Guhhong Guh Baenz Siengjmuengh Raemxhanh Rwed Daeuj Vuenyungz

来源：广西民族报网

发布时间：2026-07-07

Daj“cin ndaem naed ceh ndeu, cou sou fanh naed haeux”daengz“haetromh bae gvak rum, haemhlaep gwed gvak dauq”, gij dwgrengz guhhong、gij angqyangz souhaeuj、gij mizyinx guhhong, youq guek raeuz haj cien bi ronghsag vwnzmingz ndawde yaengyaeng laedoengh. Seizdaih mboujduenh baenaj, gangj bae gangj dauq, guhhong dwg gij dauhleix mbouj bienq buek ndaej vuenyungz, cijmiz yungh raemxhanh bae rwed, nyinhcaen bae guhhong, cijndaej saedyienh siengjmuengh, gotdawz vuenyungz.

Gauh’wjgih naihsim son’gyauq naeuz:“Gij doxgaiq ceiqndei gwnzbiengz, cungjdwg guhhong, dwg fajfwngz gvaigvet coengmingz vunzraeuz cauh okdaeuj.” Vunzraeuz miz daeuj couh aeu guhhong cij ndaej ciengx mingh, daj ciuhgonq daeuj, vunzraeuz couh yungh aen uk coengmingz, rox gvaek rin caiz rin caeuq dawz rinndaek muz raeh, gaenlaeng yied daeuj yied rox naemj rox guh. Youq guhhong ndawde gak cungj saeh doxrangh doxdaep, caux ok gij vwnzmingz ndongqrongh ciuhgeq, caemhcaiq hai le diuz loh moq guhhong. Gyoengqraeuz roeb haeuj sevei, doenggvaq yienghneix yienghhaenx gwndaenj bae roxnyinh seiqgyaiq.

“Vunzraeuz cijaeu gaenx bae guh, cungj mbouj lau mboujmiz doxgaiq gwn yungh.” Guhhong dwg gij goekmboq cingsaenz caizfouq. Daj ciuhgonq daengz seizneix, “guhhong”song cih neix gaek youq ndaw riengmeg henz diuzdah ciengxmingh, nyib youq ndaw conghcim deihyaenyaen dahsau, lae youq ndaw raemx goenjfoedfoed Duhgyanghyen, hamz youq gwnz roix ruzmbin“Saenzcou” fazse ndaej baenz. Cunghvaz Minzcuz aenvih guhhong ganqciengx ok gij cingsaenz roengzrengz bae guh、gaenxguh mbouj lau dwgrengz haenx, gij cingsaenz neix youq ndaw guhhong doxswnj baenaj, ungmaj daih youh daih lwglan guek raeuz.

Ndwenngoenz bongh baefafa, gohgi fazcanj hix bongh baenaj, gyoengqvunz mbouj caiq yungh song fwngz bae guhhong, couh yienghneix, gwnz sevei miz vunz naeuz, raeuz mbouj caiq yungh caenndang bae guhhong. Gij doxgaiq cinwngz hawj vunz gwndaenj gig fuengbienh, youq ndaw ranz mbouj yungh cihgeij doenghfwngz gij saeh couh gag guh daengz, mbouj caiq aeu raeuz sai rengz；daj “DeepSeek” mizok, gij hong yungh uk haenx hix miz daimaj dingjlawh. Yienznaeuz gohgi hawj gyoengqvunz daj ndaw gij hongnaek duet ek, hix mboujdwg naeuz vunzraeuz mboujmiz yungh geijlai. Gij doenghyiengh gihgi guhbaenz haenx, mboujmiz gij heiq vunz、mboujmiz gij cingsaenz bouxcangh.

Gij yiyi guhhong youq ndaw saedguh cij roxdaengz“angq yawj haeux duh langh dem langh”, Yenz Lungzbingz yensw gungj hwet youq ndaw naz, yungh guhhong bae doidoengh nungzyez hwngfat；Cangh Bingzgvei baengh gij saenqniemh“ndawsim miz bog feiz, raeujrub sim vunzlai”, yiedcingz guh saeh, hawj gyoengq bouxhek ndawsim rimhoz; lijmiz gij vanzvei gunghyinz ranz ngamq rongh couh bae sauq gai haenx, dwg yungh gij raemxhanh gaenxguh rwed duj va seuqseksek sevei.

Guhhong mboujdanh hawj vunz gvaq ndaej ndei, engq gven daengz gij fazcanj guekgya caeuq minzcuz. Danghnaeuz bouxcoz bouxboux cungj yienghneix maz cungj mbouj guenj mbouj naemj, ndoj haeuj aen “seiqgyaiq gyaeundei” cihgeij bae, ngoenz gvaq ngoenz ndwi, aen guekgya hungloet youh baengh maz yied guh yied ak, ndwn maenh youq dangqnaj seiqgyaiq ni? Lwgmbauq iq Cauz Yenz daiqlingx aendoih, baengh aen uk coengmingz caeuq mboujduenh bae damqguh, fatyienh le gij yienghceij sizmozhih cauhdauj, vih yenzgiu cauhdauj benq dieg neix hai ok diuz lohmoq he. Mienhdoiq Meijgoz caeuq guek raeuz gaicawx baenz doxceng doxngaed, Hungzmungz Hidungj swnhgeiz cauh’ok, dwg gohgi guek raeuz boiz mbat gienz hawj de. Linghvaih, guek raeuz haenqrengz doidoengh gij hong cingcinj banggungz, sawj lajmbanj gaenh ik vunz gungzhoj duetgungz, vih daengx seiqgyaiq duetgungz guh yienghndei, hawj vunz rox.“Hozhaenz mwngz oiq byaij loh bingz, nding lumj daengngoenz hwnj baihdoeng.”Raeuz dwg bouxcoz aen seizdaih neix, aeu gamj dawz diuzrap naek seizdaih gyauhawj raeuz neix, nyinhcaen bae guhhong. Aeu mbouj lau sinhoj gaenx guhhong, cauh’ok doenghyiengh lairaeuh、cauh’ok cingsaenz caizfouq; aeu mboujduenh cauhmoq guhhong, riengz diuzroen guekcoj fukhwng, sawj cihgeij bienq ndaej yied daeuj yied ak, sawj cihgeij baenz bouxvunz miz yungh.

Guhhong, aen swz saedsaed caihcaih neix, gietcomz gij ceiqndei fazcanj baenaj Cunghvaz Minzcuz nem daengx seiqgyaiq. Mboujlwnh youq aen nienzdaih lawz, gij dijcienz guhhong mbouj ndaej yawjsiuj. Aen daihcoz raeuz, engq aeu yungh guh- hong guh baenz siengjmuengh, yungh raemxhanh rwed daeuj vuenyungz, haenqrengz buet bae coh ngoenzcog gyaeundei.

(Lij Yihangz raiz

Danz Hijvah hoiz)

编辑：实习生陆彤复审：黄慧华终审：蒙树起