ok naj daeuj, yamq gvaqdaeuj bang gou uet raemxda naeuz:“Raeuz dwg lwgsai, mbouj ndaej seizbienh raemxda loenq!”

Gij bingh gou yw ndei caez le, hoeng daxboh dauqfanj baenz bingh lo. Dauq daengz ndaw ranz, daxboh goq mbouj ndaej bae yihyen yw gij bingh cihgeij, lij laebdaeb mbaet gwn mbaet yungh, louz ngaenz hawj gou bouj yingzyangj. Moix ngoenz gou bae hagdangz、cuengqhag, daxboh cungj- dwg dawzseiz soengq gou、ciep gou. Couh yienghneix, gou mbouj aenvih baenz bingh cix deng daengx mbouj bae hagdangz, lij ndaej caeuq doengz- hag ban gaeuq itheij hwnjdangz.

Geizgyang gaujsi, gou ngamq gauj ndaej daih cibhaj mingz. Daxboh seizseiz cungj gujli gou. Ginggvaq roengzrengz, daengz geizgauj seiz, gou gauj ndaej daihngeih mingz lo. Daxboh riunyumnyum doiq gou naeuz: “Daegliz, baezlaeng mwngz aeu lienzdaemh haenqrengz o!” Gou naemj gou itdingh aeu gyaboix yunghrengz haglienh, ceng aeu gij cingzcik engq ndei, daeuj bauqdap gij gyaez bohmeh.

Daxboh, gij ndiep caeuq gij son- gyauq mwngz, dwg hotgo fouzsing ndeu, yaek buenx gou baenz ciuh baenz seiq.

Gyo’mbaiq mwngz, daxboh!

(Cuh Lizbinh raiz

Vangz Siubiz hoiz)

编辑：实习生陆彤复审：黄慧华终审：蒙树起