Baez Daih’it Hwnj Daiz Byaujyenj

来源：广西民族报

作者：Gveigangj Si Cinzdangz Gih Mungzgungh Cin Lingzsw Siujyoz sam (3) ban Luz Suhdingz / 陆舒婷

发布时间：2024-08-28

▲Dou youq gwnz daiz diuq foux. (doz dwg boux lauxsae son raiz hawj)

　　Bineix “ciet roekit” gou raen ceiq angqyangz、vaiqvued, aenvih gou baez daih’it hwnj daiz, youq dangqnaj geij bak boux doengzhag caeuq bouxlaux byaujyenj.

　　5 nyied 31 hauh, hagdangz dou guh “ciet roekit” vwnzyi byaujyenj, gyoengq lauxsae caeuq doengzhag caez roengzrengz, aen vujdaiz nda ndaej ndei lo! Ngoenzhaenx, yienznaeuz fwndoek, hoeng dou ndaej youq aen vwnzvasiz ndaw mbanj ciuqseiz byaujyenj.

　　Cezmuz byaujyenj aen daengz aen, doengzhag ban wnq boux boux cingsaenz gvaekgvaek hwnj daiz ciengq go diuq foux, laj daiz gyoengq lauxsae doengzhag caeuq bouxlaux cungj bekfwngz goksasa, ndaw ranz vwnzvasiz sing riu sing bekfwngz doq roengz doq hwnj. Mwh bouxcujciz heuh daengz“cingj aen doihdiuqfoux sam (1) ban hwnj daiz byaujyenj”, gou song fwngz doxnu, roengzrengz sup gaemz heiq ndeu, doq byaij baenaj, doq cangguh simdingh、miz saenqsim dwk byaij coh cungqgyang daizheiq. Gou baez daengz cingqgyang ndwn ndei, gyoengq doengzdoih iq hix sikhaek ra ndei diegndwn swhgeij baij yiengh ndei. Gou raen gyoengq doengzhag cungj ndwn ndei le, couh vad fwngz coh yinhyangjswh, yinhyoz sikhaek couh yiengj hwnjdaeuj. “Gou dwg vunz Cungguek, gou gyaez guekcoj raeuz……”Dingq daengz yinhyoz le, gou sikhaek fwngz foux ndang foux diuq hwnjdaeuj. Hix mbouj rox yinhyoz miz geijlai faencung, fanjcingq gou diuq ndaej daengx ndang cungj dwg hanh lo, yinhyoz dingz le, gyoengq doengzdoih iq caeuq gou hix ngamq baij ndei aen yiengh dingz, baihlaj daizheiq gyoengq soujgih “gaca gaca” ingj mbouj dingz.

　　Mwh dou gungj hwet docih daihgya, gyoengq bouxlaux caeuq doengzhag hix bekfwngz mbouj dingz. Gou byaij roengz daizheiq le, dingqnyi gyoengq doengzhag gangjlwnh foenfoen, gyoengqde naeuz:“Aen ban neix diuq foux diuq ndaej ndeiyawj lai lo, miz eiqsei, youh cingjcaez, dungcoz hix caux moq ndeiyawj.” Dingq vunzlai baenzneix haenh, gou nyinhnaeuz yienznaeuz baizlienh gig sinhoj, hoeng seizneix hix dij ndaej lo.

　　Baez daih’it hwnj daiz byaujyenj, gou caenhrengz bae guh, ndaej daihgya haenh, gou roxnyinh angqyangz vaiqlag!

　　第一次上台表演

　　今年“六一”国际儿童节我感到最开心、快乐，因为我第一次走上舞台，在几百个同学与家长面前表演。

　　5月31日，我们学校开展了一年一度的“六一”儿童节文艺汇演，在老师和同学们的努力下，汇演舞台布置好啦！那天虽然下雨，但是我们的文艺汇演在村里的文化室按时进行表演。

　　节目表演一个接着一个，各个班级的同学精神抖擞地上台唱歌跳舞，台下的同学和老师、家长不由自主地鼓掌，文化室里掌声笑声此起彼伏。当主持人叫到“请三（1）班舞蹈队上台表演”，我摩擦着双手，做了一次深呼吸，一边走在前面，一边假装镇定地、自信地向舞台中间走去。我站好中间的位置，小伙伴们也马上找到自己的位置摆好造型。我看到同学们都做好了准备，就向音响师挥挥手，接着音乐响起。“我是中国人，我爱自己的祖国……”听到美妙的音乐，我马上挥着小手，身体有节奏地舞动起来。也不知道这首音乐是多长时间，反正我跳得满身是汗，音乐停了我和小伙伴们也踩着尾音摆好造型，台下的手机镜头“咔嚓咔嚓”拍个不停。

　　当我们鞠躬谢幕时，台下的老师和同学、家长们也给我们送上了阵阵掌声。我走下舞台，听到大家议论纷纷，他们说：“这个班级排练的舞蹈真好看，而且很有意义，又很整齐，动作也很有创意。”在大家的议论声中，我认为虽然我们排练非常辛苦，但是值得了。

　　第一次走上表演的舞台，我用了百分之百的努力，得到大家的肯定，我感到很快乐！

　　（lauxsae son raiz： Luz Dungh- ginz / 指导老师：陆冬群）

编辑：黄誉琦复审：黄慧华终审：蒙树起