Gienh Saeh Moq Ndeu - 广西民族报网

Gienh Saeh Moq Ndeu

来源：

发布时间：2026-07-07

Vei, miz gienh saeh moq ndeu gangj hawj mwngz nyi, bouxdaeuz yihyen daeuj ranz gou soengq laex lo.

Ngoenzneix banringz, aen heiqci hau ndeu hai daengz bakdou ranz gou dingz youq lo, gou caeuq daxboh daxmeh geizheih raixcaix. Seizneix, song boux vunz youq gwnz ci byaij roengzdaeuj, boux byaij youq dangqnaj maekdaeuz gig sang, daep fouq gingqda, riuj aen daeh naekgywggywg ndeu, naj riunyumnyum. Daxmeh da soem, baez raen vunz couh nyinh ok lo: “Neix mbouj dwg yihyen Liu yencangj ha?”Daxboh hix naeuz:“Dwg lo, dwg lo, dwg Liu yencangj daeuj lo.” Boux vunz sang haenx ciep vah daxboh naeuz:“Gou dwg daeuj yawj Couh mehbaj.”“Yencangj daeuj yawj daxbuz gou lo.” Gou angq dwk saetdiuq buet daengz ndaw ranz, bauq hawj daxbuz rox.

Laxlawz, daxbuz bi’gvaq ndwen- lab dungx in haenq, daengz yihyen baez cazyawj, canghyw naeuz gij bingh daxbuz gig noix raen, yihyen gig yawjnaek, naeuz yaek doengh soujsuz cij ndaej, caemhcaiq soujsuz youz yen- cangj caenfwngz guh. Daxboh dingq ranznden naeuz, mwhneix guh souj- suz deng soengq ngaenz hawj boux canghyw, mbouj soengq, canghyw couh mbouj yungh- sim bae guh soujsuz. Daxboh couh ciq bouxwnq di ngaenz soengq hawj Liu yencangj, byawz rox yencangj mbouj sou, cangjngangz doiq ngaenz dauq……

“Couh mehbaj，gou daeuj yawj mwngz lo!” Vah yencangj hawj gou roxnyinh gvaqdaeuj. “Mehbaj，gij bingh mwngz youq aen yihyen raeuz dwg boux daih’it, soujsuz guh baenz ndei caen hawj dou siengj mbouj daengz, baez soujsuz neix hawj yihyen raeuz rom ndaej gingniemh lo. Gou ngoenzneix daeuj, it dwg daeuj yawj ndangdaej mwngz banneix baenzlawz yiengh, ngeih dwg daiq di doxgaiq he hawj mwngz bouj ndang.”Yencangj doq gangj doq youq ndaw daeh dawz haujlai doxgaiq bouj ndang okdaeuj, baij youq gwnzcongz rim caez. Caiq yawj daxbuz gou, makda cungj nding lo, gikdoengh dwk naeuz: “Neix, neix, seizneix hawj dou baenzlawz gyo- mbaiq sou ne?”

Gaxgonq cungj dwg bouxbingh soengq laex hawj canghyw, seizneix dauqfanj dwg canghyw soengq laex hawj bouxbingh, mwngz naeuz gienh saeh neix dwg mbouj dwg saeh moq?

(Couh Yi raiz / Vangz Ciuhgiz hoiz)

编辑：实习生陆彤复审：黄慧华终审：蒙树起