Mehlaeng Gou - 广西民族报网

Mehlaeng Gou

来源：广西民族报网

发布时间：2026-07-07

Gou lij iq couh mboujmiz meh. Mbouj geijlai nanz, daxboh couh daiq boux mehmbwk he dauq, daxboh vix bae coh mehmbwk haenx naeuz: “Hih a, vaiq heuh daxmeh.” Gou yawj mehmbwk haenx da he, couh byaij deuz lo. Mehmbwk haenx heuh Cinz Veij, dwg boux youq caizcwnggiz guhhong ndeu. Daj ngoenzhaenx hwnj, gou yaep mbouj seiz caeuq de doxdingj. Miz ngoenz ndeu, gou caeuq boux doengzhag wnq doxceng, baez gwn haeuxngaiz sat, gou couh bae heuh geij boux doengzhag, dajsuenq bae sonson boux doengzhag haenx baez he. Ngeix mbouj daengz, fwt bungzdaengz daxmeh gou, mbouj dwg, wnggai dwg mehlaeng gou. De doiq gou naeuz: “Hih a, yaek bae gizlawz?” Gou mbouj angq dwk naeuz: “Mbouj yungh mwngz guenj!” De laengz gou, naeuz: “Gou mbouj guenj, byawz guenj mwngz, mwngz dwg lwg gou!” Gou naeuz: “Gou mbouj dwg mwngz seng!” Gangj liux, gou couh buet lo, gvaqlaeng boux doengzhag youq doeklaeng haenx lwnh gou nyi,mehlaeng daej lo. Gou naeuz: “Doenghoz.”

Miz ngoenz ndeu, gou banhaemh ma ranz, gou nyoengx dou geij baez, dou gven dwk. Gij beizheiq gou miz di lumj lwgsai, couh daj conghcueng ndonj haeujbae, ninz lo. Haetlaeng, mehlaeng baez hwnqcongz, couh daeuj daengz bien congz gou, gizsaed gou caeux couh ndiu lo. Gou daegdaengq dik fan denz, de sikhaek beng fan denz hoemq daengz gwnz ndang gou. Gou naemj, yienghneix guh lij mbouj dwg vihliux yaeuh vunz, cungj dwg gyaj lai, gou youh ok rengz dik fandenz baez moq, fandenz gaenq miz dingz he mbouj youq gwnz ndang gou. Seizneix, mehlaeng lumj yawj ok gou dwg guh gyaj nei, hat naeuz: “Mwngz gaej laihnaeuz gou mbouj gamj moeb vunz!” Gou baez gungj hwet naengh hwnjdaeuj, hemq naeuz“gou hix mbouj dwg seizbienh hawj vunz haephangz” couh bae hagdangz lo. Gou dauqma le, raen de lij doek raemxda ne! Hoeng gou mbouj cuengq youq ndaw sim, aenvih gou roxnyinh yienghneix dwg de doenghoz.

Saedceij lumj raemx lae, baez yaepda couh gvaqbae geij ndwen lo, de youq ndaw uk gou lijdwg yienghde vaih. Hoeng doeklaeng miz gienh saeh ndeu, hawj gou yawj de hwnjda lo. Miz baez ndeu, aenvih gij cozyez gou lijcaengz guh liux. Mehlaeng daeuj ciep gou lo, de raen gij cozyez gou caengz guh liux, couh baez diuz daez baez diuz daez gangj hawj gou dingq, cigdaengz gou rox guh bae. Sawqmwh, de ndang baez unq, gwnz gyaeuj ok hanhheu, gou raen le, couh heuh lauxsae, lauxsae fuz mehlaeng naengh daengz gwnz daengq, gou couh bae dwk dienhvah.

Yaep he, ci’gouqhoh daeuj lo, mwh vunz ram mehlaeng hwnj ci, de lij naeuz: “Dungz Hih dwg dahlwg gou, gou yaek ciep de ma ranz!” Seizneix, gou naemj heuh sing “meh” ndeu, hoeng aen bak gou lumj deng gijmaz saek dwk nei, gangj mbouj ok saek coenz vah. Youq mwh aen ci- gouqhoh haenx yaek gven dou, gou coemj gvaqbae, daih sing hemq: “Meh, gou gaen mwngz ma ranz, gou caiq mbouj guhyak dwk mwngz lo!” Seizneix, daj ndaw da daxmeh, lae ok song coij raemxda.

(Dungz Hih raiz / Yiz Ciz hoiz)

编辑：实习生陆彤复审：黄慧华终审：蒙树起