Yahdaiq Gauj Bonj Cingqhaici - 广西民族报网

Yahdaiq Gauj Bonj Cingqhaici

来源：广西民族报网

发布时间：2026-07-07

Miz haemh ndeu mwh gwn caeuz, yahdaiq nyinhcaen dwk naeuz, de yaek bae hag hai ci. Dou dingq le mwngz cim gou gou cim mwngz, bouxboux ngeix naeuz, yah neix baenzlawz lo, vihmaz sawqmwh naemj bae hag hai ci ni?

Yahdaiq gejnaeuz，de mbatgonq bae ranzcoj, aenvih dawz doenghyiengh lai, baebae dauqdauq, gig mbouj fuengbienh. “Langhnaeuz gou gag rox hai ci, mbouj rox geijlai ndei, naemj bae gizlawz couh bae gizlawz, naemj seizlawz bae couh seizlawz bae.” Yahdaiq naeuz.

Naeuz guh couh guh, yahdaiq ngoenz daihngeih haetromh couh buet bae aen hagdangz son hai ci bauqmingz lo, gvaqlaeng ngoenz- ngoenz laep haeuj haet ok bae hag hai ci, baenz boux hag hai ci ndaw hagdangz ceiq gaenx haenx. Gou naeuz：“Yahdaiq ha, hag hai ci mbouj yungh baenzneix buekmingh ba.”

Yahdaiq naeuz：“Ndaw hagdangz cungjdwg hauxseng, gou mbouj haengj yaez gvaq gyoengqde bw.”

Cijaeu mwngz roengzrengz, yienghyiengh guh ndaej baenz: Yahdaiq gohmuz daih’it gauj ndaej 100 faen; gohmuz daihngeih youh gauj ndaej 100 faen. Hoeng gauj gohmuz daihsam, couhdwg hai ci hwnjroen, yahdaiq gingqyienz gauj mbouj gvaq.

Ngoenzhaenx yahdaiq daj hagdangz dauq ranz, mizdi nyapsaebsaeb. Daxmeh nai de naeuz：“Gauj mbouj ndaej couh gauj mbouj ndaej be, ceiqlai caiq gauj loma, fanjcingq ranz raeuz gaenq miz song boux rox hai ci lo.”

Yahdaiq dingq le saeknaj bienq heu youh bienq hoengz, doeklaeng de riunyumnyum dwk naeuz：“Ngamq gauj mbouj gvaq baez ndeu law, gou mbouj ndaej daengz buenq roen couh cuengqfwngz bw.”

Daj baezde heij, yahdaiq engq roengzrengz hag hai ci lo, ciengzseiz youq ranz lij gen hwnj ga hwnj beijveh, caenh naemj guhlawz cij gauj ndaej gvaq hai ci hwnjroen aen goh neix.

Doeklaeng miz ngoenz ndeu, yahdaiq angqriri dwk dauq daengz ranz, ndaw fwngz gaem bonjcingq hai ci gihdungceh youh iq youh ndaem haenx. Ngoenzhaenx, vihliux goenghoh de gauj ndaej cingqhaici, yahdaiq caenndang hai ci doz daengx ranz vunz bae bouqgwn gwn donq haeuxcaeuz he. Seiz gwn caeuz, gou gaem cenj raemxcaz ndeu bae gingq yahdaiq, gou naeuz：“Yahdaiq, mwngz vunzlaux sim mbouj laux, hag hai ci gauj cingq ndaej baenzneix ndei, gou daengj mehfwngz haenh mwngz!” (Sunh Davuj raiz

Vangz Siujyinh hoiz)

编辑：实习生陆彤复审：黄慧华终审：蒙树起