Vagut Gaggangj - 广西民族报网

Vagut Gaggangj

来源：广西民族报网

发布时间：2026-07-07

Coenz sei “laj led mbaet vagut, mokmek raen Nanzsanh” yo miz Dauz Yenhmingz yawjdamh mingzleih, “haet ndoet raiz moeglanz, haemh gwn limq vagut” raiz ok Giz Yenz dungxaek seuqsang, “duj vaaeuj amqdamh, duj vahenj ronghseuq” miuzveh Lij Sanghyinj simhoz seuqsak —— Gou dwg vagut, youh cinghseuq ndeiyawj youh hamzeiq laegna, dwg gij va mizmingz youq seizcou gag angjhai baij lengj, hix dwg ciuhgeq ciuhneix yungh daeuj dakdawz gij cingsaenz maqmuengh gyaeundei.

Gou miz lai cungj lai yiengh, yienghceij gak mbouj doxdoengz. Gij ganj gou mizmbangj daengjdwt sohswd, mizmbangj boemz daemq iet maj, gyaeujgoek yawj bae miz di lumj ganjfaex, gyaeujgwnz faennga lai, yienzsaek miz saekheu hix miz saekaeuj. Mbaw gou heuswdswd, yienghsiengq lumj fajfwngz iqet, miz mbaw luenz hix miz mbaw raezreg soemset, raez 4 daengz 15 lizmij, henzbien baenz nyaz baenz nyaz lumj bwnroeg miz heujgawq, mizmbangj laeng mbaw lij maj miz bwnsaeq hau. Va gou mizmbangj duj dog dingj doxhwnj hai, mizmbangj comzgyoengq hai, dujva gvangq 2 daengz 20 lizmij, saekhau、saekhenj ceiq lai, hix miz lengq cungj va ciemhciemh bienq saek, cungjloih mbouj doxdoengz.

Gou bonjsingq daegbied, naih rengx lau dumz. Souh ndaej mbwnrengx youh lau raemx cimq, raemx noix seiz rox gag maj menh “rom rengz”, caj rwed raemx cukgaeuq le, couh rox iet nye mbe mbaw dauqcungz majfwdfwd. Caeng raemx ne cix hawj gou hojsouh yaek dai, danghnaeuz laj goek gou ciengzgeiz caeng raemx, couh yinxbaenz huxndumj aeumingh, mboujdan yungzheih naeuhnduk yingjyangj didmaj, youqgaenj lai ne, mbouj daengz hwnzngoenz ndeu couh yaek nye duiq mbaw reuq, baenz go unqnyamq, satlaeng couh dai bae.

Gou daengx ndang cungj dwg bauj, yunghcawq lai raixcaix. Aeu daeuj guh gijgwn, ndaej gyaux caep, aeuq dang. Cazvagut vunzlai cix gig maij gwn, raemxgoenj cungcimq le, raemxcaz seuqsaw gamsub, ndaej doiq ndat siu huj, hoizsoeng simnyap, dwg gaiq caz ndei ngoenznaengz ciengxndang. Daengz mboengq haiva, vaduj gou cix cien cungj fanh yiengh, vava loegloeg baijok gij yiengh gyaeundei, fatok gij hom rangfwt, ciuyinx fouzsoq rwi mbaj daeuj cienz vafaenj, binaengz mwh va hai ceiq hoengh ceiq lengj, gak dieg langhbaij vagut hawj gou supyinx baenz raeuh baenz raeuh hekyouz daeuj ngonzyawj, ingjsiengq louzniemh. Daj ciuhgeq lajbit vunzdoegsaw “seiq ginhswj ndaw va”, daengz minzsug gouj nyied gouj ngonzhaenh vagut, gou ndaej gwn, ndaej ciengxndang, ndaej vunzlai maij yawj, engq dakdawz goekdaej vwnzva laegna.

Seizcou gak cungj va ciemhciemh loenq lo, dandan gag gou gawq miz yienghsiengq cien cungj fanh yiengh, youh miz rengzmingh hoenghhwd, youq seizcou angjhai gij gyaeundei bonjfaenh gag miz, hawj seizcou baengh gou engqgya mwnhoengh.

(Bungz Yenjsih raiz

Lij Siulingz hoiz)

编辑：实习生陆彤复审：黄慧华终审：蒙树起