Bouxhaici Bae Gizlawz Lo? - 广西民族报网

Bouxhaici Bae Gizlawz Lo?

来源：广西民族报网

发布时间：2026-07-07

Deihdiet samhauhsienq daeuj lo, gou yien fwngz goengda yamqyet hwnj ci. Ngamq naengh onj, gou couh roxnyinh miz di moengx, aenvih gou fatyienh dou dwg naengh youq aen cisieng ceiq dangqnaj haenx, baez- naengz aen diegnaengh neix, cungj dwg deng doxgek, dwg funghhaici bouxhaici haenx. Seizneix, dou naengh youq diegnaengh bouxhaici bae lo! Yienghneix bouxhaici naengh gizlawz bae ni? Bouxhaici bae gizlawz lo?

Aen daeng hung liedci rongh- sagsag, cik dwk baihnaj ronghgywg. Mwh gou doeng ngeix sae naemj, aenci hai bae lo. Gij gingjsaek baihnaj ci, gak cungj doedmbot, sezbei gwnz- deih、fajciengz song henz deihgoengq, riengjretret coh dou “coemj” gvaq- daeuj. Aenci bonghfofo at gvaqdaeuj, hawj gou miz di simvueng bae.

“Goengda, aen ci neix baenzlawz mboujmiz bouxhaici? Aenci hai ndaej baenzlai riengj, gou roxnyinh lau- ndiemndiem bw.”

Goengda naeuz: “Dwg ha, caen roxnyinh miz di dwglau.”

Song goenglan dou cingq lwnh- sebseb, coenz vah ndeu cienz haeuj rwz daeuj: “Gou couhdwg bouxhaici ya!”

Gou caeuq goengda nyeux gyaeuj baez yawj, boux daxau ndeu ndwn youq gizhaenx. Daxau mbauqndei rengzrwd, simdingh ndwncingq, ndaw fwngz de gaem yiengh doxgaiq ndeu, lumj song aen doxdoiq gangjvah nei.

“Mwngz dwg bouxhaici?” Gou yawj de, mizdi ngeizvaeg. Daxau lumjbaenz mbouj haengj gangjvah, caenh ngaekgyaeuj digdig.

“Mwngz dwg aeu aen doxgaiq ndaw fwngz mwngz gaemhanh aenci laha?” Gou fwngz vix “aendoiqgangj” ndaw fwngz daxau.

Daxau mbouj gangjvah, caenh dwg ngaekgyaeuj coh gou. Dou gig vaiq couh daengz camh lo. Roengz ci le, gou doiq goengda naeuz: “Bouxhaici neix naj saepsadsad, cungj mbouj caeuq dou gangjvah.”

Goengda naeuz: “Vunz cingq guhhong, baenzlawz ndaej seizbienh caeuq bouxhek gangjvah ni?”

Laxlawz yienghneix, mboujgvaq, bouxhaici gwnz ci mbouj yungh naengh ndaw funghhaici hai ci, lij caen dwg saensien raixcaix. Mbouj rox daengz ngoenzlawz lienz boux daxau ndwn neix hix yawj mbouj raen loni?

(Sinj Yinhanz raiz

Yinj Fuzgen hoiz)

编辑：实习生陆彤复审：黄慧华终审：蒙树起